१ हाम्रो मस्तिष्कबाट पर्दा हटाइयो र हाम्रो समझका आँखाहरू खोलिए ।

२ हामीले परमप्रभुलाई मञ्चको पर्खालमा उभिनुभएको देख्यौँ, हाम्रा अगाडि; र उहाँका पाउमुनि नीर जस्तै रङको शुद्ध सुनको पक्की पेटी थियो ।

३ उहाँका नयनहरू आगोको ज्वाला जस्तै थिए; उहाँको शिरको केश शुद्ध हिउँ जस्तै सेतो थियो; उहाँको मुहार सूर्यको चमक भन्दा माथि चम्किलो; अनि उहाँको वाणी अथाह पानीको आवाज जस्तै थियो, परमप्रभुको वाणीले समेत, यसो भन्नुहुँदै:

४ म पहिलो र अन्तिम हुँ; म त्यो हुँ जो जीवित छु, म नै हुँ जो मारिएको थिएँ; म पितासँग तिमीहरूको अधिवक्ता हुँ ।

५ हेर, तिमीहरूका पापहरू तिमीहरूमा क्षमा गरिएका छन्; तिमीहरू मेरा सामु शुद्ध छौ; त्यसकारण, आफ्ना शिरहरू उठाओ र आनन्दित होओ ।

६ तिमीहरूका बन्धुहरूका हृदयहरू आनन्दित होऊन् र मेरा सबै जनहरूका हृदयहरू आनन्दित होऊन्, जसले आफ्नो शक्तिले मेरो नाममा यो आलय निर्माण गरेका छन् ।

७ किनकि हेर, मैले यो आलयलाई स्वीकार गरेको छु र मेरो नाम यहाँ रहने छ; र म यस आलयमा आफ्ना जनहरूलाई कृपा गरेर आफूस्वयंलाई प्रकट गर्ने छु ।

८ हो, म मेरा सेवकहरूसामु प्रकट हुने छु र मेरो आफ्नै वाणीले उनीहरूसामु बोल्ने छु, यदि मेरा जनहरूले मेरा आज्ञाहरू पालना गर्ने छन् र यस पवित्र आलयलाई अपवित्र पार्दैनन् ।

९ हो हजारौँ र दशौँ हजारौँका हृदयहरूमा खन्याइने आशीर्वादरू र यस आलयमा मेरा सेवकहरूलाई प्रदान गरिएका अभिदानको परिणाममा धेरै आनन्दित हुने छन् ।

१० अनि यस आलयको कीर्ति अन्य भूमिहरूमा फैलिने छ; र यो आशीर्वादको सुरूवात हो जुन मेरा जनहरूका शिरमा खन्याइने छ । तसर्थ यस्तै हुने छ । आमीन ।

११ यो दर्शन बन्द भएपछि, स्वर्ग पुनः हाम्रा लागि खोलिएका थिए; र मोशा हाम्रासामु प्रकट भए र पृथ्वीको चार भागबाट इस्राएलको एकीकरणका साँचाहरू र उत्तरको भूमिबाट दश कुलहरूको अगुवाइ हामीलाई सुम्पिए ।

१२ यस पछि, एलियास प्रकट भए र अब्राहामको सुसमाचारको युग सुम्पिए, यसो भन्दै कि हामी र हाम्रा सन्ततिहरूद्वारा हामी पछिका सबै सन्ततिहरूले आशीर्वाद प्राप्त गर्ने छन् ।

१३ यो दर्शन बन्द भएपछि, अर्को महान् र महिमित दर्शन हामीमाथि प्रकट भयो; किनकि मृत्युको स्वाद अनुभव नगरी स्वर्गमा लगिएका, एलिया अगमवक्ताले, हाम्रासामु उभिए र भने:

१४ हेर, समय पूर्ण रूपमा आइपुगेको छ, जसका सम्बन्धमा मलाकीको मुखबाट भनिएको थियो—परमप्रभुको विशाल र भयङ्कर दिन आउनुपूर्व उनी [एलिया]लाई पठाइनु पर्छ भनी प्रमाणित गर्दै—

१५ पिताहरूको हृदय छोराछोरीमा र छोराछोरीहरूलाई पितामा फर्काउन, अन्यथा सारा पृथ्वीलाई श्रापले प्रहार गरिने छ—

१६ त्यसकारण, यस युगका साँचाहरू तिमीहरूका हातहरूमा सुम्पिएका छन्; र यसद्वारा तिमीहरूले जानकारी प्राप्त गर्ने छौ कि परमप्रभुको विशाल र भयङ्कर दिन नजिकै छ, ढोकाहरूमा समेत ।