“Ujasiri kutoka kwa Roho Mtakatifu,” Rafiki, Julai 2023, 29.
Imeandikwa na Wewe
Ujasiri kutoka kwa Roho Mtakatifu
Kielelezo na Toby Newsome
Nilipokuwa mdogo, madaktari waliwaambia wazazi wangu kwamba nina tatizo la kupata ugumu wa kuzungumza katika baadhi ya matukio. Hiyo ni hali ya wasiwasi ambayo hufanya iwe vigumu kuzungumza na wengine. Ningeweza tu kuzungumza na wanafamilia wangu wa karibu.
Nilihisi wasiwasi wakati wote, hasa ikiwa mtu alizungumza nami. Kusali mara zote kulinifanya nihisi vizuri na kulinituliza. Nilikutana pia na mshauri shuleni kwa ajili ya msaada. Lakini nilihisi kana kwamba sikuwa nikipata nafuu yoyote. Nilikaribia kukata tamaa, lakini niliendelea kuwa na imani.
Siku yangu ya kuzaliwa ya kufikisha miaka minane ilikuwa ikikaribia. Wazazi wangu walinipa changamoto ya kusoma Kitabu cha Mormoni na kusali ili inisaidie kuamua ikiwa nilitaka kubatizwa. Kila usiku nilisali kujua ikiwa nilipaswa kubatizwa. Mara zote nilipata jibu linalofanana—hisia nzuri za utulivu katika moyo wangu. Nilifahamu Roho Mtakatifu alikuwa akiniambia kwamba ubatizo ni uchaguzi sahihi.
Wakati nilipopewa kipawa cha Roho Mtakatifu baada ya ubatizo wangu, nilisikia maneno ya tumaini, upendo na ya kutia moyo. Nilifahamu kwamba Roho Mtakatifu atanifariji na kunipa ujasiri.
Niliamua kujaribu kuzungumza na rafiki yangu mpendwa, Charlie. Nilijaribu wiki nzima, lakini ilikuwa ngumu sana. Lakini siku moja mimi na Charlie tulikuwa peke yetu kwenye bustani ya shule. Nilisema sala ya kimya kimya akilini mwangu. Baba wa Mbinguni, tafadhali nisaidie niseme angalau neno moja.
Kisha nilifungua kinywa changu na kusema, “Habari, Charlie!” Hakika alistaajabu. Nilikuwa na furaha sana!
Baada ya siku hiyo, ilikuwa rahisi kukamilisha malengo mengi zaidi. Punde tu nilikuwa nikizungumza na karibia kila mtu! Ninashukuru Roho Mtakatifu alinipa ujasiri wa kuzungumza na Charlie.