1 Atan, pues matto i tiempo na anai ha sangan este siha si Jesus, ha atan ta’lo i lahyan taotao, ya ilek-ña giya siha: Atan, i tiempo-ku este hihot.

2 Hu li’e’ na mandaffe’ hamyo, na ti siña en komprende todu i palabras siha ni’ ha kumanda yu’ i Tata para bai hu sangani hamyo pa’go na tiempo.

3 Entonses, hanao para i gima’-miyu, ya en hasso todu siha i hu sangan, ya faisen i Tata, gi na’an-hu kosaki siña en komprende, yan en pripara i hinasson-miyu para agupa’, ya bai hu fatto giya hamyo ta’lo.

4 Ya pa’go bai hu hanao para i Tata, yan lokkue’ para bai hu fa’nu’i yu’ gi manmalingu na familian Israel, sa’ ti manmalingu para i Tata, sa’ ha tungo’ amanu na ha konne’ siha.

5 Pues matto i tiempo na anai kumuentos si Jesus, ha atan ta’lo i linahyan siha, ya ha li’e’ na mangakati, ya ma atan gui’ sin manchalamlam kulan para ma faisen para u lasaga yan siha.

6 Pues ilek-ña giya siha: Atan, mi endothensia yu’ nu hamyo.

7 Kao guaha giya hamyo malangu? Konne’ magi. Kao guaha giya hamyo ke’yao, pat bachet, pat kohu, pat ma’tot, pat lepra, pat ti brabu, pat mantangnga pat guaha hafa pinadesen-ñiha? Konne’ magi ya bai hu na’homlo’, sa’ mi’endothensia yu’ giya hamyo; mampos mimina’ase’ yu’.

8 Sa’ hu li’e’ na en diseha para bai hu fa’nu’i hamyo hafa bida-hu ni’ mañe’lon-miyu giya Jerusalem, sa’ hu li’e’ na i hinenggen-miyu sufisiente para bai hu na’homlo’ hamyo.

9 Pues matto i tiempo na anai kumuentos, todu i linahyan, gi un biahi, manhanao mo’na yan i malangon-ñiha yan i manmamadedesi, yan i ke’yao-ñiha, yan i bachet-ñiha, yan i tattamudon-ñiha, yan todu siha i manggai pinadesi; ya ha na’fanhomlo’ siha kada unu ni’ ma konne’ guatu giya guiya.

10 Ya todu siha, i manma na’homlo’ yan i mangabales, manekkon papa’ gi addeng-ña, ya ma adora gui’, ya i manu siña ginen i linahyan ma chiku i addeng-ña, esta ma na’o’mak i addeng-ña nu i lago’-ñiha.

11 Pues matto i tiernpo na ha kumanda na i famagu’on-ñiha u fanma konne’ mo’na.

12 Pues ma konne’ i dikike’ na famagu’on-ñiha ya ma na’fanmata’chong gi hilo’ i edda’ gi fi’on-ña, ya si Jesus tumohge gi entalo’-ñiha; ya i linahyan mafa’tinas kampo para u fanma konne’ todu guatu giya guiya.

13 Pues matto i tiempo na anai manma konne’ todu guatu, ya si Jesus tumohge gi entalo’-ñiha, ha kumanda i linahyan para u fandimu papa’ gi edda’.

14 Pues matto i tiempo na anai mandimu papa’ gi edda’, si Jesus umugong maisa, ya ilek-ña: Tata, ha estototba yu’ sa’ i taotao i gima’ Israel manmi’isao.

15 Ya anai ha sangan este siha na palabras, guiya lokkue’ dumimu papa’ gi edda’; ya atan, manaitai gi Tata, ya i tinaitai-ña ti siña ma tuge’, ya i linahyan ma testigu ni’ humungok gui’.

16 Ya gi taiguini na manera na mantestigu: I mata taya’ na ha li’e’, ni i talanga taya’ na ha hungok, mampos dangkolo yan na’manman siha taiguini i en li’e’ yan hungok si Jesus ha sangan gi Tata;

17 Ya taya’ hula’ siña kumuentos, yan taya’ siña ma tuge’ nu i taotao, yan taya’ kurason taotao siña humasso i mampos dangkolo yan na’manman siha ni’ en li’e’ yan hungok si Jesus ha sangan; yan taya’ siña humasso i minagof ni’ humatme i anten-mami anai in hingok gui’ manaitai gi Tata.

18 Pues matto i tiempo na anai si Jesus monhayan manaitai gi Tata, kumahulo’; lao sen dangkolo i minagof i linahyan esta manhinilat.

19 Pues matto i tiempo na si Jesus ha kuentusi siha, ya ha tago’ siha para u fangahulo’.

20 Ya mangahulo’ ginen i edda’, ya ilek-ña giya siha: Ma bendisi hamyo put i hinenggen-miyu. Pues pa’go atan, mampos i minagof-hu.

21 Pues anai ha sangan este siha na palabras, kumati, ya i linahyan mantestigu, ya ha konne’ i dikike’ famagu’on, unu put unu, ya ha bendisi, yan ha tayuyuti i Tata para siha.

22 Ya anai ha cho’gue este, kumati ta’lo;

23 Ya ilek-ña gi linahyan; Atan i famagu’on-miyu.

24 Ya anai ma atan ma atan hulo’ gi langet, ya ma li’e’ i langet ma baba, ya ma li’e’ anghet siha manhuyong ginen i langet ya kulan maniniriyayi nu i guafi; ya manunok ya ma uriyayi i mandikike’ siha, ya maniniriyayi nu i guafi; ya i anghet siha ma ministro giya siha.

25 Ya i linahyan ma li’e’ yan ma hungok yan ma tuge’; ya ma tungo’ na i notan-ñiha magahet sa’ todu siha lumi’e’ yan humungok, todu taotao para guiya na maisa; ya guaha siha dos mit kiñentos; ya ha konsiste lalahi, famalao’an yan famagu’on.