Fahko
Oruh tuh muhtowos ac insiowos lohacng nuh ke Mwet Lahngo Jisus Kraist ac engan ma pahtpaht ma tuhkuh Sel muhkwena.
Nga etuh lah meac kom nuhnkuh an! Sramsram se na luhlah ac na kuht fah lohng sel Prestuhn Nelson. Nga finsrakihn na in ahkacsmakihnye kom ke minit ekahsr ke kuht tuhpan mwet pahluh sacohk lasr, nga sulwaclah sifac na ahknuhnak se: sifac se luhk inge pa fukunsahk.
Ke tuhnaiyac ah, fihsracsrsracsriyac, ac emwemiyacn berries, usr, fohtohmahlwem, ac macngko, kuh kuhtuh fukunsahk usrnguck sahyac pa nuh ke kiwano kuh pomegranate, fukunsahk ma luhngkihnyuck pacl loes.
Ke pacl in luti Lal fin facluh ah, Mwet Lahngo El kapsra fukunsahk wowo nuh ke ma oasr srihpac ke wacngihn sahflahiyac. El fahk, “Kowos ac akilenulos ke orekma lalos.”1 “Soko sak wo fah oswe fahko wo.”2 El ahkkweye kuht in eisacni “fahko nu ke moul ma patpat.”3
Ke sie mwemwe kahlwem ma kuht etuh yohk kac lun Puk luhn Mormon, mwet pahluh Lehi el liyacl sifacna muh el oasr ke sie acn “lohsr ac suhpwacr.” Oasr kof fohkfohk, lohsr mahtoltol, inkacnek ohkohk, ac inkacnek sruhngweyuck, oacyacpac soko osra4 ukwaclah na soko inkacnek suwohs ac ohsrihksrihk kohllah nuh ke sahk kahto soko ma nwacnwaclah ke “fahko ma luhngkihnyuck in [oruh] sie mwet in engan.” Tahfwelah mwemwe lal, Lehi el fahk: “Nga tuh … ipeis ke fukun sahk kac ah; … ma inge arulacna emwem … liki ma nuhkwewa ma nga ema met. … [Ac] nwacklah nguhnihk ke engan na yohk.“Fukun sahk se inge “luhngkihnyuck yohk liki fukun sahk nuhkwewa sahyac.”4
Kalmacn Sahk Soko ac Fahko la
Meac sahk soko inge wi fahko sacohk yohk emet la an akucliyac? El luhma “luhngse luhn God”6 ac fahkwelihk plwacn in molwelah usrnguck luhn Pahpah tuhmasr Inkuhsrao. “Tuh God El luhngse facluh ohinge; El acse Wen sefanna Nahtuhl, tuh elos nuh kwewa suc luhlahlfongi ke El fah tiac misac tuh elos fah eis moul ma pahtpaht.”7
Mwe sang sacohk se inge akucliyac mwe sang wolacna ke Iwaclah wacngihn lainyac luhn Mwet Lahngo. Kuht ac tiac sifilpac moul muhkwena tukun moul suhkawihl lasr, tuhsruhk ke luhlahlfongi lasr ke Jisus Kraist, auiliyak lasr, ac liyacacng masap, kuht kuh in eis nuhnak muhnahs ke ma koluk lasr ac sie lwen tulac nwacsnwacslah ye muhtuhn Pahpah ac Wen Nahtuhl.
Eisyacn fahko ke sahk soko ma akucliyucki tuh kuht in sruokyacna akwuck ac olwelah ke wosasuc fohlohkihnyuckyak—pacptaislac, eis mwe sang luhn Nguhn Muhtahl, ac utyak nuh ke lohm sin Leum in eis olwelah muhtahl ke kuh ma tuhkuh lucng me. Ke kuhlwacng luhn Jisus Kraist ac ke ahkfuhlwactyeyacn olwelah lasr, kuht eis olwelah ma tiac kuh in srihkweyucki ke moul wi sucu suwohswohs lasr nwe tok ma pahtpaht.8
Pa oruh lupufacn sac ahkuhtweyac muh fahko sac pa “engankihnyuck emet nuh ke moul uh.”9 Ahok pwacye!
Ma Lainiyac Moulkihn Pwacye
Oacna ke kuht nuhkwewa lotwelah, finne tukun sefiyac fahko sacohk ke wosasuc fohlohkihnyuckyak, moulkihn pwacye ac luhlahlfongi ke Leum Jisus Kraist upac in orek uh. Oacna fahklah tari pacl puhs ke toeni se inge, kuht tahfwelah in sun mwe ahkfohs ac ma kikiacp, fohs ac tihkuclkucl, mwe srihkasrak ac sruhf ma srihke in ollah insiyacsr liki Mwet Lahngo ac mwe engan ac kahto ma sikyak nuh sesr ke kuht ukwacl.
Ke srihpen ma upac inge, oasr mwe sensen nuh ke mwemwe lal Lehi! Ke lacyacn se sahyac nuh infacl ah pa lohm luhlahp se ma nwacnwack mwet ke kain in yac nuhkwewa srihsrngiyac ke kihfihn paholos, isrucn, ac ahkkolukye mwet fahsr tukun Jisus Kraist.
Mwet lun lohm sac ahksrihkyactwen ac isrucn elos suc liyacacng masap, finsrakihn na in ahkkolukye ac tulokihnyac luhlahlfongi lalos ke Jisus Kraist ac wosasuc Lal. Ac ke srihpen kahs upac luhn tahfuh luo ac ahkmuhnahs tuhngalyac mwet luhlahlfongi ah, kuhtuh selos suc sruhflah ke fahko sac mwekihnyak ke srihpen wosasuc elos ukwe met ah. Kahs kikiap luhn facluh ahkluhkuhkyaclos; elos forlah liki fahko sac ac, ke kahs luhn ma suhmuhslah, “[puhtatyang] nuh ke inkacnek sruhngwacyuck ac [na] tuhlac.”10
Fin facluh lasr mihsenge, mwet orekma luhn Setuhn orekma upac, in ahkyohkye lohm luhlahp ac mwesahs se. Ahkyohkye se inge fahsrwelihk nuh infacl ah, finsrak muh in kohslah utyak nuh lun lohm sesr, ke pacl se ma mwet srihsrsrihsr ac isracsr ah arlacna wohwohn ke lwen ac fong ke yohklac puhsraclos ah.11
Prestuhn Nelson el ahkuhtweyac, “Mwet lokoalok sac el sang lihksrweni kuhiyacl in ahkkolukye testimoni uh ac tulokihn orekma luhn Leum uh.”12 Esam kahs lal Lehi: “Kuht tiac lohacng nuh selos”13
Ne ohinge kuht tiac enenuh in sahngweng, kuht enenuh in muhta acsmak. Kuhtuh pacl uh, ma srihsrihk kuh in kuhnaoslah ohiyacn nguhn lasr. Nuhnak muhnahs tiac lwelah kihsensiyuck lom, isrucn luhn mwet sahyac, kawuck suc tiac luhlahlfongi, kuh tahfonglac ac ma suhpwacr kol kom liki mwe insewowo emwem, suwohs, ac wo nuh sin nguhn ma tuhkuh ke fukun sahk sacohk soko. Oruh tuh muhtuwos ac insiyowos lohacng nuh ke Mwet Lahngo Jisus Kraist ac engan ma pahtpaht ma tuhkuh Sel muhkwena.
Luhlahlfongi luhn Jason Hall
Ke Jun muhtwacn kiyuck, Kathy, ac nga wi mas misac lal Jason Hall. Ke pacl se ma sun misac lal ah, el yac 48 ac kuhlwacnsap ekihn prestuhn ke u luhn elder.
Pa inge kahs lal Jason ke ma sikyak ma ekuhllah moul lal:
“[Ke matwac singucul limekosr] nga [tuh] ongaiyac ke stosah. … [Muhsahllah] inkacwuck ac nga tiac kuh in puhla muhtwacwacack infulwuck nuh ten. Wacngihn ma nga kuh in moklwe niyuck ac kuhtuh srihk ip ke pouk. Nga tiac kuh in sulpac fahsr, tu, … kuh kihtweyuc sifacna. Nga tiac kuh in arlac momong kuh sramsram.”14
“‘Pahpah sacohk [Inkuhsrao],’ nga kacfwe siyuck, ‘fin kuh in oasr pouk muhkwena, nga etuh lah nga kuh in oraclah. Nuhnak muhnahs, Pahpah, nuhnak muhnahs. …
“… “Finne kom eislah niyuck, Pahpah; nga [pruhe nuh ke] orekmakihnyacn pouk na.’”15
Jason el tena eis orekmakihnyacn pahol. Kom kuh in lohng puhsra tuhkuh ke lohm luhlahp sac mwe? “Jason Hall, God El tena lohng pruhe lom! Fin God El God luhngse se, fuhkah tuh Elan som liki kom angwe? Efuh in luhlahfongi ke Kraist?” Jason Hall el lohng puhsrwaclos, tuhsruhk el tena lohacng nuh kac. Sahyac na el mongo yohk ke fukun sahk soko ah. Luhlahlfongi lal kacl Jisus Kraist eklac fokoko. El ahksahf lutlut lal ke university ac mahruhtlac sel Kolette Coleman lun tempuhl, suc el ahkuhtwelyac muh el pa luhngse luhn moul lal.16 Tukun macruhtlac sun yac ahk 16 [singucul onkohsr], kuhtwepacna ma usrnguck se sikyak, wen sacohk nahtuhlos, Coleman, el isuslac.
Elos ahkyohkye luhlahlfongi lalos fuhkah? Kolette el ahkuhtweyac: “Kuht luhlahlfongi ke plwacn luhn God. Ac pa use finsrak nuh sesr uh. Kuht etuh lah Jason [ac sie lwen] kwelac. … Kuht etuh lah God El use nuh sesr Mwet Lahngo, suc iwaclah kihsackuhnlah lal oruh kuht kuh in tahfwelah sukok lasr nuh met ke pacl ma kuht ke fuhlweack uh.”17
Sramsram eke mas misac lal Jason ah, yac-ahk-10 [singucul] Coleman el fahk ma pahpah tuhmwacl ah lotwel: “[Oasr] plwacn luhn Pahpah tuhmasr Inkuhsrao nuh sesr, moul fin facluh uh fah wolacna, ac kuht fah moul wi sucu lasr. … Tuhsruhk … kuht enenuh in puhtatyang nuh ke ma upac ac fah oraclah tahfonglac.”
Coleman el tahfwelah: “Pahpah tuhmasr Inkuhsrao El suhpwacma Wen Nahtuhl, Jisus Kraist, nuh facluh. Orekma Lal ah in suwohs. In onwelah mwet uh. In luhngse elos. Ac na in kweok kacsr nuhkwewa ke ngal, ahsor, ac ma koluk. Na El misac kacsr.” Na Coleman el tahfwelah, “Ke srihpen El oruh ma inge, Jisus El etuh lah fuhkah puhla luhk ingena uh.”
“Tukun lwen tolu ma Jisus El misac ah, El … tuhkuh sifil moulyak, ke mahno suwohs Lal. Yohk srihpac ma inge nuh sihk mweyen nga etuh lah … monun [pahpah] tuhmuhk fah ahksuwohsyeyucklac ac fah tuhkweni ekihn sie sucu.”
Coleman el ahksahfye: “Fong nuhkwewa ke nga sie ahwowo, pahaph tuhmuhk el fahk nuh sihk, ‘Pahpah el luhngse kom, Pahpah tuhmasr Inkuhsrao El luhngse kom, ac kom tuhlihk mukul na wowo se.’”18
Engan Tuhkuh Ke Srihpacl Jisus Kraist
Prestuhn Russell M. Nelson el ahkuhtweyac lah efuh kuh sucu Hall oasr engan ac finsrak la. El fahk:
“Engan kuht puhla uh tiac ma wiwina ohiyacn moul lasr tuhsruhktuh wiwina ma kuht lohacng nuh kac ke moul lasr uh.
“Ke kuht fihliyac moul lasr nuh ke plwacn in molwelah luhn God … ac Jisus Kraist ac wosasuc Lal, kuht kuh in puhla engan sahyacn ma sikyak—kuh tiac sikyak—ke moul lasr. Engan tuhkuh Sel me ac ke Srihpacl. El pa orwaclah engan nuhkwewa. …
“Kuht fin ngwet nuh facluh … , kuht ac tiac etuh engan. … [Engan] pa mwe sang se ma tuhkuh ke srihke pwacye in moul suwohs, oacna lutiyuck sin Jisus Kraist.”19
Olwelah Se ke Kom Fohlohk
Fin wacngihn fahko luhn sahk soko yurum ke kuhtuh pacl uh, nuhnak muhnahs etuh lah poun Leum pacl nuhkwewa ahsreyucklac nuh sum. El suli ke luhngse, “Auliyak ac tuhkuh nuh yuruk.”20 Fukunsahk Lal pohslac lac ac oasr pacl nuhkwewa. Tiac kuh in moliyuck ke mani uh, ac wacngihn mwet se luhngse in eis kuh in lahfwekihnyuck.21
Fin kom kena fohlohk nuh ke sahk soko ah ac sifilpac ipeis fahko la ah, muhtwacwacack ke pruhe nuh sin Pahpah tuhmom Inkuhsrao. Luhlahlfongi ke Jisus Kraist ac kuh ke iwaclahiyacn kihsackuhnlah Lal. Nga olwelah nuh sum lah ke kom liye Mwet Lahngo “ke nuhnak nuhkwewa,”22 fahko luhn sahk soko ah fah ma lom, emwem nuh ke ema lom an, mwe engan nuh ke nguhnum, “mwe sang yohk se emet liki ma nuhkwewa luhn God.”23
Wik tolu tari ah, nga liye engan ke fahko luhn Mwet Lahngo ke Kathy ac nga wi tuhkweni se ke kihsaclah luhn Tempuhl Lisbon Portugal ah. Ma pwacye luhn wosasuc fohlohkihnyuckyak ikacklah nuh sin acn Portugal ke 1975 ke pacl sacn sukohsohk luhn luhlahlfongi fihlfihllac pac ah. Inge ke Mwet Luhlahlfongi suwohs suc ma ipeis emet ke fahko sac ke pacl sacn wacngihn un mwet in alu, wacngihn lohm alu, ac wacngihn tempuhl fototo nuh we sun miles 1,000 weluhllos engan ke fahko sacohk luhn sahk soko ma tuhfah konweyuckyak tuh puhkantwen ke lohm sin Leum fin acn Lisbon, Portugal. Fuhkah luhpan kaksak ac ahkfuhlwactye Mwet Luhlahlfongi ke Lwen-sahflah suc sruokyac sang Mwet Lahngo nuh insiyaclos.
Mwet Lahngo El fahk, “El suc muhta yuruk, ac Nga in el, el sepacna us fahko puhkantwen: fin tiac sihk kom tiac kuh in oruh kuhtwena ma.”24
Sramsram olutu uh nuh sin mempucr luhn Alu fin facluh nohfohn, Prestuhn Nelson el fahk, “Tamuhlwel ac tahmtahel sacohk wiyuck, kowos srihkasrak moul luhn fahko ma tuhkuh ke ukweyacn mwe luti luhn Jisus Kraist.” Na el fahk: “Nga kuloh nuh sum!” Nga luhngse kom!”25
Kuht luhngse kom, Prestuhn Nelson.
Nga sie mwet loh nuh ke kuh luhn fwackyuck ma fihliyucki in poun Prestuhn sacohk lasr. El pa mwet pahluh luhn God. Oacna Lehi ke pacl met ah, Prestuhn Russell M. Nelson el pahngon kuht ac sucu luhn God nohfohn in tuhkuh ac ipeis ke fahko luhn sahk soko. Lwelah in oasr in kuht mongfihsrwacsr ac kuh in fahsr tukun luti lal.
Nga sang mwe loh puhsisacl luhk lah Jisus Kraist pa Wen nuhtin God. Luhngse Lal, kuh Lal, ac kuhlwacng Lal use ma wo nuhkwewa ke wacngihn sahflahiyac. Nga fahkwack ke inen Jisus Kraist, amen.