![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F98%2F9d%2F989d48329604be039641581936ca67bdb3f4d333%2F989d48329604be039641581936ca67bdb3f4d333.jpeg/full/!250,/0/default)
Mwet Tuhma Lutlut Pwacye luhn Mwet Lahngo
Kuht kuh in puhla engan luhlahp ke Mwet Lahngo lasr ac wosasuc Lal pa pwelucng suc kuht muhsaheack moul lasr uh kac.
Wihklac kuhtuh ke Olweacng Mahtuh ke puk lal Haggai pa ahkuhtweyac ke un mwet suc enenuh kaiyuck lal Elder Holland. Elos sulwaclah ma stuh ke elos tiac fihliyac Kraist ke infulwacn moul lalos ac kuhlwacnsap lalos. Haggai el oraclah kuhtuh petsac ke kahs in ahknuhnak ma el kai mwet inge uh ke elos muhta na lohm wo selos liki na in muhsaheack tempuhl luhn Leum:
“Mwet luk, efuh ku kowos muta in lohm ma musaiyukla arulana wo, a Tempuhl luk musallana oan?
“Ku kowos tiana akilen ma sikyak nu suwos uh?
“Kowos yukwiya fita na pukanten, a ma kowos kosrani uh arulana pu. Oasr mwe mongo nowos, a kowos tia ku in kihpi kac. Oasr wain kowos in nim, a kowos tia muti kac! Oasr nuknuk lowos, tuh tia ku in akfusrfusrye kowos. Ac mwet orekma uh, molol tia fal in sang enenu lal.
“Kowos tiana akilen lah efu ku in sikyak ouinge?”1
Yac kom tiac luhngse mwe ahkuhtweyac ke yohk srihpaciyacn tahkuhnlah in wo ma wacngihn srihpac ke mwacta ma pahtpaht la lucng liki ma luhn God?
Nga wi sie toeni ke kuhfa luhn Leum ke pacl sa somlah ah, misineri tuhfahna in fohlohk liki misin lal ah etahi in fahk sie kahs luhn sie pahpah suc fahk arulacna wo nuhnak se inge nuh sin tuhlihk nahtuhl ke el fahk, “Ma kuht enenuh ingena uh pa in ahksrihkye Wi-Fi ac ahkyohkye Nephi!”
Nga muhta ke lacfahl Rohtoh Africa ke lusen yac limekohsr, nga liye mwe srihkasrak puhs ke mwet uh oraclah wo ma yohk srihpac ke wosasuc uh ac tiac mwekihn. Sie mwe srihkasrak uh pa inen sie acn in ahknoe taer ac pacluhnsi wil ke stosah e Ghana. Mwet se la uh sang ine ah “Thy Will Alignment.”
Kuht kuh in puhla engan2 luhlahp ke Mwet Lahngo lasr ac wosasuc Lal pa pwelucng suc kuht muhsaheack moul lasr uh kac. Tuhsruhk, arulacna fihsrwacsr pwelucng sacn in eklac nuh ke ma luhn facluh, ma wosasuc uh an oacna in ma yolyak srihk srihpac uh, kuh in ahkfal wi alu ke ao luo ke Sacnri. Ac fin pa inge ohiyac uh, ac oacpacna ke kuht sang molosr nuh lun “sie pack ma oasr pat kac.”
Haggai el fahk nuh sesr in insacnweacng—in oacna, ke kuht fahk fin acn Australia, “fair dinkum” ke moul ke wosasuc. Mwet uh fair dinkum ke elos oacpacna ma elos fahk muh elos oacna.
Nga etwaclah kuhtuhsrihk ke fair dinkum ac insacnweacng ke sritacl rugby. Nga etwaclah lah ke nga sritacl ke kuhiyuck, ke pacl nga sang nohfohn kuhiyuck, engan luhk ke sritacl ah yohk.
Yac se nga luhngse emet ke rugby pa ke yac se tukun high school. Team soko nga wi ah kwewana suhmaht ke sritacl uh ac insacnweacng. Team soko lasr ah itto ke yac sac. Tuhsruhk, sie lwen ah kuht ac sritacl lain team se ten liki kuht, ac tukun sritacl ah tari kuht nohfohn us muhtwacn kawuck lasr nuh ke tacn luhlahp ke yac sac ke college. Nga pahngon na muh ke srihpen ac fihsrwacsr sritacl se inge, nga enenuh in karihngihnyucyang in tiac kihnet tuh ngan kuh in egan yohk ke tacn ah. Ke sritacl sac, kuht tiacna arulacna insacnweacng kampare ke yuyang fuohf upac oacna ke kuht tuh oruh ke sritacl sahyac, oruh kuht kuf. In oruh in koluklac liki met ah, nga ahksahfyelah sritacl sac a inwaclihk fahfwack yohk, oruh tiacna ahkwoye ngetnget se luhk ah nuh sin muhtwacn kawuck se luhk ah. Sahp nga enenuh in lotwelah kuhtuh ma ah.
Ma sikyak nga puhlakihn na sienalac se ke sie sritacl tohkoh ah ma nga arulacna insacnweacng kampare. Ke sie pacl ah nga kahsruhsr in oasr srihpac in yucyang fuohf; nga sa na puhlahkuhnwack lah ngalyak muhtuhk. Pahpah el lutiyuck lah nga enenuh in tiac lwelah mwet sritacl lainyuc uh in etuh lah nga ngalyak, nga fahfahlac na in sritacl ne ke tari sritacl sac. Ke fong sac, ke nga srihke in mongo, nga koflah in ngalis. Lututacng tok ah, nga som nuh hospital, ac X-ray ah ahkpwacyeye lah sri soko ke inwaclihk uh kaptwelihk. Inwaclihk waeriyucki kauli ke lusen wik ohnkohsr.
Mwe luti uh lutiyuck ke puhpuhlyuck se inge ke inwacl fahfwack ac kaptwelihk. Finne nga esam na suhpwacr luhk ke nga ke kang mongo ma tiac fihsrwacsrsrwacsr ke lusen wik ohnkohsr ke nga kuh na in mongo na ma sup kof, nga tiacna auli lah kaptwelihk sri ke inwaclihk uh ke srihpen ma inge sikyak ke nga sang kuhiyuck nohfohn. Tuhsruhk oasr auli luhk ke fahfwack inwaclihk ah ke srihpen nga tiacna sang kuhiyuck.
Sang kuhiyacsr nohfohn tiac kalmac pa kuht ac fah apihsyucki pacl nuhkwewa ke mwe insewowo kuh kwacna kuhtanglah. Tuhsruhk kalmac pa kuht ac engan. Engan uh tiac ma puhlakihnyuck wo ke kihtin na pacl kuh finne engan na ke kihtihn pacl. Engan uh muhtweng ac tuhkuh ke insacnweacng lasr ma ahkkweyeyuck sin Leum.3
Sie mwe srihkasrak ke ahkkweyeyuck se inge pa sramsram se kacl Oliver Granger. Prestuhn Boyd K. Packer el fahk lah ke mwet luhlahlfongi ah tuh ukohkyak liki acn Kirtland, … Oliver el tuh muhta na we elan kuhkwackuhnlah acn lalos ke luhpah na srihsrihk. Tiac na oekyuck muh el ac kuh in kuhtanglah. Na, pwacye, el tiac na kuhtanglah!4 El tuh srihsrngiyucki sin Prestuhnsi Se Met in oruh sie kunohkohn na upac, kuh upac in oreklac. Tuhsruhk Leum El ahkkweyeyacl ke insacnweacng pucspucs lal ma el koflah in oraclah ke kahs inge:
Leum El fahk muh El esam mwet kuhlwacnsap Lal suc pa Oliver Granger; liye, pwacye na lah El fahk nuh sel lah inel ac fah ohi in esamyuck ke fihl nuh ke fihl, ne tok ma pahtpaht.
Leum El fahk lah ohinge, lwelah elan insacnweacng in srihke in molwelah ac langwelah Prestuhnsi Se Met ke Alu Lal, … ac ke pacl se el puhtatlac el fah sifilpac tuyak, tuh kihsac lal ac fah muhtahl nuh sin Leum yohk liki na ma kapwack lal.5
Ma ingacn sahp pwacye nuh sesr nohfohn—tiac ke kuhtanglah lasr tuhsruhk tuh ke kihsac ac kampare lasr pa yohk srihpac nuh sin Leum.
Siepac mwe srihkasrak ke sie mwet tuhma lutlut pwacye luhn Jisus Kraist pa sie kawuck sacohk suc muhta Côte d’Ivoire fin acn Rohtoh Africa. Tahmtahel wo, ac oaru se inge kweoklacna ke ahkfohsyeyuck el ke ma el puhlakihn, ac finne acnwuck pac el sin mukul tuhmwacl ah ke lusen pacl loeloes, ac oacna inge ne ke na elos sahf. El tiacna tihkuclkuclyak ke luhlahlfongi lal ac wolacnaiyacl, tuhsruhk ke srihpen koluk luhn mukul tuhmwacl ah nuh sel, el arulacna ngalyak ke lusen pacl loeloes. Ke kahs lal sifacna, el ahkuhtweyac ma sikyak ah:
“Finne nga fahk muh nga nuhnakmuhnahs nuh sel, nga kwacna kihnetuh mutul; kihnet sacn wiyuc lwen na fohn se. Oacna in fihrihr fol se insiuck. Pacl puhs nga pruhe nuh sin Leum in eislah likiyuc, tuhsruhk arulacna ngal upac oruh nga luhlahlfongi na pwacye lah ac wiyuc na ke lusen moul luhlahl luhk uh. Ngal yohk liki na ke misac ninac kiyuck ah ke nga srackna srihk ah; ngal yohk liki na ke pahpah tuhmuhk ah misac ac oacyacpac wen se nuhtihk. Oacna in maelihk ac afuhnlah insiuck, oruh nga nuhnkuh muh ngac misac ke oacna sie pacl.
“Kuhtuh pacl sahyac nga siyuck sihk sifacna lah meac Mwet Lahngo El kena ngan oruh ke ohiyac se nga oasr kac inge, ac nga tuh kena fahk, ‘Ma se inge arulacna upac, Leum.’
“Na sie lututacng ah nga suk ngal se ma tuhkuh ke ma inge nuhkwewa ke insiuck ac lollah in loal, suk ma inge ke nguhnihk. Wacngihnlac tiac kuh in konweyuckyak. Nuhnak luhk uh sa na ngwetlah motko srihpac nuhkwewa oruh ngan puhla ngal uh, tuhsruhk nga tiacna puhlakin ngal sac. Nga sano lusen lwen na fohn se in liye lah ngwac puhlahkuhnwack ngal ke insiuck; nga tiacna puhlakihn. Na nga sikuckmuhtuhnte ac sang kuloh nuh sin God ke El iwaclah kihsac ke orekma luhn Leum nuh sihk.”6
Tahmtahel se inge el ingena siliyucki nuh sin sie mukul na wo, oaru suc luhngse el na upac.
Ohinge meac elah lasr ac enenuh in oacna kuht fin mwet tuhma lutlut pwacye luhn Kraist? Ac luhpahkah sacohklacna luhn wosasuc uh nuh sesr ke kuht “nuhnkuh ohiyacsr,” oacna ke Haggai el tuh fahk ah?
Nga luhngse mwe srihkasrak se ke elah pwacye se ma tuh ahkkahlwemyeyuck sin pahpah tuhmwacl Tohkohsrah Lamoni. Kom ac esam kasrkuhsrak lal ke el sokwack lah wen se nahtuhl ah el weluhl Ammon, sie mwet Nephi—sie un mwet suc mwet Laman ah koase. El faeslah katlas nahtuhl ah in acnwuck nuh sel Ammon ac tiac paht na el liye katlas nahtuhl Ammon ah ke inkacwacl sifacna. “Inge tohkohsrah, el sahngweng tuh elan misac, fahk: Kom fin fihliyuclac nga fah acsot nuh sum oacna sie ma kom siyuck, finne nuh ke tahfuhn tohkohsrahi.”7
Lohacng nuh ke sang se lal an—tahfuhn tohkohsrahi lal nuh ke moul lal.
Tuhsruhk tuh tohkoh, tukun el kahlwemwack ke wosasuc, el oraclah siepac mwe sang. “Tohkohsrah el fahk: Meac nga enenuh in oruh tuh ngan kuh in eis moul ma pahtpaht ma kom sramsramkihn inge? Ahok, meac nga enenuh in oruh tuh ngan kuh in isuslac ke God, tuh nguhn koluk se inge in eisyucklac liki iniwuck, ac eis Nguhn Lal, tuh nga in kuh in sesseslah ke engan, tuh ngan kuh in tiac lihsyucklac ke lwen sahflah? Liye, el fahk, nga fah fuhlweack nohfohn ma luhk, ahok, nga fah fuhlweack tohkohsrahi luhk, tuh ngan kuh in eis engan yohk se inge.”8
Ke pacl se inge, el tuh ahkolah in fuhlweack nohfohn tohkohsrahi lal, ke srihpen wosasuc uh yohk srihpac liki na ma nuhkwewa lal! El fair dinkum ke wosasuc.
Na, kihsensiyuck soko nuh sesr kais sie uh pa, yac kuht oacyacpac fair dinkum ke wosasuc? Mweyen tahfuh luo uh tiac na fair dinkum! Ac tiac etweyuck God Elan kaksakihn mwet fucsrfucsr.9
Wacngihn ma sacohk, kuh ma kuht pwacr in muhta oruh, kuh kuhtwena wal, kuht kuhtwena acn in toeni ke internet, kuh kuhtwena video game, kuh kuhtwena sritacl, kuh kuhtwena kakawuck nuh sin mwet pwengpweng, kuh kuhtwena ma fin facluh sacohk liki na moul ma pahtpaht. Na oruh Leum El kai mwet nuhkwewa in “nuhnkuh ohiyacsr.”
Ma nga puhlakihn uh ahkkahlwemyeyuck wo emet ke kahs lal Nephi: “Nga kaksak ke ma kahlwem; nga kaksak ke ma pwacye; nga kaksak ke Jisus luhk, tuh El molwelah nguhnihk liki hell.”10
Yac kuht mwet fahsr Tohkohl pwacye suc sang nohfohn Kacl ke srihpacsr? El suc pa Mwet Lahngo lasr ac Mwet Iwaclah lasr yurun Pahpah? El suc sifacna sang nohfohn ke iwaclah ke kihsac Lal ac inge ke luhngse Lal, pahkotwen Lal, ac kena Lal tuh kuht in eis engan ma pahtpaht? Nga kwacfe nuh sin mwet nuhkwewa suc lohng ac riti kahs inge: Nuhnakmuhnahs, nuhnakmuhnahs nimet kom kohtwaclah insacnweacng in kampare lom an nohfohn ne ke na kom oraclah ke kuhtuh pacl fahsruh uh. Eis fair dinkum ingena ac puhlakihn engan! Ke inen Jisus Kraist, amen.