1 Cunan, Jacob, canda parlani: Quiquin ñuca callari churi jichushca pambapi ñuca jatun llaqui punllacunapi nacirishca cangui. Riqui, quiquin huahua cashpa ninan llaquicunata llaqui yalishcangui, ashtacapacha llaquirina, quiquinba huauquicuna shinlli caimanda.

2 Shina cajpipash, Jacob ñuca callari churi jichushca pambapi nacishca, quiquin rijsingui Diospaj jatun caita; pai achilyachinga quiquinba llaquicunata quiquinba ali cachun.

3 Chaimanda, quiquinba alma achilyachishca canga, ali achishca causangui quiquinba huauquihuan, Nefi; quiquinba punllacuna quiquinba Diosta servishpa tucuchingui. Chaimanda, ñuca yachani quiquin jatun causachishca cangui, quiquinba Jatun Causachijpaj ali ruraimanda; quiquin ricushca cangui tucuilla punllacuna pactamujpica pai apamushpa shamunga runacunaman jatun quishpirinata.

4 Quiquin ricushcangui canba huambra caipi paipaj punchapamba caita; chaimanda, quiquin achilyachishca cangui imashna picunata pai achil yachachinga aichapi; Espírituca paillata can, caina, cunan imaurapash na tucurinacaman. Ñanga alichishca can runa urmaimanda, jatun quishpirinaca carashca can.

5 Runacunaca ali yachachishcacuna can paicuna yachachun alita na alimanda. Catichunbacha saquishcacuna runacunaman cushca can. Catichunbacha saquishcacunamanda aichaca na alicachinllu; nacashpaca catichunbacha saquishcacunahuan runacuna anchuchi tucushca can. Ari, temporal catichunbacha saquishcacunahuanga paicuna anchuchi tucushca carca; espiritual catichunbacha saquishcacunahuan ali canamanda paicuna tucurin, llaquinayaiman tigranga na tucurinacaman.

6 Chaimanda, jatun causachina shamun Achil Mesías-huan; paica ninan juyai na llullahuan junda can.

7 Riqui, paimandallata juchamanda shuj sacrificiopi curin, catichunbacha saquishcacunamanda mañashcacunata pactachingapa, tucui picunami charin shuj faquirishca shunguta, shuj cazuj amujlla espíritu; nipimanda ashtahuangari catichunbacha saquishcacunapaj mañashcacunata pactachi ushangachu.

8 Chaimanda, imashna jatun minishtirishca cai cuzascunata yachachun cuna cai alpapi causajcunaman, paicuna yachachun na aicha tiajta Diospaj ñaupapi causai ushaj, shinapash cai canga Achil Mesíaspa ali ruraicunamanda, llaquimanda, ninan juyaimandapash, pimi paipaj causaita cun aichapi, cutin japinbash Espíritupaj ushaihuan, huañui yalichun pai apamunga huañushcacunata causachina, jataringapa callari canga.

9 Chaimanda, paimi Diospaj callari fucushca can, shina pai runacunapaj huahuacunamanda shayaringa; paipi crijcunaca quishpiringami.

10 Tucuimanda shayarishcamanda, tucui runacuna Diospaman shamun; chaimanda, paicuna paipaj ñaupapi canga, ricushpa chasquichishca cangapa na llullahuan achilhuanbash imacunami paipi can. Chaimanda, catichunbacha saquishcacunamanda mañashcacunaca imatami Achil cushca can, ima castigota ricuchinatapash churangapa, chai castigo ricuchishca canaca cushi canapa jarcaipimi can imami ricuchishca, pactachingapa shujpa juchacunamanda huañunapa mañashcacunata—

11 Caica minishtirishca can, jarcai tiachun tucui cuzascunapa. Na shina cajpica, ñuca callari churi jichushca pambapi nacirishcaca, ali rurana ama yalichun apamushca canmanllu, na ali ruranapash, achilpash llaquinayaipash, alipash na alipash. Chaimanda, tucui cuzascuna minishtirishcamanda shuj tandanajushca canman carca; chaimanda, shujlla tandanajushca cashpaca huañushcashna cana carca, causaitapash huañuitapash na charishpa, ismuna na ismuna, cushillacai llaquicai, sentina na sentina.

12 Chaimanda, cai minishtirishca canacarca nacashpaca shuj yanga cuzas rurashca canman carca; chaimanda imapa munana rurashca canapash illa canman carca. Chaimanda, caica Diospaj jatun yachai tucuchina minishtishca canman carca paipaj mana tucurina munaicunapash, ushaipash, shujta llaquinapash, Diospaj alicaipash.

13 Canguna catichunbacha saquishcacuna na tianllu nishpaca, canguna ninguichipash jucha na tian. Canguna jucha na tianllu nishpaca, ninguichipashmi ali rurana na tianllu. Ali rurana na tiashpaca cushilla canapash na tian. Ali rurana cushilla canapash na tiashpaca castigopash llaquicaipash na tiangachu. Cai cuzascuna na tiashpaca Diospash na tianga. Dios na tiashpaca ñucanchipash na tianchiman, alpapash na tianmanllu; na tianmanllu carca cuzascunapaj rurashca; imata rurangapa nacashpa chaipi rurangapa; chaimanda, tucui cuzascuna chingarishca canman carca.

14 Cunan, ñuca churicuna, cangunaman parlani cai cuzascunata cangunapa ali cachun yachajuchunbash; shuj Dios tianmi, pai tucui cuzascunata rurashca, ishcandi jahua pachacuna alpatapash, tucui cuzascunata imacunami tian, ishcandi cuzascuna rurangapa cuzascuna rurashcacachunbash.

15 Rurangapa paipaj mana tucurina munaicunata runacunapa mañashcata, pai ñucanchi callari taitacunata rurashca jipa, pambapi causaj animalcunata, jahuata rij alas-huan animalcunata; tucuripipash, tucui cuzascuna rurashca carca, cai minishtirishca cana carca, tiana shuj jarcai; na saquishca fucushca causana quirupa jarcai; shujca mishqui, chaishuca na mishqui cashpa.

16 Chaimanda, Apunchij Diosca runacunaman curca paicunamandallata imatapash rurachun. Chaimanda, runacuna na imatapash paimandallata rurangachu pai shujhuan nacashpa chaishuhuan munachishpa.

17 Ñuca, Lehi, cai cuzascunata liishca caimanda, minishtini yangapa shuj Diospaj ángel, jahua pachamanda urmamurca; imashna quilcashca can, chaimanda, shuj ayaman tigrarca, Diospaj ñaupapi na alita mascaimanda.

18 Pai jahua pachamanda urmaimanda, llaqui caiman tigrarca mana tucurinacaman, pai mascanbash tucui runacuna llaqui cachun. Chaimanda, pai Evata nirca, ari, punda culebra, pimi aya can, pimi tucui llullacunapa taita can, chaimanda pai nirca: Na saquishca fucushcata micui, canga na huañunguichu, ashtahuangari Dios laya cangui, alita na alita yachashpa.

19 Adán Evapash na saquishca fucushcata micushca jipa paicuna Edén jardínmanda calpachi tucurca, alpata trabajangapa.

20 Paicuna huahuacunata charirca; ari, tucui alpapaj aillutapash.

21 Runacunapaj huahuacunapaj punllacuna mirashca carca, Diospaj munashcashna, paicuna aichapi cashpallata arrepentirina; chaimanda, paicuna caica tigran shuj ruraj na ruraj ricuna canaman, paicunapaj punlla mirashca can, rurachunbacha saquishcacunahuan imacunatami Apunchij Dios runacunapaj huahuacunaman curca. Paica rurachunbacha saquishcacunataca curca tucui runacuna arrepentirichun; pai ricuchirca tucui runacunapaj huahuacunaman paicunaca chingashca cajta, paicunapaj taitacunapaj na alita ruraimanda.

22 Cunan, riqui, Adán na alita na rurajpica pai na urmanmanllu carca, ashtahuangari paica Edén jardínpi causanmanlla carca. Tucui cuzascuna imacuna rurashcacuna carca shinallata canapi causanmanlla carca imashna rurashcashna; causanmanlla carca mana tucurinacaman, imami na tucurita charin.

23 Paicuna huahuacunata na charinman carca; chaimanda paicuna shuj inocente caipi causanman carca, cushijuita na charishpa, llaquita na yachaimanda, alita na rurashpa, paicuna juchata na yachaimanda.

24 Ashtahuangari riqui, tucui cuzascuna rurashca can paipaj jatun yachaipi pimi tucui cuzascunata yachan.

25 Adán urmarca runacuna tiachun; runacuna tian, paicuna cushijuita charichun.

26 Mesíasca shamunga tucuilla punllacuna pactamujpica, runacunapaj huahuacunata jatun causachingapa urmanamanda. Paicunaca urmanamanda causachishca caimanda pipash na ima nij illacuna tucushca na tucurinacaman, yachashpa alita na alimanda; paicunamandallata rurangapa na paicunapapi rurashca cachun, na cashpa catichunbacha saquishcacunamanda castigo caimanda jatun tucuri punllapi, rurachunbacha saquishcacunamanda imata Dios cushca can.

27 Chaimanda, runacuna aichapi libre can; tucui cuzascuna cushcacuna can paicunapa minishtirishcacuna caimanda. Paicuna libre can ajllangapaj libertadta mana tucurina causaitapash, jatun tucui runacunapaj Shayarijmanda, nacashpapash ajllana huatai tucushcashnata huañuita ayapaj huatai tucushcashna ushaimanda; pai mascanmi tucui runacuna paishnalla llaquinayaicuna cachun.

28 Cunan, ñuca churicuna, Ñuca munani canguna jatun Shayarijta ricuriachun, paipaj jatun rurachunbacha saquishcacunata cazuchun; paipaj shimicunaman fielcuna caichi, na tucurina causaita ajllaichi, paipaj Achil Espíritu munaihuan;

29 Na tucurina huañuita ama ajllaichi, aichapaj munaihuan na ali rurai chaipi cajpash, chaitaca cun ayapaj espírituman ushaita huatai tucungapa, ucu pachaman apangapa, pai reinangapa paipalla reinopi.

30 Ñuca parlashcani cai huaquin shimicunata tucui cangunaman, ñuca churicuna, ñucapa ruran na ruran ricuna tucuri punllacunapi; ñuca ali pushtuta ajllashcani, achil villachijpa shimi nishcashna. Ñuca na cutishuj munaita na charinichu cangunapaj almacunapa mana tucurina alicaitalla. Shinacapashcachun.