![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F2d%2Fe3%2F2de36a486b6479d1941ea2eccf92eb51d1fd3ad7%2F2de36a486b6479d1941ea2eccf92eb51d1fd3ad7.jpeg/full/!250,/0/default)
Eis Ma Luhn Nguhn
Ke mwet tuhma lutlut oaru luhn Jisus Kraist, kom kuh in eis ma lom sifacna ma sacohklacna ac fwackyuck, fal nuh ke masap Lal, ma oreklac nuh sum.
Ke nga som liki kacm luhn tuhlihk muhtwacn fuhsr ke summer se inge, tuhlihk muhtwacn na wo se use nuh sihk not se. Ke not sac, el siyuck, “Nga e fahk fuhkah lah God El fahk nuh sihk ma?” Nga luhngse kihsensiyuck se lal ah. Nguhnasr srohnfuhsri ke ma ahkfototoyang nuh ke lohm inkuhsrao sesr. Kuht ke puhla enenweyuck ac orekmakihnyuck. Tuhsruhk ke kuhtuh pacl kuht sun ma upac in oraclah in wacngihnlac ma ke nuhnak lasr uh sifacna ac ma srihsrihk luhn Nguhn in wakrekuht. Mwet Pahluh, omeet ac mihsenge, nuhnkuh pac lah fin ma se “suli ac kai in oruh ma wo, el tuhkuh sin Kraist.”1
Prestuhn Russell M. Nelson el suli ke kahs na fihsrwacsr ac kuh: “Tamuhlwel ac Tahmtahel sacohklacna wiyuck, Nga kwacfe nuh suwos in ahkyohkye kuh luhn nguhn lom in eis fwackyuck. … Sulwaclah in oruh orekma luhn nguhn ma ahkoeyuck in engan ke mwe sang luhn Nguhn Muhtahl ac in lohng puhsren Nguhn pacl pohs ac in kahlwem.”2
Ma nga luhngse ke lututacng se inge pa in sramsram nuh sum ke insiyuck ke atac ahkosr in ahkyohkye kuh luhn nguhn lom in eis fwackyuck.
1. Ahkolah nuh ke Oraclah Pacl ac Acn in Lohng Puhsren God
Ke kom sulwaclah in eslah pacl lwen nuhkwewa in oruh in fototo nuh ke puhsren God, yohk liki na ke Puk luhn Mormon, pacl pohs, Puhsrwacl e muh arulacna kahlwem ac kom e arulacna akihlen.
Ke ma sahyac, ma ahkfohs ac puhsra ma nwacnwaclah fin facluh ac lohm sesr uh ac ke moul lasr uh kuh in oruh in upac in lohng ke Puhsrwacl. Ahkfohs inge kuh in arulacna nwacnwaclah ke nuhnak lasr uh ac insiyacsr tuh kuht likiac wacngihn rum nuh ke kolyuck fihsracsracsr luhn Nguhn Muhtahl.
Mwet Pahluh Joseph Smith el luti lah inkaiyacn pacl uh God El fahkuhlwack “nuh selos kais sie ma wiklac sifacna, ke rum la; ke acn mwesis kuh acn uh, ac lah wacngihn puhsra kuh acn okahrkahr.”3
Setuhn el kena ituckkuhtlac liki puhsren God ke el us kuht liki kain acn mihslac inge. FIn God El sramsram ke puhsra srihsrihk, ac suwohs, kom ac nga enenuh in orekma in fototo nuh Sel in lohnguhl. Srihke nuhnkuh meac e sikyak fin kuht oruh kuht in connect na nuh Sel oacna ke kuht muhta connect nuh ke Wi-Fi uh! Sulwaclah pacl ac acn, ac lohng ke puhsren God lwen nuhkwewa. Ac karihngihn muhtahliyacn ma kunac se inge in suwohs, ke ma pohs muh fal nuh kac uh!
2. Orekma Sa ac tiac Pahtlac
Ke kom eis mwe kolyuck ac orekma nuh ke srihpac, Leum El kuh in orekmakihn kom. Fin yohk orekma lom, e yohk akihlen lom ke puhsren Nguhn ma e tuhkuh. E tuhfah yohkwelihk akihlen yacn kohkoh luhn God nuh sum ac El ac “tuhfah … ahkkahlwemye nuhnak Lal ac luhngse Lal.”4 Fin kom pahtlac, kom e sahp muhlkuhnlah kolyuck kuh eslah pacl se lom in kahsruh oacna sie mwet ke God.
3. Eis ma Kunom sin Leum
Pruhe ma Pahpah Tuhmasr Inkuhsrao El liye muh El luhngse in topuk uh pa orekma lasr ma in kolyuck nuh sin mwet sahyac suc enenuh kahsruh lasr. Prestuhn Henry B. Eyring el luti kuht in suk fwackyuck in siyuck sin God suc kuht kuh in kahsruh Kacl, “Fin kom kihsensiyuck angen nuh sel, Nguhn Muhtahl e tuhkuh ac kom e puhla enenweyuck kom ke ma kom kuh in oruh nuh sin mwet sahyac. Ke kom som ac oruh ma inge, kom oasr ke enenuh luhn Leum, ac ke kom oasr ke enenuh luhn Leum, kom fal nuh ke mwe sang luhn Nguhn Muhtahl.”5
Kom kuh in pruhe ac siyuck sin Leum ke kunohkohn. Ke kom e oruh uh, El kuh in orekmakihn talan lom an in ahksahfyelah orekma sacohklacna Lal.
Pahpah mahtuh tuhmuhk, Fritz Hjalmar Lundgren, mwet na Sweden se ke el yac 19 [singucul yuc]. El ai fin acn Macrike, sifacna, wi fihlis se lal ac yac na ohnkohsr iyacna ke lwen in lutlut. Tiac kuh in sramsram kahs English, el oraclah fahlac lal nuh Oregon ac orekma we ekihn mwet in orekma ke lumber ac tok, wi pac ninac mahtuh kiyuck ac ninac kiyuck, wi Alu uh. Tiac oasr pacl se el karihngihn ward se, tuhsruhk el mwet na oaru ke luti in sucu, el us kain in sucu 50 [lamngaul] nuh ke mukwikwi ke Alu ah. El oruh fuhkah?
Tukun misac lal Pahpah Mahtuh, nga sroacng liye pohk in pepuh nahtuhl ac lwacta se sihmlac sin mukul se suc fohlohk nuh ke alu ah ke srihpen luhngse luhn Pahpah Mahtuh. Lwacta sac fahk, “Lukmac se lal Tamuhlwel Fritz, nga luhlahlfongi, lah el pa kwacna oruh orekma ke Pahpah Tuhmasr Inkuhsrao.”
Lwacta sac ma tuhkuh sel Tamuhlwel Wayne Simonis. Pahpah Mahtuh el muhtwacta yohrohl ac etwaclah kais sie mempucr ke sucu lal. Ke pacl, Pahpah Mahtuh el fahk nuh selos lah elos enenweyuck ac elos suliyuck nuh ke alu ah. Tuhsruhk ke Sacnri sac, Tamuhlwel Simonis el tuhkahkwack ke elyah se—el tiac ahksahfyelah fin lohm sel ah ac elos etuh muh e af ke wik sac. El sulwaclah elan som nuh ke alu ah, usrusrpo yohrohl Pahpah Mahtuh, na el ac som ac fohlohk nuh lohm sel ah in ahksahfyelah fin lohm sel ah. Sucu lal ah kuh in wi pacl in sackracmacn ac tiac weluhl.
Ma nuhkwewa wo ke plwacn lal nwe ke, fin lohm sac, el lohng mwet se fanyak ke mwe fan ah. Ke kahs lal el fahk: “Ke nga ngwetack nuh lucng, … tu e lucng fin mwe fan ah pa Tamuhlwel Fritz. El isrwacsrwelihk nuh sihk. Pacl se omeet ah, nga puhla mwekihn ac puhla oacna tuhlihk srihsrihk se langyak ke tiac wi kuhtuh kuhlahs. Na … nga puhla ahngyahng. [Tuhsruhk Tamuhlwel Fritz el] eslah nuknuk toasr lal ma afihnilyac ac sruhpuhsrwack ke mwe fan uh. Ke el luhmuhnwack poun fohrohk fasrfasr lal ah, el forma nuh sihk ac fahk, ‘Tamuhlwel Simonis, oasr ahmuhr sahyac? Orekma se inge sahp arulacna yohk srihpac kuh kom tiac enenuh in sislah sucu lom ah, ac fin yohk srihpac angen, nga luhngse kahsrwe kom.’ Ke nga ngwetwacng nuh ke muhtahl, nga liye kuhlwacng muhkwena ac luhngse oacna Kraist. Ahngyahng luhk som likiyuc. … Nga filiyac kuhfwen osra nuhtihk ke Sacnri ac ukwe kawuck wowo luhk nuh ten ke yen fan uh ac fohlohk nuh lohm alu ah.”
Pahpah Mahtuh el eslah elyah lal sin Leum, ac el etuh el pa in suk sip ma tuhlac. Oacna mukul ahkosr suc us kawuck se lalos ma mahtoltollac fin lohm uh ac fuhlwelah elan fani in onweyucklac Sel Jisus Kraist,6 ma ke elyah luhn Pahpah Mahtuh el eisacl nuh fin lohm uh. Leum El suhpwaclah fwackyuck nuh sin mwet suc suk in kahsruh mwet sahyac.
4. Luhlahlfongi
Met liki na, nga riti ke ma suhmuhslah ke misineri na wowo se suc eis orekma lal ma tuhkuh sin Leum. Aaron el luti tohkohsrah luhn mwet Laman, suc nuhnkuh lah efuh tamuhlwel lal Aaron, Ammon, el tiac tuhkuh in lotwel. “Ac Aaron el fahk nuh sel tohkohsrah: Liye, Nguhn luhn Leum pahnglol ke siepacna inkacnek.”7
Nguhn sramsram nuh sihk ke insiyuck: kais sie sesr siena ma kunac in orekma, ac ke pacl Nguhn e tuhfah pahngon kuht ke “innek sahyac.” Oasr kain in srihpac in muhsaheack tohkohsrahi luhn God ke olwelah-oreklac, olwelwah in-karihngihn mwet tuhma lutlut luhn Jisus Kraist. Ke mwet tuhma lutlut oaru Lal, kom kuh in eis ma lom sifacna ma sacohklacna ac fwackyuck, fal nuh ke masap Lal, ma oreklac nuh sum. Oasr kuhlwacnsap lom ac ma enenuh kom in oruh ke moul ac e tuhfah ituckyang kolyuck in nwacklah.
Nephi, tamuhlwel lal Jared, ac finne Moses nohfohnna oasr mahno luhlahp in kof in tuhpali—ac kais sie oruh siena. Nephi el orekma “ke usrnguck ke kain in sroasr nuhkwewa ke ipin sahk.”8 Tamuhlwel lal Jared el musaheack oak muh “tihngtihng oacna sie ahluh.”9 Ac Moses el “fahsr sasla in meoa fin acn pao.”10
Kais sie selos eis kolyuck la sifacna, suwohs nuh selos, ac kais sie luhlahlfongi ac orekma nuh kac. Leum El etuh selos suc ahkos ac, ke kahs lal Nephi, ac fah “ahkolah sie inkacnek nuh [sesr] in oraclah ma suc el sapkihn.”11 Akihlen lah Nephi el fahk, “inkacnek se”— tiac “inkacnek pwacye.”
Kuh kuht muhlkuhnlah kuh lahfwekihn orekma lasr ma tuhkuh sin Leum mweyen El ahkolah “inkacnek se” siena liki ma kuht etuh muh e sikyak uh?
Pahpah Mahtuh tuhmuhk el kolyucklac nuh in acn kuht tiac etuh kac se—ke nuknuk toasr lal suc afuhnuhllah, ke fin lohm se, ke lwen Sacnri. Luhlahlfongi ke God in kol kom. finne atac sacn liyeyuck muh sienna nuh sum oacna ke kom nuhnkuh uh kuh in sienna liki mwet sahyac.
Mwet Luhlahlfongi ke Lwen-sahflah tuhkuh ke kain in atac ac sais, tuhsruhk “mwet nuhkwewa in oacna sie nuh sin God”—“sralsral ac fasrfasr, srohoh ac sukohsohk, mukul ac muhtwacn,” tiac macruht kuh macruht, kahsruhp kuh suhkahsruhp, fuhsr kuh mahtuh, mempucr pacl loes ac mwet sasuc ke alu uh.12 Tiac elyah lah suc kom an kuh ma kom orekma nuh kac uh, kom suliyuck nuh ke tepuh luhn Leum.13
Ke suk ac oruh luhngse luhn Pahpah pa puhsra nuh sum ke inkaiyacn pacl ke moul, kom e tuhfah, pwacye, kolyuck in ekuhllah ac auliyak.
Prokracm sasuc luhn Alu uh ke tuhlihk srihsrihk ac tuhlihk fuhsr pa in muhsaheack acn in lutlut in sokwack fwackyuck, oaru in oruh lah meac Leum El ac ahkolah nuh sesr in oruh, ac oruh orekma nuh ke ma ingacn. Kais sie sesr, finne nuh ke yac kuh srihpac, kuh in kuhtanglah in suk, eis, ac orekma. Ke kom e ukwe pactuhn ma wacngihn sahflahyac se inge ke lwen lasr, kom e fah fototoyang nuh sin Jisus Kraist—ke luhngse Lal, kahlwem Lal, inkacnek Lal, mihslac Lal, ac onweyuck Lal ac kuh Lal. Ac kom e fah ahkyohkye kuh lom in eis ma luhn nguhn in eklac nuh ke muh lwen nuhkwewa mwe sritacl in on se ke Pahol in ahksahfyelah orekma wolacna Lal. Ke inen Jisus Kraist, amen.