1 Riqui, yalishca jipa ñuca, Nefi caparircani ashtacata Apunchijta ñuca Dios, ñuca huauquicunapaj fiñaricunamanda.

2 Shinapash riqui, ñucahuan paicunapaj fiñaricuna mirarirca, ñucata huañuchingapa munarca.

3 Ari, paicuna ñucata huasharimashpa, ninajurca. Ñucanchipa jipa huauqui yuyan ñucanchipa ñaupaj cangapa; ñucanchica ashtaca shinlli llaquicunata charishcanchi paimanda; chaimanda, cunan paita huañuchishunchi, ñucanchi ama ashtahuan llaquichi tucungapa paipaj nishcacunamanda. Riqui, ñucanchi na munanchi pai ñucanchipa ñaupaj cachun; chaica ñucanchipa can, rucu huauquicuna, cai llactacunapa ñaupaj cana canchi.

4 Cunan ñuca na quilcanichu cai jirru fangacunapi tucuilla nishcacunata paicuna ñucata huasharimashcacunata. Caitalla nini paicuna ñuca causaita quichungapa munarca.

5 Yalishca jipa Apunchij villahuarca, ñuca, Nefi paicunamanda anchurircani, rircanipash jichushca pambaman, tucuilla ñucahuan ringapaj munajcunahuan.

6 Chaimanda, yalishca jipa ñuca, Nefi ñuca ailluta, Zoram paipaj aillucunandi, Sam, ñuca rucu huauqui paipaj aillucunandi, Jacob, José, ñuca jipa huauquicuna, ñuca panicuna, tucuilla ñucahuan ringapa munajcunatapash japircani. Tucuilla ñucahuan ringapa munashcacuna crircami villachishcacunapi Diospaj achil ricuchishcacunapi; chaimanda, paicuna ñuca nishcacunata rurarca.

7 Ñucanchi facha huasicunata tucui apai ushashcatapash aparcanchi, jichushca pambapi tauca punllacunatapacha purircanchi. Tauca punllacunatapacha purishca jipa ñucanchipa facha huasicunata shayachircanchi.

8 Ñuca llactapuracuna chai pushtuta Nefi nishpa shutichichun munarca; chaimanda, ñucanchi Nefi shutihuan rijsircanchi.

9 Tucui ñucahuan cajcuna munarca paicunamandallata shutichiringapa Nefipaj llactapura.

10 Ñucanchi pactachingapa atirircanchi ricuchun saquishcacunata, catichun saquishcacuna, Apunchijpaj rurachunbacha saquishcacunatapash tucui cuzascunapi, imashna Moiséspaj catichunbacha saquishcacuna.

11 Apunchijca ñucanchihuan carca; ñucanchi ashtacatapacha ali mirarircanchi; muyucunata tarpuimanda, fucujpica ashtacata tandachircanchi. Ñucanchi viñachi callarircanchi ataju ataju, tucui laya animalcunata.

12 Ñuca, Nefi, apamushcarcani quilcashcacunata chaicunaca quilcashca bronce jirru fangacunapi; bola Nacashpa brújulatapash shamuchirca ñuca taitaman Apunchijpaj maquimanda imashami ña quilcashca carca.

13 Yalishca jipa ñucanchi ashtacata ali mirari callarircanchi, aillucuna mirarishpa catirca alpapi.

14 Ñuca, Nefi, Labánpaj espadata japircani, jipaman shinalaya tauca espadacunata rurarcani, cashna cashpa runacuna pimi can Lamanitacuna shutichirishca, ñucanchipaman macanajungapa shamushpa ñucanchita tucuchinga; ñuca yacharcani paicuna napacha ricunayachihuarca ñuca huahuacunatapash tucuilla ñucapa llactapuracuna shutichirishcatapash.

15 Ñuca yachachircani ñucapaj llactapuracunata jatun huasicunata ruranata, tucui laya caspicunahuan ruranata, hierruhuan, cobrehuan, broncehuan, acerohuan, curihuan, culquihuan juyailla mineralcunahuan chaicuna ashtacapacha tiarca.

16 Ñuca, Nefi shuj Achil huasita shayachircani; ñuca shayachircani caita Salomónpaj achil huasilaya shinapash na shayachishca carca tauca juyailla cuzascunahuan, caicuna na tiarca chai alpapi, chaimanda, Salomónpaj Achil huasitashna na rurai usharcanchichu. Shinapash imashna shayachinaca Salomónpaj achil huasishna carca; rurashcacuna juyaillapacha carca.

17 Yalishca jipa ñuca, Nefi llactapuracunata alipacha trabajadorman tigrachircani, paicunapaj maquicunahuan rurachun.

18 Yalishca jipa paicuna ñuca paicunapaj jatun mandaj cachun munarca. Shinapash ñuca, Nefi, paicuna ama jatun mandajta charichun munarcani; shinapash, ñuca paicunamanda rurarcani ima ñuca ushaipi carca.

19 Riqui, Apunchijpaj shimi nishcacuna ñuca huauquicunaman pactarca, paicunamanda parlashpa nirca, ñuca paicunapaj ñaupaj paicunapaj yachachij cagrijta. Chaimanda, ñuca paicunapaj ñaupaj paicunapaj yachachij carcani, imashna Apunchijpaj rurachunbacha saquishcacunamanda, paicuna ñuca causaita quichungapa munangacaman.

20 Chaimanda, ñucaman parlashca Apunchijpaj shimi nishcacuna pactarirca, shina nishpa: quiquinbaj nishcacunata paicuna na rurashpaca anchuchi tucunga Apunchijpaj ñaupamanda. Riqui paicuna anchuchi tucurca paipaj ñaupamanda.

21 Pai llaquicunata paicunapi urmachirca, ari shuj jatun llaqui, paicunapaj na ali ruraicunamanda. Riqui, paicuna shinlliyachirca paicunapaj shungucunata paita jarcangapa, chaimanda paicuna shuj shinlli rumishna tucushca carca; shina caimanda, paicuna yuracuna carca, ninan juyaillagucunapash sumajllacunapash, chaimanda paicunata, Apunchij Dios paicunapaj aichata yanayachirca ama ñuca llactapuracuna paicunata munachun.

22 Apunchij Diosca shina nin: Ñuca tigrachisha paicunata millanayaicuna cachun canba llactapuracunapa, paicuna na paicunapaj na ali ruraicunamanda arrepentirijpica.

23 Llaquichi tucungami maijanbash cati aillupuracuna chapurijpi paicunapa cati aillupuracunahuan; chaimanda paicuna llaquichi tucunga chai llaquihuanllata. Apunchij caita parlarca, shina tucurca.

24 Llaquichicuna paicunaman shamuimanda paicuna quilla runacuna tucurca, na casillacuna umachijcuna jichushca pambapi sacha animalcunata mascajcuna.

25 Apunchij Dios nihuarca: Paicuna llaquichinga quiquinba cati aillupuracunata, paicunata tangaj shina ñucata yuyarichun; paicuna ñucata na yarishpa, ñuca nishcacunata na rurashpa, paicuna llaquichi tucunga paicunata tucuchingacaman.

26 Yalishca jipa ñuca Nefi, Jacobta Josétapash achil ajllarcani, paicuna cachun sacerdotecuna yachachijcuna ñuca llactapuracunapaj alpapi.

27 Yalishca jipa ñucanchi causarcanchi cushillacuna.

28 Quimsa chunga huatacuna yalishpa carca ñucanchi Jerusalénmanda llujshimushca mandapacha.

29 Ñuca, Nefi, tandachishca quilcashcacunata ñuca jirru fangacunapi quilcarcani, caicunata ñuca rurashcani ñucapa aillupuracunamanda cunangaman.

30 Yalishca jipa Apunchij Dios nihuarca: shuj jirru fangacunata rurai; quilcai tauca cuzascunatapash paicunamanda maijan ñuca ñavipi alicunata alicachun quiquinba llactapuracunapa.

31 Caimanda, ñuca, Nefi, cazujpacha cangapa Apunchijpaj rurachunbacha saquishcacunata, rishpa rurarcani cai jirru fangacunata maijanbi ñuca cai cuzascunata quilcarcani.

32 Ñuca quilcarcani Dios alicachishcata. Ñuca llactapuracuna Diospaj cuzascunahuanbash alicachi tucujpica cuzascunahuanbash paicuna alicachi tucunga ñucapa quilcashcacunahuan chaicuna cai jirru fangacunapimi.

33 Ñuca llactapuracuna yachangapa munajpica ashtahuan imashna causashcata ñuca llactapuracunamanda paicuna mascanga ñucapa chaishu jirru fangacunapi.

34 Chaitallami nini chuscu chunga huatacuna ña yalishca, ñucanchi ña charishcanchi macanajuicunata pliturijcunatapash ñucanchi huauquicunahuan.