Ahkfuclwactye Inel
Ke luhman wuhlweacng ac puhla in luhgnse, kuht pahngonyuck ke inen Jisus Kraist.
Ke pahpah ninac kiyac rarrarlac sanno ke isuslac luhn tuhlihk nahtuhlos, oasr kunohkohn lalos in sulwaclah inen ahwowo sasuc se nahtuhlos. Sahp ke kom isuslac, kom eis ine se muh oasr ke sucu lom omeet ah. Kuh sahp inem kom eis pa eye ke yac kuh acn kom isuslac ke.
Mwet pahluh Helaman ac muhtwacn kiyacl sang ine yohk srihpac nuh sin tuhlihk nahtuhlos Nephi ac Lehi. Helaman el fahk nuh sin wen nahtuhl:
“Nga usot nuh suwos inen pahpah tuhmwacsr emet … tuh ke kowos esam inewos kowos kuh in esamuhlos; ac ke kowos esamuhlos kowos in kuh in esam orekma lalos; … tuh fwack, ac oacyacpac sihmlac, lah elos wo.”
“Ke ma inge, wen nuhtihk, nga kena tuh kowos in oruh ma wo.”1
Inelos Nephi ac Lehi kahsrwelos in esam orekma wo luhn mwet mahtuh lalos ac kahsrwelos in oruh ma wo pac.
Muhtwacn wiyuck, oacna sie acn kuht muhta we, kahs ke sramsramkihn, kuh finne kuht yac 8 kuh 108, oasr ine yohk srihpac ke kain srihpac se inge.
“Kowos baptaicsla in kupasryang nu yurin Christ, ac inge kowos nokonmang tari moul lun Christ sifacna … [kuht] nukewa ma sefannala yurin Christ Jesus.”2
Ke mempucr luhn Alu luhn Jisus Kraist luhn Mwet Luhlahlfongi ke Lwen-sahflah, “pacl se emet kuht sang insese lasr in eis nuh facsr inen Kraist … ke akwuck in pacptais.”3 SIn wulwelah se inge, kuht olwelah in esamuhl pacl nuhkwewa, liyacacng masap Lal, ac kuhlwacnsuhpuh mwet sahyac. Insese lasr in karihngihn wuhlweacng se inge ahksasucyeyucklac lwen Sahpuht nuhkwewa ke kuht ipeis ke kuhfa luhn Leum ac sifilpac kaksak ke mwe insewowo in “moulkin sie moul sasuc.”4
Ine kuht eis ke kuht isuslac ahkkahlwem luhmasr sifacna ac use luhngse yurin sucu fin facluh lasr. Tuhsruhktuh, ke kuht “sifil isuslac” ke pacptais, kahlwem lasr ahkyohk ke luhmasr. “Ke srihpen wuhlweacng se suc kowos oraclah kowos fah pahngpahng tuhlihk nuhtin Kraist, … tuh liye, … El orekowoslac in nguhn; tuh kowos fahk lah insiowos eklac nuh ke luhlahlfongi ke Inel; ohinge, kowos isuslac Kacl.”5
Oruh, ke luhman in wuhlweacng ac puhla in luhgnse, kuht pahngonyuck ke inen Jisus Kraist. Ac “fah wacngihn sie ine sahyac ac ituckyang kuh kuhtwena inkacnek kuh ohiyac ma molwelah kuh in tuhkuh nuh yurin tuhlihk nuhtin mwet, ke inen Kraist muhkwena.”6
Inen Jisus etuhyak pacl loeslac met liki isuslac Lal. Nuh sin Tohkoksrah Benjamin, lipufacn se palye: “Ac El fah pahngpahng Jisus Kraist, Wen nuhtin God, … ac ninac Kiacl fah pahngpahng Mary.”7 Orekma Lal ke “luhngse moliyucklac”8 ahkkahlwemyeyuck nuh sin tuhlihk nuhtin God ke wosasuc oasr fin facluh, ke pacl lal Adam ac Eve nwe ke misenge, muh elos kuh in etuh lah “meac pwelucng elos kuh in ngwet nuh kac tuh in iyucklac ma koluk lalos.”9
Yac se tari ah, Prestuhn Russell M. Nelson kwacfe ke “nguhsr luhn mwet pahluh se” nuh sin muhtwacn in “nahwelah pacl fahsruh ke kahsruh orwacni mwet Israel.” El suli kuht in riti Puk luhn Mormom ac “mahkiac kais sie fuhs ma ahkuhtweyac, kuh kapsra nuh ke, Mwet Lahngo.” El siyuck sesr in “oruh in oasr srihpac in sramsram ke Kraist, ahkfuclwactye ke Kraist, ac luti ke Kraist yurin sucu ac kawuck [lasr].” Sahp kowos muhtwacwack in akihlen fahko luhn olwelah Lal tuh “kowos ac elos ac fahsr fototo nuh sin Mwet Lahngo. … Ac eklac, finne ma usrnguhk, fah muhtwacwack in sikyak.”10
Olwelah lasr in esam Mwet Lahngo pacl nuhkwewa use kuh nuh sesr in tu kuh ke ma pwacye ac suwohswohs—ke kuht oasr yurin puhslac mwet kuh kuht muhkwena, acn muh wacngihn mwet etuh mukwikwi lasr sahyacn God. Ke kuht esamuhl ac Inel kuht eis nuh facsr, wacngihn pacl in ahkkolukye kuht sifacna ke kuht kapsra kuht sifacna nuh ke mwet sahyac kuh nuhnuhkuh upac. Ke ahtron muhtasr ngwetwacng nuh ke Mwet Lahngo, kuht liye kuht sifacna ke ip lasr pwacye—tuhlihk kuloh nuhtin God.
Pacl in esam wuhlweacng lasr ahkmihsye elyah fin facluh lasr, ekuhllah suhmuhngnguh ke kuht sifacna nuh ke puhlaik, ac use finsrak ke pacl upac.
Ac ke kuht tihkuclkuclwack ac puhtatlac ke kihluckyak lasr fin inkacnek ke wuhlweacng, kuht enenuh in esam Inel ac luhngse kuhlwacng Lal nuh sesr muhkwena. “Tuh oasr yohrohl kuh nuhkwewa, lahlahlmwetmwet nuhkwewa, ac etatwen nuhkwewa; El etuh ma nuhkwewa, ac El sie God pahkotwen … nuh selos suc fah auliyak ac luhlahlfongi ke Inel.”11 Pwacyena, wacngihn puhsra emwem likina inen Jisus nuh selos suc, ke inse muhsahl ac toasr in nguhn, suk in “oruh wo ac eklac wolac.”12
Prestuhn Nelson el luti: “Lwen sac somlah ke kowos kuh in Mwet Christian mihslac ac fihsrwacsr. Kalmacn alu lowos tiac pa wi alu muhkwena ke Sacnri Kalmacn pa wi mwet tuhma lutlut pwacye ke lututacng in Sacnri nwe ke fong in Sactte. … Wacngihn ip in kuhtuh pacl wi mwet tuhma lutlut luhn Leum Jisus Kraist.”13
Insese lasr in eis nuh facsr inen Kraist yohk likina sramsram lucng muhkwena. Tiac wuhlwelah srihsrihk kuh facsin na. Tiac wal se kuh name tag kuht nukum. Tiac kahs muh kuht fihliyac fin acn in loang kuh srihpsrihpyak ke pihsinkac. Inel pa ine se muh “nokomang,”14 sihmihsyucklac insiyacsr, ac “taflah ke [luhmasr].”15
Kuht enenuh in esam kihsac in iwelah luhn Mwet Lahngo, pacl nuhkwewa, ke nuhnak lasr, mukwikwi lasr, ac kuhpahsr yurin mwet sahyac. El tiac esam inacsr muhkwena, tuhsruhk El esam kuht pacl nuhkwewa. Mwet Lahngo El fahkwack:
“Tuh yac sie muhtwacn kuh in muhlkuhnlah tuhlihk katiti nahtuhl, tuh elan tiac pahkomuhta wen se ke insiacl? Ahok, elos kuh in muhlkuhnlah, tuhsruhk Nga fah tiacna muhlkihnkowoslac, O mwet Israel.
“Liye, Nga sihmihskowoslac lun pouk.”16
Pretuhn George Albert Smith el luti, “Ahkfuclwactye inewos, mweyen sie lwen uh oasr ma wo ac mwe enenuh lowos in ripohrtiyac … nuh sin Pahpah tuhmowos inkuhsrao … lah meac kowos oruh ke [inewos].”17
Oacna inen Nephi ac Lehi sollac in okak, kuh in fwackyuck ac sihmihsyucklac kacsr muh kuht mwet tuhma lutlut pwacye luhn Leum Jisus Kraist? Kuh kuht ahkfuclwactye inel Jisus Kraist muh kuht insese in eis nuh facsr? Kuh kuht pa kewana “mwet luti se ac mwet loh se”18 ke luhngse kuhlwacng Lal ac kuh in molwelah Lal?
Sie pacl ah, nga lohngwack nuh ke Puk luhn Mormon. Ke sapta in sahflah luhn 2 Nephi, nga lohng Nephi el fahk ma se nga tiac lohng ke ohiyac sac met. Ke lusen ma sihmlac lal, el luti ac fahkwack ke “Mwet in Molwelah,” “El suc Muhtahl luhn Israel,” “Lahm nuhtin God,” ac “Messaia.” Tuhsruhk ke el kaliyac ma sihmlac lal, nga lohngohl fahk kahs inge: “Nga kaksak ke ma kahlwem; nga kaksak ke ma pwacye; nga kaksak ke Jisus luhk, tuh El molwelah nguhnihk liki hell.”19 Ke nga lohng kahs inge, insiyuck enganwack ac nga sifil lohng kahs inge pacl nuh ke pacl. Nga akihlen ac suhpang nuh ke fuhs sac oacna ke nga akihlen ac suhpang nuh ke inek.
Leum El fahk, “Ahok, insewowo mwet inge suc kena in us Inek; tuh Inek elos fah pahngon; ac elos ma Luhk.”20
Ke mempucr luhn Alu luhn Jisus Kraist luhn Mwet Luhlahlfongi ke Lwen-sahflah, lwelah kuht “engan [eis nuh facsr] inen Kraist”21 in ahkfulwactye Inel ke luhngse, ahkfulwact, ac orekma wo. Nga fahkwack muh El pa “Lahm nuhtin God, ahok, finne Wen Nuhtin Pahpah Ma Pahtpaht.”22 Ke inen tuhlihk muhtahl se Nahtuhl, Jisus Kraist, amen.