Fuhfahsrfyucsr Wolacna Lom
Mwet Lahngo El suli kuht, kais sie lwen, in likiyac nuh sahyac ma puhlakihnyuck wo fihsrwacsr ac karihngihnyuck lasr ac Weluhl ke fuhfahsryucsr in luti mwet uh.
Luhn Hobbit an
Puk sacohk sin tuhlihk uh sihmlac ke yac puhs somlah ah muhtwacwacack ke pohloh kahs se “Ke sie luhf infohk uh hobbit se muhta we.”1
Sramsram kacl Bilbo Baggins ah ma ke hobbit wo ac oacyac se suc ituckyang pacl na wowo se emet lal—sie pacl in fuhfahsryucsr ac olwelah nuh ke opi na wowo se.
Elyah uh pa inkaiyacn hobbit ma sifacna suhnakuhnolos an tiac luhngse wi fuhfahsryucsr uh. Moul lalos an ma na ke moul wo fihsrwacsr. Elos engan in mongo pacl ohnkohsr ke lwen se ke elos kuh in eis ma inge ac sislah pacl lalos ke imac lalos, sruhmuhnyuck sramsram nuh mwet forfor, on, sritaclkihn mwe sritacl on, ac ayuck ke pwacr luhn facluh.
Tuhsruhk, ke ituckyang nuh sel Bilbo ma kunacl ke sie pacl in fuhfahsryucsr, ma se el puhlahkuhnwack loal ke insiacl. El kahlwem e ke na muhtwacwacackiyac ah lah fuhfahsryucsr se inge ac upac. Finne sensen. Sahp elac tiac pac fohlohk.
Na tuhsruhk, pahng in forfor sukok ohrohr tilyang loal nuh ke insiacl. Na oruh, hobbit oacyac se inge el som sislah moul wo fihsrwacsr sac ac muhtwacwacack fahsr ke inkacnek nuh ke fuhfahsryucsr wolacna ma ac usacllah na ne “we ac sifilpac fohlohk.”2
Fuhfahsryucsr Lom
Sahp sie srihpac oruh sramsram se inge etweyuck sin inkaiyacn mwet uh pa ke srihpen ma se inge pa sramsram se pac lasr.
Pacl loeloes somlah ah, finne met liki kuht isuslac ah, ke pacl ma matwacn mwet uh sihpihsrpihsrlac ke pacl uh ac ohkohklah ke mwe acsmakihn, kuht suliyuck pac in wi som nuh ke fuhfahsryucsr uh. Ma se inge tuhkahkihnyuck sin God, Pahpah tuhmasr Inkuhsrao. Insese in oruh fuhfahsryucsr se inge kalmac pa ac som liki moul wo fihsrwacsr ac sefiyacn acn ma raunellah ingacn. Kalmac pa ac tuhkuh nuh facluh nuh ke sie fuhfahsryucsr sesseslah ke ma sensen ac ongaiyac ma tiac etweyuck.
Kuht etuh lah ac tiacna fihsrwacsr.
Tuhsruhk kuht oacyacpac etuh lah kuht ac eis ma sekoyuck sacohk, weacng mahno se ac puhlakihn engan ac ahsor yohk luhn moul suhkawihl. Kuht ac lotwelah in kampare, in suk, ac in tikuclkucl. Kuht ac sokwack ma pwacye ke God ac kacsr sifacna.
Pwacye lah, kuht etuh tari lah kuht ac oraclah tahfonglac pucspucs ke fuhfahsryucsr uh. Tuhsruhk oasr pac olweacng se lasr: lah ke srihpen iwaclah yohk luhn Jisus Kraist, kuht kuh in ahknwacsnwacsyeyucklac ke tahfonglac lasr, ahkkweyeyucklac ac ahknwacsnwacsyeyucklac ke nguhnasr, ac sie lwen sifilpac moulyak ac sifilpac ohsun nuh selos suc kuht luhngse.
Kuht etwaclah luhpan luhngse luhn God nuh sesr. El use nuh sesr moul, ac El kena kuht in kuhtanglah. Ohinge, El tuh ahkolah sie Mwet Lahngo nuh sesr. “Ne ohinge,” Pahpah tuhmasr Inkuhsrao El fahk, “kom kuh in sulaclah nuh sum sifacna, tuh ma se inge utuckot nuh sum.”3
Sahp oasr ip ke fuhfahsryucsr in suhkawihl ma ahksensenye ac finne ahksahngwengye tuhlihk nuhtin God, ke srihpen puhs suhnuhn tamuhlwel ac tahmtahel nguhnnguhn wiyacsr uh sulaclah in tiac insese kac.4
Ke mwe sang ac kuh luhn sulaclah in nwacsnwacs, kuht otwelah lah finsrak yohk lasr ke ma kuht kuh in lotwelah ac eklac ma pahtpaht nuh kac uh arulacna fal in lipangpang oruh.5
Ac pa sis, luhlahlfongi ke owelach ac kuh luhn God ac Wen Sacohk Nahtuhl, kuht tuh insese nuh ke ma na upac se inge.
Nga tuh insese.
Ac kom tuh insese pac.
Kuht tuh insese in som liki karihngihnyuck luhn lohm se emet sesr ac in som nuh ke fuhfahsryucsr wolacna lasr sifacna nuh “we ac sifilpac fohlohk.”
Pahng nuh ke Fuhfahsryucsr
Ac tuhsruhk, oasr ohiyacn moul suhkawihl uh in ahklusrongtwenye kuht, meac tiac? Kuht kwacna eislah muhtahsr liki srihpen fuhfahsryucsr wolacna lasr uh, kuht kena puhlakihn ma wo fihsrwacsr ac kahkahsrihklac ke kapkapwack uh.
Finne ohinge, srwackna oasr ma se kuht tiac kuh in lahfwekihn, tilyang loal an insiacsr, ma masrinsrwacllah suk srihpac fuhlwact ac suwohs. Masrinsrwacl se inge pa sie srihpac ma oruh mwet uh fungyang nuh ke wosasuc ac Alu luhn Jisus Kraist. Wosasuc sifilpac fohlohkihnyuckyak uh, ke sie srihpac, ahksasucyeyucklac luhn pahng nuh ke fuhfahsryucsr ma kuht insese in eis ke pacl loeloes somlah ah. Mwet Lahngo El suli kuht, kais sie lwen, in likiyac nuh sahyac ma puhlakihnyuck wo fihsrwacsr ac karihngihnyuck lasr ac Weluhl ke fuhfahsryucsr in luti mwet uh.
Oasr kucruc pucspucs ke inkacnek se inge. Oasr infahlfahl, inging, ac inkacnek kucruc nuh sahyac. Sahp finne oasr ma luhmweyuck muh oacna pwepwenu, fuhfuhsr, ac finne trackohn sie kuh luo. Tuhsruhk kom fin muhta na ke inkacnek an ac luhlahlfongi God, kom ac fah sokwack inkacnek nuh ke acn wolacna kom ac fahsr nuh we an ac fohlohklac nuh ke lohm sum inkuhsrao.
Na kom ac muhtwacwacack fuhkah?
Fihsrwacsr pac na.
Sang Insiom nuh sin God
Ma se met, kom enenuh in sulaclah in sang insiom nuh sin God. Kampare ke kais sie lwen in Sokohl. Lotwelah in luhngse El. Ac na lwelah luhngse se inge in ahkkweye kom in lotwelah, kahlwem, ac ukwe mwe luti Lal ac etwaclah in karihngihn masap luhn God. Wosasuc fohlohkihnyuckyak luhn Jisus Kraist utuckuh nuh sesr ke sie inkacnek kahlwem ac fihsrwacsr ma sie tuhlihk kuh in kahlwem kac. Tuhsruhk wosasuc luhn Jisus Kraist oasr topukyac nuh ke kihsensiyuck ma upac emet ke moul uh ac arulacna loal ac upac oruh finne lutlutkihnyuck ac motkoeyuck ke lusen moul nohfohn se, kuht kuh in kahlwem kac kuhtuhsrihsrihk finne ke ip sefanna ke ip srihsrihk.
Kom fin tahfuh luo ke fuhfahsryucsr se inge ke srihpen kom ahlohloh ke ma kom kuh in oruh an, esam lah luti mwet uh tiacna pa in oruh ma uh in suwohs; ac pa in oruh ma uh ke inse pwacye. Sulaclah lom in ahkkahlwemye lah kom mwet fuhkah se, yohk liki na kuhiyom.6
Finne ke kom puhtatlac, kom kuh in sulaclah in tiac fuhlweack, tuhsruhk in konwacack kuh lom, fahsr nuh met, ac tuyak. Pa ingacn mwe srikasrak yohk se emet ke fuhfahsryucsr uh.
God El etuh lah kom tiac suwohswohs, lah kom ac fah puhtatlac ke kais kuhtuh pacl. God El luhngse kom tiac srihkweni ke kom tikuclkucl liki na kom kuhtanglah.
Oacna sie ninac pahpah suc luhngse, El kena kom in srihke ke insiom. Luti mwet uh oacna in muh lutlut in sritacl ohkohn. Sahp ma nuhkwewa kom kuh in oruh emet an pa sie sramsram tiac arlulacna akihlenyuck ke “Chopsticks.” Tuhsruhk kom fin fahfahlacna in ahkpah, on fihsrwacsr ac fah sie pacl somlah nuh ke sritacl in ohkohn wi mwe sritacl sahyac, on ke pohloh kahs ma oacna sie puhsrwen kahs se ma sahflah kac ah, ac sritacl in ohkohn wi mwe sritacl luhn un mwet pihsrlac ke kain in mwe sritacl puhs wolacna.
Inge, lwen sac sahp ac tiac tuhkuh ke lusen moul se inge, tuhsruhk ac tuhkuh. Ma nuhkwewa God El siyuck uh pa kom in okak in kampare na.
Saplaklac ke Luhngse nuh sin Mwet Sahyac
Oasr sie ma pwacr, apkuhran in tahfuhnkahs, ke inkacnek soko kom sulaclah uh: inkacnek sefanna nuh sum kom in kapkapwack ke fuhfahsryucsr in wosasuc lom an pa in kahsruh mwet sahyac in kapkapwack pac.
In kahsruh mwet sahyac pa inkacnek nuh ke mwet tuhma lutlut uh. Luhlahlfongi, finsrak, luhngse, pahkomuhta, ac kuhlwacnsap uh ahkkweye kuht oacna mwet tuhma lutlut.
Ke kampare lom in kahsruh mwet suhkahsruhp ac mwet oasr enenuh la, in saplaklah nuh selos suc kweok, ohiyac lom sifacna an ahknwacsnwacsyeyucklac ac ahknoeyucklac, nguhnum ahkyohkyuck, kom fahsr ac farngom loesaclihk kuhtuhsrihk.
Tuhsruhk luhngse se inge tiac kuh in tuhkuh ke sanoyacn moliyac. Tiac kuh in kain in kuhlwacnsap se ma sano na in akihlenyuck, kaksakihnyuck, kuh luhngkihnyuck.
Mwet tuhma lutlut pwacye luhn Jisus Kraist uh luhngse God ac tuhlihk Nahtuhl ac tiacna sano kuhtwena ma in sang fohlohkihn. Kuht luhngse elos suc ahksuhpwacrye kuht, suc tiacna luhngse kuht. Finne elos suc isrucn, ahkkoluk, ac suk in lokoalok nuh sesr.
Ke kom nwacklah insiom ke luhngse nwacsnwacs luhn Kraist, nimet kom sekihn kuhtwena acn nuh ke ohiyac suhluhng, nuhnuhnkuh, ac ahkmwekihn. Kom in liyacacng na masap luhn God ke srihpen kom luhngse El. Ke ohiyac se, kom kahkahsrihk na in eklac oacna Kraist ke nuhnak ac orekma lom an.7 Ac fuhfahsryucsr fuhkah se kuh in yohk liki na ma se inge?
Akacsruhi ke Sramsram Lom an
Ma se ahktolu kuht kampare in pihsrlac kac ke fuhfahsryucsr se inge pa in eis nuh facsr sifacna inen Jisus Kraist ac tiac mwekihn lah kuht mempucr uh ke Alu luhn Jisus Kraist.
Kuht tiac na wihkihn luhlahlfongi lasr uh.
Kuht tiac na pihkihnyac.
Siena liki inge, kuht sramsramkihn fuhfahsryucsr lasr uh nuh sin mwet sahyac ke ohiyac wo ac ohi. Pa ingacn ma kawuck uh oruh—elos sramsram ke ma ma yohk srihpac nuh selos. Ma ma an fototo nuh insiaclos ac oraclah oasr ma eklac kac nuh selos.
Pa ingacn ma kom oruh uh. Kom sruhmuhn sramsram lom ac ma kom puhlakihn oacna sie mempuhr ke Alu luhn Jisus Kraist luhn Mwet Luhlahlfongi Lal ke Lwen-sahflah.
Kuhtuh pacl uh sramsram lom an oruh mwet uh isrwacsr. Kuhtuh pacl uh ac oruh elos sroninmuhtayak. Kuhtuh pacl uh elos ac kahsruh mwet uh in fahfahlacna ke mongfihsrwacsr, fokoko, ac puhlaik in sun siepac ao, siepac lwen in fototoyang kuhtuhsrihk nuh yurun God.
Akacsruhi ke ma kom puhlakihn an ke monum sifacna, ke kain in acn in aetuhi ke internet, ke kain in u, acn nuhkwewa.
Sie sin ma sahflah ma Jisus El fahk nuh sin mwet tuhma lutlut Lal pa elos in som nuh ke muhtuhnfacl nuhkwewa fin facluh ac fahkwelihk sramsram ke Kraist suc sifilpac moulyak.8 Mihsenge kuht pac engan in insese nuh ke kunohkohn wolacna se ingacn.
Fuhkah wolacnaiyacn pweng se kuht ac akacsruhi kac uh: ke srihpen Jisus Kraist, mukul, muhtwacn, ac tuhlihk nuhkwewa kuh in fohlohk wo nuh lohm selos inkuhsrao ac, ingoh, muhta in wolacna ac suwohswohs!
Oasr pac pweng wowo yohk in akacsruhi kac.
God El sikyak nuh sin mwet uh in pacl lasr inge! Oasr mwet pahluh moul lasr uh.
Lwelah ngan ahkacsmakihnye kom lah God El tiacna enenuh kom in “kuhkwackihn” wosasuc sifilpac fohlohkihnyuckyak kuh Alu luhn Jisus Kraist.
El muhngnguh na kom in tiac okanlah ye sie ahluh.
Ac mwet uh fin sulaclah lah Alu uh tiac ma nuh selos, pa ingacn sulaclah lalos an.
Tiac kalmac pa kom kuf. Kom fahfahlacna na in kuhlwacng nuh selos. Tiac pac kalmac pa kom in tiac sifilpac solwaclos.
Ma se ma sienalac inmahsrlon mwet aetuhi lom ac mwet tuhma lutlut pahkotwen ac puhlaik an pa—suli!
Kuht luhngse ac suhnakihn tuhlihk nuhkwewa nuhtin God, macnsis wal lalos in moul uh, macnsis lah elos mwet oyac kuh meac alu lalos an, macnsis ke sulaclah luhn moul lalos an.
Nuh ke ip lasr an, kuht ac fah fahk, “Fahsruh ac liye! Sokwack nuh sum sifacna lah fahsr fuhkah ke inkacnek luhn mwet tuhma lutlut uh ac oasr ma wo ac yohk srihpac kac.”
Kuht suli mwet uh in “fahsruh ac kahsruh, ke kuht srihke in oruh facluh in wolac.”
Ac kuht fahk, “Fahsruh ac muhta! Kuht pa tamuhlwel ac tahmtahel wiyom. Kuht tiac arulacna suwohswohs. Kuht luhlahlfongi God ac suk in liyacacng na masap Lal.
“Wi kuht, na kom ac oruh kuht wolac. Na, ke ohiyac se inge, kom ac fah eklac wolac pac. Lwelah kuht in tuhkweni eis fuhfahsryucsr se inge.”
Nga ac Muhtwacwacack Ngac?
Ke kawuck se lasr Bilbo Baggins el puhlakihn pahng se nuh ke fuhfahsryucsr uh wakreack insiacl, el sulaclah in monglac mutullac wo, pwacr ke mongo in litutacng, ac tang na mukwilac ke litutacng ah.
Ke Bilbo el muhtwaclihk ah, el liye lah lohm se sel ah okahrkahr, ac el kuhracnna wakreyuck liki plwacn na wowo se lal ah.
Tuhsruhk na kawuck se lal ah Gandalf el tuhkuh ac siyuck, “Kuh ngac ma kom ac tuhkuh an?”9 In falkeyac kawuck lal ah, Bilbo el sulaclah nuh sel sifacna lah meac elac oruh.
Na ohinge, hobbit na oacyac ac tiac pihsrlac se inge el sifacna kahsruhsr sahslah liki motonoac lal ah nuh ke inkacnek in fuhfahsryucsr uh arulacna pihsrpihsr oruh el muhlkuhnlah susu se lal, sikucl in fahsr, ac acnkisuhf se lal. El fihliyac pac tiac kanglah nohfohn mongo in litutacng ahkluo se lal ah.
Sahp oasr sie mwe luti ke ma se inge nuh sesr pac.
Fin kom ac nga puhlakihn muh mokleyuck kuht in wi fuhfahsryucsr wolacna luhn moul uh ac akacsruhi ke ma Pahpah luhngseyuck tuhmasr Inkuhsrao El akolah nuh sesr ke pacl loeloes somlah ah, nga ahkkweye kowos, mihsenge pa lwen se in fahsr tukun Wen nuhtin God ac Mwet Lahngo lasr ke inkacnek Lal ke kuhlwacnsap ac luti mwet uh.
Kuht kuh in tohllah lusen moul nofohn se sano nuh ke pacl se ma ma nuhkwewa tahklac suwohs. Tuhsruhktuh pa inge pacl in insacnweacng nohfohn in suk God, kahsruh luti mwet sahyac, ac akacsruhi nuh sin mwet sahyac ke ma kuht puhlakihn.
Fihliyac na susu lom, sikucl in fahsr, acnkisuhf, ac lohm okahrkahsr sum an.10
Nuh sesr suc fahsr tari ke inkacnek soko ingacn, puhlaik na, pahkomuhta, ekahk na, ac ahkwot!
Nuh selos suc som liki inkacnek uh, nuhnakmuhnahs fohlohkoh, sifilpac tuhkuh wi kuht, oruh kuht in fokokoi.
Ac nuh selos suc soenna muhtwacwacack an, efuh in kohtwaclah? Kom fin luhngse puhlakihn ma usrnguck ke fuhfahsryucsr wolacna in nguhn se inge, sis falkom nuh ke fuhfahsryucsr wolacna lom sifacna an! Sramsram nuh sin misineri an. Sramsram nuh sin kawuck lom ke Mwet Luhlahfongi ke Lwen-sahflah. Sramsram nuh selos ke orekma wolacna se inge ac ma usrnguck inge.11
Pacl in muhtwacwacack!
Fahsruh, Wi Kuht!
Kom fin puhlakihn muh moul lom an enenuh in oasr kalmac yohk la, srihpac yohk la, fokokoi inmahsrlon sucu an, ac in fototoi kuhpahsr la nuh yurun God, nuhnakmuhnahs, fahsruh, wi kuht.
Kom fin suk sie un mwet suc orekma in eklac wolac kais sie selos sfiacna, kahsruh elos suc enenuh, ac oruh facluh se inge in wolac, fahsruh, wi kuht!
Fahsruh ac liye lah meac fuhfahsryucsr wolacna, usrnguck, ac eye se inge oacna uh.
Ke inkacnek uh kom ac fah etwekomlac sifacna.
Kom ac fah etwaclah kalmac.
Kom ac fah etwaclah God.
Kom ac fah etwaclah fuhfahsryucsr pwacr ac wolacna emet ke moul lom an.
Ke ma inge nga fahkwack ke inen Mwet Molwelah ac Lahngo lasr, Jisus Kraist, amen.