Wi Wuhlweacng
In wi God ac in tuhkweni fahsr ke inkacnek in wuhlweacng Lal pa in ahkinsewowoyeyuck ke ac wi wuhlweacng uh.
Tamuhlwel ac tahmtahel sacohk, sramsram se fahkwack ke tuhlihk ke U luhn Tuhlihk Srihsrihk suc pruhe. “Kuloh ke lwacta A, lwacta B, … lwacta G.” Pruhe luhn tuhlihk sac fahfahlac na, “Kuloh ke lwacta X, Y, Z. Pahpah Lucng Sacohk, kuloh ke nempuh 1, nempuh 2.” Mwet luti se ke U luhn Tuhlihk Srihsrihk uh el fosrngahlah tuhsruhk el sano na. Tuhlihk sac fahk, “Kuloh ke nempuh 5, nempuh 6—ac kuloh ke mwet luti se luhk ke U luhn Tuhlihk Srihsrihk. El muhkwena pa mwet se suc lwelah nga in ahksahfyelah pruhe luhk uh.”
Pahpah Lucng El lohng pruhe nuhkwewa luhn tuhlihk uh. Ke luhngse ma wacngihn sahflahiyac, El suli kuht in tuhkuh luhlahlfongi ac in wi ke wuhlweacng.
Facl se inge sesseslah ke aruhrruhma tiac pwacye, mwe ahklohsr, mwe pwen motom kom in tiac lohacng wo. Puhslac ma luhman ma ke kihtin pacl ac kikiacp na. Ke kuht fihliyac nuh sahyac mwe afihnyac muhtahsr, mwe kiyacpwelah, ma luhngkihnyuck ac sruhngwacyuck sin un mwet sukok eye, kuht srohnfuhsri ma ac tiac wacngihnlac ke kihtin na pacl, aetuhi paht liki na kihtin pacl, kuh ukweyacn ma wacngihn srihpac luhn facluh. Sruikihn lah, oasr sie inkacnek nuh ke top ma oasr srihpac.
Ke kuht tuhkuh nuh ke masap wolacna luhn God in luhngse El ac elos suc raunikuhtlac ke wuhlweacng, kuht oruh ohinge tiac ekihn mwet sac kuh mwet fahsr, tuhsruhk ekihn tuhlihk Nahtuhl ke lohm ah.1 Kahs mahtuh se srackna pwacye. Ke kuht sifacna sislah ohiyac luhn facluh lasr ke kuht wi wuhlweacng, kuht sifacna konwacack ac eklac nuh ke ohiyacsr ma pahtpaht wo emet2—sukohsohk, moul, pwacye—ac ahkuhtweyac kuhpahsr yohk srihpac emet lasr nuh sin mwet uh. Wi wuhlweacng uh pa in oraclah ac liyacacng olwelah muhtahl nuh sin God ac sie sin sie ke akwuack muhtahl muh suli kuh luhn god in ahkkahlwemyeyuck ke moul lasr.3 Ke kuht wuhlweacng ke kuhiyacsr nohfohn, kuht kuh in eklac wo liki met ah. Wi wuhlweacng uh use acn, ma kolyuck, kuh in eklac. Ma inge oraclah luhlahlfongi nuh ke moul ac molwelah.4
Wuhlweacng muhtahl uh pa sie ma tuhkuh ke luhngse nuh sin ac sin God me, ac ohinge nuh ke ac nuh sin sie sin sie. God, Pahpah tuhmwacsr Inkuhsrao, El luhngse kuht yohk liki ac etwe kuht wo liki na kuht luhngse ac etwe kuht sifacna. Luhlahlfongi ke Jisus Kraist ac eklac luhn kais sie mwet (auliyak) use pahkotwen, kuhlwacng, nuhnakmuhnahs. Ma inge ahkkweye mwet ngalyak, muhkuhlacna, nuhnuhnkuh koluk ma kuht puhlakihn ke moul suhkawihl. Ke oruh luhn God, Pahpah tuhmwacsr Inkuhsrao El kena kuht in eis mwe sang wo se emet—engan Lal, moul ma pahtpaht Lal.5
God lasr pa sie God luhn wuhlweacng. Ke ohiyac Lal, El “liyacacng wuhlweacng ac ahkkahlwemye pahkotwen.”6 Wuhlweacng Lal muhtweng “fin wacngihn sahflahiyacn pacl uh, kuh facluh fah tu na, kuh ac fah oasr siefanna mwet fin facluh in moliyucklac.”7 Tiacna orek kuht in muh forfor wel ac ahlohloh, tuhsruhk in kaksak ke inmahsrlon kuhpahsr sacohk ke wuhlweacng ma “fokoko liki mwe kapihr luhn misac.”8
Akwuck ac wuhlweacng luhn God uh ma enenweyuck se nuh sin mwet nuhkwewa ac ma wo se nuh sin kais sie mwet. Ke wolacna luhn God, kais sie mwet ke acn ac matwac nuhkwewa kuh in eis akwuck in molwelah. Sukohsohk in sulaclah uh wi pacna—kais sie mwet ac sulaclah in insese in eis akwuck ituckyang an. Akwuck luhn God uh use mwe akucl ma use kahs in kolyuck wo ke inkacnek Lal ke wuhlweacng. Kuht pahngon plwacn luhn God in uslah tuhlihk Nahtuhl nuh lohm ah muh plwacn in molwelah liki ma koluk, plwacn in molwelah, plwacn in engan. Molwelah liki ma koluk, molwelah, engan ke moul celestial uh kuh ke srihpen Jisus Kraist El “oraclah iwaclah suwohswohs se inge.”9
In wi God ac in tuhkweni fahsr ke inkacnek in wuhlweacng Lal pa in ahkinsewowoyeyuck ke ac wi wuhlweacng uh.
Ma se met, wi wuhlweacng uh ahkkahlwemye lah Jisus Kraist pa “mwet akiwe su oakiya wuleang sasu.”10 Ma nuhkwewa kuh in tuhkweni orekma nuh ke woiyacsr ke kuht “ahkmuhtahlyeyucklac in Kraist … ke wuhlweacng luhn Pahpah.”11 Mwe insewowo wo ac uliyuck nuhkwewa tuhkuh nuh selos suc tu na kuh ac oaru ne ke na sahflah. “Ohiyac engan lalos suc liyacacng masap luhn God” pa in “ahkinsewowoyeyuck ke ma nuhkwewa, kwewana ke ikoac ac nguhn,” ac in “muhta yurun God ke … engan wacngihn sahflahiyac.”12
Ke kuht oruh kuhiyacsr in muhta na ke wuhlweacng lasr, sahp kuhtuh pacl uh kuht puhlakihn muh kuht oasr yurin lihpufacn. Ac kuht ac fah—elos suc kuht luhngse ac suc ahkinsewowoye kuht ke lacfacl se inge ke lihsrlihsr uh, ac elos suc luhngse ac ahkinsewowoye kuht ke lacfahl se sahyac ke lihsrlihsr uh.
Ke pacl puh somlah ah nga ac Tahmtahel Gong tuh liye ke pacl wolacna emet ke wi wuhlweacng se ke sie rum ke ohspituhl. Pahpah fuhsr se arulacna enenuh sie kidney ah. Sucu lal ah tuhng, lalo, ac pruhe kacl elan eis sie kidney ah. Ke nus se tuhkuh lah kidney in molwelah moul se oasri, muhtwacn kiyacl ah mahmah fahk, “Nga finsrak tuh sucu se sahyac ah in wo na.” In wi ke wuhlweacng pa, ke kahs lal Mwet Sap Paul, “kut kewa fah akasrui, lulalfongi lowos ac kasreyu, ac lulalfongi luk ac fah kasrekowos.”13
Ke inkacnek in moul uh, sahp kuht ac suhluhlahlfongi God, tuhsruhk El tiacna suhlahlahlfongi kuht. Ke ohiyac se, kahlwem ke motonoac Lal uh kahlmwelihk pacl nuhkwewa. El suli kuht in tuhkuh kuh fohlohk nuh ke wuhlweacng ma akucliyac inkacnek Lal. El sano na ahkolah in apihskuhti, finne ke kuht srackna “loesla liki.”14 Ke kuht liye ke sie muhtah ma luhlahlfongi nuh ke ohiyacn pactuhn, kuhruh, kuh tul ma kuhpahsrweni ke lain soko ke ma kuht puhlakihn, kuht kuh in liye pahkotwen yohk ac ahkkweye Lal, yohkna ke upac, ahsor, ac ongaiyac lasr, oacyacpac ke engan lasr. Tuhsruhk puhs pacl kuht tihkuclkucl kuh puhtatlac, kuht fin ahkwot nuh met nuh Yohrohl, El ac fah kahsrwekuht, kais sie falkac ke kais sie pacl.
Ahkluo, Puk luhn Mormon pa mwe ahkpwacye se ma kuht kuh in sruok ke pahosr ke wi wuhlweacng uh. Puk luhn Mormon pa kuhfa uliyuck ke orekweni luhn tuhlihk nuhtin God ma tuh palyeiyuck oacna sie wuhlweacng sasuc.15 Ke kuht riti Puk luhn Mormon, ke kuht sifacna ac ke kuht wi mwet sahyac, lah kuht kahkahsrihk rit kuht rit in yohk, kuht kuh in siyuck sin God “ke inse pwacye, kena in etuh na pwacye, luhlahlfongi Kraist,” ac eis ke kuh luhn Nguhn Muhtahl ke mwe ahkkweye luhn God lah Puk luhn Mormon pwacye.16 Ma se inge wi pac ke mwe ahkkweye lah Jisus Kraist El pa Mwet Lahngo lasr, Joseph Smith el mwet pahluh ke Sifilpac Fohlohkihnyuckyak, ac Alu luhn Leum uh pahngpahng ke Inel—Alu luhn Jisus Kraist luhn Mwet Luhlahlfongi Lal ke Lwen-sahflah.17
Puk luhn Mormon sramsram ke wuhlweacng ke pacl mahtuh omeet ah ac ke pacl inge nuh sum suc pa tuhlihk nahtuhl Lehi, “tuhlihk nuhtihn mwet pahluh.”18 Pahpah mahtuh tuhmom an tuh eis sie wuhlweacng ma uliyuck lah kom, fihlin sucu tok lalos, ac akihlen sie puhsra oacna in tuhkuh liki infohk uh yak ke Puk luhn Mormon.19 Puhsra se ma kom puhlakihn ke kom rit an fahkwack lah kom “tuhlihk ke wuhlweacng”20 ac Jisus pa Mwet Shepherd Wo lom.
Puk luhn Mormon suli kais sie sesr, ke kahs lal Alma, in ilyak “nuh ke sie olwelah [yurun Leum], tuh [kuht] fah kuhlwacnsuhpwacl ac karihngihn masap Lal, tuh Elan okwaclah Nguhnal in yohk nuh [facsr].”21 Ke kuht kena in eklac wolac liki met ah—oacna ke sie mwet el fahk, “in tui tilac suhpwacr ac in engankihn in engan”—kuht kuh in eklac in mwesahs nuh ke kolyuck, kahsruh, ac ahkkuh. Kuht kuh in tuhkuh ke wuhlweacng in wi yurun God ac sie un mwet luhlahlfongi oaru ac eis mwe insewowo ma uliyuck ke mwe luti luhn Kraist22—ingena.
Kuh ac wal ke pristut ma sifilpac fohlohkihnyuckyak in ahkinsewowoye tuhlihk Nahtuhl nuhkwewa pa sie sin ip tolu ke wi wuhlweacng uh. Ke fihlin pacl se inge, John Pacptais ac Mwet Sap Peter, James, ac John elos tuhkuh oacna mwet utuck pweng wolacna sin God me in sifilpac fohlohkohnwack kuh ke pristut Lal.23 Pristut luhn God ac akwuck Lal ahkwoye kuhpahsr luhn mwet fin facluh ac kuh in siliyac kuhpahsr in wuhlweacng inkuhsrao.24
Pristut uh kuh in ahkinsewowoye ke ahwowo ne ke na mwet se misac—ke na pacl se ahwowo se eis mwe ahkinsewowo ke inel ne ke na alullah kuclyuck uh. Mwe ahkinsewowo ke pristut uh ah ahkkweye, ahkwoye, kahsruh. Pahpah se tuh kasrkuhsrak sin wen se nahtuhl ne ke na nuhnakmuhnahs ke luhngse tuhkuh ke pahpah sac sang mwe ahkinsewowo ke pristut na wo nuh sin wen se nahtuhl ah. Mempucr sefanna luhn Alu uh ke sucu lal ah, muhtwacn sacohk fuhsr se tuh ahlohloh ke luhngse luhn God nuh sel ne ke na el eis mwe ahkinsewowo mokleyuck ke pristut. Fin facluh nohfohn, patriarch wo an ahkolah in nguhn in sang mwe insewowo luhn patriarch. Ke patriarch sacn fihliyac pahol fin sifom, el puhla ac ahkkahlwemye luhngse luhn God nuh sum. El fahk tahk in sucu lom an ke lohm sin Israel. El ahkkahlwemye mwe insewowo sin Leum. Okak pacl nuhkwewa, muhtwacn kiyacn patriarch se tuh fahk nuh sihk lah el ac sucu lal ah suli Nguhn, yohkna ke pacl ma Pahpah tuhmwaclos an ac sang mwe insewowo luhn patriarch.
Ma se sahflah, mwe insewowo luhn wi wuhlweacng tuhkuh ke kuht ukwe mwet pahluh luhn Leum ac kaksakihn moul in wuhlweacng luhn tempuhl, wi pac ke macruht. Wuhlweacng luhn macruht uh arulacna wo ac wacngihn sahflahiyac ke kuht sulaclah ke kais sie lwen ke engan luhn kiyacsr ac sucu lasr met liki engan lasr sifacna. Ke “nga” eklac nuh ke “kuht,” kuht tuhkweni kapwack. Kuht tuhkweni mahtuhuh; kuht tuhkweni fuhsri. Ke kuht ahkinsewowoye sie sin sie ke lusen moul lasr ke kuht muhlkihnkuhtlac sifacna, kuht sokwack finsrak ac engan lasr ahkmuhtahlyeyuck ke pacl inge ac nuh tok ma pahtpaht.
Oasr kain in moul siena, ke kuht oruh ma nuhkwewa ma kuht kuh in oruh, ke kuhiyacsr, ac siyuck ke inse pwacye ac suk kahsruh Lal ke fuhfahsryucsr uh, Leum El ac fah kol kuht, ke pacl Lal ac ohiyac Lal, ke Nguhn Muhtahl.25 Wuhlweacng luhn macruht uh akwucki ke kwewana insese in sulaclah—mwe acsmakihn ke suhnakihn luhn God ac lasr ke sukohsohk in sulaclah ac ke mwe insewowo ke kahsruh Lal ke kuht tuhkweni suk ma inge.
Fahko ke wi wuhlweacng ke fihlin fihl in sucu an puhlakihnyuck in lohm sesr ac ke insiyacsr. Nuhnak muhnahs lwelah ngan ahkkahlwemye ke ma nga sifacna puhlakihn.
Ke Tahmtahel Gong ac nga muhtwacwacack in aluhngsei ah ac fahfahlac in macruhtlac, nga etwacack ke sukohsohk in sulaclah ac ohiyacn sulaclah. Ke puhlan pacl se, kuht lutlut ke lohm lutlut tuh muhta ke acn luo ke muhtuhnfacl luo. Pa oruh nga kuh in fahk na pwacye lah nga eislah degree in daktuh ke inmahsrlon muhtuhnfacl uh.
Ke nga siyuck, “Pahpah Lucng, yac nga enenuh in pahyuckyak sel Susan?” Nga tuh puhlakihn mihs. Tuhsruhk ma ke pacl se nga tuh lotwelah in pruhe ke inse pwacye, “Pahpah Lucng, nga luhngse Susan ac nga ke pahyuckyak sel. Nga olwelah tuh ngac oruh kuhiyuck in mukul ac pahpah na wowo se”—ke nga mukwikwi ac oraclah sulaclah wo emet luhk uh, pa ingacn pacl ma mwe ahkpwacye luhn nguhn uh tuhkuh fokoko emet uh.
Inge tahk in sucu luhn sucu lasr Gong ac Lindsay ke FamilySearch, sramsram mahtuh, ac petsac kahsrwekuht in suk ac sokwack ke puhlakihn met ke wi wuhlweacng fihl na ke fihl.26 Nuh sesr, sucu suhnakihnyuck suc kuht tuhkuh we me pa:
Ninac kiyacl ninac mahtuh Maria Elizabeth Blauer, suc tuh siyuckyucklac pacl tolu ke lwen sefanna, tohkohyang el tuh siyuck sin mukul tuhmwacl ah in ahknwacacng mwe futfut se ke pwacskuhl ah nuh ke mwe furohfohr pata se lal ah elan muh kuh in furok pata, orek ohnkoht, ac rit ke pacl sefanna.
Pahpah tuhmwacl pahpah mahtuh Loy Kuei Char el us popo tuhlihk nahtuhl ke fintohkohl ac ma luhn sucu lal ah ke tanki soko ke elos fahsr sahslah ke acn lava e ke Fintuhka Luhlahp Hawaii. Fihlin fihl in sucu ke insacnweacng luhn sucu Char ac kwemkahtuh lalos ahkinsewowoye sucu lasr uh misenge.
Gram Mary Alice Powell Lindsay el muhkwena karingihn tuhlihk srihsrihk limekohsr ke mukul tuhmwacl ac mukul mahtuh se emet nahtuhl misac ke lwen ekahsr inmahsrlo. Katinmas se ke lusen yac 47, Gram el tuhfahlah sucu se lal inge ke luhngse ahkkweyeyuck sin mwet kol ac mempucr ke mura lal ah. Ke lusen yac ekahsr ah, Gram el olweacng nuh sin Leum lah El fin kahsrwel, el ac fah tiacna tohrkahskahs. Leum El kahsrwel. El tiacna tohrkahskahs.
Tamuhlwel ac tahmtahel sacohk, ke ahklohyeyuck sin Nguhn Muhtahl, ma wo nuhkwewa ac ma pahtpaht uh oasr ke infulwen moul pwacye luhn God, Pahpah Ma Pahtpaht tuhmwacsr, ac Wen Nahtuhl, Jisus Kraist, ac Iwaclah Lal. Leum lasr, Jisus Kraist, El pa Mwet Iwe luhn wuhlweacng sasuc. Fahkwack ke Jisus Kraist pa srihpac se in wulweacng ke Puk luhn Mormon.27 Ke kahs in fuhlahk ac wuhlweacng, kuh ke pristut ma God El sifilpac fohlohkohnwack uh ma orek in ahkinsewowoye tuhlihk nuhkwewa nuhtin God, weacng ke wuhlweacng luhn macruht, fihlin fihl in sucu, mwe insewowo luhn kais sie mwet.
Mwet Lahngo lasr El fahk, “Nga pa Alpha ac Omega, Kraist suc Leum; ahok, finne El, muhtwacwackiyac ac sahflahiyac, Mwet in Molwelah luhn facluh.”28
Wi kuht e ke na muhtwacwacackiyac ah, El wi kuht, ke wuhlweacng nuhkwewa lasr, ne ke na sahflah. Nga fahkwack luhlahlfongi ke ine suhnakihnyuck ac muhtahl luhn Jisus Kraist, amen.