१ म, परमप्रभु तिमीहरूका परमेश्वर, तिमीहरूका कार्यहरू मूर्खतापूर्ण भए तापनि म अप्रसन्न छैन ।

२ मसँग यो शहरमा तिमीहरूका लागि, सियोनको र यो सहरका धेरै मानिसहरूका लाभका लागि खजाना छ, जुन म उपयुक्त समयमा सियोनको लाभका लागि तिमीहरूका माध्यमद्वारा सङ्कलन गर्ने छु ।

३ त्यसकारण, यो उचित छ कि तिमीहरूले यस सहरमा मानिसहरूसँग परिचित हुनु पर्छ, जसरी तिमीहरूलाई अगुवाइ गरिने छ र तिमीहरूलाई दिइने छ ।

४ अनि यो उपयुक्त समयमा हुन आउने छ कि म यो सहर तिमीहरूको हातमा सुम्पिदिने छु, ताकि तिमीहरूसँग यसमाथि अधिकार हुने छ, यतिसम्म कि तिनीहरूले तिमीहरूका गोप्य अंशहरू पत्ता लगाउने छैनन्; अनि त्यसका सुन र चाँदीको सम्पत्ति तिमीहरूको हुने छ ।

५ आफ्नो ऋणका सम्बन्धमा चिन्ता नगर, किनकि म तिमीहरूलाई तिनीहरू तिर्न शक्ति दिने छु ।

६ सियोनका सम्बन्धमा चिन्ता नगर, किनकि म उनीसँग दयालु रूपमा व्यवहार गर्ने छु ।

७ यस स्थानमा र वरपरका क्षेत्रहरूमा बसोवास गर;

८ अनि त्यो स्थानमा तिमीहरू रहनु पर्छ जहाँ मेरो चाहना छ, मुख्य रूपमा, तिमीहरूलाई मेरो आत्माको शान्ति र शक्तिद्वारा सङ्केत गरिने छ, जुन तिमीहरूमा प्रवाह हुने छ ।

९ यो स्थान तिमीहरूले भाडामा प्राप्त गर्न सक्ने छौ । अनि यस सहरका प्राचीन बासिन्दाहरू र संस्थापकहरूका सम्बन्धमा लगनशीलतापूर्वक सोधपुछ गर;

१० किनकि यस सहरमा तिमीहरूका लागि एकभन्दा धेरै खजानाहरू छन् ।

११ त्यसकारण, तिमीहरू सर्पहरूजस्तै बुद्धिमान् र तर पापरहित बन; र म सबै विषयहरू तिमीहरूको लाभका लागि आदेश दिने छु, जति चाँडो तिमीहरूले तिनीहरूलाई प्राप्त गर्न सक्षम हुने छौ । आमीन ।