ການກາຍເປັນໄພ່ພົນຍຸກສຸດທ້າຍທີ່ເປັນຕົວຢ່າງ
ຂ້າພະເຈົ້າຂໍມອບຄວາມຮັກ ແລະ ພອນໃຫ້ແກ່ທ່ານ, ວ່າທ່ານຈະຊື່ນຊົມຢູ່ກັບພຣະຄຳຂອງພຣະຜູ້ເປັນເຈົ້າ ແລະ ນຳໃຊ້ຄຳສອນຂອງພຣະອົງ ໃນຊີວິດສ່ວນຕົວຂອງທ່ານ.
ຊ່າງເປັນກອງປະຊຸມໃຫຍ່ທີ່ໃຫ້ຄຳດົນໃຈ ແລະ ແຫ່ງປະຫວັດສາດແທ້ໆ. ພວກເຮົາເບິ່ງອະນາຄົດດ້ວຍຄວາມກະຕືລືລົ້ນ. ພວກເຮົາໄດ້ຖືກຊຸກຍູ້ໃຫ້ ເຮັດ ດີກວ່າເກົ່າ ແລະ ໃຫ້ ເປັນ ຄົນດີກວ່າເກົ່າ. ຂ່າວສານທີ່ໜ້າອັດສະຈັນໃຈ ກໍໄດ້ຖືກກ່າວ ຈາກແທ່ນປາໄສ ໂດຍເຈົ້າໜ້າທີ່ຊັ້ນຜູ້ໃຫຍ່ ແລະ ເຈົ້າໜ້າທີ່ສາມັນ ແລະ ສຽງເພງກໍມ່ວນອອນຊອນຫລາຍ! ຂ້າພະເຈົ້າຂໍຊຸກຍູ້ທ່ານ ໃຫ້ສຶກສາຂ່າວສານເຫລົ່ານີ້, ເລີ່ມຕົ້ນຈາກອາທິດນີ້ໄປ.1 ຂ່າວສານດັ່ງກ່າວສະແດງໃຫ້ເຫັນພຣະດຳລັດ ແລະ ພຣະປະສົງຂອງພຣະຜູ້ເປັນເຈົ້າ ສຳລັບຜູ້ຄົນຂອງພຣະອົງ, ໃນທຸກວັນນີ້.
ຫລັກສູດກ່ຽວກັບການເຮັດໃຫ້ບ້ານເຮືອນເປັນສູນກາງ, ໂດຍມີສາດສະໜາຈັກສະໜັບສະໜູນ ມີສັກກະຍະພາບ ທີ່ຈະປ່ອຍພະລັງຂອງຄອບຄົວອອກໄປ, ເມື່ອແຕ່ລະຄອບຄົວປະຕິບັດດ້ວຍຄວາມເອົາໃຈໃສ່ ແລະ ດ້ວຍຄວາມຮອບຄອບ ເພື່ອປ່ຽນບ້ານເຮືອນຂອງຕົນ ໃຫ້ເປັນສະຖານທີ່ສັກສິດແຫ່ງສັດທາ. ຂ້າພະເຈົ້າສັນຍາວ່າ ເມື່ອເຮົາທຳງານຢ່າງພາກພຽນ ເພື່ອສ້ອມແປງບ້ານເຮືອນຂອງເຮົາ ໃຫ້ເປັນສູນກາງ ການຮຽນຮູ້ພຣະກິດຕິຄຸນ, ແລ້ວເມື່ອເວລາຜ່ານໄປ ວັນຊະບາໂຕ ຂອງທ່ານ ຈະເປັນມື້ທີ່ມີຄວາມສຸກຫລາຍແທ້ໆ. ລູກໆ ຂອງທ່ານ ຈະຕື່ນເຕັ້ນ ທີ່ຈະຮຽນຮູ້ ແລະ ດຳລົງຊີວິດຕາມຄຳສອນຂອງພຣະຜູ້ຊ່ວຍໃຫ້ລອດ, ແລະ ອິດທິພົນຂອງຜູ້ປໍລະປັກ ໃນຊີວິດ ຂອງທ່ານ ແລະ ໃນບ້ານເຮືອນ ຂອງທ່ານ ຈະລົດນ້ອຍຖອຍລົງ. ການປ່ຽນແປງໃນຄອບຄົວຂອງທ່ານ ຈະເປັນສິ່ງທີ່ໜ້າຕື່ນເຕັ້ນ ແລະ ຄ້ຳຈູນ.
ລະຫວ່າງກອງປະຊຸມໃຫຍ່ນີ້ ເຮົາໄດ້ຕັດສິນໃຈທີ່ຈະມຸ່ງໝັ້ນ ໃນການໃຫ້ກຽດແດ່ອົງພຣະເຢຊູຄຣິດເຈົ້າ ທຸກ ເທື່ອ ທີ່ເຮົາກ່າວເຖິງສາດສະໜາຈັກຂອງພຣະອົງ. ຂ້າພະເຈົ້າສັນຍາກັບທ່ານວ່າ ຄວາມຕັ້ງໃຈທີ່ຊອບທຳຂອງເຮົາ ທີ່ຈະເອີ້ນຊື່ແທ້ຂອງສາດສະໜາຈັກຂອງພຣະຜູ້ຊ່ວຍໃຫ້ລອດ ແລະ ສະມາຊິກ ຈະນຳໄປສູ່ການມີສັດທາຫລາຍຂຶ້ນ ແລະ ໄດ້ຮັບພະລັງທາງວິນຍານທີ່ຍິ່ງໃຫຍ່ກວ່າ ສຳລັບສະມາຊິກຂອງສາດສະໜາຈັກຂອງພຣະອົງ.
ບັດນີ້ ໃຫ້ເຮົາຫັນມາກ່າວກ່ຽວກັບພຣະວິຫານ. ເຮົາຮູ້ວ່າ ເວລາຂອງເຮົາຢູ່ໃນພຣະວິຫານແມ່ນຈຳເປັນຕໍ່ຄວາມລອດ ແລະ ຄວາມສູງສົ່ງຂອງເຮົາ ແລະ ຂອງຄອບຄົວຂອງເຮົາ.
ຫລັງຈາກທີ່ເຮົາໄດ້ຮັບພິທີການທາງພຣະວິຫານສຳລັບຕົວເຮົາເອງ ແລະ ໄດ້ເຮັດພັນທະສັນຍານຳພຣະເຈົ້າແລ້ວ, ເຮົາແຕ່ຄົນຍັງຕ້ອງການພະລັງ ແລະ ການສິດສອນທາງວິນຍານນຳອີກ ຊຶ່ງເປັນໄປໄດ້ ພຽງແຕ່ ໃນບ້ານຂອງພຣະຜູ້ເປັນເຈົ້າເທົ່ານັ້ນ. ແລະ ບັນພະບຸລຸດຂອງເຮົາ ຢາກໃຫ້ເຮົາຮັບໃຊ້ເປັນຜູ້ກະທຳພິທີແທນເຂົາເຈົ້າ.
ໃຫ້ເຮົາມາພິຈາລະນາຄວາມເມດຕາອັນຍິ່ງໃຫຍ່ ແລະ ຄວາມດີງາມຂອງພຣະເຈົ້າ, ຜູ້ຊຶ່ງ, ກ່ອນການວາງຮາກຖານຂອງໂລກ, ໄດ້ຈັດຕຽມວິທີທີ່ຈະມອບພອນຂອງພຣະວິຫານໃຫ້ແກ່ຜູ້ທີ່ໄດ້ເສຍຊີວິດໄປ ໂດຍປາດສະຈາກຄວາມຮູ້ເລື່ອງພຣະກິດຕິຄຸນ. ພິທີການທີ່ສັກສິດໃນພຣະວິຫານ ແມ່ນເປັນແບບສະໄໝບູຮານ. ຕໍ່ຂ້າພະເຈົ້າແລ້ວ ຄວາມເກົ່າແກ່ ເປັນສິ່ງທີ່ໜ້າຕື່ນເຕັ້ນ ແລະ ເປັນຫລັກຖານເຖິງຄວາມຈິງແທ້.2
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ການໂຈມຕີຂອງຜູ້ປໍລະປັກ ແມ່ນເພີ່ມທະວີຫລາຍຂຶ້ນ, ໃນຄວາມຮຸນແຮງ ແລະ ໃນຫລາຍຮູບແບບ.3 ການໄປພຣະວິຫານເປັນປະຈຳຂອງເຮົາ ແມ່ນຈຳເປັນຫລາຍກວ່າ ທີ່ຜ່ານມາ. ຂ້າພະເຈົ້າຂໍໃຫ້ທ່ານຈົ່ງກວດກາເບິ່ງເວລາທີ່ທ່ານໃຊ້ເຮັດສິ່ງຕ່າງໆ ດ້ວຍການອະທິຖານ. ຈົ່ງໃຊ້ເວລາໃນອະນາຄົດຂອງທ່ານ ກັບຄອບຄົວຂອງທ່ານ. ຖ້າຫາກທ່ານສາມາດໄປພຣະວິຫານ, ຂ້າພະເຈົ້າຂໍຊຸກຍູ້ທ່ານ ໃຫ້ໄປເຂົ້າເຝົ້າພຣະຜູ້ເປັນເຈົ້າເປັນປະຈຳ—ໄປຫາບ້ານທີ່ສັກສິດຂອງພຣະອົງ—ແລ້ວໃຫ້ຮັກສາການນັດພົບນັ້ນດ້ວຍຄວາມແນ່ນອນ ແລະ ດ້ວຍຄວາມຊື່ນຊົມ. ຂ້າພະເຈົ້າສັນຍາກັບທ່ານວ່າ ພຣະຜູ້ເປັນເຈົ້າຈະນຳສິ່ງມະຫັດຈະສັນ ທີ່ທ່ານຕ້ອງການ ມາໃຫ້ທ່ານ ຂະນະທີ່ທ່ານເສຍສະລະເວລາ ທີ່ຈະຮັບໃຊ້ ແລະ ນະມັດສະການ ຢູ່ໃນພຣະວິຫານຂອງພຣະອົງ.
ປະຈຸບັນນີ້ ເຮົາມີພຣະວິຫານທີ່ໄດ້ຮັບການອຸທິດແລ້ວ ຢູ່ດ້ວຍກັນ 159 ແຫ່ງ. ການດູແລ ແລະ ການຮັກສາພຣະວິຫານເຫລົ່ານີ້ ໃນທາງທີ່ຖືກຕ້ອງ ແມ່ນສຳຄັນຫລາຍຕໍ່ພວກເຮົາ. ເມື່ອເວລາຜ່ານໄປ, ພຣະວິຫານກໍຕ້ອງໄດ້ຮັບການປັບປຸງ ແລະ ການບຸລະນະ ຢ່າງທີ່ຫລີກລ້ຽງບໍ່ໄດ້. ສະນັ້ນ, ບັດນີ້ຈຶ່ງມີແຜນການທີ່ຈະສ້ອມແປງ ແລະ ປັບປຸງພຣະວິຫານເຊົາເລັກ ແລະ ພຣະວິຫານແຫ່ງອື່ນໆ ທີ່ໄດ້ສ້າງໃນສະໄໝບຸກເບີກ. ລາຍລະອຽດກ່ຽວກັບໂຄງການເຫລົ່ານີ້ ຈະແຈ້ງໃຫ້ຊາບ ໃນຂັ້ນຕອນຕໍ່ໄປ.
ມື້ນີ້ ພວກເຮົາຍິນດີທີ່ຈະປະກາດແຜນການກໍ່ສ້າງພຣະວິຫານຕື່ມອີກ 12 ແຫ່ງ. ພຣະວິຫານເຫລົ່ານັ້ນ ຈະຖືກສ້າງຂຶ້ນໃນສະຖານທີ່ ດັ່ງຕໍ່ໄປນີ້: ເມັນໂດຊາ, ອາກຊັງຕິນ; ເຊົາວາດໍ, ບຣາຊິນ; ເມືອງຢູບາ, ແຄລິໂຟເນຍ; ພະນົມເປັນ, ກຳພູຊາ; ພຣາເອຍ, ເຄບ ເວເດ; ຢີໂກ, ກວາມ; ພວຍບະລາ, ແມັກຊິໂກ; ອອກແລນ, ນິວຊີແລນ; ເລໂກສ໌ ໄນເຈເຣຍ; ດາວາວ ຟີລິບປິນ; ແຊນຮວນ, ພອດໂຕ ຣິໂກ; ແລະ ເຂດວໍຊິງຕັນ, ຢູທາ.
ການກໍ່ສ້າງ ແລະ ການບົວລະບັດຮັກສາພຣະວິຫານ ອາດບໍ່ປ່ຽນແປງຊີວິດຂອງທ່ານ, ແຕ່ເວລາທີ່ທ່ານໃຊ້ຢູ່ໃນພຣະວິຫານ ຈະປ່ຽນຊີວິດຂອງທ່ານ ຢ່າງແນ່ນອນ. ຕໍ່ຜູ້ທີ່ບໍ່ໄດ້ໄປພຣະວິຫານດົນແລ້ວ, ຂ້າພະເຈົ້າຂໍຊຸກຍູ້ທ່ານໃຫ້ກະກຽມ ແລະ ກັບຄືນໄປໄວໆ ເທົ່າທີ່ຈະສາມາດເຮັດໄດ້. ແລ້ວ ຂ້າພະເຈົ້າຂໍເຊື້ອເຊີນທ່ານ ໃຫ້ນະມັດສະການຢູ່ໃນພຣະວິຫານ ແລະ ອະທິຖານ ເພື່ອຈະໄດ້ຮູ້ຢ່າງເລິກຊຶ້ງເຖິງຄວາມຮັກອັນເປັນນິດຂອງພຣະຜູ້ຊ່ວຍໃຫ້ລອດ, ເພື່ອວ່າທ່ານແຕ່ລະຄົນ ຈະມີປະຈັກພະຍານຂອງຕົວເອງ ວ່າພຣະອົງຊີ້ນຳວຽກງານທີ່ສັກສິດ ແລະ ນິລັນດອນນີ້ ຂອງພຣະອົງ.4
ອ້າຍເອື້ອຍນ້ອງທັງຫລາຍ, ຂ້າພະເຈົ້າຂໍຂອບໃຈທ່ານ ສຳລັບສັດທາ ແລະ ຄວາມພະຍາຍາມທີ່ບໍ່ລົດລະຂອງທ່ານ. ຂ້າພະເຈົ້າຂໍມອບຄວາມຮັກ ແລະ ພອນໃຫ້ແກ່ທ່ານ, ວ່າທ່ານຈະຊື່ນຊົມຢູ່ກັບພຣະຄຳຂອງພຣະຜູ້ເປັນເຈົ້າ ແລະ ນຳໃຊ້ຄຳສອນຂອງພຣະອົງ ໃນຊີວິດສ່ວນຕົວຂອງທ່ານ. ຂ້າພະເຈົ້າໃຫ້ທ່ານໝັ້ນໃຈໄດ້ວ່າ ການເປີດເຜີຍທີ່ຕໍ່ເນື່ອງໃນສາດສະໜາຈັກ ຈະມີຢູ່ຕໍ່ໄປ ຈົນກວ່າ “ຈຸດປະສົງຂອງພຣະເຈົ້າ ຈະສຳເລັດຄົບຖ້ວນ, ແລະ ພຣະເຢໂຮວາທີ່ຍິ່ງໃຫຍ່ ຈະກ່າວວ່າ ວຽກງານສຳເລັດແລ້ວ.”5
ຂ້າພະເຈົ້າຂໍອວຍພອນທ່ານ ໃຫ້ມີສັດທາຫລາຍຂຶ້ນໃນພຣະອົງ ແລະ ໃນວຽກງານທີ່ສັກສິດຂອງພຣະອົງ, ດ້ວຍສັດທາ ແລະ ຄວາມອົດທົນ ເພື່ອຈະໄດ້ທົນກັບການທ້າທາຍສ່ວນຕົວ ໃນຊີວິດຂອງທ່ານ. ຂ້າພະເຈົ້າຂໍອວຍພອນທ່ານ ໃຫ້ກາຍເປັນໄພ່ພົນຍຸກສຸດທ້າຍທີ່ເປັນຕົວຢ່າງ. ຂ້າພະເຈົ້າຂໍອວຍພອນທ່ານດັ່ງນັ້ນ ແລະ ສະແດງປະຈັກພະຍານວ່າ ພຣະເຈົ້າຊົງພຣະຊົນຢູ່! ພຣະເຢຊູຄື ພຣະຄຣິດ! ນີ້ແມ່ນສາດສະໜາຈັກຂອງພຣະອົງ. ເຮົາເປັນຜູ້ຄົນຂອງພຣະອົງ, ໃນພຣະນາມຂອງພຣະເຢຊູຄຣິດ, ອາແມນ.