1 Pues matto i tiempo na konsiste gi notan-mami, ya in tingo’ na i notan-mami magahet, sa’ atan, husto na taotao i tumuge’ i nota — sa’ meggai siha na milagru ha cho’gue gi na’an Jesus; ya taya’ taotao siña ha cho’gue milagru gi na’an Jesus solu ma na’gasgas nu todu i isao-ña —

2 Ya pa’go matto i tiempo, yanggen taya’ lachi-ña este na taotao put i tiempon-mami, i trenta yan tetset añu manmaloffan esta;

3 Ya i taotao ma tutuhon umespiha i siñat ni’ ha sangan i prufeta as Samuel, i Lamanite, hunggan, para i tiempo ni’ debi di u guaha hinemhom tres dihas gi hilo’ i tano’.

4 Ya duru i taotao manduda yan manatgomento achok ha’ meggai siñat esta manma na’i siha.

5 Ya matto i tiempo gi trenta yan mina’kuattro na añu, gi primet mes, gi mina’kuattro na diha gi mes, matto un dangkolon pakyo, ni’ taya’ na ma li’e’ na klasi.

6 Yan lokkue’ dangkolon uchan; yan dangkolon hulu, esta todu ha yengyong i tano’ kulan para u ma yamak.

7 Ya meggai na lamlam, ayu i taya’ na ma li’e’ gi todu i tano’.

8 Ya kimason i si’udat Zarahemla.

9 Ya ma fondo i si’udat Moroni gi halom tasi, ya manmatmos i taotao siha.

10 Ya i tano’ ma hatsa hulo’ gi si’udat Moronihah, ya anai gaige i si’udat humuyong dangkolon sabana.

11 Ya dangkolo na minayulang gi sanhaya na tano’.

12 Lao atan, guaha mas dangkolon minayulang gi ge’lagu na tano’; sa’ atan, ma tulaika todu i tano’, ginen i pakyo yan rimulinu siha, yan i hilu yan i lamlam, yan i dangkolon linao gi tano’;

13 Ya i chalan siha manma yamak, ya meggai siha finu na chalan mambastos.

14 Ya meggai siha mandangkolo yan famosu na si’uda siha manma fondo, yan meggai mangkimason, yan meggai siha manma yengyong estaki mamoddong i gima’ siha gi tano’, ya i mañasaga guihi manma puno’, ya i lugat siha taya’ taotao yan hafa.

15 Ya guaha ha’ si’uda siha manatachu; lao i destrosu sen dangkolo, ya meggai siha manma puno’.

16 Yan guaha giya siha ni’ mangkinenne’ nu i rimulinu; yan manmalak manu taya’ taotao tumungo’, ayu ha’ i kumonne’.

17 Pues todu i hilo’ tano’ ma yamak, put i pakyo, yan i hilu, yan i lamlam, yan i linao gi tano’.

18 Yan atan, i acho’ manma utot talo’; manma yulang gi hilo’ i tano’ esta manma sodda’ manma yamak na pidasu, gi halom ka’ka’ siha, gi todu i hilo’ i tano’.

19 Pues matto i tiempo na anai pumara i hilu, yan i lamlam, yan i pakyo, yan i linao i tano’ — sa’ atan, tres oras i pakyo yan i linao; ya guaha ilek-ñiha na mas apmam na tiempo; sinembatgo, todu este siha na minayulang gi halom tres oras — pues atan, humuyong hinemhom gi hilo’ i tano’.

20 Pues matto i tiempo na sen homhom gi hilo’ i tano’, esta ayu siha i ti mamoddong siña ma siente i airen i hinemhom;

21 Ya taya’ manana, sa’ i hinemhom, ni danges, ni hachon; yan ti siña ma na’fañila’ i guafi nu i anglo’ na hayu, ya taya’ ha’ manana.

22 Ya taya’ ni manu na guaha manana, ni i guafi, ni i atdao, pat i pilan, pat i puti’on, sa’ sen dangkolo i hinemhom gi hilo’ i tano’.

23 Pues matto i tiempo na tres dihas este i taya’ manana ma li’e’; ya meggai manatanges yan mampiniti gi taotao siha; hunggan, dangkolo i inigong i taotao put i hinemhom yan i dinangkolon minayulang ni’ matto giya siha.

24 Ya gi un lugat ma hungok ma sangan, ilek-ñiha: Ai ya manmañotsot hit mohon antes di este na dangkolo yan tiripble na diha, ya siempre i mañe’lu-ta manggagaige ha’, ya ti u fangkimason gi si’udat Zarahemla.

25 Ya gi otro na lugat ma hungok mangakati, ilek-ñiha: Ai ya manmañotsot hit mohon antes di este na dangkolo yan tiripble na diha, ya ti ta puno’ yan ti ta daggao acho’ i prufeta siha, yan ti ta dulalak huyong; pues siempre i nana-ta yan i haga-ta siha, yan i famagu’on-ta manggagaige ha’, ya ti u fanma hafot gi dangkolo na si’udat Moronihah. Ya este i ginengong i taotao siha dangkolo yan tiripble.