Kahl luhn Mwet Lahngo
Ke kuht tuhkuh nuh Sel, God Elac tuhkuh in molikuhtlac, in unwekuhtlac kuh ahkkweye kuht in sun ma nuhkwewa.
Apkuhran in yac luo tausin tari ac, Mwet Lahngo El fani finohl ah tukun El luti ke Beatitudes ac mwe luti sahyac luhn wosasuc. Ke El fahsr, sie mukul maskihn lepa tuhkuh nuh yohrohl. Mukul sac suhnakihnuhl ac ahkfuhlwactyacl ke el sikuck muhtuhnte met luhkwel Kraist, el ke ahkkweyeyuck ke mas lal. Fihsrwacsr siyuck lal: “Leum, fin ou lungse lom, kom ku in aknasnasyeyula.”
Mwet Lahngo El tuh saplak pahol ac, kahlilyac, fahk, “Nga lungse; kom in nasnasla.”1
Kuht lotwelah inse lah Mwet Lahngo lasr kena ahkinsewowoye kuht pacl nuhkwewa. Kuhtuh mwe insewowo ac tuhkuh ingena, kuhtuh ac pahtlac, ac kuhtuh finne tukun kuht misac, tuh mwe insewowo ac tuhkuh ke pacl fal la.
Oacna mwet maskihn lepa se, kuht kuh in konwacack kuh ac mihslac ke moul se inge ke kuht eis kena Lal ac etuh lah El ke ahkinsewowoye kuht. Kuht kuh in eis kuh in kuhtanglah kuhtwena ma upac, wiwina kuhtwena mwe srihfe, ac in kahlwem ac muhtweng ma ke moul lasr. Pwacyena, ke ma kweok emet ke moul Lal, kuh luhn Mwet Lahngo yohkwelihk ke El fahk nuh sin Pahpah Tuhmwacl, “Lela ma lungse lom in orek.”2
Mwet maskin lepa se el tiac na siyuck ke inse fuhlwact kuh semuhtweng. Kahs Lal ahkkahlwemye inse puhsisacl, wi luhlahlfongi tuh oacyacpac wi kena pwacye lah kena luhn Mwet Lahngo oreklac. Pa inge srihkasrak luhn ohiyac fal ma kuht in tuhkuh nuh yurun Kraist kac. Kuht in tuhkuh nuh Yohrohl ac luhlahlfongi lah kena luhn Mwet Lahngo pa ma wo emet ke moul lasr ingena ac ke moul se tok. Oasr ma El etuh ke pacl ma pahtpaht ma tiac oasr yohrohsr. Kuht enenuh in tuhkuh nuh yurun Kraist ke kena suwohs lah luhngse lasr fahsr fal nuh ke luhngse luhn Pahpah, oacna luhngse Lal.3 Ma inge ac ahkoekuhtlac ke moul ma pahtpaht.
Upac nuh sihk in nuhnkuh ke kweok in nuhnak ac mahno luhn mwet maskihn lepa se ma tuhkuh nuh yurin Mwet Lahngo. Mas lepa ahkkolukye nerves ac ikoac, oruh mwet se in suhkahpahs. Oacyacpac, arulacna ahkmwekihnye sie mwet. Mwet maskihn lepa enenuh in som liki sucu lalos ac muhta srwenglah liki mwet sahyac. Nuhnkweyuck tuh mwet maskihn lepa fohkfohk, ke mahno ac nguhn. Ke srihpen ma inge, masap luhn Moses fahk tuh mwet lepa enenuh nokomacng nuknuk muhsahlah ac salac “Fohkfohk!” ke elos fahsr.4 Mas ac sruhngweyuck, mwet maskihn lepa tuh muhta ke lohm mahtuh kuh inkuclkucl uh.5 Tiac upac in petsacilah tuh mwet maskihn lepa se suc tuhkuh nuh yurun Mwet Lahngo el inse muhsahllah na pwacye.
Kuhtuh pacl uh—oacna sie ohiyacn moul uh—kuht pac kuh in puhla muhsahllah, finne ke mukwikwi lasr sifacna kuh mwet sahyac, ke ma kuht kuh in eklac kuh tiac. Ke kain pacl inge, kuht kuh in fuhlwelah luhngse lasr ke Pahol.
Yac ekahsr somlah ah, Zulma—muhtwacn kiyuck, tahfweyuck, ip yohk se emet luhk—eis nus upac wik luo met liki macruht luhn sie tuhlihk nahtuhsr. Oasr cancer se inkoacl, ac muhtwacack moi in yohkwelihk. Muhtahl muhtwacack in fahfwack, ac el enenuh in laslas. Nuhnak puhkantwen som ke sifacl ac toasr insiyacl. Kuh cancer se srwackna kapwack? Kuh mahnol ac kwelac fuhkah? Kuh muhtahl ac fah ullac? Kuh fuhkah luhpan kweok lal? Kuht muhtahl ac fah kihnetyak ke lusen moul lal? Kuh cancer sac ac fohlohk tukun laslas ah? Kuh el kuh in srwackna wi macruht luhn wen nahtuhsr? Ke el muhta ke acn in laslas, el puhla muhsahllah.
Ke pacl yohk srihpac sacn, Nguhn mahmah fahk nuh sel muh el enenuh eis luhngse luhn Pahpah. Na el sulwaclah in sang luhlahlfongi ke God. El puhla fokoko muh oacna sie rihport uh, luhngse Lal pa ma wo emet kacl. El sa in mutullac ke laslas uh.
Tok, el suhmuhslah ke puk se nahtuhl: “Ke acn in laslas ah nga epahsr met liki Kom, ac fuhlweyuclac nuh luhngse Lom, nga mutullac. Nga etuh lah nga kuh in luhlahlfongi Kom, etuh lah wacngihn ma koluk tukuh yurum me.”
El sokwack kuh ac mihslac in fuhlwelah luhngse lal nuh sin Pahpah. Lwen sacn, God El ahkinsewowoyacl yohk.
Oacna sie ohiyacn moul lasr, kuht kuh in ahkyohkye luhlahlfongi lasr in tuhkuh nuh yurin Kraist ac konwacack God se kuht luhlahlfongi kac. Oacna tuhlihk se nuhtik sihmlac sie pacl ah:
Nuh sin mwet pahluh, muhtuhn God kahlwem liki kahlwem luhn faht ah
ac aunsifac Lal fasrfasr liki snow uh
ac Puhsrwacl oacna infacl soko,
ac siskacl mwet uh srihklaclac. .
Nga suhpwaclac ke nga etwacack lah finna nga wacngihn srihpuck.
Na nga tihkuclkucl suk ke sie god nga kuh in luhlahlfongi.
Ac na nga konwacwack God se ma nga kuh in luhlahlfongi.6
God se kuht kuh in luhlahlfongi ke ahkkweye finsrak lasr ke ohiyacn moul uh nuhkwewa. Kuht kuh in luhlahlfongi El ke srihpen El luhgnse kuht ac kena tuh in wo ma uh nuhsesr ke oacna sie ma.
Mwet maskihn lepa se tuhkuh ke srihpen kuh luhn finsrak. Facluh tiac kuh in kahsrwacl, tiac kuh in sang mihslac. Na, kahl luhn Mwet Lahngo puhla oacna kahl fihsrwacsr nuh sin fohnlah nguhn lal. Kuht kuh in nuhnkuh na puhla luhn kuloh luhn mwet maskihn lepa se ke Mwet Lahngo kahlilyac, yohk ke el lohng kahs “Nga lungse; kom in nasnasla.”
Sramsram soko se fahk lah “na kitin pacl ac na mwet sac kwela liki mas lal.”7
Kuht pac kuh in puhla kahkah luhngse, ahkkweyuyuck luhn Mwet Lahngo. Engan, finsrak, ac srui tuhkuh nuh insiyacsr in etuh El ke kasrwekuht in nwacsnwacs! Ke kuht tuhkuh nuh Sel, God Elac tuhkuh in molikuhtlac, in unwekuhtlac kuh ahkkweye kuht in sun ma nuhkwewa.
Oacna sie, in eis luhngse Lal—tiac luhngse lasr—ac fah kahsrwe kuht ke ma upac lasr. Wacngihn ma koluk kuh in tuhkuh sin God me. El etuh ma ac wo emet nuh sesr uh. Sahp El ac tiacna eislah ma toasr lasr ke pacl na sa. Kuhtuh pacl El kuh in ahkfihsrwacsrye ma toasr lasr, oacna El oruh nuh sin Alma ac mwet lal.8 Ke sahflah, ke srihpen wuhlweacng uh, ma toasr eisyucklac,9 ke moul se inge kuh ke Moulyak muhtahl.
Kena pwacye lah luhngse Lal in oreklac, wi pac kahlwem lah ohiyac muhtahl luhn Mwet Lahngo, kahsrwe kuht ahkyohkye kain luhlahlfongi oacna mwet maskihn lepa se in ahknwacsnwacsyeyucklac. Jisus Kraist El sie God luhn luhngse, God luhn finsrak, God luhn ono, ac God se suc luhngse ahkinsewowoye kuht ac kahsrwe kuht in nwacsnwacs. Pa ingwacn ma El luhngse met liki El tuhkuh nuh facluh ke El sulaclah in molikuhtlac ke kuht puhtatlac ke ma koluk. Pa ingwacn ma El luhngse ke Gethsamane ke El puhla kweohk yohk in mahno in molwelah ma koluk lasr. Pa ingwacn ma El luhngse ingena ke El sramsram nuh sin Pahpah kacsr.10 Pa ingwacn puhsra Lal srwackna fahk: “Fahsruh nuh yuruk, kowos nuh kwewa suc orekma ac tohtohlah, ac nga fah usot nuh suwos monglac.”11
El kuh in onwekuhtlac ac sruhkkuhtyak ke srihpen oasr kuh lal in oruh. El eis nuh Facl kweok luhn mahno ac nguhn nuh kwewa tuh insiyacl kuh in nwacnwaclah ke pahkomuhta in tuh kahsrwe kuht ke ma nuhkwewa ac onwekuhtlac ac sruhkkuhtyak.12 Kahs lal Isaiah, oacna Abinadi el tahfwelah, fahklah kahto ac wo:
“Pwacyena El us ahsor lasr, ac us suhpwacr lasr. .
“… El kantweyucki ke ma koluk lasr, El itucngyucki ke mwe muhnahs lasr; uni luhn mislac lasr oan facl; ac ke srihngsrihng Lal kuht ahkkweyeyucklac.”13
Mwe luti inge oasr ke pohloh kahs inge:
“O Mwet Kamptuh luhn Nazareth,
Insiyac se inge, ma muhsahllah tiac kuh in sifilpac oreklac,
Moul se inge, ma kuhnaosyucklac apkuhran in misac,
Oh, kuh Kom kuh in ahkwoyelah, Mwet Kamptuh?”
Ac ke paho ahkolah ac kuhlwacng Lal,
Moul wo Lal tuhkuh sin
Moul muhsahllah lasr, nwe ke elos tuyak
Oreklac Sasuc—“ma sasuc nuhkwewa.”
“[Ma] muhsahllah luhn insiyac,
Kena, luhngse, finsrak, ac luhlahlfongi,
Oraclah Kom nuh ke ma suwohs,
O, Mwet Kamptuh luhn Nazareth!”14
Fin kom puhla lah kom tiac nwacsnwacs ke oacna sie ohiyac, fin kom puhla muhsahllah, nuhnak muhnahs etuh kom kuh in ahknwacsnwacsyeyucklac, meyen El luhngse kom. Luhlahlfongi lah wacngihn ma koluk kuh in tuhkuh Yohrohl me.
Ke srihpen El “puhtati ye ma nuhkwewa,”15 El oraclah tuh ma nuhkwewa muhsahllah ke moul lasr kuh in ahkwoyelah, ac na kuht kuh in ahksuwohsyeyucklac yurun God. ke El, ma nuhkwewa sifil fohlohkihnyuckyak, kewana ma oasr fin facluh ac ma oasr inkuhsrao, oracalh “mihs nuh ke srah fin sahksing lal.”16
Lwelah kuht in tuhkuh nuh yurun Kraist, ke ip enenweyuck nuhkwewa. Ke kuht oruh, lwelah ohiyacsr oacna in fahk, “Leum, fin ou lungse lom, kom ku in aknasnasyeyula.” Fin kuht oruh, kuht kuh in eis kahl in onwelah luhn Mwet Lahngo, oacyacpac kahs kuhlwacng Lal: “Nga lungse; kom in nasnasla.”
Mwet Lahngo El sie God kuht kuh in luhlahlfongi. El pa Kraist, El suc Ahkmuhsraelac, Mesaia suc nga fahk luhlahlfongi luhk ke ine muhtahl Lal, finne Jisus Kraist, amen.