Muhtwacn Wuhlweacng in Kuhpahsr yurin God
In eklac nuh ke muhtwacn wolacna suc wi God pa ohiyac suwohs ac muhtwacn wo nuhtin God elos karihngihn, kol, ac kahsruh pacl nuhkwewa.
Nga sruikihn pacl insewowo se inge in sramsram nuh suwos, muhtwacn wuhlweacng nuhtin God. Ofong, srihpuck pa in ahkkweye kowos ke kuhlwacnsap wolacna kowos pahng nuh kac. Ahok, muhtwacn nuhkwewa nuhtin God suc lohng puhsrek eis sie pahng sin Leum Jisus Kraist.
Pahng lom an muhtwacwacack ke pacl se kom isuslac, ke acn se ac pacl se suleyucklac sin God suc etwe kom suwohswohs ac luhngse kom ke muhtwacn Nahtuhl. Ke facl luhn nguhn, El etwe kom ac luti kom ac fihlikowi ke acn se ma ac usot pacl wo, pacl suhkwac ke pacl mahtuh luhn facluh, in suliyuck nuh ke acn in pacptais. Ingoh, kom kuh in lohng kahs sruhmuhnyuck sin mwet kuhlwacnsap luhn Jisus Krais suc fahk lah ke wal ma utuckuh nuh sihk ke Jisus Kraist, nga pacptaisi kom ke inen Pahpah, ac ke Wen, ac ke Nguhn Muhtahl. Amen.1
Ke kom otyak liki kof uh, kom insese in eis pahng sahyac in kuhlwacnsap. Oacna muhtwacn wuhlweacng sasuc se nuhtin God, kom olwelah ac eis kunohkohn ke Alu luhn Jisus Kraist luhn Mwet Luhlahlfongi ke Lwen-sahflah, ma kom ahkkweyeyucklac in mempucr se. Kom wuhlweacng nuh sin God in eis inen Jisus Kraist, in karihngihn masap Lal, ac in Kuhlwacnsapuhl.
Nuh sin kais sie suc oraclah wuhlweacng inge, kuhlwacnsap ma Leum El pahnglol in oruh ac fah oreklac wo fal nuh sin mwet sacn. Muhtwacn ac mukul wuhlweacng nuhtin God, oacpacna, nohfohnna akacsruhi ke sie pahng yohk ac engan. Ma se inge pa in kuhlwacnsapuh mwet sahyac ke Srihpacl.
Ke sramsram nuh sin tahmtahel uh, Prestuhn Russell M. Nelson el sang sramsram wo fototo ke pahng luhn Leum nuh suwos in Weluhl ke orekma Lal. Prestuhn Nelson el ahkuhtweyac pahng lowos ke ohiyac se inge: “Leum El fahk lah orekma Lal ac wolacna Lal pa in oraclah inkacnek tuh mwet uh kuh in eis moul ma pahtpaht yurin God. (liye Moses 1:39.) Na muhtwacn oaru Nahtuhl kuh in fahk, ‘Orekma luhk ac wolacna luhk pa in kahsruh mwet suc nga luhngse in sun finsrak inkuhsrao se ingacn.’
“In kahsruh sie mwet sahyac in sun ohiyac celestial lal pa ip se ke misin wolacna luhn muhtwacn. Ke ninac, mwet luti, kuh Mwet Luhlahlfongi karihngihn, el tuhfahlah mwet nuh ke finsrak la. Ke fahsrweni yurun God, misin wolacna lal pa in kahsruh nguhn moul ac ahkkweyeyuck. Pa inge ohiyacn ahkfalye oreyucklac lal. Ma inge ahkfuhlwactye, ahkwoye, ac ahkmuhtahlye.”2
Kowos nihkihn pacl sac, kuh lusen pacl uh, misin lowos sifacna fah wi lohacng na nuh ke pahng ma oacna ninac, mwet kol, kuh tahmtahel in karihngihn. Leum, ke luhngse, El tiac use nuh sesr sukohsohk in sulwaclah pacl an, kuh puhtahkah, kuh tahk ke ma kunacsr uh. Tuhsruhktuh kowos etuh ke ma suhmuhslah ac mwet pahluh moul lah nohfohn kunohkohn inge fah tuhkuh, finne ke moul se inge kuh ma se tok uh, nuh sin muhtwacn nuhkwewa nuhtin God. Ma inge nuhkwewa mwe ahkolah nuh ke moul ma pahtpaht yurin sucu luhngse—“mwe sang wolacna se emet sin God.”3
Kowos in lahlmwetmwet in eklac mukwikwi nuhkwewa lowos in ahkolah ingena nuhnkuh ke pacl sahflah. Tahk luhn ma kunac inge fihsrwacsr mweyen kais sie kunohkohn enenuh ahkolah ma oacpacna inge.
Lwelah kuht in muhtwacwacack ke kunohkohn in ahkfalye tahmtahel in karihngihn. Finne kowos eis kunohkohn se ingen ekihn muhtwacn fuhsr matwac singucul suc pahpah tuhmwac misac tari, kuh prestuhn luhn Rilif Sosaiti suc muhta ke acn ma oasr ongaiyacn ke e fihrihr, kuh ke kowos oasr ke lohm ono tukun laslas—oasr pacl lowos in oraclah kunohkohn lowos sin Leum in muhtwacn in karihngihn Nahtuhl.
Ma kunac ingen ke ohiyacn karihngihn luhman arulacna sienna. Tuhsruhk elos nohfohn enenuh ohiyacn ahkolah luhn kuh, inse sesseslah ke luhngse, sie luhlahlfongi ke wacngihn sahngweng ma Leum El sang ohiyac in ahkfalye, ac kena se in som ac oruh ma Lal.4
Ke srihpen el ahkolah, muhtwacn fuhsr matwac yac singucul se el apihsyac ninac lolacp se kiyacl ac pruhe in etuh fuhkah in kahsruh sucu lal. Ac el kampare na.
Prestuhn luhn Rilif Sosaiti el ahkolah in karihngihn met liki pacl ongaiyac tuhkuh nuh ke acn lal. El etuh ac luhngse mwet uh tari. Luhlahlfongi lal ke Jisus Kraist kapwack tari mweyen el eis top nuh ke pruhe lal tuh Leum elan kahsrel ke kuhlwacnsap srihksrihk nuh Sel. Ke srihpen ahkolah loes lal, el ahkolah ac oasr kena lal in oracni tahmtahel lal in som karihngihn mwet ac sucu suc oasr elyah lalos.
Tahmtahel se suc kaul ke lohm ono tukun laslas se el ahkolah in karihngihn mwet kauli siskacl. El moul ke ohiyacn karihngihn ke moul lal nohfohn nuh sin Leum nuh sin mwet sahyac oacna el fin mwet tuhlan kuh kawuck lal. Ke el puhla ke insiyacl pahng se in karihngihn ke lohm ono, el kuhlwacnsapuh mwet sahyac ke ohiyac puhlaik ac ke ohiyacn luhngse tuh mwet kwelac sahyac muhtwacwack in eis finsrak tuh elan tiac sa in kwelac.
Ohiyac oacpacna sie kowos ahkolah in karihngihn, kowos kuh ac enenuh in ahkolah ke pahng lowos in mwet kol luhn Leum ke pacl ac tuhkuh. Ma inge enenuh luhlahlfongi nuh sin Jisus Kraist ac wi pac luhngse loal ke ma suhmuhslah, in kol mwet ac in luti kahs Lal ac tiac sahngweng. Na kowos ahkolah tari in oasr Nguhn Muhtahl wi kowos pacl nuhkwewa. Kowos ac rahrah in fahk, “Ngac fah,” ke mwet in kahsruh lowos ke prestuhnsi luhn Muhtwacn Fuhsr el fahk, ke elyah ke puhsrwacl, “Tahmtahel Alvarez el mas mihsenge. Suc ac luti kuhlahs lal uh?”
Ma inge enenuh pacl in ahkolah oacna ke lwen wolacna ke Leum El ac pahngon kowos nuh ke kunohkohn in ninac. Tuhsruhktuh ma ingen enenuh inse luhngse yohk likina met ah. Ma inge enenuh luhlahlfongi sin Jisus Kraist yohk liki kuhtwena pacl met ke insiowos. Ac enenuh inse yohk in pruhe ke moklweyuck, kolyuck, ac karihngihnyuck sin Nguhn Muhtahl ma yohk liki ma kowos puhla muh kuh in sikyak.
Sahp kowos ac siyuck fuhkah mukul se ke kuhtwena matwac in kuh in etuh lah meac enenuh luhn ninac. Kihsensiyuck pwacye se. Mukul uh tiac kuh in etuh ma nuhkwewa, tuhsruhktuh kuh in etwaclah kuhtuh ma ke fwackyuck sin God. Ac kuht kuh in oacyacpac lotwelah yohk ke ohiyacn intei, ke kuht eis pacl wo in suk Nguhn in kahsrwe kuht kahlwem ke ma kuht intei.
Nga inteel Kathleen Johnson Eyring ke yac 57 [luhmngaul itkohsr] ke kuht pahyuck uh. El pa ninac uh ke tuhlihk mukul ahkosr ac tuhlihk muhtwacn luo. Ne mihsenge, el insese in eis pahng in kai ke ohiyacn ninac nuh sin puhs liki mempucr siofok luhn sucu lasr ac puhs liki siofok sahyac el nuht nuh ke inse in ninac lal.
Kowos esam ahkuhtweyac lal Prestuhn Nelson ke misin wolacna luhn muhtwacn—wi pac misin lal ke ohiyacn ninac: “Ke ninac, mwet luti, kuh Mwet Luhlahlfongi karihngihn, el tuhfahlah mwet nuh ke finsrak lal. Ke fahsrweni yurin God, misin wolacna lal pa in kahsruh nguhn in moul ac ahkkweyeyuck. Pa inge ohiyacn ahkfalye orweyucklac lal.”5
Ke ohiyacn liye luhk, muhtwacn kiyuck, Kathleen, el ukwe kunohkohn se inge, ma tuhkuh nuh sin muhtwacn nuhtin Pahpah tuhmasr. Ma yohk nuh sihk ke ma inge pa kahs “el tuhfahlah mwet nuh ke finsrak la ke fahsrweni yurin God.” El tiac ahkkohsye. El tuhfahlah. Ac oasr plwacn sel ke finsrak lal in kahsrwel etuh fuhkah elan kuh in tuhfahloslac suc el luhngse ac karihngihn. Plwacn lal pa wosasuc luhn Jisus Kraist—ma nga kuh in liye ke pruhe ke lusen pacl ingen.
In eklac nuh ke muhtwacn wolacna suc wi God pa ohiyac suwohs ac muhtwacn wo nuhtin God elos karihngihn, kol, ac kahsruh pacl nuhkwewa, in kuhlwacnsap ke ohiyac ac acn nuhkwewa ma El ahkolah nuh selos. Nga olwelah tuh kowos fah konwacack engan ke fuhfahsryucsr lowos nuh ke lohm inkuhsrao suwos ke kowos fohlohk nuh Yohrohl oacna muhtwacn suc karihngihn wuhlweacng nuhtin God.
Nga fahkwack lah Pahpah God El etwe kowos ac El luhngse kowos. El fah topuk pruhe lowos uh. Wen Kuloh Nahtuhl El kol, ke ip yohk nuhkwewa, Alu luhn Jisus Kraist luhn Mwet Luhlahlfongi Lal ke Lwen-sahflah. Prestuhn Russell M. Nelson el pa mwet pahluh moul Lal. Ac Joseph Smith el liye ac sramsram yurin Pahpah God ac Jisus Kraist ke imac in sahk se fin acn Palmyra, New York. Nga etuh ma inge pwacye. Nga oacyacpac fahkwack luhlahlfongi lah Jisus Kraist El pa Mwet Lahngo lowos; El luhngse kowos. Ac nuh ke Iwaclah Lal, kowos kuh in ahknwacsnwacsyeyucklac ac ahkfalye pahng fuhlwact ac wolacna ma ac fah tuhkuh nuh suwos. Nga fahkwack luhlahlfongi ke ine muhtahl luhn Jisus Kraist, amen.