1 Cunan quiquinman parlani, José, ñuca tucuri churi. Quiquin nacircangui ñuca llaqui yalicunapi jichushca pambapi; ari, ñuca jatunbacha llaquirina punllacunapi canba mama quiquinda nacirca.

2 Apunchij quiquinmanbash cai pambata achilyachishca cachun, caica shuj juyaillapacha pamba can, quiquinba chasquina cati aillucunapapash chasquina quiquinba huauquicunahuan, na tucurinacaman ali cachun, shina Israelpaj Achilpaj rurachunbacha saquishcacunata alichijpica.

3 Cunan, José, ñuca cati churi, pitami ñuca llaqui yalicunamanda jichushca pambamanda apamushcani, quiquinda Apunchij na tucurinacaman achilyachipachun, quiquinba cati aillucunaca na tucuchitapacha tucuchishca cangachu.

4 Riqui, quiquinga ñuca lomocunamanda mirai cangui; Ñuca canimi Josépaj shuj cati aillu pimi Egiptoman huatai tucushcashna apai tucushca carca. Jatun carca Apunchijpaj conveniocuna imata pai rurarca Joséman.

5 Chaimanda, José ciertopacha ricurca ñucanchi punllata. Paica Apunchijmanda shuj ninapachata chasquirca, lomocunapaj miraitaca Apunchij Dios jatarichinga shuj ali rurana malquita Israelpaj huasiman; na Mesíasta, ashtahuangari shuj malqui chaica chalchishca canga, shina cajpipash, Apunchijpaj conveniocunapi yarishca canga Mesíasca paicunaman ricurimushca canga tucuri punllacunapi, ushai espírituhuan, yanallamanda michaman llujchingapa—ari, pacashca yanallamanda huatai tucushcashnamanda libertadman.

6 Joséca ciertopacha testificarca, nishpa: Apunchij ñuca Dios shuj videnteta jatarichinga, pimi shuj ajllashca ñuca lomocunamanda mirai.

7 Ari, José ciertopacha nirca: Apunchijca shina nin ñucata: Shuj ajllashca videnteta ñuca jatarichisha quiquinba lomocunapaj miraimanda; pai ninandapacha juyai tucushca canga quiquinba lomocunapaj miraicunahuan. Paiman ñuca cusha rurachunbacha saquishcata pai rurachun shuj ruranata quiquinba lomocunapaj miraicunapa, paipaj huauquicuna, caica jatun valishca canga paicunapa, apamungapapash paicunaman yachaj chayachun conveniocunata imata ñuca rurashcani quiquinba taitacunahuan.

8 Ñuca cusha shuj rurachunbacha saquishcata pai cutishuj ruranata ama rurachun, ashtahuangari ñuca paiman mandashcata ruranata. Paica jatun canga ñuca ñavicunapi; pai ruranga ñuca ruranata.

9 Pai jatun canga Moisés laya, pimanda nircani ñuca jatarichisha cangunaman, ñuca llactapuracunata cacharichun, Oh Israelpaj huasi.

10 Moisésta jatarichisha, cacharichichun quiquinba llactapuracunata Egipto llactamanda.

11 Ashtahuangari shuj videnteta jatarichisha quiquinba lomocunamanda miraita; paiman ushaita cusha ñuca shimicunata apamuchun quiquinba lomocunapaj cati aillucunaman—na ñuca shimitalla apamuchun, Apunchij nin, ashtahuangari paicunata crichingapa ñuca shimita, imami ña paicunaman villashca can.

12 Chaimanda, quiquinba lomocunapaj miraica quilcanga; Judápaj lomocunapaj miraipash quilcanga; imata quilcanga quiquinba lomocunapaj mirai, shinallata imata quilcanga quiquinba lomocunapaj miraipash, shinallata imata quilcanga Judápaj lomocunamanda miraipash, ishcandi viñanga, pandachingapa llulla yachajunacunata fiñanajuicunatapash tucuchingapa, sumaj cai tiachun quiquinba lomocunapaj miraicunahuan, apangapa yachachicunaman paicunapaj taitacunapaj tucuri punllacunapi, ñucapaj conveniocunapa yachachinacunamanbash, Apunchij nin.

13 Irquimanda pai shinlli tucushca canga, chai punllapi imaura ñuca rurana tucui ñuca llactapuracunahuan callarijpi, cutinlla apamungapa, Oh Israelpaj huasi, Apunchij nin.

14 Shinami José achil villachirca, nishpa: Riqui, videntetaca Apunchijca achilyachingami; paita tucuchingapa munajcunataca pandachishcacuna canga; cai ninapachataca, Apunchijmanda chasquishcani, ñuca lomocunamanda miraicunamanda, pactachishca canga. Riqui, ñuca seguro cani cai ninapachaca pactachishca canga;

15 Paipaj shutica ñucapaj shutillata canga; paipaj taitapaj shutillata canga. Pai ñucashnalla canga; imatami Apunchij apanga paipaj maquihuan, Apunchijpaj ushaihuan ñuca llactapuracuna quishpirinaman apanga.

16 Ari, José achil villachirca: Ñuca seguro cani caicunamanda, ñuca seguro cani Moiséspaj ninapachata; Apunchijca shina nihuarca, ñuca quiquinba cati aillucunata alchishpa charisha na tucurinacaman.

17 Apunchijca shina nihuarca: Ñuca jatarichisha shuj Moisésta; ñuca paiman ushaita cusha shuj varapi; ñuca yachaita paiman quilcanapi cusha. Shina cashpapash ñuca paipaj jalluta na cacharichishachu, pai ashtacata parlachun, ñuca paita parlaipi na jatun rurashachu. Ashtahuangari quilcasha ñuca catichunbacha saquishcacunata, ñuca maquipalla dedohuan; ñuca paiman shuj parlaj runata ajllasha.

18 Apunchijca nihuarcapashmi: Ñuca jatarichisha quiquinba lomocunapaj miraita; ñuca paiman shuj parlaj runata ajllasha. Ñuca, riqui, saquisha pai quilcachun quiquinba lomocunapaj miraipa quilcanacunata, quiquinba lomocunapaj miraipa; quiquinba lomocunamanda parlaj runa caita villanga.

19 Shimicuna pai quilcashca cangami imacuna ñuca jatun yachaimanda minishtirishca cana quiquinba lomocunapa miraiman villachun. Caín canga quiquinba lomocunapaj mirai alpamanda caparishcashna; imashpa ñuca yachani paicunapaj feta.

20 Paicuna alpamanda caparin; ari, paicunapaj huauquicunapaj arrepentimientota paicunapata tauca miraicunapaj yalishca jipa. Cai yalingami paicunapaj capari llujshimunga, paicunapaj yangalla shimicunamanda.

21 Paicunapaj femanda shimicuna llujshinga ñuca shimimanda paicunapa huauquicunaman picunami quiquinba lomocunamanda mirai; paicunapaj shimicuna irqui caimanda ñuca paicunapaj feta shinlliyachisha, ñuca conveniocunata yarichun imatami ñuca quiquinba taitacunaman rurarcani.

22 Cunan, riqui, ñuca churi José, cashna layami ñuca pundamanda taita achil villachirca.

23 Chaimanda, cai conveniomanda quiquin achilyachishca cangui; quiquinba cati aillucuna na tucuchishca cangachu, paicuna quilcashcamanda shimicunata cazuimanda.

24 Jatarichisha shuj ushai charijta paicunamanda, pimi ruranga acha alita, ishcandi shimi nipi ruraipipash, Diospaj maquicunapi shuj imatalla rurana cashca canga, ninanbacha fehuan, rurangapa jatun juyailla ricurinacuna, ruranapash ima cuzami jatun can Diospaj ricuipi, yalichun apamungapa acha cutinlla apamuna Israelpaj huasiman, quiquinba huauquipaj cati aillucunamanbash.

25 Cunan, achilyachishca cangui, José. Riqui, uchilla cangui; chaimanda cazui quiquinba huauqui, Nefipaj shimicunata, quiquinhuan rurashca canga ñuca parlashca shimicunahuan. Yaringui quiquinba ña huañunalla taitapaj shimicunata. Shinacapashcachun.