Olweacng Fokoko nuh sin Jisus Kraist
God El suli kuht in sislah kwewa ohiyac mahtuh lasr in loes liki kuht ac muhtwacwacack ke sie moul sasuc in Kraist.
Ke Eprel somlah ah, oasr pacl wo se luhk in kihsacelah Tempuhl fin acn Kinshasa Democratic Republic luhn acn Congo.1 Kahs uh tiac kuh in ahkkahlwemye engan luhn mwet oaru Congo ac nga puhlakihn [engan] in liye kihsackuhnlah luhn tempuhl uh fin acn selos.
Elos suc ilyak nuh ke Kinshasa Tempuhl ah liye sie sroal ma ine uh pa Congo Falls.2 Ma se inge ahkacsmakihnye mwet suc som nuh ke tempuhl ke olweacng fokoko ma enenweyuck in lihksreni na tolyac kawuck lom an fungyang nuh yurun Jisus Kraist ac fahsr tukun inkacnek in wuhlweacng ke plwacn luhn Pahpah tuhmasr Inkuhsrao. Waterfall sroallah ke petsac sac oruh mwet uh in lohacng nuh ke sie mukwikwi ma tuh kwacna orek na yohk met ke lusen yac siofok somlah inmahsrlon mwet mahtuh met ma eklac nuh ke Kristin fin acn Congo.
Met liki elos eklac, elos alu nuh ke ma sruhlwaclah, luhlahlfongi lah ma inge oasr kuh fokoko kac.3 Tukun eklac an, mwet pucspucs oruh fahsr lalos nuh ke sie sin waterfall puhkantwen sisken Infacl Congo, suc sie pa Nzongo Falls.4 Mwet eklac inge tohllah ma sruhlwaclah met lalos nuh ke waterfall ah oacna in sie mwe akucl nuh sin God ac mwet sahyac lah elos sislah facsin mahtuh lalos ac insese nuh sin Jisus Kraist. Elos oruh na in oacyac in tiac tohllah ma sruhlwaclah lalos nuh ke acn ma mihs, ac suhloal ah; elos tohllah nuh ke acn ma kof furohfohr ke waterfall luhlahp ah puhtat nuh kac ah, yac ma sruhlwaclah ah tiac kuh in sifilpac fohlohkihnyucklac. Mukwikwi inge pa sie mwe akihlenyac ke ma susauc tuhsruhktuh olweacng fokoko nuh sin Jisus Kraist.
Mwet ke acn sahyac ac kain in matwac ahkkahlwemye olweacng lalos nuh sin Jisus Kraist ke kain in ohiyac sepacna inge.5 Mwet ke Puk luhn Mormon ma etweyuck muh mwet-Anti-Nephi-Lehi elos “fihliyac kuhfwen mwe lainyuck lalos,” pihkihnyac ma inge “in loal infohk uh” oacna “sie luhlahlfongi kuh nuh sin God … lah elos fah tiacna sifilpac orekmakihn mwe mweun [lalos].”6 Ke elos oruh ohinge, elos olwelah in fahsr tukun mwe luti luhn God ac in tiacna fohlohk forlah liki wuhlweacng lalos an. Olweacng se inge pa muhtwacwacackiyacn “eklac forlah nuh sin Leum” ac tiacna puhtatlac.7
Kalmacn “eklac forlah nuh sin Leum” pa in ekuhllah sie inkacnek in mukwikwi, kolyuck ke sie ohiyacn luhlahlfongi mahtuh, ac forlah nuh ke sie ma sasuc ma tuhkuh ke luhlahlfongi ke plwacn luhn Pahpah Lucng ac ke Jisus Kraist ac Iwaclah Lal. Eklac se inge yohk liki na suhmaht insese ke mwe luti luhn wosasuc. Ma inge luhmahlah ohiyac lasr uh, ekuhllah kahlwem lasr ke kalmacn moul uh, ac kol nuh ke oaru ma wacngihn eklac kac nuh sin God. Kena luhn kais sie mwet ma siena liki in kawucki ac fungyang nuh yurun Mwet Lahngo ac fahsr tukun inkacnek wihlwihl in wuhlweacng uh kais kuhtuh wacngihnlac ac ac aholyucklac ke sie insacnweacng in eiskowosyang nuh ke luhngse luhn God.
Eklac forlah nuh sin Leum muhtwacwacack ke sie wuhlweacng fokoko in fahsr tukun God, ke kuht oraclah wuhlweacng se ingacn in pa sie ip kacsr uh. In sruokyac na wuhlweacng se inge ke insiacsr pa sie ohiyacn kapkapwack ke lusen moul fohn se ma se inge enenuh mongfihsrwacsr ac aulikyak pacl nuhkwewa. Tukun pacl ekahsr, wuhlweacng se inge wi ip ke suc kuht uh, infulwacn ohiyac lasr, ac liyeyuck ke moul lasr uh. Oacna ke kuht tiacna muhlkuhnlah inesr sifacna finne wacngihn srihpac ma sahyac ma kuht nuhnkuh kac, kuht tiacna muhlkuhnlah wuhlweacng se suc sihmlac ke insiacsr.8
God El suli kuht in sislah kwewa ohiyac mahtuh lasr in loes liki kuht ac muhtwacwacack ke sie moul sasuc in Kraist. Ma inge sikyak ke kuht oraclah luhlahlfongi nuh sin Mwet Lahngo uh, tuh muhtwacwacacki ke kuht lohng luhlahlfongi kuh lalos suc luhlahlfongi.10 Ohinge, luhlahlfongi yohkwaclihk ke kuht mukwikwi ke ohiyac ma ac ahkfokokoye luhlahlfongi in El.10
Na, acarlac wo kuht fin kuh in ahkfokokoye luhlahlfongi lasr uh oacna ke kuht maswack fwacfohn, kohfkohf, kuh mihsrihsryak uh. Na, “sinaclac in nguhnnguhn” ac ahkkweye luhlahlfongi kacn mwet sahyac. Tuhsruhk tuh tiacna orekma oacna ingacn. Inkacnek sefanna ma luhlahlfongi uh ac kapkapwack uh pa sie mwet in mukwikwike ke luhlahlfongi. Inkaiyacn pacl uh mukwikwi inge moklweyuck ke mwe suli nuh sin mwet sahyac, tuhsruhktuh kuh tiac kuh in “kapwack” luhlahlfongi luhn mwet se sahyac kuh sruokyac luhlahlfongi lasr ma wiwina mwet sahyac an. In oruh luhlahlfongi lasr uh in kapwack, kuht enenuh in sulaclah mukwikwi ma ac ahkyohkye luhlahlfongi uh, ma oacna pruhe, lutlut ke ma suhmuhslah, ipeis kuhfa luhn Leum, ahkohs masap, ac kuhlwacnsapuh mwet sahyac.
Ke luhlahlfongi lasr ke Jisus Kraist uh yohkwaclihk, God El suli kuht in oruh olwelah nuh Sel. Wuhlweacng inge, oacna etuh ke olwelah, ahkkahlwemye eklac lasr. Wuhlweacng oraclah pwelucng pwacye ke kapwack luhn nguhn. Ke kuht sulaclah in pacptaislac, kuht muhtwacwacack in eis nuh facsr sifacna inen Jisus Kraist11 ac sulaclah in ahkkahlwemye kuht sifacna nuh Sel. Kuht olwelah in mukwikwi ac nuhnkuh oacna El ac in kapwack in Ohiyacl.
Wuhlweacng kawucki kuht nuh yurun Mwet Lahngo ac kahsre kuht in fahsr tukun inkacnek ma ac kohllah nuh ke lohm sesr inkuhsrao. Kuh luhn wuhlweacng an pahtok kuht nuh ke inse eklac yohk, ahkloalye eklac lasr nuh sin Leum, ac eis luhmahl Kraist ke ngwetngwetwacsr.12 Tuhsruhk olwelah se ma tahfuh-luo an nuh ke wuhlweacng lasr uh tiac ahkpwacyeye kuhtwena ma nuh sesr.13 Sahp kuht srihfweyucklac in kikiyap, sislah ohiyac mahtuh lasr an nuh ke acn kof mwesahs; kuh in pihkihnyac nohfohn kuhfa in acnwuck lasr an in kuhtwena acn kac in an sahslah liki fohk uh. Oacna olwelah suhfal nuh ke wuhlweacng lasr uh tiac ikacslah sruhngucl in ahkfalye kuh luhn Pahpah Lucng ac Jisus Kraist uh.
Olweacng lasr in sruokyac na wuhlweacng lasr uh tiac enenuh in wiwi na kuh ekyek wiwi na eklac luhn ohiyacn moul lasr uh. Oaru lasr nuh sin God enenuh in oacna acsr muhngnguh ke Infacl Congo ma sohrohrma nuh sisken Tempuhl Kinshasa. Infacl soko inge, siena liki inkaiyacn infacl fin facluh, oacna sie yac-fohn se,14 apkuhran nuh ke milliacn 11 gallon (41.5 million L) in kof ke second se kahklah nuh ke Meoa Atlantic.
Mwet Lahngo El suli mwet tuhma lutlut Lal in muhngnguhiyuck ac oaru. El fahk nuh selos in otwelah ma inge ke insiaclos, tuh elos in fah oruh ma suc El ac luti, ac sapkihn nuh selos.15 In “otwelah” kampare in sruokyac na wuhlweacng lasr ac lwelah kuht in akihlenack kwewa ke olweacng luhn God in eis engan ke lusen pacl loeloes.16
Puhs Mwet Luhlahlfongi ke Lwen Sahflah ahkkahlwemye lah elos “otwelah” tari ke wuhlweacng lalos nuh sin God ac eklac ne tok ma pahtpaht. Lwelah nga in sruhmuhn nuh sum ke mwet tolu inge—Tamuhlwel Banza Mucioko, Tahmtahel Banza Régine, ac Tamuhlwel Mbuyi Nkitabungi.
Ke yac 1977 sucu Banzas elos muhta Kinshasa fin acn se ma pahngpahng Zaire, ingena etweyuck ke ine se Democratic Republic luhn Congo. Elos suhnakihnyuck yohk ke un alu Protestant se lalos ah. Ke srihpen suhmaht lalos ah, alu se lalos ah oraclah ohiyac nuh ke lutlut fuhlwact tuh elos in wi sucu lalos ah in som nuh Switzerland in lutlutac eis mani in scholarhip.
Ke elos muhta Geneva, ke pas soko lalos elos wi nuh ke lutlut ah, Tamuhlwel Banza el kwacna liye lohm srihsrihk se ine ah sihmlac “Alu luhn Jisus Kraist luhn Mwet Luhlahlfongi ke Lwen-Sahflah.” El motko, “Yac oasr Mwet Luhlahlfongi lal Jisus Kraist, ke lweng sahflah uh?” Oacna inge ne ke na el otwelah in som ac liye.
Tamuhlwel ac Tahmtahel Banza elos tuh paingyuck wo ke pracns sac. Elos siyuck kuhtuh kihsensiyuck lalos ke ohiyac luhn God, suc pa oacna, “Fin God El sie nguhn, oacna engyeng uh, kuht oreklac fuhkah ke Luhmahl? El muhta fuhkah fin tron?” Wacngihn pacl elos eis top fal nuh ke pacl misineri ahkuhtweyac ke mwe luti ma sifilpac fohlohkihnyuckyak ke sie lesin fototo. Ke misineri ah som, sucu Banza elos angwetacni nuh sin sie sin sie ac fahk, “yac tiac pa inge ma pwacye ma kuht lohngwack ah?” Elos tahfwelah na in tuhkuh wi alu ac ohsun nuh sin misineri ah. Elos etuh lah pacptais ke Alu luhn Jisus Kraist fohlohkihnyuckyak fah oruh ma in sikyak. Wacngihnlac scholarship lalos, wacngihnlac visa lalos, ac tuhlihk nahtuhlos luo fah enenuh fohlohk nuh ke acn Switzerland. Elos sulaclah in pacptaislac ac ahkkweyeyucklac ke Ohktopa 1979. [sie yucfoko itngucul yuc]
Wik luo tukun pacptaislac lalos, Tamuhlwel ac Tahmtahel Banza elos fohlohklac nuh Kinshasa oacna mempuhr se emet ac ahkluo luhn Alu uh fin acn we. Mempuhr ke Pracns Geneva ah tahfwelah na in sramsram nuh selos ac kahsrelos in sramsram nuh sin mwet kol ke Alu uh. Sucu Banzas elos ahkkweyeyuck in oaru muhtweng in sano pacl wihlwihl ke God El ac akiyac Alu Lal fin acn Zaire.
Ke pacl sac pac, sie tuhlihk lutlut sahyac tuhkuh liki acn Zaire, Tamuhlwel Mbuyi el lutlut fin acn Belgium. El pacptaislac ke yac 1980 [sie yucfoko alngucul] ke Brussels Ward. Tiac paht tohkoh, el kuhlwacnsap ke misin full-time nuh England. Ac God El oruh orekma usrnguck Lal. Tamuhlwel Mbuyi el fohlohklac nuh Zaire ekihn mempuhr ahktolu ke Alu uh fin acn we. Ke lwelah luhn ninac ac pahpah, miting ke Alu met ah tuh orek lohm sel ah. Ke Fepweri yac 1986 [sie yucfoko alngucul ohnkohsr] siyuck se oreklac nuh ke kafucrmacn luhlahp in akihlen Alu uh. Signature tolu luhn mwet citizen fin acn Zaire enenweyuck. Mwet engan tolu inge sainiyac pwepuh in siyuckyuck se ingacn pa Tamuhlwel Banza, Tahmtahel Banza, ac Tamuhlwel Mbuyi.
Mempuhr na wowo inge etuh ma pwacye ke elos lohngwack ah; elos oraclah wuhlweacng ke elos pacptaislac ma kawuckelosi nuh yurun Mwet Lahngo. Elos tuh sislah ohiyac mahtuh lalos nuh ke waterfall for sac ac elos tiacna motko in sifilpac fohlohklac nuh kac. Inkacnek wuhlweacng uh tiacna fihsrwacsr. Fohs luhn politics, suhkwac sramsram nuh sin mwet kol luhn Alu uh, ac ma upac sikyak ke muhsaheack sie un Mwet Luhlahlfongi uh sahp ac ukwacack fin mwet tiac arulacna insacnweacng oacna elos. Tuhsruhktuh Tamuhlwel ac Tahmtahel Banza ac Tamuhlwel Mbuyi oaru ke luhlahlfongi lalos. Elos tuh wi nuh ke kihsaclah luhn Tempuhl Kinshasa, tukun lusen yac 33 [tolngoul tolu] ke elos tuh sainiyac pwepuh in siyuck ke lwelah ma kohllah in akihlenyuck Alu fin acn Zaire.
Sucu Banzas elos oasr inge ke Toeni Luhlahp mihsenge an. Tuhlihk mukul luo nahtuhl, Junior ac Phil, welal ac muhtwacn kiyaclos, Annie ac Youyou pac. Ke yac 1986 [sie yucfoko alngucul ohnkohsr], Junior ac Phil, elos pa mwet luo emet suc pacptaislac welah Alu uh fin acn Zaire. Tamuhlwel Mbuyi el liye toeni se inge yurin muhtwacn kiyacl, Maguy, ac tuhlihk ahkohsr nahtuhlos.
Mwet oraclah emet inge kahlwem ac me sikyak ke kalmacn wuhlweacng ma usaclosme “in etwacack ke Leum God lalos, ac in kaksakihn Jisus Kraist Mwet in Molwelah lalos.”17
Kuht kais sie kawuck nuh sin Mwet Lahngo fuhkah ac muhtweng ac oaru fuhkah oacna mwet inge ac mwet tausin tausin pucspucs sin Mwet Luhlahlfongi Congo suc fahsr tohkohlos ac mwet puhspuhs sahyac fin facluh? Mwet Lahngo El luti ohiyac an. Kais sie wik kuht ipeis ke kuhfa luhn Leum ac orek wuhlweacng nuh sin Pahpah tuhmasr Inkuhsrao. Kuht olwelah in kuhpahsrweni luhmahsr nuh ke luhlahl Mwet Lahngo ke kuht fahk insese lasr in eis nuh facsr Inel, in esamuhl pacl nuhkwewa, ac in liyacacng na masap Lal.19 In acsmak na ahkolah nuh kac wo fal in oruh wuhlweacng inge ke kais sie wik ac kawucki kuht nuh yurun Mwet Lahngo, kahsruh kuht in kahlwem wuhlweacng lasr,20 ac lihksreni na pahtok kuht ke inkacnek wuhlweacng soko an.
Nga suli kom in uli nuh ke sie ohiyac in eklac ke lusen pacl loeloes ke moul luhn mwet tuhma lutlut. Oraclah ac liyacacng olwelah uh. Sislah ohiyac mahtuh lom an nuh ke acn loal ma kof an for ke waterfall an. In pihkihnyac nohfohn kuhfa in acnwuck lom an in wacngihn kuhtwena acn kac in an sahslah liki fohk uh. Ke srihpen Iwaclah luhn Jisus Kraist, in oruh wuhlweacng an ke inse pwacye in muhngnguh in ahkfuhlwactye ma inge ac fah ahkinsewowoye moul lom an ne tok ma pahtpaht. Kom ac fah eklac yohk oacna Mwet Lahngo ke kom sikaleni in esamuhl, fahsr Tohkohl, ac luhngse El. Nga fahkwack lah El pa pwelucng fokoko. El pa suwohswohs, ac olwelah Lal pwacye. Ke inen Jisus Kraist, amen.