Konweyuckyak ke Kuh luhn Puk luhn Mormon
Mwet nuhkwewa enenuh in puhlakihn ac konweyuckyak ke kuh luhn ma pwacye ma oasr ke Puk luhn Mormon.
Ke nga ohsun nuh ke lohm selos, sie kihsensiyuck nga luhngse siyuck nuh ke mwet eklac pa elos ac sucu lalos etwaclah ke Alu uh fuhkah ac elos tuhkuh in pacptais fuhkah. Tiacna yohk srihpac fin mwet se tiac mempucr fokoko ke pacl inge kuh tiac wi alu ke lusen yac pucspucs. Top lalos kwacna oacna sie: elos isrwacsr ac engan ataclos, elos muhtwacwacack in fahk sramsram lalos lah fuhkah elos konweyuckyak. Pwacye, sramsram ke eklac apkuhran pacl nuh kwewa sramsram ke ohiyac kuht konweyuckyak fuhkah.
Jisus Kraist El sifacna pa Leum ke ma tuhlac. El karihngihn ma tuhlac. Pa oruh srihpac El luti puhpuhlyuck tolu ma kuht kuh in konwacack ke sapta singucul limekohsr ke Luke: puhpuhlyuck ke soko sheep tuhlac, ipin mani tuhlac, ac, sahflah, sie wen suc tuhlac. Oasr ma oacna sie ke sramsram inge: tiac elyah lah efuh elos tuhlac. Tiac elyah finne elos tiacna etuh muh elos tuhlac Oasr puhla in engan lucng liki kuht muh fahk, “Fahsru wiyu engan, mweyen nga konauk [ma sac] ma tuhlac.”1 Ke sahflah, wacngihn ma tuhlac nuh Sel.2
Lwelah nga in akacsruhi yuruwos oyekuh kuhtuh ma sacohk nuh sihk—puhpuhlyuck se ke ohiyac nga konweyuckyak.
Met liki nga sun matwac yac 15 [singucul limekohsr], uncle wiyuck, Manuel Bustos, el suliyuc in weluhl ac sucu lal ke acn United States inge. Pa inge pacl wo nuh sihk in lotwelah kuhtuh kahs English. Uncle wiyuck el eklac nuh ke Alu yac puhs tari ah, ac el us nguhn wo ke ohiyacn misineri. Nga muh ke srihpen ma inge, ninac kiyuck, ke ohiyac nga nihkihn, sramsram nuh sel ac fahklah el ac insese nuh ke mwe suli ke sie olwelah: el ac tiac srihke kai yuc in wi mempucr ke Alu lal. Kuht pa Catholic, ac wi luhlahlfongi se ingacn ke fihl pucspucs, ac wacngihn srihpac in eklac. Uncle wiyuck el pa insese nuh ke olwelah se ingacn ac karihngihn olwelah nuh ke kain ohiyac sac lah el tiac ke topuk kihsensiyuck ke Alu uh.
Tuh pwacye, ma uncle wiyuck ac muhtwacn wowo lal, Marjorie, tiac kuh in okanlah pa ohiyacn moul lalos.3
Elos usyuc in muhta ke infuckihl se ma oasr puk pucspucs kac. Nga kuh in liye ke library se ingacn oasr apkuhran puk 200 [luhmfoko] ke Puk luhn Mormon ke kahs siena, ac oasr kain puk 20 [longoul] ke kahs Spanish.
Sie lwen ah, ke kena se in etuh, nga eis sie Puk luhn Mormon ke kahs Spanish.
Pa inge sie puk ingen ke afihnyac folfol, ke sroal se luhn lihpufacn Moroni ke muhtuhn puk sacn. Ke nga ikaclsah, oasr olwelah se ma sihm ke sra puk se met: “Ac ke kowos fah eis ma inge, nga kena kwacfe nuh suwos tuh kowos in siyuck sin God, Pahpah Ma Pahtpaht, ke inen Kraist, fin ma inge tiac pwacye; ac fin kowos siyuck ke inse pwacye, kena in etuh na pwacye, luhlahlfongi Kraist, El fah ahkkahlwemye pwacyeiyacn ma inge nuh suwos, ke kuh luhn Nguhn Muhtahl.”
Na el fahk ma ingacn: “Ac ke kuh luhn Nguhn Muhtahl kom kuh in etuh ma pwacye ke ma nuh kwewa.”4
Arulacna upac in ahkuhtweyac ohiyac fokoko ma suhmuhslah se inge som nuh ke nuhnak ac insiyuck. In fahk na pwacye, nga tiac suk ke “ma pwacye.” Nga mukul fuhsr na, engan ke moul lal, engan ke acn ac facsin sasuc.
Na ke ma inge, ke olwelah sacn ke nuhnak luhk, nga muhtwacwacack riti puk uh ke lukmac. Ke nga kalweni in rit, nga kahlwem fin nga kena in eis ma wo ke ma inge, nga enenuh in muhtwacwacack pruhe. Ac kuht nohfohn etuh ma ac sikyak ke kom sulwaclah in rit ac pruhe ke Puk luhn Mormon. Kacl, pa inge ma sikyak nuh sihk. Sikyak se inge pa arulacna insewowo ac sifacnalac—ahok, oacna sie ke ohiyacn sikyak nuh sin mwet puhkantwen sahyac fin facluh. Nga muhtwacwacack in etuh ke kuh luhn Nguhn Muhtahl lah Puk luhn Mormon pwacye.
Na nga som nuh ke uncle wiyuck ac fahk nuh sel ma sikyak ah ac nga ahkolah in pacptaislac. Uncle wiyuck el tiac kuh in okanlah mwe rahrah lal. El som ke stosah okwacl, kahsruhsr nuh ke airport, na fohlohk ke ticket luhn oak sohk luhk in fohlohk nuh lohm sihk, wi pac oasr mwe sihm srihsrihk nuh sin ninac kiyuck ma fahk muh, “Wacngihn ma nga oruh ke ma se inge!”
Ke ohiyac se ma el fahk pwacye. Nga konweyuckyak nuh ke kuh luhn Puk luhn Mormon.
Sahp oasr puhkantwen mwet suc konweyuckyak sin misineri wowo fin facluh, kais sie konweyuckyak ke ohiyac wolacna. Kuh sahp elos konweyuckyak sin kawuck lah God El sang ke moul lalos. Sahp elos konweyuckyak sin sie ke fihl se inge kuh sin sie mwet mahtuh lalos.5 Oacna sie ma, elos fin ke fahsr nuh ke eklac pwacye sifacna, ke pacl sa, elos nohfohn enenuh puhlakihn ac konweyuckyak ke kuh luhn ma pwacye ke Puk luhn Mormon. Oacyacpac ke pacl se ingacn, elos enenuh in sifacna sulwaclah in orek wuhlweacng pwacye nuh sin God lah elos fah srihke karihngihn masap Lal.
Ke nga fohlohk nuh ke acn Buenos Aires, ninac kiyuck akihlen lah nga luhngse na pwacye in pacptaislac. Ke srihpen nga pa sie mwet lihkkeke, el tiac lainyuc, el insese. Ac finne el nihkihn, el sifacna oruh kihsen siyuck in lohlngohk luhk ke pacptais. Pwacye, nga luhlahlfongi lah kihsensiyuck lal arulacna yohk likina ma misineri lasr sang uh. El fahk nuh sihk, “Kom fin ke pacptaislac, nga ac tahpuhk kom. Tuhsruhktuh nga ac siyuck sum kuhtuh kihsensiyuck, ac nga luhngse kom in nuhnkuh yohk ac use top pwacye lom nuh kac. Yac kom olwelah in wi alu kais sie Sacnri nohfohn?”
Nga fahk nuh sel, “Ahok, pwacye nga ac oruh ma sacn.”
“Yac kom etuh tari puhtahkah alu uh?”
“Ahok, nga etuh,” nga fahk.
El topuk, “Koacl, kom fin pacptaislac, nga ac liye lah kom wi.” Na el siyuck yuc fin oasr kena luhk in wacngihn pacl nihmnihm kuh sismohk.
Nga topuk nuh sel, “Ahok, pwacye, nga ac oruh ma nuh kwewa sacn pac.”
Na ke fahk sacn el topuk, “Kom fin pacptaislac, nga ac liye lah ma inge sikyak.” Na el kalweni ke kain ohiyac se ingen nuh ke apkuhran masap nohfohn uh.
Uncle wiyuck el pahngon ninac kiyuck ac fahk nuh sel in tiac elyah, tuh nga ac sa in kahkahsrihk ke ma inge. Tukun yac ahkosr somlah, ke nga eis pahng luhk in kuhlwacnsap ke Uruguay Montevideo Mission, ninac kiyuck el pahngon uncle wiyuck ac siyuck sel ke pacl se nga ac kahkahsrihk ke ma inge. Ma pwacye ke ma inge pa ke pacl se nga pacptaislac, el pa ninac engan likina met.
Nga lotwelah Puk luhn Mormon pa ip yohk srihpac ke inkacnek luhn eklac ke nga puhla sifacna olwelah tuh “sie mwet ac kuh in fototoyang nuh sin God ke el muhta na ke mwe luti luhn ma inge.”6
Nephi el ahkuhtweyac ma yohk srihpac emet ke Puk luhn Mormon ke ohiyac sacn:
“Tuh kuht oaru orekma in suhmuhslah, in mokleack tuhlihk nahtuhsr, ac oacyacpac mwet wiyacsr, in luhlahlfongi Kraist, ac in fohlohkyang nuh yurun God. …
“Ac [na] kuht sramsramkihn Kraist, kuht kaksakihn Kraist, kuht luti kacn Kraist, [ac] kuht palye ke Kraist, … tuh tuhlihk nahtuhsr uh in kuh in etuh lah meac pwelucng elos kuh in ngwet nuh kac tuh in iyucklac ma koluk lalos.”7
Puk luhn Mormon nohfohn sesseslah ke srihpac muhtahl oacna sie se ingacn.
Ke srihpac se inge, kuhtwena mwet riti suc sang kuhyaclos in lutlutkihn ma se inge, ke nguhn in pruhe, ac tiac lotwelah ke Kraist muhkwena tuh ac lotwelah sin Kraist—pwacyena fin elos sulwelah in “srihka ma wo ke kahs”8 ac tiac sa in lahfwekihn ke srihpen suhluhlahlfongi9 ke ma mwet sahyac fahk ke ma elos tiacna riti met.
Prestuhn Russell M. Nelson el fahk: “Ke nga nuhnkuh ke Puk luhn Mormon, nga nuhnkuh ke kahs se kuh. Ma pwacye ke Puk luhn Mormon pa oasr kuh in ahkkweye, ahkmihsye, fohlohk, pahkomuhta, ahkfokokoye, karihngihn, ac ahkengan nguhnasr.”10
Mwe suli luhk oyekuh nuh sin kais sie sesr, tiac yohk srihpac luhpahkah mempucr luhn Alu uh, pa in lwelah kuh luhn ma pwacye ke Puk luhn Mormon in konwekuhtyak ac sulpac sruokyac kuht ac lwen nuh ke lwen ke kuht oaru in sokwack fwackyuck sifacna. El fah oruh ma inge kuht fin lwelah in sikyak.
Nga inse puhsisacl in fahkwack lah oasr wosasuc nohfohn luhn Jisus Kraist ke Puk luhn Mormon ac lah Nguhn Muhtahl fah ahkkweye ma pwacye oasr lun puk pacl nuh pacl nuh sin kuhtwena mwet suc, ke insiyac pwacye, suk mwe etuh nuh ke molwelah luhn nguhn lalos.11 Ke inen Jisus Kraist, amen.