Nimet Kiyacpweyuc
Ke kuht ahkos masap luhn God, kuht ac fah kolyuck ke inkacnek pwacye ac fah tiac kiyacpweyucklac.
Misenge, nga usot kahs in kahsruh nuh sin mwet nuhkwewa, tuhsruhk yohkna nuh sin fihl se ma kapkapwack inge—tuhlihk ke U luhn Tuhlihk Srihsrihk, mukul fuhsr, ac muhtwacn fuhsr. Kom luhngseyuck na upac sin mwet pahluh luhn Leum in pacl inge, Prestuhn Russell M. Nelson—yohkna oruh el sramsram nuh sin inkaiyowos ke sie toeni nuh sin mwet fuhsr fin facluh ke yac se tari ah ac sifac an pa “Finsrak luhn Israel.”1 Kuht kwacna lohng ke Prestuhn Nelson el pahngon kowos ke ine sacn, “finsrak luhn Israel,” ke fihl kapkapwack se inge ac nuh ke pacl fahsruh uh ke Alu luhn Jisus Kraist fin facluh.
Kawuck fuhsr luhk, nga kena muhtwacwacack in akacsruhi ke sramsram luo luhn sucu luhk.
Kosro Dalmatian 102 [Siofok Luo]
Yac ekahsr somlah ah, nga fohlohk nuh lohm ah ke orekma ah ac lut ke nga liyacack sroal fasrfasr osrwaclihk acn nuhkwewa—infohk ah, ke sruhnguhl ke garage ah, ac ke lohm simacn brick-sruhsrah se sesr ah. Nga lohacng nuh kac ac sokwack lah sroal ah srwackna sroksrok. Inkacnek in sroal se som nuh ke lihkihnihm tukun lohm ah, ac nga ukwaclah. Acn we, nga konwacack wen nuhtihk matwac-yac-limekohsr ke puhrahs in sroal ke pahol, kahsruhsr ukwe kosro nahtuhsr. Kosro Labrador sralsral na kahto se nahtuhsr ah sroallah tahfuh fasrfasr!
“Meac kom oruh ngacn?” Nga siyuck ke puhsra luhlahp se.
Tuhlihk mukul se nuhtihk ah tui, ngwetma, ngwetwacng liye kosro soko ah, ngwetwacng liye puhras in sroal tultul ke sroal fasrfasr, ac fahk, “Nga kena Milo elan oacna kosro tuhn-sralsral ke movie sac—kom etuh, ma se ke kosro Dalmatian 101 [Siofok Sie] ah.”
Nga luhngse kosro nahtuhsr. Nge muh el wona, tuhsruhk nuhnak luhn wen nuhtihk ke lwen sac siena likiyuc.
Kihsrihk Ngaho Srihsrihk Koakoa Soko
Sramsram ahkluo luhk uh ma kacl great-uncle Grover, suc muhta ke sie lohm ma an ke muhtuhnfwacl srwenglah, an loes liki mura ma puhs mwet we. Uncle Grover el mahtuhuh na pwacye. Kuht motko lah tuhlihk mukul nahtuhsr uh enenuh in sonol met liki el misac. Pa, sie ekuh ah, kuht kahsruhsr loeloes som nuh lohm puhsisacl se sel ah. Kuht tuhkweni muhta in muhtwacta ac fahk nuh sel kacn tuhlihk mukul nahtuhsr inge. Tiac paht ke sramsram sac, tuhlihk mukul fuhsr luo nahtuhsr, sahp matwac yac limekohsr ac ohnkohsr, elos ke tifoki nuh lukunum ah ac sritacl.
Uncle Grover, ke el lohng siyuck se lalos inge, el kuhi sang muhtahl nuh muhtuhn muhtahlos. Muhtahl arulacna mahtuhuh ac tiac akihlenyuck sin tuhlihk mukul inge oruh elos sahngweng kuhtuhsrihk sel. El fahk nuh selos, ke puhsra na toasr se, “Taran—arulacna puhslac skunks lukunum ah.” In lohng ma inge, Lesa ac nga lut kac; kuht sahngweng muh elos ac fah fwifwiyuck sin skuhngk se! Tiac paht tohkoh na tuhlihk mukul ah tufoklac in sritacl ke kuht tahfwelah na in muhtwacta.
Tok, ke kuht sroacng nuh ke stosah ah in fohlohk nuh lohm ah, nga siyuck sin tuhlihk mukul ah, “Kuh oasr skunk komtacl liyacack?” Sie selos topuk fahk, “Moh, wacngihn skunk kuht liyacack, tuhsruhk kuht liyacack kihsrihk ngaho sralsral koakoa fasrfasr se an ke fintohkohl!”
Mwet Kikiacp Yohk Sac
Sramsram ke tuhlihk srihsrihk wowo inge ke elos sokwack kuhtuh ma ke moul ac oaciyacn moul uh oruh kais sie sesr in isrwacsr, tuhsruhk elos oacyacpac ahkkahlwemye nuhnak na yohk srihpac se.
Ke sramsram se emet an, oasr kosro kahto soko nuhtin tuhlihk mukul fuhsr nahtuhsr; tuhsruhktuh, el us kaclohn ke sroal se ac, wi puhrahs in sroal se ke pahol, srihke in sifacna oraclah nuhnak lal.
Ke sramsram se ahkluo an, tuhlihk mukul inge tiacna akihlen ma sensen se elos sun kac ke elos sokwack skunk soko ah. Elos tiacna etuh lah meac se elos sokwack ah, elos sun mwe sensen in kuh na in kweoklac ke kuhtuh mwacta tiac wo. Pa inge sramsram ke tahfonglac in etuh ke sie ma—nuhnkuh na muh ma na pwacye sacn pa ma sepacna sahyac. Ke kais sie sin sramsram inge, mwacta an tiacna upac.
Tuhsruhktuh, mwet puhs ke pacl inge lain elyah yohk liki kain elyah inge. Eltahl ac sahp tiac kuh in liye ma oacna ma na pwacye la an kuh tiac falkihn ke ma pwacye la an. Ohinge, oasr kuh ma orek pacl inge in kol kuht liki ma pwacye wo. Mukwikwi kuhtasrihk ac kikiacp uh som tuhpallah tahfonglac ke srihpen tiac etuh ke ohiyacn sie ma ac kwacna oasr mwacta na upac, tiac fihsrwacsr.
Setuhn, pahpah tuhmwacn kikiacp ac mwet kuhtasrihk koluk sac, el kena kuht in kihsensiyuck ke ohiyacn ma na pwacye la uh ac sahp lusrong ma pwacye ma pahtpaht kuh in ekuhllah ma inge nuh ke ma pwacr yohk liki na ma sahyac. “El oraclah sie mweun lain mwet luhnlahlfongi luhn God”2 ac el muhta kotai ac ahkpahye kuh lal ke lusen tausin yac ekahsr in moklwe tuhlihk nuhtin God in luhlahlfongi muh wo uh koluk ac koluk uh wo.
El oraclah ohiyacl sifacna in ahkluhkuhkye mwet uh lah skunk uh pa kihsrihk ngaho srihsrihk kuh lah, in sruhlwaclah ke sroal, kom kuh in ekuhllah sie kosro Labrador nuh ke kosro Dalmatian tuhntuhn soko!
Inge lwelah kuht in foracng nuh ke sie mwe srihkasrak ke ip yohk se inge ma sukokyak ke ma suhmuhslah, ke mwet pahluh luhn Leum Moses El sun ohiyac se pacna inge. “Moses el utucklac nuh ke sie finohl fuhlwact[;] … el liye muhtuhn God, ac el sramsram nuh Sel.”3 God El lotwel Moses ke ohiyac ma pahtpaht Lal. Finne Moses el moul suhkwaihl ac tiac suwohswohs, God El lotwel Moses “oreklac oacpac Wen Sefanna nuhtihk; ac Wen Sefanna nuhtihk … El as Mwet Lahngo sac.”4
Moses, ke aruhruhma wolacna se inge, Moses el liyacl God, ac el etwaclah ma yohk srihpac se kacl sifacna: finne el suhkawihl, el sie wen nuhtin God.
Porongo ahkwoyac lah meac sikyak ke aruhruhma wolacna se inge ke sahflah ah. “Ac tukun ma inge lah … Setuhn el tuhkuh in srihfwacl,” fahk muh, “Moses, wen nuhtin mwet, alu nuh sihk!”5 Moses el puhlaik in topuk fahk: “Suc kom an? Tuh liye, nga sie wen nuhtin God, oreklac oacpac Wen Sefanna nuhtin God; ac piyac wolacna lom tuh ngan alu nuh sum?”6
Ke kahs sahyac, Moses el fahk: “Kom tiacna kuh in kiyacpweyuclac, tuh nga etuh lah suc nga uh. Nga oreklac ke luhman God. Wacngihn yurum kahlwem ac wolacna Lal. Na efuh kuh nga in alu nuh sum kuh puhtatyang nuh ke mwe sruhf in kikiacp lom?”
Inge lohacng na nuh kac ke Moses el fahfahlacna in topuk. El fahk, “Kom som ingena, Setuhn; nimet kiyacpweyuc.7
Puhs ma kuht kuh in lotwelah ke top fokoko lal Moses nuh ke mwe sruhf sin mwet lokoalok sac. Nga suli kom in topuk oacpacna inge ke kom puhlakihn mwe sruhf uh. Sapkihn nuh sin mwet lokoalok luhn nguhnum ke kom fahk, “Tiohk nuh ingoh! Wacngihn wolacna yurum. Nimet kom srihfe kuh kikiacp nuh sihk! Tuh nga etuh lah nga sie tuhlihk nuhtin God. Ac nga fah kwacna pahngon inen God nuh ke kahsruh Lal.”
Mwet lain sac, tuhsruhk, el tiac fihsrwacsr in sislah ohiyac in kuhnaostwen lal in kiyacpwe ac suhfan kuht. El tiac oruh ohinge nuh sel Moses, kena in oruh Moses elan muhlkuhnlah lah suc el uh ke ma pahtpaht.
Oacna in muh el elan tuhlihk tucltucl, “Setuhn el tuhng wowoyak, ac usruk facluh, ac sapkihn, fahk: Nga pa Wen Sefanna Isuslah, alu nuh sihk.”8
Lwelah kuht in sifilpac liye. Yac kom porongo ma Setuhn el fahk ah? “Nga pa Wen Sefanna Isuslac. Alu nuh sihk!”
Nimet fosrngah, ngac tiac ahkkweokye kom—nga tiac skuhngk soko; nga kihsrihk ngaho srihsrihk wo koakoa sralsral-ac-fasrfasr.”
Na Moses el pahngon God ac eis kuh muhtahl Lal. Finne mwet lain sac el rarrar ac facluh usrukyuckyak, Moses el tiacna fuhlweack. Puhsrwacl fokoko ac kahlwem. “Som likiyuc, Setuhn,” el fahk, “tuh God se inge muhkwena pa ngac fah alu nuh se, suc pa God luhn wolacna.”9
Sahflahiyac ah, “Setuhn … el som … luhkwel Moses.”10
Tukun Leum El sikyak ac ahkinsewowoyacl Moses ke ahkostwen lal, Leum El fahk:
“Insewowo nuh sum, Moses, tuh … kom ac fah ahkfokokoyeyucklac yohk likina kof pucspucs. …
“Ac liye, Nga wi kom, finne nuh ke sahflahiyacn moul lom.”11
Ke Moses el lain mwet lain sac el pa sie mwe srihkasrak kahlwem ac mwe eis etwacack wo nuh sesr kais sie, macnsis lah kuht oasr oyac in moul lasr uh. Ma se inge pa sie pweng fokoko nuh sum sifacna—in etuh lah meac in orek ke el srihke in kiyacpwe kom uh. Tuh kom, oacna Moses, ahkinsewowoyeyuck ke mwe sang luhn kahsruh inkuhsrao.
Masap ac Mwe Insewowo
Kom ac sokwack fuhkah kahsruh inkuhsrao se inge, oacna ke Moses el tuh oruh ah, ac tiac kiyacpweyucklac kuh puhtatyang nuh ke mwe sruhf? Inkacnek kahlwem se nuh ke kahsruh muhtahl uh tuh ahkkweyeyuck ke lwen sahflah inge sin Leum Sifacna ke El fahk: “Ohinge, Nga Leum, etuh ongaiyac ma ac tuhkuh nuh facn mwet fin facluh, pahngon mwet kuhlwacnsap Luhk Joseph Smith, Jun., ac sramsram nuh sel inkuhsrao me, ac sang nuh sel masap an.”11 In orekmakihn kahs fihsrwacsr kuhtuh, kuht kuh in fahk lah Leum, suc etuh “sahflahiyac ac muhtwacwacackiyac ah,”13 etuh ma upac ke pacl lasr uh. Ohinge, El use sie inkacnek in lain ma upac ac mwe sruhf, puhs suhna tuhkuh ke srihpen mokleyuck ke kikiacp luhn mwet lain sac ac lokoalok lal.
Fihsrwacr ohiyac sac. Ke mwet kuhlwacnsap Lal, God El sramsram nuh sesr, tuhlihk Nahtuhl, ac use nuh sesr masap. Kuht kuh in ahkkahlwemye siena fuhs ma nga tuhfahnna fahk ingacn, “Nga, Leum, … pahngon mwet kuhlwacnsap luhk [Prestuhn Russell M. Nelson], ac sramsram nuh sel inkuhsrao me, ac sang nuh sel masap.” Yac tiac ma wolacna pwacye se pa ingacn?
Nga fahkwack mwe ahkpwacye luhk muh Leum El tuh sramsram nuh sel Joseph Smith inkuhsrao me, muhtwacwacak ke Aruhrruhma Se Met wolacna. El oacyacpac sramsram nuh sel Prestuhn Nelson in pacl lasr inge. Nga fahkwack lah God El sramsram nuh sin mwet pahluh ke pacl somlah ac sang nuh selos masap ma ahknoeyucklac in kol tuhlihk Nahtuhl nuh ke engan ke moul se inge ac wolacna ke moul se tok uh.
God El fahfahlac na in sang masap nuh sin mwet pahluh moul lasr misenge. Puhlsac mwe srihkasrak—eklac ke luti luhn wosasuc akwucki-lohm ah, tahpuhkyak ke Alu uh; ahol luti in sucu ac forfor luti wi kahsruh; eklac in masap akwuck luhn tempuhl; ac prokracm sasuc ke luhn Tuhlihk Srihsrihk ac Mwet Fuhsr. Nga fwefwelac ke wolacna ac pahkomuhta luhn Papah Lucng suc luhngse ac Wen Nahtuhl, Jisus Kraist, suc sifilpac fohlohkohnwack Alu Lal nuh facluh ac tuh pahngon sie mwet pahluh ke pacl lasr inge uh. Fohlohkihnyuckyak luhn wosasuc luhn Jisus Kraist sang ahol pacl upac ke fohnlah luhn pacl uh.
Ma koluk uh Tiacna Pa Engan
Ahkostwen nuh ke masap ma ituckyang nuh sin mwet pahluh lasr uh pa sie ki in kahingkihn mokleyuck ac kikiacp luhn mwet kikiacp sac tuh in oacyacpac puhlakihn kaksak ac engan ma wacngihn sahflahiyac. Fihsrwacsr ohiyac muhtahl se inge: suwohswohs, kuh ahkostwen nuh ke masap, use mwe insewowo, ac mwe insewowo use engan, kuh pwacr, nuh ke moul lasr.
Tuhsruhk, ke ohiyac se pacna ma mwet lain sac el srihke in kiyacpwel Moses ah, el srihke in kuhtasrihki kom. El kwacna oruh in nuhmuh el oacna ma ma el tiac oacna. El kwacna srihke in okanlah lah suc el na pwacye uh. El fahk lah ahkostwen uh ac oruh moul lom an in suhpwacr ac lah ac fah eislah engan lom an.
Yac kom kuh in nuhnkuh ke kuhtuh ohiyac in kikiacp lal uh? In mwe srihkasrak, el ahksrihkye mwacta koluk ke ono kuh koluk ac nihmnihm uh ac na fahk muh ac use pwacr. El uskuhtlac nuh ke ma koluk luhn facluh ma oasr ke social media, wi pac kapsra ahkkolukye ac facluh suhtuhuh. Oacpacna, el ahkkahlwemye nuh sesr ma koluk ke internet in ahkkolukye ac ahkngalye kuht, oacna petac koluk, lokoalok lain mwet sahyac ke mweun in kahs ke internet, ac oraclah ma suhtuhuh in ahkfohs ac use sahngweng ke insiyacsr ac insifacsr. El kuhtasrihk mahmah fahk muh, “Fahsr tukuk, ac pwacyena kom fah engan.”
Kahs ma sihmlac ke yac siofok kuhtuh somlah sin mwet pahluh ke Puk luhn Mormon arulacna fal nuh ke pacl lasr uh: “Ma koluk tiacna pa engan.”13 Lwelah kuht in akihlen kikiacp luhn Setuhn ke ma elos oacna. Lwelah kuht in tu na kuh ac kahlwem ke kikiacp ac mokleyuck luhn el suc kena in kuhnahoslah nguhnasr ac pihsrwaclah engan lasr in pacl inge ac wolacna lasr ke pacl fahsruh uh.
Tamuhlwel ac tahmtahel sacohk wiyuck, kuht enenuh in ahkwot in oaru ac karihngihn, tuh pa inge ohiyac sefanna in etuh ma pwacye ac in porongo puhsren Leum ke mwet kuhlwacnsap Lal. “Tuh Nguhn sramsram ke ma pwacye ac tiac kikiacp. … Ma inge ahkkahlwemyeyuck nuh sesr in kahlwem, nuh ke molwelah luhn nguhnasr. … Tuh God El oacyacpac sramsram ke ma inge nuh sin mwet pahluh mahtuh met ah.”14 Kuht pa Mwet Luhlahlfongi luhn God Kuhlacna, finsrak luhn Israel! Yac kuht ac tikuclkuclack? “Yac kuht ac molokeni kuh kahingkihn acnwuck uh? Moh! . Nuh ke sap luhn God, nguhn, inse, ac paho, oaru ac pwacye kuht ac fah tu na kuh.”15
Nga fahkwack ahkloh sacohk luhk ke El Suc Muhtahl luhn Israel—finne Jisus Kraist. Nga fahkwack ke luhngse, ma pwacye, ac engan ma pahtpaht Lal ma oreklac kuh ke iwaclah ma wacngihn sahflahiyac ac ma pahtpaht Lal. Ke kuht ahkos masap Lal, kuht ac fah kolyuck pacl nuhkwewa ke inkacnek pwacye ac fah tiac kiyacpweyucklac. Ke ine muhtahl luhn Mwet Lahngo lasr, Jisus Kraist, amen.