Kapitulu 25
Gi Sigundo na Finatton Jesukristo i mambanidosu yan manmala siempre manma songge — Si Elijah siempre matto antes di ayu na dangkolo yan ti atanon na diha — Kompara yan Malachi 4.
1 Sa’ atan, i diha matto ya siempre taiguihi i sinenggen hotno; ya todu i mambanidosu, hunggan, yan i mala siha bidan-ñiñiha, siempre manma songge; ya i diha ni’ matto siempre mansinengge siha, ilek-ña i Sainan i Ostiha, ya taya’ sopbla ni hale’ pat ramas.
2 Lao giya hamyo ni’ manma’a’ñao ni’ na’an-hu, siempre i Lahen Hinusto kumahulo’ kon latto’ gi pappa-ña; ya siempre manhanao hamyo ya mandangkolo kulan tatneru.
3 Ya siempre en gatcha’ i mambaba siha; sa’ siempre siha apu gi papa’ i addeng-miyu gi diha anai para bai hu cho’gue este, ilek-ña i Sainan i Ostiha.
4 Kao en hasso i lain Moises, i setbiente-ku, ni’ hu kumanda giya guiya gi Horeb para todu Israel, nu i lai yan sentensia siha.
5 Atan, bai hu na’fatto si Elijah i prufeta antes di i finatton i dangkolo yan ti atanon na dihan i Saina;
6 Ya siempre ha bira i kurason i tata siha guatu gi famagu’on, yan i kurason i famagu’on guatu gi tatan-ñiha, sino bai hu fatto ya bai hu matdisi i tano’.