Masap Yohk Ahkluo
Engan yohk se emet lasr uh tuhkuh ke kuht kahsruh tamuhlwel ac tahmtahel wiyacsr.
Tamuhlwel ac tahmtahel sacohk, kuloh ke ke ma nuhkwewa kowos oruh in kahsruh fahsrweni luhn Israel ke kwewana lacfahl ke acn lihsrlihsr, in ahkkweye sucu lowos an, ac in ahkinsewowoye moul lalos suc enenuh. Kuloh ke kowos moul oacna mwet fahsr tukun Jisus Kraist.1 Kom etuh ac luhngse in ahkos masap yohk luo Lal an, in luhngse God ac in luhngse mwet tuhlan lom.2
Ke mahlwem ohnkohsr tari ah, nga ac Tahmtahel Nelson tuh ohsun nuh sin tausin sin Mwet Luhlahlfongi ke kuht tuh forfor nuh Infulwen acn ac Epang America, fintuhka Pacific, ac kain in mura fin acn United States. Ke kuht forfor ah, finsrak lasr pa in muhsaheack luhlahlfongi lom an. Tuhsruhk pacl nuhkwewa kuht fohlohkoh luhlahlfongi lasr pa tuh ahkkweyeyucklac sin mempucr ac kawuck kuht ohsun nuh se. Lwelah ngacn akacsruhi ke pacl yohk srihpac tolu ke ma kuht puhlakihn ke pacl fototo somlah?
Ke Mei, nga ac Tahmtahel Nelson weluhl Elder Gerrit W. ac Tahmtahel Susan Gong forfor nuh Epang Pacific. Ke kuht oasr Auckland, New Zealand, kuht kaksak in ohsun nuh sin mwet kol pruhe ke acn in alu mosque luo fin acn Christchurch, New Zealand, yac mahlwem na luo met liki ah, mwet wo ma som alu tuh likacskiyucki ke sie mukwikwi na koluk ke ongaiya yohk.
Kuht ahkkahlwemye ahsor lasr nuh sin tamuhlwel inge ke siepacna luhlahlfongi ac ahkkweyelah insacnweacng ke insese lasr nuh ke sukohsohk in alu.
Kuht oacyacpac sang kahsruh ke orekma ac kahsruh ke ip luhn mani in sang kahsruh in sifilpac muhsaheack lohm in alu mosque lalos. Miting se lasr wi mwet kol ke alu Muslim ah sesseslah ke ahkkahlwemyeyacn puhlakihnyuck wowo inmahsrlon tamuhlwel.
Ke Ohkohs, nga weluhl Elder Quentin L. ac Tahmtahel Mary Cook, Tahmtahel Nelson tuh ohsun nuh sin mwet fin acn Buenos Aires, Argentina—inkaiyaclos tiac wi luhlahlfongi lasr uh—suc moul lalos tuh eklac ke siyah pahtpaht ma tuh ituckyang nuh selos sin Kahsruh ke Luhngse Pwacye luhn Mwet Luhlahlfongi ke Lwen Sahflah. Kuht tuh mokleyuckyak ke elos ahkkahlwemye engan-sesseslah ke kuloh ke elos kuh in sul forfor inge.
Pacl yohk srihpac sacohk ahktolu sikyak ke wik na puh tari ah yenuh fin acn Salt Lake City. Ma se inge tuhkuh ke lwacta se nga eis ke lwen luhk ah sin sie muhtwacn fuhsr suc ngwac pahnglol Mary—yac 14.
Mary el suhmuhslah ke ma nga ac el oacna sie kac: “Tuhlihk 10 nuhtum. Tuhlihk 10 nahtuhsr. Kom kahs Mandarin. Itkohsr sin tuhlihk ke sucu luhk uh, wiyucyang, nuhtlac China me, oruh Mandarin pa kahs se emet lasr uh. Kom sie mwet laslas at. Tahmtahel se wiyuck el ikacklah-at lal ah [laslas] pacl luo. Kom luhngse ao-luo ke alu. Kuht luhngse ao-luo ke alu. Wo puhsrwem ke on uh. Wo puhsrwen tamuhlwel se wiyuck ke on uh pac. El kun oacna nga.”
Kahs lal Mary ah kahlyac loal insiuck, ahkkahlwemye tiac nguhn yohk lal muhkwena tuhsruhk oacyacpac ahkmuhtahlyeyuck luhn ninac ac pahpah tuhmwacl an.
Mwet Luhlahlfongi ke Lwen Sahflah, oacna mwet sahyac suc fahsr tukun Jisus Kraist, elos kwacna suk inkacnek in kahsruh, in ahkkweye, ac in luhngse mwet sahyac. Elos suc insese in pahngpahng mwet luhn Leum elos insese “in akacsruhi ke ma toasr luhn kais sie, … in ahsor weluhlos suc ahsor; … ac [in] ahkenganyaclos suc enenuh in ahkenganyeyuck.”3
Elos suk na pwacye in moulkihn masap yohk se emet ac ahkluo an. Ke kuht luhngse God ke insiacsr kwewa, El ac furohkwacng insiacsr nuh ke ohiyac-wowo luhn mwet sahyac ke sikalweni kahto in oruh ma wo.
Ac upac in oacklah luhpan kuhlwacnsap luhn Mwet Luhlahlfongi ke Lwen Sahflah ma orek fin facluh nohfohn ke lwen nuhkwewa ke yac nuhkwewa, tuhsruhk ma se inge kuh in oacklah ma wo ma Alu uh oacna sie u ma ahkinsewowoye mukul ac muhtwacn—tuhlihk mukul ac tuhlihk muhtwacn—suc enenuh poun kahsruh.
Prokracm luhn Alu uh in kahsruh mwet uh tuh muhtwacwacack ke yac 1984. Na Alu uh nohfohn tuh lalo in sruhkwack sie luhpan mani ah in kahsrwelos suc sun ongaiyac ke srwacl in kof fin acn kuhtuhlacp Africa. Mempucr luhn Alu uh sang luhpan mani miliacn $6.4 ke lwen in lalo sefanna ingacn.
In pacl sac-Elder M. Russell Ballard ac Tamuhlwel Glenn L. Pace elos tuh som nuh Ethiopia in liye lah mani ma ahkmuhtahlyeyucklac an ac orekmakihnyuck wo emet fuhkah. Orekma se inge pa muhtwacwacackiyacn ma se ma tok pahngpahng muh Kahsruh ke Luhngse Pwacye luhn Mwet Luhlahlfongi ke Lwen Sahflah.
Ke pacl sac me, Mwet Luhlahlfongi ke Lwen Sahflah elos sang luhpah in tala biliacn luo in kahsrwelos suc enenuh fin facluh nohfohn. Kahsruh se inge ituckyang nuh sin mwet tiac oacwac lah alu fuhkah elos wi, lah elos tuhkuh oyac, mwet oyac, muhtwacn kuh mukul, kuh u fuhkah ke politics elos wi an.
Tiac pa ingacn nohfohn. In kahsruh mempucr ke Alu luhn Leum suc sun ongaiyac, kuht luhngse ac muhta na ke masap mahtuh omeet ke lalo.4 Kuht masrinsrwacllah in kahsrelos suc masrinsrwacl. Lwen se ke kais sie mahlwem, kuht tiac mongo ac sang molin mongo (ac yohk liki) in kahsrelos suc enenuh.
Ngac fah tiac muhlkuhnlah forfor se emet luhk nuh Rohtoh Africa ke yac 1986. Arulacna puhslac Mwet Luhlahlfongi ma tuh tuhkuh nuh ke miting lasr ah. Finne elos suhkahsruhp, inkaiyaclos tuhkuh nukum nuknuk na nwacsnwacs fasrfasr.
Nga siyuck sin stek prestuhn sac lah el karuhnguhnwacng fuhkah mempucr ma arulacna suhkahsruhp. El topuk lah pisap lalos an etuh na pwacye mwet lal an. Mempucr an fin kuh in moul mongo pacl luo ke lwen se, elos tiac enenuh kahsruh. Tuhsruhk elos fin kuh in moul mongo pacl se fanna kuh srihk liki—finne ke kahsruh luhn sucu—pisap an ac sang mongo, mani ma tuhkuh ke mwe sang ke lalo. Na el fahk pac ma na pwacye wowo se inge: mwe sang ke lalo lalos an kwacna ahluhkwelah luhpan mani elos orekmakihn. Mani luhlah ke mwe sang ke lalo an suhpweyucklac nuh yurun mwet ke acn sahyac suc enenuh la ahluhkwelah enenuh lalos. Mwet Luhlahlfongi wolacna Africa ingacn lutiyuc sie mwet luti na yohk ke kuh luhn masap ac nguhn luhn lalo.
Oacna mempucr luhn Alu uh, kuht puhlakihn kuhpahsr fototo nuh selos suc kweok ke kuhtwena ohiyac.5 Oacna wen ac acn nuhtin God, kuht nuhkwewa tamuhlwel ac tahmtahel. Kuht lohacng nuh ke sie kai ke Wuhlweacng Mahtuh: [Kowos fah ikacslah pouwos in yohk nuh sin tamuhlwel wiyowos, nuh sin mwet] “sukasrup ac [nuh selos suc] muta in enenu.”6
Kuht srihke pac in moulkihn luti luhn Leum Jisus Kraist oacna ke sihmlac ke Matthew 25:
“Mweyen nga tuh masrinsral ac kowos kiteyu mongo; nga malu ac kowos se ma nimuk; nga sie mwet sac ac kowos suliyuyak nu in lohm suwos:
“Wangin nuknuk luk ac kowos ase nuknuk luk; nga mas ac kowos kareyu. …
“… Ke kowos oru ma inge nu sin sie su srik liki nukewa sin mwet lik, kowos oru nu sik.”7
Lwelah ngan fahk kuhtuh mwe srihkasrak puh lah Alu uh ukwe fuhkah luti luhn Mwet Lahngo.
In kahsruh ahkfihsrwacsrye masrinsrwacl, oasr lohmstoh 124 [Siofok Longoul Ahkosr] luhn pisap fin facluh nohfohn. Kaclos, apkuran nuh ke 400,000 [Ahngfoko Tausin] ohtoh ke mongo ituckyang ke kais sie yac nuh sin mwet ma enenuh. Ke acn ma wacngihn lohmstoh we an, pisap ac prestuhn luhn pracns an eislah mani an ke mwe sang ke lalo luhn Alu uh in sang mongo ac kuhfa nuh sin mempucr lalos ma enenuh an.
Tuhsruhktuh, elyah luhn masrinsracl uh som loal nuh ke mahsrol luhn Alu uh. El ahkyohkyeyucklac ahluhkwelah facluh an. Sie ripohrt ke pacl fototo somlah ah ahkkahlwemye luhpan mwet masrinsrwacl fin facluh ingena uh ahluhkwelah miliacn 820 [Alfoko Longoul]—kuh apkuhran in sie sin yuc ke mwet nuhkwewa fin facluh.8
Luhpah na ahklut se! Fuhkah luhpan kuloh lasr ke sang lowos an. Kuloh ke kuhlwacng yohk lowos, mwet miliacn fin facluh ac fah eis mongo ma ac kahsruh-yohk, nuknuk, lohm nuh ke kihtin pacl, siyah pahtpaht, ono, kof nwacsnwacs, ac yohk pac sahyac.
Mas pucspucs fin facluh sikyak ke srihpen kof fohkfohk. Ne misenge, kampare ke mwe kahsruh luhn Alu uh nuh sin mwet uh tuh kahsruh in sang kof nwacsnwacs ke mura siofok siofok ke muhtuhnfacl 76 [Itngucul Ohkohsr].
Sie prokracm fin acn Luputa, ke Democratic Republic luhn Congo, pa sie mwe srihkasrak na wowo. Ke pihsen mwet ahluhkwelah 100,000 [Tausin Siofok], wacngihn kof kahkkahk ke mura sac. Mwet citizen elos fahsr loeloes nuh ke acn ma oasr kof nwacsnwacs we. Finne kof unohn ke finohlah sukokyak mael 18 [singucul alkosr] (29 km) liki acn we, mwet ke mura sac tiac kuh in eislah kof sac pacl nuhkwewa.
Ke misineri lasr ke un mwet kahsruh mwet uh etwacack ke ma upac se inge, elos orekma wi mwet kol luhn acn Luputa ke elos sang kuhfa ac lotwelos in oraclah paiplac kof ah in som ne ke mura sac. Mwet Luputa ah sislah yac tolu in pihkihl luhf mita-se-loaliyac ah ke acn yotyot ac innimac. Ke tuhkweni orekma, lwen engan sac tuhkuh ke kof nwacsnwacs ah oasri nuh sin mwet nuhkwewa ke mura sac.
Alu uh oacyacpac kahsruh mwet kahinglac liki acn selos ke srihpen ongaiyac, lah ma ke srihpen ma ke fohs luhn acn ah, ke ongaiyac luhn facluh, kuh ke kalyeiyuck ke srihpen alu. Puhs liki mwet miliacn 70 [Itngucul] ingena kahinglac liki lohm selos.9
Ke yac 2018 [Luo Tausin Singucul Alkosr] muhkwena, Alu uh sang kuhfa nuh ke pacl elyah nuh sin mwet kahinglac liki acn selos ke muhtuhnfacl 56 [Lamngaul Ohnkohsr]. In weacng, mempucr pucspucs luhn Alu uh sang pacl lalos in kahsruh mwet kahinglac liki lohm selos an in welah mura sasuc an. Kuht sang kuloh nuh sin kais sie mwet nuhkwewa suc saplakyang in kahsrelos suc srihke in sramtweack moul sasuc ke lohm sasuc.
Ke mwe sang yohk nuh sin stoh Deseret Industries fin acn United States, miliacn miliacn paun in nuknuk orekweni ac sriyucklac. Ke pisap ke mura lalos an orekmakihn stoh luhlahp inge in kahsruh mempucr ma enenuh, ip yohk se emet kac an ituckyang nuh sin un mwet kahsruh sahyac suc kihtaclihk nuknuk an nuh facluh nohfohn.
Ac ke yac tari ah, Alu uh sang karihgnihnyacn liye luhn ahtron muhta uh nuh sin puhs liki mwet 300,000 [tolfoko tausin] ke muhtuhnfacl 35 [tolngoul limekohsr], karihngihnyacn ninac ac ahwowo ma tuhfahna in isuslac an ke muhtuhnfacl 39 [tolngoul yuc], ac siyah pahtpaht nuh sin puhs liki mwet 500,000 [luhmfoko tausin] muhta ke muhtuhnfacl puhkantwen.
Alu uh etweyuck ke kuht pa inmahsrlon mwet som na emet in kahsruh ke pacl oasr ongaiyac uh. Finne met liki pahkah ac sun acn uh, mwet kol ac mwet orekma luhn Alu ke acn ma ac sun ongaiyac an ac oraclah plwacn lalos lah elos ac uslah fuhkah kuhfa in kahsruh ac sang kahsruh lalos an nuh selos suc ac sun ongaiyac.
Ke yac tari ah muhkwena, Alu uh tuh kahsrelah puhs liki prokracm in kahsruh-ongaiyac 100 [Siofok] fin facluh nohfohn, kahsruh mwet sun ongaiyac ke pahkah, fihrihr, sronot, kusrusrsrusr luhn acn uh, ac ongaiyac yohk sahyac. Fin kuh, mempucr ke Alu lasr ma nukum vest rangrang ma sihmlac Paho in Kahsruh mukwilac ke pihsac na luhlahp se in kahsrelos suc sun kweok ke ongaiyac uh. Kain in kuhlwacnsap se inge, ituckyang sin inkaiyowos, pa inge kalmac na pwacye luhn kuhlwacnsap kahsruh.
Tamuhlwel ac tahmtahel wiyuck, mukwikwi ma nga ahkuhtweyac inge pa kihtin na ip ke ohiyacn kahsruh yohkwaclihk ac mwe kahsruh mwet uh ke Alu luhn Jisus Kraist luhn Mwet Luhlahlfongi ke Lwen Sahflah.10 Na kowos pa oruh ma inge nuhkwewa kuh in fahlac wo uh. Ke srihpen moul wowo lowos, inse pwacye yohk lowos, ac paho kahsruh lowos, kuht nuh suk lah efuh mura pucspucs ac mwet kol luhn government uh kaksakihn kampare lowos an.11
Ke nga Prestuhn lac luhn Alu uh, nga fwefwelac kac lah prestuhn puhkantwen, prime minister an, ac ambassador an fahk kuloh yohk nuh sihk ke kahsruh lasr nuh sin mwet lalos. Ac elos ahkkahlwemye kuloh ke ahkkweyeyuck ma mempucr oaru lasr uslah nuh ke muhtuhnfacl selos oacna mwet citizen wo, ma sruhk kasrpacn acn we.
Nga lut pac ke mwet kol facluh muhtwacta yurun Prestuhnsi Se Met ac ahkkahlwemye finsrak lalos tuh Alu uh in akwucki fin acn selos. Efuh? Ke srihpen elos etuh lah Mwet Luhlahlfongi ke Lwen Sahflah ac fah kahsruh in sramtweack sucu ac mura fokoko, oraclah moul uh in wolac nuh sin mwet sahyac ke oacna sie acn elos muhta we.
Tiac oacwac lah piyac acn kuht pahngon lohm ah, mempucr luhn Alu uh puhlakihn luhlahlfongi kuh ke pahpah God ac tamuhlwel luhn mukul uh. Ohinge, engan yohk se emet lasr uh tuhkuh ke kuht kahsruh tamuhlwel ac tahmtahel wiyacsr, macnsis lah kuht muhta oyac fin facl wolacna se inge.
Sang kahsruh nuh sin mwet sahyac—oraclah kampare kowos nuhnkuh an in karihngihn mwet sahyac in yohk kuh yohk liki na ke kuht karihngihn kuht sifacna—pa engan lasr uh. Yohkna, ngan sang in weacng, ke ac tiac fihsrwacsr ac ke ac eiskuhtlac liki ma kuht etuh uh. Moulkihn masap yohk ahkluo sacn pa ki nuh ke in eklac oacna sie mwet tuhma lutlut pwacye luhn Jisus Kraist.
Tamuhlwel ac tahmtahel wiyuck, kowos mwet moul pihsrlac ke fahko ma tuhkuh ke fahsr tukun luti luhn Jisus Kraist. Nga kuhloh nuh sum! Nga luhngse kom!
Nga etuh lah God El moul. Jisus El pa Kraist. Alu Lal uh fohlohkyak ke lwen sahflah inge in ahkpwacyeye srihpac muhtahl la. Nga fahkwack ke inen Jisus Kraist, amen.