Pweng, Kalmac, ac Un Mwet
Ke tuhram ac puhsra okahrkahr yohk ma tiac tui ke kais sie lwen lasr, lwelah tuh kuht in kacfweacng in liyacl Kraist ke infulwacn moul lasr, luhlahlfongi lasr, ac kuhlwacnsap in kahsruh lasr.
Tamuhlwel ac tahmtahel, Sammy Ho Ching pa inge, mahlwem itkohsr matwacl, muhta liye toeni luhlahp ke television ke Epril tari ah lun lohm sel.
Ke pacl se apkuhran in ahkkweyeyucklac Prestuhn Russell M. Nelson ac wi Mwet Kol Luhlahp sahyac ah, pahol Sammy kacohlah na ke sruokyacn sufah soko nimacl. Na el oraclah ma na usrnguck se.
Sammy el oraclah atacn mwe lutlut sasuc se ke vote orekmakihn niyacl.
Pain kowos nuh ke toeni luhlahp se inge ke Alu luhn Jisus Kraist luhn Mwet Luhlahlfongi ke Lwen-sahflah. In akiyac acn se ma sramsram uh oasr kac uh ke kalmeyacn tuhkweni pacl luo ke yac se, nga eislah ma sikyak se inge liki ma suhmuhslah ke puk lal Luke ke Wuhlweacng Sasuc:1
“Ke Jisus el tuku apkuranyang nu Jericho, oasr mwet kun se muta sisken inkanek uh ac ngusr:
“… Ke el lohng ke un mwet uh fahsr alukella el siyuk [lah] mea se inge.
“… Elos fahk nu sel, Jisus lun Nazareth el a fahsryak ngi.
“Mwet kun sac wowoyak, ac fahk, Jisus, Wen nutin David, pahkomutuk.”
Mwet ma fahsr meet uh, muhlat nu sel ac fahk elan mislac, tusruk “el wowoyak yohk liki meet,” fwack ohinge. Ke srihpen insacnweacng yohk lal, utucklac el nuh yohrohl Jisus, suc lohng siyuck lal ke luhlahlfongi yohk lal nuh ke fohlohkyak luhn mwe ngetnget lal ac ahkkweyacl lah.2
Nga moklweyuckyak ke kihtin sramsram na kahlwem se inge pacl nuhkwewa nga riti uh. Kuht kuh in puhlakihn kweok luhn mukul se inge. Apkuhran na kuht in kuh in lohng wowoyak lal tuh Mwet Lahngo elacn lohacng nuh sel. Kuht isracsr srihsrihklac ke el sruhnga koasrlong—ahok, insacnweacng lal in kihl nuh lucng puhsrwacl ke mwet nuhkwewa fahk nuhsel in kihlyac nuh ten. Sramsram se inge, ke kuh la sifacna, pa sramsram wowo se ke luhlahlfongi fokoko. Tuh ke nohfohn ma suhmuhslah uh, ke kuht riti yohk kac, ac yohk ma kuht konwacack kac.
Sie ma lihksreni na tuhngalyucwi mihsenge uh pa ma wowo ma mukul se inge puhlakihn ke mwet raunwellah ma fisrwacsr in oasr nguhn la yohrohl. Ma yohk srihpac ke sramsram soko inge kuhpahsryang nuh sin muhtwacn ac mukul puh ma tiac etweyuck inelos suc, ke mwet weluhltahl orekma siyuck, “Meac kalmeyacn mukwikwi se inge?” ke sie aruhruhma, fin kom muh, in ahkuhtwelyac Kraist muh pa srihpac se nuh ke ahkuhtweyac yohk se; El pa Kalmac se ma Luhmweyuck. Oasr mwe luti ke kihtin sramsram se inge nuh sesr nohfohn. Ke ip luhn luhlahlfongi ac nuhnuhnkweyuck, ac kahsruh kol kom nuh ke siyuck lom nuh selos suc oasr se na pwacye! “Yac sie mwet kun kuh in pwen sie pac mwet kun?” Jisus el tuh siyuck. “[El fin oruh,] eltal na kewa ac fah putatla nu in luf uh?”3
Kain in sukyacn luhlahlfongi ac nuhnuhnkweyuck uh pa srihpac lasr ke toeni inge, ac ke kom wi kuht mihsenge, kom fah akihlacnwack lah sukok se inge yohkna akacsruhi kac uh. Ngwetngwet raunikomlac. Inse fin acn se inge kom liye sucu ke luhpah nuhkwewa tuhkuh ke acn nuhkwewa. Kawuck mahtuh ohsun tuhkweni ke engan, choir wolacna ahkolah puhsrwaclos, ac mwet lain an wowoyak ke acn in tu wohwohn lalos. Misineri ke pacl met ah suk kawuck misineri met lalos ah, uh misineri tuhfahna fohlohkoh suk kawuck sasuc (fin kom etuh lah meac kalmacn ma nga fahk uh!). Ac petsac? Inkuhsrao kahsre kuht! Ke cell fon ma oasr ke paho nuhkwewa, kuht eklac “mempucr nuhkwewa pa misineri se” nuh ke “mempucr nuhkwewa pa mwet ituck petsac se.” Infulwacn mwe ahkfohs ma kuht lohlah kac, mwet se kuh in siyuck ke srihpac wo, “Meac kalmacn ma ingacn kewa?”
Oacna sramsram soko ke Wuhlweacng Sasuc nahtuhsr, elos suc ahkinsewowoyeyuck ke mwe liye fah akihlen, liki na ma nuhkwewa sahyac ma toeni se fah use nuh sesr, ac fah oasr kuhtsrihk srihpac kuh wacngihn kuht fin te konwaclwack Jisus ke infulwacn ma nuhkewa. In sruokyac nuhnak se ma kuht suk uh, unweyucklac se ma El olwelah ah, yohk srihpac tuh kuht etuh lah oasr inge, kuht enenuh in otwelah mwe lusrohngtwen—engankihn enganiyac—ac lohacng ahkwoyac nuh Sel. Pruhe luhn mwet sramsram nuhkwewa, finsrak luhn mwet nuhkwewa ma on, muhtweng luhn mwet muhtwacta nuhkwewa—nohfohn kihsackihnyucklac in suli nguhn Lal suc la Alu se inge—Kraist moul, Lamb nuhtin God, Fihsrack luhn Mislac.
Tuhsruhk kuht tiac enenuh in muhta lun acn in toeni se inge in Sokol. Ke tuhlihk srihsrihk se riti Puk luhn Mormon ke pacl se emet lal ac el fwefwelac ke puhlaik lal Abinadi kuh ke mahs luhn solse fokoko 2,000 ah, fihsrwasr kuht in fahk lah Jisus El oasr infulwac pacl nuhkwewa ke tahk wolacna se inge, tulac fuhlwactwack ahluhkwelah ma nuhkwewa ac sang kuhpahsr inmahsrlon mwet luhlahlfongi nuhkwewa kac.
Oacpacna, ke kawuck se lutlut ke luhlahlfongi lasr, el kuh in eis etwacack yohk ke kuhtuh ip srihsrihk usrnguck ac kahs ma el tiac etuh ke ip luhn alu uh—mongo ma tiac lweyucklac, kuhfa nuh ke sifacna karihngihn, inkacnek luhn mempucr ke pacl met ah, tahk sucu ke computer, wi pihsen stek ke alu uh ma kuhtuh mwet uh finsrakkihn tiac tahfuh luo in pa fosrngakihnyuck elos ke sie ikoac steak manman, ma na fal se. Na, ke kawuck sasuc lasr sun un mwet ngetnget ac puhsra sasuc, kuht enenuh in siyac ahluhkwelah ma silahklahk ac okahrkahr ac lohacng nuh kac ke kalmweyac la an kewa, ke kihmkihm luhn art luhn wosasuc ma pahtpaht—luhngse luhn Pahpah ac Ninac Inkuhsrao, mwe sang ke iwaclah luhn Wen fuhlwact, wolacnaiyacn kohkoh luhn Nguhn Muhtahl, fohlohkyak ke lwen-sahflah luhn ma pwacye nuhkwewa ac kuhtuh pac.
Ke sie mwet som nuh tempuhl muhtahl ke pacl se emet lal, el ac sahp fwefwelac ke ma ac sikyak nuh sel. Ma kunacsr in ahkkweye lah akucl muhtahl ac ohiyac ahkkahlwemyeyuck, akwuck muhtahl ke nuknuk ac mwe ahkuhtweyac ke petsac, nimet lohsrlah tuhsruhk in siyac na Mwet Lahngo, suc kuht som in alu nuh se. Tempuhl uh lohm Sel, ac El enenuh in pa ma se emet ke nuhnak lasr ac insiacsr—mwe luti yohk kacl Kraist tahfwekuhtlac ke luhman atacsr oacna ke akwuck luhn tempuhl uh tuhtahflah uh—ke pacl kuht rit ma sihmlac ke motonac nuh ke pacl sahflah lasr kuht muhta lun lohm sacn. Inmahsrlon ma wolacna nuhkwewa kuht sun, kuht ac muh liye, lucng liki nuhkwewa sahyac, kalmacn Jisus lun tempuhl.
Motko for luhn mukwikwi puhlaik ac mwe fahkwack sasuc ke Alu uh ke mahlwem na ekahsr somlah inge. Ke kuht kahsruh sie sin sie, kuh ahknwacsnwacsye ma sikyak nuh sesr ke lwen Sahpuht, kuh akiyac prokracm sasuc nuh sin tuhlihk ac mwet fushr, kuht ac muh ahsrellah srihpac na pwacye nuh ke ma eklac fwackyuckyak inge fin kuht liyacltahlos muh elos siena, wacngihn kuhpasr la liki na tuhkweni sang kuhiyac in kahsrwe kuht muhsahi kuht lac in fokoko fin Yot luhn Molwelah lasr.4 Pacyena, pa inge ma President Russell M. Nelson el kena tuh kuht in orekmakihn ine ahkkahlwemyeyuck luhn Alu uh.5 Fin Jesus—Inel, mwe luti Lal, srikasrak Lal, fuhlwactlacna Lal—kuh in oasr infulwacn alu in ahkfuhlwact lasr, kuht fah ahkkweye ma pwacye yohk ma Alma el tuh luti sie pacl ah: “Oasr ma pucspucs sikyak; [tuh] liye, oasr sie ma yohk srihpac liki ma nuhkwewa— … Mwet in Molwelah [suc] moul ac tuhkuh nuh inmahsrlon mwet Lal.”6
Nuhnak sahflah se: Acn se lal Joseph Smith ke yac sie alfoko kuhtuh ah tuh fihrihryak wi un mwet Kristin se ma tuh wi liye.7 Tuhsruhk ke fohsack luhn puhsra elos oraclah, mwet yohk nguhn la inge, usrnguckiyac uh, muhlkuhnlah na Mwet Lahngo se Joseph el tuh insacnweacng in suk ah. Lainyacn ma se el pahgnon lohsr ac fohsack,8 el kahing fohlohk nuh ke inimac in sahk se ma el tuh liye ac lohng wolacnaiyac ahkpwacyeye Mwet Lahngo nuh ke wosasuc liki na ma kuht sruhmuhn ke olutu se inge. Ke mwe sang luhn mwe ngetnget ma tiac kuh in nuhnkweyuck ac tiac kuh in sa ahkahlwemyeyuck, Joseph el liye ke sie aruhruhma ke Pahpah tuhmwacl Inkusrao, God wolacna luhn facluh, ac Jisus Kraist, Wen suwohs Sefanna Nahtuhl. Na Pahpah El akiyac srihkasrak se ma kuht kaksakihn ke olutu se inge: El srihsrngilyac Jisus, fahk lah pa inge Wen Kuloh Nuhtihk. Porongel!9 Wacngihn kahs yohk in ahkuhtweyac wolacnaiyacl Jisus, yohk srihpaciyacl ke plwacn in molwelah, ac tulac Lal ye muhtuhn God kuh in ahluhkwelah mwe fahkwack fototo ke pohloh kahs itkohsr sacn.
Tihkuclkucl ac Fohsack? Un mwet ac ackuhkuhin? Puhkantwen ma ingacn ke facl lasr uh. Ahok, mwet ahlohloh ac luhlahlfongi srackna akuhkuhin ke aruhruhma se ac weacng ma nuhkwewa sahyac nga sramsramkihn mihsenge. Mwe na tweng sahp kom kampare in liye yohk in kahlwem ac konwacack kalmeyac inmahsrlon nuhnak luhn un mwet se, nga srihsrngikowi nuh yurin Jisus se pacna ingacn ac fahkwack mwe loh luhk ke ma sikyak nuh sel Joseph Smith, tuhkuh oacna ke oreklac 1,800 kuhtuh yac tukun mwet kawuck kun se lasr ah eis mwe ngetnget lal ke Inkacnwek mahtuh Jericho ah. Nga fahkwack lah mwet luo inge ac un mwet pac sacyac inge nuh tok ke pacl ma pacyena ma mwe ngwetngwet ac puhsra engan ke moul uh pa tuh Jisus Elan tiac ahliki kuht lac muhkwena10 tuhsruhk tuhkuh Lal nuh yohrohsr, tui siskacsr ac oruh acn in monglac Lal wi kuht.11
Tahmtahel ac tamuhlwel, ke tuhram ac puhsra okahrkahr yohk ma tiac tui ke kais sie lwen lasr, lwelah tuh kuht in kacfweacng in liyacl Kraist ke infulwacn moul lasr, luhlahlfongi lasr, ac kuhlwacnsap in kahsruh lasr. Pa ingacn acn se ma kalmac pwacye uh oasr we. Ac fin srihklac kuhtuh aruhruhma lasr ke kuhtuh lwen uh, kuh srihkeni puhlaik lasr, kuh luhlahlfongi lasr uh srikeyuck ac ahkwoyeyuck—oacna ke ac fahk—sahp kuht ac tuhng in yohk fahk, “Jisus, Wen nutin David, pakomutuk.”12 Nga olwelah ke follah luhn insiyac sapkihnyuck ac mukwikwi palyeiyuck lah El fah lohng kom ac fah fahk, sa kuh pahtlac, “Kwal, kom in liye: lulalfongi lom akkeyekomla.”13 Paing kowos nuh ke toeni luhlahp. Ke inen Jisus Kraist, amen.