ຄຳປາໄສເປີດກອງປະຊຸມ

ໂດຍ ປະທານຣະໂຊ ເອັມ ແນວສັນ

ມັນເຖິງເວລາແລ້ວທີ່ຈະເປັນສາດສະໜາຈັກ ທີ່ໃຫ້ບ້ານເຮືອນເປັນສູນກາງ, ໂດຍທີ່ໄດ້ຮັບການສະໜັບສະໜູນຈາກ ສິ່ງທີ່ເກີດຂຶ້ນ ໃນຕຶກສາຂາ, ຫວອດ, ແລະ ສະເຕກຂອງເຮົາ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ພວກເຮົາຕື່ນເຕັ້ນຫລາຍທີ່ໄດ້ມາເຕົ້າໂຮມກັບທ່ານອີກ ໃນກອງປະຊຸມໃຫຍ່ສາມັນ ເດືອນຕຸລານີ້ ຂອງສາດສະໜາຈັກ. ພວກເຮົາຂໍຕ້ອນຮັບທ່ານແຕ່ລະຄົນດ້ວຍຄວາມຊື່ນຊົມຢ່າງຍິ່ງ. ພວກເຮົາມີຄວາມກະຕັນຍູຫລາຍສຳລັບຄຳອະທິຖານທີ່ສະໜັບສະໜູນຂອງທ່ານ. ພວກເຮົາຮູ້ສຶກເຖິງຜົນຂອງຄຳອະທິຖານເຫລົ່ານັ້ນ. ຂໍຂອບໃຈຫລາຍໆ!

ພວກເຮົາມີຄວາມກະຕັນຍູສຳລັບຄວາມພະຍາຍາມຢ່າງຫລວງຫລາຍຂອງທ່ານ ທີ່ຈະເຮັດຕາມຄຳແນະນຳ ທີ່ໄດ້ມອບໃຫ້ໃນກອງປະຊຸມໃຫຍ່ສາມັນ ເມື່ອຫົກເດືອນຜ່ານມານີ້. ປະທານສະເຕກຕະຫລອດທົ່ວໂລກ ກໍໄດ້ສະແຫວງຫາການເປີດເຜີຍ ທີ່ຈຳເປັນຕໍ່ການສ້າງຕັ້ງກຸ່ມແອວເດີຂຶ້ນໃໝ່. ຜູ້ຊາຍຂອງກຸ່ມເຫລົ່ານັ້ນ ພ້ອມດ້ວຍເອື້ອຍນ້ອງໃນສະມາຄົມສະຕີສົງເຄາະ ທີ່ອຸທິດຕົນ ໄດ້ທຳງານຢ່າງພາກພຽນ ເພື່ອປະຕິບັດສາດສະໜາກິດ ຕໍ່ອ້າຍເອື້ອຍນ້ອງຂອງພວກເຮົາ ໃນວິທີທີ່ສູງກວ່າ ແລະ ສັກສິດກວ່າ. ພວກເຮົາໄດ້ຮັບການດົນໃຈຈາກຄວາມດີ ແລະ ຄວາມພະຍາຍາມທີ່ໜ້າອັດສະຈັນໃຈຂອງທ່ານ ທີ່ຈະນຳຄວາມຮັກຂອງພຣະຜູ້ຊ່ວຍໃຫ້ລອດ ມາສູ່ຄອບຄົວ, ເພື່ອນບ້ານ, ແລະ ໝູ່ເພື່ອນຂອງທ່ານ ແລະ ເພື່ອປະຕິບັດສາດສະໜາກິດຕໍ່ເຂົາເຈົ້າ ດັ່ງທີ່ພຣະອົງຈະກະທຳ.

ນັບແຕ່ກອງປະຊຸມໃຫຍ່ເດືອນເມສາ ເປັນຕົ້ນມາ, ຊິດສະເຕີ ແນວສັນ ແລະ ຂ້າພະເຈົ້າ ໄດ້ໄປພົບກັບສະມາຊິກຢູ່ໃນສີ່ທະວີບ ແລະ ໃນໝູ່ເກາະຕ່າງໆ. ຈາກ ເຢຣູຊາເລັມ ເຖິງ ຮາຣາເຣ, ຈາກ ວິນນິເພກ ເຖິງ ບາງກອກ, ພວກເຮົາໄດ້ມີປະສົບການກັບສັດທາທີ່ຍິ່ງໃຫຍ່ ແລະ ປະຈັກພະຍານ ທີ່ເຂັ້ມແຂງຂອງທ່ານ.

ພວກເຮົາດີໃຈຫລາຍ ກັບຊາວໜຸ່ມຢ່າງຫລວງຫລາຍ ທີ່ໄດ້ເຂົ້າຮ່ວມກອງທັບໜຸ່ມຂອງພຣະຜູ້ເປັນເຈົ້າ ເພື່ອເຕົ້າໂຮມອິດສະຣາເອນ ທີ່ກະຈັດກະຈາຍໄປ.¹ ພວກເຮົາຂໍຂອບໃຈພວກເຈົ້າຫລາຍໆ! ແລະ ເມື່ອພວກເຈົ້າສືບຕໍ່ເຮັດຕາມການເຊື້ອເຊີນຂອງຂ້າພະເຈົ້າ ຢູ່ທີ່ກອງປະຊຸມສຳລັບຊາວໜຸ່ມທົ່ວໂລກ, ພວກເຈົ້າໄດ້ສ້າງຕັ້ງມາດຕະຖານ ໃຫ້ພວກເຮົາທຸກຄົນ ທີ່ຈະເຮັດຕາມ. ພວກເຈົ້າໄດ້ສ້າງຄວາມແຕກຕ່າງທີ່ດີເລີດ!

ໃນຫລາຍປີທີ່ຜ່ານມາ, ພວກເຮົາ ໃນສະພາຝ່າຍຄວບຄຸມ ຂອງສາດສະໜາຈັກ ໄດ້ປຶກສາຫາລືກັນກ່ຽວກັບຄຳຖາມທີ່ສຳຄັນ ທີ່ວ່າ: ເຮົາຈະເອົາພຣະກິດຕິຄຸນ ໃນຄວາມບໍລິສຸດຂອງມັນ, ແລະ ພິທີການຕ່າງໆ ກັບຜົນສະທ້ອນນິລັນດອນຂອງມັນ ໄປໃຫ້ລູກໆ ທຸກຄົນ ຂອງພຣະເຈົ້າໄດ້ແນວໃດ?

ໃນຖານະໄພ່ພົນຍຸກສຸດທ້າຍ, ເຮົາມັກຄິດກ່ຽວກັບ “ສາດສະໜາຈັກ” ວ່າເປັນ ບາງສິ່ງທີ່ເກີດຂຶ້ນຢູ່ໃນໂບດ, ທີ່ສະໜັບສະໜູນໂດຍສິ່ງທີ່ເກີດຂຶ້ນຢູ່ທີ່ບ້ານ. ເຮົາຕ້ອງໄດ້ປັບຕົວເຂົ້າກັບແບບແຜນນີ້. ມັນເຖິງເວລາແລ້ວ ທີ່ຈະເປັນ ສາດສະໜາຈັກ ທີ່ໃຫ້ບ້ານເຮືອນເປັນສູນກາງ, ໂດຍທີ່ໄດ້ຮັບການສະໜັບສະໜູນຈາກ ສິ່ງທີ່ເກີດຂຶ້ນ ໃນຕຶກສາຂາ, ຫວອດ, ແລະ ສະເຕກຂອງເຮົາ.

ເມື່ອສາດສະໜາຈັກສືບຕໍ່ຂະຫຍາຍອອກໄປຕະຫລອດທົ່ວໂລກ, ມີສະມາຊິກຫລາຍຄົນທີ່ອາໄສຢູ່ໃນບ່ອນທີ່ບໍ່ມີຕຶກໂບດ—ແລະ ອາດບໍ່ມີຕຶກໂບດ ໃນມໍ່ໆນີ້. ຂ້າພະເຈົ້າຈື່ຄອບຄົວໜຶ່ງໄດ້ ຜູ້ຊຶ່ງ, ເພາະສະຖານະການເຊັ່ນນັ້ນ, ໄດ້ຖືກຂໍຮ້ອງໃຫ້ຈັດພິທີນະມັດສະການຢູ່ໃນເຮືອນຂອງເຂົາເຈົ້າເອງ. ຂ້າພະເຈົ້າໄດ້ຖາມຜູ້ເປັນແມ່ວ່າ ນາງຮູ້ສຶກແນວໃດ ທີ່ໄດ້ໄປໂບດ ຢູ່ເຮືອນຂອງຕົວເອງ. ນາງຕອບວ່າ, “ຂ້ານ້ອຍມັກຫລາຍ! ດຽວນີ້ ຜົວຂອງຂ້ານ້ອຍ ໄດ້ໃຊ້ພາສາທີ່ສຸພາບຢູ່ໃນບ້ານ, ໂດຍທີ່ຮູ້ວ່າ ລາວຈະເປັນຜູ້ກ່າວຄຳອະທິຖານສຳລັບສິນລະລຶກ ໃນທຸກວັນອາທິດ.”

ຈຸດປະສົງຂອງສາດສະໜາຈັກ ເປັນເວລາດົນນານ ແມ່ນເພື່ອຮັບໃຊ້ສະມາຊິກທຸກຄົນ ໃຫ້ມີສັດທາຫລາຍຂຶ້ນໃນອົງພຣະເຢຊູຄຣິດເຈົ້າ ແລະ ໃນການຊົດໃຊ້ຂອງພຣະອົງ, ເພື່ອຮັບໃຊ້ເຂົາເຈົ້າ ໃນການເຮັດ ແລະ ຮັກສາພັນທະສັນຍາຂອງເຂົາເຈົ້ານຳພຣະເຈົ້າ ແລະ ເພື່ອໃຫ້ມີຄວາມເຂັ້ມແຂງ ແລະ ຜະນຶກຄອບຄົວຂອງເຂົາເຈົ້າເຂົ້າກັນ. ໃນໂລກທີ່ສັບສົນ ທຸກວັນນີ້, ສິ່ງນີ້ ບໍ່ໄດ້ເປັນເລື່ອງງ່າຍ. ຜູ້ປໍລະປັກ ກໍເພີ່ມການໂຈມຕີ ເລື່ອງສັດທາ ແລະ ໂຈມຕີເຮົາເລື່ອງຄອບຄົວ ໃນລະດັບທີ່ໄວກວ່າເກົ່າ. ໃນການເອົາຕົວລອດທາງວິນຍານ, ເຮົາຕ້ອງມີແຜນຕໍ່ຕ້ານ ແລະ ແຜນຊ່ວຍເຫລືອ. ຍ້ອນສິ່ງນີ້, ບັດນີ້ ພວກເຮົາຈຶ່ງໄດ້ຈັດໃຫ້ມີການດັດແປງໃນອົງການ ໃນແບບທີ່ປົກປ້ອງສະມາຊິກ ແລະ ຄອບຄົວຂອງເຂົາເຈົ້າ.

ເປັນເວລາຫລາຍປີທີ່ ຜູ້ນຳຂອງສາດສະໜາຈັກໄດ້ທຳງານໃນການຮວບຮວມຫລັກສູດ ເພື່ອເພີ່ມຄວາມເຂັ້ມແຂງໃຫ້ແກ່ຄອບຄົວ ແລະ ບຸກຄົນ ຜ່ານທາງແຜນ ທີ່ໃຫ້ ບ້ານເຮືອນເປັນສູນກາງ ແລະ ສາດສະໜາຈັກສະໜັບສະໜູນ ເພື່ອຮຽນຄຳສອນ, ເພີ່ມຄວາມເຂັ້ມແຂງໃຫ້ແກ່ສັດທາ, ແລະ ສົ່ງເສີມການນະມັດສະການເປັນສ່ວນຕົວ ທີ່ດີກວ່າເກົ່າ. ຄວາມພະຍາຍາມຂອງເຮົາເມື່ອສອງສາມປີທີ່ຜ່ານມາ, ທີ່ຈະເຮັດໃຫ້ວັນຊະບາໂຕສັກສິດ—ເພື່ອເຮັດໃຫ້ມັນເປັນເຄື່ອງໝາຍທີ່ມີຄວາມສຸກ ແລະ ເປັນສ່ວນຕົວ ຕໍ່ພຣະເຈົ້າ ເຖິງຄວາມຮັກທີ່ເຮົາມີຕໍ່ພຣະອົງ—ຈະດີຂຶ້ນໂດຍການດັດແປງ ຊຶ່ງບັດນີ້ ພວກເຮົາຈະນຳສະເໜີ.

ເຊົ້າມື້ນີ້ ພວກເຮົາຈະປະກາດຄວາມດຸນດ່ຽງ ແລະ ການເຊື່ອມໂຍງລະຫວ່າງຄຳແນະນຳເລື່ອງພຣະກິດຕິຄຸນ ຢູ່ທີ່ບ້ານ ແລະ ຢູ່ທີ່ໂບດ. ເຮົາແຕ່ລະຄົນ ມີຄວາມຮັບຜິດຊອບຕໍ່ການເຕີບໂຕທາງວິນຍານ ຂອງເຮົາເອງ. ແລະ ຂໍ້ພຣະຄຳພີ ກໍບົ່ງບອກຢ່າງແຈ່ມແຈ້ງວ່າ ຜູ້ເປັນພໍ່ແມ່ ມີໜ້າທີ່ຮັບຜິດຊອບຕົ້ນຕໍ ທີ່ຈະສິດສອນຄຳສອນ ໃຫ້ແກ່ລູກໆຂອງຕົນ.² ມັນເປັນໜ້າທີ່ຮັບຜິດຊອບຂອງສາດສະໜາຈັກ ໃນການຊ່ວຍສະມາຊິກແຕ່ລະຄົນ ໄປສູ່ຈຸດເປົ້າໝາຍທີ່ສູງສົ່ງ ເພື່ອໃຫ້ມີຄວາມຮູ້ເລື່ອງພຣະກິດຕິຄຸນຫລາຍກວ່າເກົ່າ.

ບັດນີ້ ແອວເດີ ຄວິນຕິນ ແອວ ຄຸກ ຈະອະທິບາຍ ການປ່ຽນແປງທີ່ສຳຄັນເຫລົ່ານັ້ນ. ສະມາຊິກທຸກຄົນໃນສະພາຂອງຝ່າຍປະທານສູງສຸດ ແລະ ກຸ່ມອັກຄະສາວົກສິບສອງ ໄດ້ເຫັນດີນຳກັນ ທີ່ຈະສະໜັບສະໜູນຂ່າວສານນີ້. ພວກເຮົາຮັບຮູ້ດ້ວຍຄວາມກະຕັນຍູ ທີ່ໄດ້ຮັບການດົນໃຈຈາກພຣະຜູ້ເປັນເຈົ້າ ຜູ້ຊຶ່ງມີອິດທິພົນຫລາຍ ໃນການພັດທະນາແຜນ ແລະ ຂັ້ນຕອນຕ່າງໆ ທີ່ແອວເດີ ຄຸກ ຈະນຳສະເໜີ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າຮູ້ວ່າ ພຣະເຈົ້າຊົງພຣະຊົນຢູ່! ພຣະເຢຊູຄື ພຣະຄຣິດ! ນີ້ແມ່ນສາດສະໜາຈັກຂອງພຣະອົງ ຊຶ່ງພຣະອົງນຳພາໂດຍການມອບຄຳທຳນາຍ ແລະ ການເປີດເຜີຍ ໃຫ້ແກ່ຜູ້ຮັບໃຊ້ທີ່ຖ່ອມຕົວຂອງພຣະອົງ. ຂ້າພະເຈົ້າຂໍເປັນພະຍານ ໃນພຣະນາມຂອງພຣະເຢຊູຄຣິດ, ອາແມນ.