Luhlahlfongi, Tiac Suhlahlahlfongi
Kuht enenuh sulwaclah in eslah pacl ke ma luhn facluh ac sang nuh ke ma luhn inkuhsrao.
Tiac loes pacl met ah nga tuhkahkwek ac ahkolah in lutlut ke ma suhmuhslah. Nga sruhkwack smartphone nuhtihk ac muhta ke siah sisken ma kiyuck ke kena se in ikacslah Gospel Library app an. Nga ikacslah phone nuhtihk ac apkuhran in muhtwacwack in lutlut ke nga liye mwe sulkackihn puhspuhs ke sap ke text ac email ma tuhkuh ke fong ah. Nga nuhnkuh, “Nga kuh in sa na liye sap ingacn, ac tok nga kuh in fohlohk nuh ke ma suhmuhslah.” Tuhsruhk, tukun ao luo somlah nga srackna riti sap ke text, email, pweng fototo, ac ma sihmihsyucklac ke social media. Ke nga akihlacnwack pacl uh, nga silahklahk in ahkolah ke lwen sac. Ke lututacng se ingen nga tiac lutlut ke ma suhmuhslah, na nga tiac eis mongo fal luhn nguhn ma nga finsrak kac.
Mongo luhn Nguhn
Nga muh puhs suwos kuh in kahlwem kac. Technology ke pacl se inge ahkinsewowoye kuht ke ohiyac pucspucs. Elos kuh in oracni kuh yurin kawuck ac sucu, ke mwe etuh, ac ke pweng ke ma sikyak ke facluh. Tuhsruhktuh, elos kuh in pac eiskuhtlac liki mwe kuhpahsr ma yohk srihpac emet: mwe kuhpahsr lasr nuh inkuhsrao.
Nga kalweni ma mwet pahluh lasr, Prestuhn Russell M. Nelson, el tuh fahk: “Kuht muhta ke sie facl na upac ac yohkwaclihk fohs. Oasr luhn mwe aengani ke internet pacl nuhkwewa ac lohlngohk ac ripohrti news ke ao nuhkwewa tiac tui in lain kuht ke pweng uh. Fin kuht ac eis kuhtwena finsrak kuht in suk ma yohk srihpac ke nuhnak puhs luhn mwet ac suhmaht luhn mwet ma lain ma pwacye uh, kuht enenuh in eis etwacack in eis fwackyuck.”
Prestuhn Nelson el kalweni in kai, “Ke lwen ma ac tuhkuh uh, ac fah tiacna kuh in painmoul ke nguhn fin wacngihn pwenyuck, kolyuck, ahkwoye, ac pihrihkyuck pacl nuhkwewa luhn Nguhn Muhtahl.”1
Yac ekahsr tari ah, Prestuhn Boyd K. Packer el sramsram ke un deer tuh, ke srihpen upac snow puhtatlac, sremlah ke acn sahyac ac kuh in misac ke masrinsracl upac. Kuhtuh mwet suc kena oruh ma wo, in kahsruh deer an, fihliyac hay puhs ke acn sacn—tuh tiac pa ingacn mongo ma deer uh kwacna kang, tuhsruhktuh elos finsrak in kahsruh deer an in moul ahluhkwelah winter se ingen. Ke ma ahsor, apkuhran deer ah nohfohn in misac. Elos kanglah hay sacn, tuhsruhktuh mwe mongo sacn tiac kahsrwelos, ac elos masrinsracl ac misac a inseyaclos yohk kihpi.2
Pweng pucspucs tuhkuh nuh sesr ke pacl luhn mwe etuh ac oacna ohiyacn nguhn ke sang mongo hay nuh sin deer—kuht kuh in kanglah lwen nohfohn, tuhsruhk tuh kuht tiac kuh in kihpi kac.
Kuht kuh in konwacack oyac mongo luhn nguhn? Inkaiyacn pacl uh, kain ma inge tiac oasr ke acn in aengani ke internet. Kuht konwacack ma ingen ke kuht “fahsr na nuh met” ke inkacnek wuhlweacng, “met, sihkalweacng na in lihksrweni sruokyac osra uh,” ac ipeis ke fahko luhn sahk in moul.3 Kalmacn ma inge pa kuht enenuh in sulaclah in eslah pacl ke ma luhn facluh ac sang nuh ke ma luhn inkuhsrao.
Ke mwemwe lal, Lehi el liye mwet suc ipeis ke fukun sahk tuhsruhk tuh forlah liki sahk soko ah ke srihpen moklweyuck luhn lohm luhlahp ac mwesahs sac, pa insefuhlwact luhn facluh.4 Kuh in sikyak ke mwet fuhsr uh kapwack ke lohm sin Mwet Luhlahlfongi ke Lwen-sahflah, wi toeni ac kuhlahs suwohs nuh kwewa luhn Alu uh, wi pac akwuck lun tempuhl, na forlah fahsr “nuh ke inkacnek sruhngwacyuck na tuhlac.”5 Efuh ma se inge sikyak? Ke sikyak ohinge puhs ma inge sikyak mweyen, finne elos sahp mukwikwi ke ma luhn nguhn, elos tiac eklac na pwacye. Elos mongo tuh tiac kihpi in eis ma enenweyuck.
Ke ohiyac sahyac, nga ohsun nuh sin suwos mwet fuhsr Luhlahlfongi ke Lwen-sahflah suc suhmaht, fokoko, ac oaru. Kowos etuh lah kowos pa tuhlihk mukul ac muhtwacn nuhtin God ac oasr orekma Lal nuh suwohs in oruh. Kowos luhngse God ke insiowos, kuhiyowos, ac nuhnak lowos an kwewa.6 Kowos karihngihn wuhlweacng lowos ac kuhlwacnsapuh mwet sahyac, muhtwacwacack ke lohm suwos an. Kowos orekmakihn luhlahlfongi, auliyak, ac wolac kais sie lwen, ac ma inge usot engan yohk. Kowos ahkolah nuh ke mwe insewowo luhn tempuhl ac ma wo sahyac kom ac eis oacna mwet fahsr tukun Mwet Lahngo pwacye. Ac kowos kahsruh ahkolah facluh ke Tuhkuh Ahk Luo, in suli mwet nuhkwewa in tuhkuh nuh yurun Kraist ac eis mwe insewowo ke Iwaclah Lal. Kowos kuhpahsryang nuh inkuhsrao.
Ahok, kowos sun ma upac. Tuhsruhktuh ma inge sikyak ke fihl nuhkwewa. Pa inge pacl lasr, ac kuht enenuh in luhlahlfongi, tiac suhlahlahlfongi. Nga fahkwack lah Leum El etuh ke ma upac lasr, ac nuh ke kolyuck lal Prestuhn Nelson, El ahkoekuhtlac in ohsun nuh selos. Nga luhlahlfongi lah pahng tuhfahna tari ah luhn mwet pahluh in oasr alu in lohm uh, wi pac ke ma oasr ke lohm alu uh,7 ac oruh in kahsrwe kuht moul—finne moul suwohs—ke lwen inge ke suhfal mongo luhn nguhn.
In Lohm uh
Meac kalmac in oasr kena yohk nuh sin Kraist in lohm uh? Lohm uh kuh in siena luhmah fin facluh nohfohn. Sahp kowos wi sucu suc mempucr ke Alu ke fihl pucspucs. Kuh sahp kowos pa mempucr sefanna luhn Alu ke sucu lowos an. Sahp kowos macruht kuh lolacp, oasr kuh wacngihn tuhlihk ke lohm uh.
Finne ohiyowos, kowos kuh in oraclah lohm suwos in acn in lutlut ac moulkihn wosasuc. Ke kahs fihsrwacsr sahyac, kalmacn ma inge pa in sifacna sruokyac kunohkohn ke eklac ac kapwack luhn nguhn lowos. Kalmac pa in ukwe mwe luti lal Prestuhn Nelson in “karihngihn [eklac in lohm suwos] nuh ke sie lohm muhtahl ke luhlahlfongi.”8
Setuhn el fah srihke fahk nuh suwos lah mongo luhn Nguhn tiac enenweyuck kuh, ke ohiyac suhlalacl, kuh in sano. El pa mwet kol ke ma lusrohngtwen ac mwet sihm luhn kohtwaclah. El fah ahkkahlwemye ma luhman yohk srihpac tuhsruhktuh tiacna yohk srihpac. El kena kowos in “fosrnga ac lokoalok ke ma puspis” lah kowos tiac porongo nuh ke “ma sefanna pa eneneyuk uh.”9
Nga arulacna sruikihn “ninac ac pahpah wo,”10 tuhmuhk, suc tuhfahlah sucu lalos lun lohm se ke mongo luhn Nguhn, kuhpahsr luhngse, ac mukwikwi wo pwacr. Mwe luti elos use ke pacl fuhsr luhk kahsrweyuc in tu ke acn wo. Pahpah ac ninac, nuhnakmuhnahs muhsaeack kuhpahsr kuh yurin tuhlihk nuhtuwos. Elos enenuh pacl yohk lowos, tiac puh.
Karihngihnyuck ke Alu uh
Ke kowos oruh, Alu uh ac kahsrwe kowos. Pacl lasr ke alu uh kuh in ahkfokokoye mongo luhn nguhn ma sikyak lohm ah. Ke yac se inge, kuht liye tari kain ma inge luhn karihngihnyuck ke Alu uh ke Sacnri Skul ac U luhn Tuhlihik Srihsrihk. Kuht ac liye laheslah ma inge ke toeni luhn Aaronic Pristut ac Muhtwacn Fuhsr an pac. Ke Jacnweri se inge, mwe lutlut ke Sacnri ke toeni inge fah eklac kuhtuh. Ac fah srackna lohacng nuh ke sifac yohk srihpac luhn wosasuc, tuhsruhktuh ac fah eklac in wi lutlut oasr ke Come, Follow Me—For Individuals and Families. Pa inge eklac srihk, tuhsruhktuh kuh in oruh eklac yohk ke mongo luhn nguhn luhn mwet fuhsr.
Meac kain kahsruh sahyac luhn Alu uh ? Ke Alu uh kuht ipeis kuhfa luhn Leum, ma kuh in kahsruh kuht in sulpac uli wuhlweacng lasr nuh sin Mwet Lahngo kais sie wik. Ac ke Alu uh kuht tuhkweni yurin mwet luhlahlfongi sahyac suc oacyacpac oraclah wuhlweacng oacpacna inge. Kuhpahsr luhngse ma kuht oraclah yurin mwet tuhma lutlut luhn Jisus Kraist kuh in karihngihn kuht ke ohiyacn mwet tuhma lutlut in lohm sesr uh.
Ke nga yac 14 ah, sucu luhk som nuh ke inkucl sasuc se. Sahp ma se inge tiac ma yohk se nuh suwos, tuh nuh sihk, ke pacl sacn, arulacna upac. Ke ma inge nga infulwacn mwet nga tiacna etuh. Ke ma inge mukul fuhsr nohfohn ke ward luhk fah wi acn lutlut sahyacn yuc. Ke nuhnak luhk ke nga matwac yac 14, nga nuhnkuh, “Pahpah ac ninac kiyuck kuh in oruh ma inge nuh sihk fuhkah?” Nga puhlakihn muh oacna moul luhk uh muhsahlah.
Tuhsruhktuh, nuh ke mukwikwi luhn Un Mukul Fuhsr lasr, nga kuh in muhsahi kuhpahsr kuh yurin mempucr ke u luhk, ac elos eklac kawuck luhk. Oacyacpac, mempucr ke pisaprik ac mwet kol luhn Aaronic Pristut muhtwacwacack pwacr in wi ma nga oruh ke moul luhk uh. Elos wi srihtacl luhk. Elos sihm srihsrihk ke pwepuh ma nga srackna sruokyac oasr sihk ne mihsenge. Elos kalweni in sramsram nuh sihk tukun nga som nuh ke college ac ke nga som nuh ke sie misin. Sie selos oacyacpac tuhkuh nuh ke airport ke nga fohlohk nuh lohm ah. Nga ac sruikihn mukul wo inge ke luhngse ac luhlahlfongi yohk lalos nuh sihk. Elos furokyuclac nuh inkuhsrao, ac moul uh eklac kahlwem, engan, ac pwacr.
Kuht oruh fuhkah, ke pahpah ac ninac ac mwet kol, kahsruh mwet fuhsr uh etuh lah elos tiac muhkwena ke elos fahsr ke inkacnek wuhlweacng? In wi pac akiyac kuhpahsr wo, kuht suli elos nuh ke tuhkweni luhlahp ac srihk—ke toeni luhn For the Strength of Youth ac camp luhn mwet fuhsr nuh ke mukwikwi luhn u ac kuhlahs an ke kais sie wik. Tiac srihkkihn kuh se ma tuhkuh ke tuhkweni yurin mwet sahyac suc oacyacpac srihke in tu kuh. Pisap ac mwet kol sahyac, nuhnakmuhnahs lohacng in ahkkapye tuhlihk ac mwet fuhsr ke ward lowos. Elos enenuh pacl yohk lowos, tiac puh.
Finne kowos pa mwet kol, mwet tuhlan, mempucr ke u, kuh Mwet Luhlahlfongi muhkwena, kowos fin eis pacl wo in eklac kahlyac moul luhn mwet fuhsr se, kahsrwel in kuhpahsryang nuh inkuhsrao. Sahp kahsruh lowos an pa “karihngihnyuck ke Alu uh” ma mwet fuhsr enenuh na pwacye uh.
Tamuhlwel ac Tahmtahel, nga fahk lah Jisus Kraist El kol Alu se inge. El mokle mwet kol lasr ac kol kuht nuh ke mongo luhn nguhn ma kuht enenuh in moul ac engan ke lwen sahflah inge. Mongo luhn nguhn inge fah kahsrwe kuht in luhlahlfongi ac tiac suhlahlahlfongi. Ke inen Jisus Kraist, amen.