Kapitulu 23
Si Jesus ha apreba ifino’ Isaiah — Ha kumanda i taotao siha para u ma tungo’ put i prufeta siha — I fino’ Samuel i Lamanite put i risureksion ma na’daña’ gi notan-ñiha.
1 Pues pa’go, atan, hu sangani hamyo, na debi di en aligao este siha. Hunggan, un tinago’ hu na’i hamyo na en aligao este siha kon dilihente; sa’ dangkolo i fino’ Isaiah siha.
2 Sa’ magahet na ha sangan siha put i taotao-hu ni’ ginen i gima’ Israel; entonses debi lokkue’ na u kuentos gi Gentiles siha.
3 Ya todu siha ni’ ha sangan esta monhayan yan mamaila’, tanto konsiste gi palabras siha ni’ ha sangan.
4 Entonses ekungok i fino’-hu siha; tuge’ siha i hu sangani hamyo; ya konsiste gi tiempo yan i minalago’ i Tata siempre matto gi Gentiles.
5 Ya hayi umekungok i fino’-hu siha yan mañotsot yan ma takpange, guiya siempre ma satba. Aligao i prufeta siha, sa’ meggai guihi ma testigu put este siha.
6 Pues matto i tiempo na anai ha sangan este siha si Jesus ha sangani siha ta’lo, despues di ha eksplika todu i eskritura giya siha ni’ rumisibi, ilek-ña giya siha: Atan, guaha otro siha eskritura malago’ yu’ na en tige’, ya ti en titige’.
7 Pues matto i tiempo na ilek-ña gi as Nephi: CHule’ magi i nota ni’ un gogo’te.
8 Ya anai ha chule’ si Nephi i nota siha, ya ha fa’nu’i, ha atan ya ilek-ña:
9 Magahet hu sangani hamyo, hu kumanda i setbiente-ku as Samuel, i Lamanite, para u testigu entre este na taotague, na gi diha anai i Tata ha glorifika i na’an-ña giya guahu meggai siha na mañantos siempre mangahulo’ ginen i matai, ya manannok gi taotao siha, ya ma fana’gue siha. Pues ilek-ña giya siha: Na ti magahet?
10 Ya i disipulu-ña siha ma oppe gui’ ya ilek-ñiha: Hunggan, Asaina, si Samuel ha prufisiha konsiste gi fino’-mu, ya todu ma kumple.
11 Ya si Jesus ilek-ña giya siha: Hafa taimanu na ti en tige’ este papa’, na meggai na mañantos mangahulo’ ya manannok gi taotao siha ya ma fa’na’gue siha?
12 Pues matto i tiempo na si Nephi ha hasso na ti ma tuge’ este.
13 Pues matto i tiempo na si Jesus ha kumanda na u ma tuge’; entonses ma tuge’ konsiste gi tinago’-ña.
14 Pues matto i tiempo na anai si Jesus ha eksplika todu i eskritura gi un biahi, ni’ ma tuge’, ha kumanda siha para u ma fa’na’gue ayu siha i ha eksplika giya siha.