Engan luhn Mwet Luhlahlfongi
Engan tuhkuh ke liyacacng masap luhn Kraist, tuhkuh ke kuhtanglah ahsor ac muhnahs uh Kacl, ac ke kuht kuhlwacnsap oacna El kuhlwacnsap.
Mwet pahluh Enos, wen nuhtin nahtuhl Lehi, ke Puk luhn Mormon, sihm ke puhlakihn se lal ke ma sikyak nuh sel ke moul lal met ah. Ke el muhkwena oasr ke insack ah, Enos el muhtwacwacack in motko ke mwe luti luhn pahpah tuhmwacl, Jacob. El fahk, “Kahs ma nga kwacna lohng pahpah tuhmuhk el sramsramkihn ke moul ma pahtpaht, ac engan luhn mwet luhlahlfongi, tihli loal nuh insiyuck.”1 Ke el masrinsrwacl in nguhn, Enos el sikuck muhtuhnte in pruhe, pruhe wolacna se ke lwen na fohn se, pruhe se ma el eis fwackyuck yohk srihpac, etuh, ac olwelah.
Pakantwen ma kuht kuh in etwaclah ke puhlakihn lal Enos, tuhsruhk misenge nga akihlen esamyac lal Enos ke pahpah tuhmwacl sramsram puhs ke “engan luhn mwet luhlahlfongi.”
Ke toeni luhlahp ke yac tolu tari ah, Prestuhn Russell M. Nelson el sramsram ke engan.2 Inmahsrlon ma sahyac, el fahk:
“Engan kuht puhla uh tiac ma wiwina ohiyacn moul lasr tuhsruhktuh wiwina ma kuht lohacng nuh kac ke moul lasr uh.
“Ke kuht fihliyac moul lasr nuh ke plwacn in molwelah luhn God … ac Jisus Kraist ac wosasuc Lal, kuht kuh in puhla engan finne lah meac sikyak—kuh tiac sikyak—ke moul lasr. Engan tuhkuh Sel ac ke Srihpacl. … Nuh sin Mwet Luhlahlfongi ke Lwen-sahflah uh, Jisus Kraist pa engan!”3
Mwet Luhlahlfongi pa elos suc ilyak nuh ke olwelah luhn wosasuc ke pacptais ac kampare in fahsr tukun Kraist in oacna mwet tuhma lutlut Lal.4 Oruh, kalmacn “engan luhn mwet luhlahlfongi” pa engan in eklac oacna Kraist.
Nga ke sramsram ke engan se ma tuhkuh ke liyacacng masap Lal, engan se ma tuhkuh ke kuhtanglah ahsor ac muhnahs uh Kacl, ac engan se ma tuhkuh ke kuht kuhlwacnsap oacna El kuhlwacnsap.
Engan ke Liyacacng Masap luhn Kraist
Kuht moul ke pacl luhn mwet srohwohsr ke mwet puhs nihkihn ma yohk srihpac luhn masap luhn Leum ac tiac lohacng nuh kac. Tiac pacl puh, mwet suc luhkuhk ke elos ahkos kolyuck wolacna oacna masap ke tiac kosro, ohiyac wo ke ma pwacye, ac muhtahl ke lwen Sahpuht kuh in kapwack ac enganwack ke ma wo ke moul uh, ac kuhtuh pacl elos puhla ma inge yohk likina elos suc kampare in ahkos. Kuhtuh mwet uh muhtwacwacack in nuhnkuh fin kampare in srihke ac sang kihsac uh wo fal in orek. Mwet mahtuh luhn Israel torkahskahs sie pacl ah:
“Wangin sripa kut in orekma nu sin God: mwe mea kut in oru ma El fahk uh, ku in akkalemye nu sin Leum [luhn un mwet mweun] lah kut asor ke ma kut oru uh?
“Mwet filang uh pa insewowo; mwet koluk uh elos kapkapak; ac ke elos srike muteng lun God ke orekma koluk lalos, wanginna ma sikyak nu selos.”5
Sanno na, Leum El fahk, nwe ke “len se ke nga ac oru ma luk sifana. … “Na mwet luk elos ac fah … sifilpa liye lah oasr ekla inmasrlon ma ac sikyak nu sin mwet suwoswos ac mwet koluk, ac nu selos suc [kulansupu God] ac elos su tia.”6 Mwet koluk ac fah “engan ke orekma lalos ke sie lusen pacl,” tuhsruhk oasr sahlflahiyacn ma inge.7 Engan luhn Mwet Luhlahlfongi ac fah muhtweng.
God El liye ma ke ohiyac pwacye, ac El use ohiyac inge nuh yohrohsr ke masap Lal, ma kol kuht in raun som liki luhf luhlahp ke moul uh nuh ke engan ma pahtpaht. Mwet Pahluh Joseph Smith el ahkuhtweyac: “Ke masap Lal luti kuht, ma ingacn liyeyacn na nuh tok ma pahtpaht; tuh kuht liyeyuck sin God oacna in muh kuht muhta nuh tok ma pahtpaht; God El muhta nuh tok ma pahtpaht, ac tiac liye ma uh oacna ke kuht liye.”8
Nga soenna ohsun nuh sin kuhtwena mwet suc konwacack wosasuc tok ke moul la ac tiac finsrak tuh elan sa konwacack met. “We, sulwaclah koluk ac tahfonglac nga luhkuhn tiac oruh met ah,” elos fah fahk. Masap luhn Leum pa mwe kol lasr in sulwaclah wo ac eis mwacta engan. Fuhkah luhpan kuht enenuh in kaksak ac sang kuloh nuh Sel ke El ahkkahlwemye ohiyac wolacna nuh sesr.
Ke el tuhlihk fuhsr se, Tahmtahel Kalombo Rosette Kamwanya ke D. R. Congo, suc kuhlwacnsap ke Côte d’lvoire Abidjan Rohtoh Misin, el lalo ac pruhe ke lusen lwen tolu in etuh inkacnek pwacye ma God El ke elan fahsr nuh kac. Ke aruhrruhma askuhlacna ke fong se, el liye lohm luo, lohm alu se ac ma se el etuh ingena pa tempuhl se. El muhtwacwacack in suk ac sa na el konwacack lohm alu se el liye ke mwemwe se lal ah. Sain sac fahk, “Alu luhn Jisus Kraist luhn Mwet Luhlahlfongi ke Lwen-sahflah.” Tahmtahel Kamwanya el pacptaislac ac na ninac kiyacl ac mukul ohnkohsr wiyacl ukwacl. Tahmtahel Kamwanya el fahk, “Ke nga eis wosasuc, nga puhla oacna won se suc tuhfanna in fihliyucklac. Insiyuck sesseslah ke engan. … Nga etuh muh God El luhngse nga.”9
Liyacacng masap luhn Leum ahkkweye kuht in puhla luhngse Lal ke fohnlah ac fihsrwacsr. Inkacnek suwohs ac oasrihksrihk luhn masap som nuh ke sahk in moul, ac sahk in moul ac fahko la, emwem ac “luhngkihnyuck emet liki ma nuhkwewa,”10 ahol luhngse luhn God ac nwacklah nguhna “ke engan na yohk.”11 Mwet Lahngo El fahk:
“Kowos fin akos ma sap luk, kowos ac oanna in lungse luk, oana ke nga akos ma sap lun Papa tumuk ac mutana in lungse lal.
“Nga fahk ma inge nu suwos tuh engan luk fah oan in kowos, ac tuh engan lowos arulana yohk.”12
Engan ke Kuhtuhnglah sin Kraist
Finne ke kuht liyeyuck in karihngihn masap ke luhlahlfongi, oasr ma upac ac ma ahsor muh kuh in tulohkihnye engan lasr. Tuhsruhk ke kuht srihke in kuhtanglah ma upac inge ke kahsruh luhn Mwet Lahngo, pa inge ac fah karihngihn engan lasr kuht puhla ingena ac engan kuht ac fah puhla sie lwen. Kraist El fahk nuh sin mwet tuhma lutlut Lal, “Ke kowos muta faclu kowos ac keok; tusruktu kowos in pulaik na; Nga kutangla faclu tari.”13 Ke kuht ngwetwacng nuh Sel, ahkosohl, weluhl ma upac ac ahsor kuh in eklac nuh ke engan. Nga fahk srihkasrak se.
Ke 1989, Jack Rushton el pa prestuhn luhn Irvine California Stek fin acn United States. Ke muhtwacta yurin sucu lal ke acn California, Jack el loalloal in mahno ke el kihpackihnyuck ke noa meoa nuh ke yoht se. Jack el fahk ke pacl tok, “Pacl sac nga tuhngal yoht se, nga etuh muh nga tiac kuh in mukwikwi.”14 El koflah in sramsram kuh momong ke kuh lal sifacna.15
Sucu, kawuck, ac mempucr luhn stek tahpuhk Tamuhlwel Rushton ac muhtwacn kiyacl, Jo Anne, ac, weacng ma sahyac, ekuhllah lohm sel kuhtuh in lwelah wheelchair lal in fahsr. Jo Anne pa mwet karihngihn se emet lal Jack ke lusen yac 23. Sramsramkihn kahs luhn Puk luhn Mormon lah fuhkah Leum El muhtwacta yurin mwet Lal ke pacl upac lalos ac ahkmuhlahlahye ma toasr lalos,16 Jo Anne el fahk, “Inkaiyacn pacl nga lut ke muhlahlah ke insiyuck nga puhla ke nga karihngihn mukul tuhmuhk.”17
Eklac se ke ohiyacn momong lal fohlohkonwack kuh lal Jack in sramsram, ac ke yac se, Jack el pahngonyuck in mwet luti ke Olweacng luhn Wosasuc ac patriarch luhn stek. Ke el sang mwe insewowo luhn patriarch, mwet se sahyac suc sruok pristut an fihlihyac pahol Tamuhlwel Rushton nuh fin sifacn mwet se suc fah eis mwe insewowo ah ac sruhkwack pahol Tamuhlwel Rushton ke el sang mwe insewowo. Jack el misac ke Lwen in Christmas ke yac 2012, tukun yac 22 in kuhlwacnsap.
Ke sie pacl in kihsen siyuck in lohlngohk, Jack el fahk muh: “Elyah ac fah tuhkuh nuh ke moul lasr nohfohn; pangwacn ip luhn moul fin facluh. Ac kuhtuh mwet nuhnkuh muh alu kuh luhlahlfongi ke God ac fah sensenkihn kom liki ma koluk. Tiac pangwacn ma sacn. Nga muh fin fokoko luhlahlfongi lasr, na ke ma koluk sikyak, pwacye ac fah sikyak, oasr kuh lasr in muhtweng. … Luhlahfongi luhk tiac kuhruhruh, tuhsruhk srwackna oasr ahsor luhk. Nga muh ke pacl se emet ke moul luhk, nga sun sahflahiyacn kuh luhk, ac na wacngihn ma sahyac kuh in kahsrweyuc, oruh nga ngwetwacng nuh sin Leum, ac nwe ke misenge, nga sa in puhla engan.”18
Pacl inge oasr mweun upac ke social media ac ye muhtuhn mwet suc lain mwet suc srihke in ukwe ohiyac wo luhn Leum ke nuknuk, pwacr luhn facluh, ac nwacsnwacs in mahno. Inkaiyacn pacl tuhlihk fuhsr ac mwet fuhsr ke Mwet Luhlahlfongi, wiwina muhtwacn ac ninac, pa ahngonyuck ac ahkkweokyeyuck yohk emet. Tiacna fihsrwacsr in tohkack liki kweok inge, tuhsruhk esam kahs lal Peter: “Insewowo nu suwos mwet fin kaskas koluk lain kowos ke sripen kowos fahsr tukun Christ, kalmen ma inge pa Ngun wolana lun God oan fowos.”19
Ke Imac luhn Eden, Adam ac Eve “muhta na ke sie ohiyacn moul ma wacngihn mwacta, wacngihn engan, ke srihpen elos tiac etuh suhpwacr.”20 Inge, ke mwet muh oasr kunohkohn, kuht konwacack engan in kuhtanglah kweok nuhkwewa, finne ma koluk, ma upac, mwe muhnahs, kuh oacna sie ma upac liki engan. Pa inge engan ke kapkapwack fin inkacnek in fahsr tukun Kraist; engan in “eis nuhnak muhnahs ke ma koluk lalos, ac eis mihs ke nuhnak”;21 engan ke nguhna ahkyohk ac kapwack sin kuhlwacng luhn Kraist.22
Engan ke Kuhlwacnsap Oacna Kraist El Kuhlwacnsap
Mwet Lahngo El engan in us moul kawihl ac moul ma pahtpaht lasr.23 In sramsram ke Iwaclah luhn Mwet Lahngo, Prestuhn Russell M. Nelson el fahk:
“Oacna ke ma nuhkwewa, Jisus Kraist pa srihkasrak wo emet, ‘a ke sripen engan su el akwot nu kac, el pilesrala mwekin lun misa fin sahkseng’ [Met Hibru 12:2]. Nuhnkuh kac! In oruh ma upac emet fin facluh, Mwet Lahngo lasr El nuhnkuh yohk ke engan!
“Ac fuhkah engan ma fihliyucki ye muhtahl? Pwacyena weacng engan ke ahknwacsnwacsye, ahkkweye, ac ahkfokokoye kuht; engan ke moli ma koluk luhn mwet nuhkwewa suc auliyak; engan se ma oruh kuht in kuh in fohlohk nuh lohm ah—nwacsnwacs ac suwohs—in moul yurin Pahpah Ninac Inkuhsrao kiyacsr ac sucu lasr.”24
Atac se pacna inge, engan lah “oasr ye muhtahsr” pa engan ke kuht kahsruh Mwet Lahngo ke orekma in molwelah Lal. Ke fihtac ac tuhlihk nahtuhl Abraham,25 kuht wi ahkinsewowoye sucu nuhkwewa fin facluh “ke mwe insewowo luhn wosasuc, muh pa mwe insewowo luhn molwelah, finne ke moul ma pahtpaht.”26
Kahs lal Alma tuhkuh nuh sihk:
“Pa inge kaksak luhk, tuh sahp ngan kuh in sie kuhfa in orekmakihnyuck ke poun God in use kuhtuh mwet in auliyak; ac pa inge engan luhk.
“Ac liye, ke nga liye puhs sin mwet wiyuck elos auli na pwacye, ac tuhkuh nuh yurun Leum God lalos, na nguhnihk sesseslah ke engan. …
“Tuhsruhk nga tiac engan ke kuhtanglah luhk muhkwena, tuhsruhk engan luhk fohnlah liki met ah ke srihpen kuhtanglah luhn mwet wiyuck, suc tuh som nuh fin acn Nephi. …
“Inge, ke nga nuhnkuh ke kuhtanglah luhn mwet wiyuck inge nguhnihk utucklac, finne nuh ke fahsrelihk luhn nguhna liki mahno, oacna ke tuh sikyak, ohinge yohk engan luhk.”27
Fukunsahk luhn kuhlwacnsap lasr nuh sin sie sin sie ke Alu uh pa ip ke engan “ye muhtahsr.” Finne ke pacl ahsor ac upac, kuht kuh in karihngihn ke muhtweng fin kuht ke engan ke ahkpwacrye God ac sang kahlwem, kahsruh, ac engan nuh sin tuhlihk Nahtuhl, mukul ac muhtwacn wiyacsr.
Ke elos oasr acn Haiti mahlwem tari ah ke kisaclah ke Tempuhl fin acn Port-au-Prince, Elder David ac Tahmtahel Susan Bednar ohsun yohrohl muhtwacn se suc mukul tuhmwacl tuhfahnna misac kuhtuh lwen met ah ke ongaiyac ahsor se. Elos weluhl tucng. Tuhsruhk ke Sacnri muhtwacn wo se srwackna karihngihn ip lal ke usher se ke kisaclah, ke isrwacsr srihsrihk nuh sin mwet nuhkwewa suc ilyak nuh ke tempuhl.
Nga luhlahlfongi lah “engan [yohk] luhn mwet luhlahlfongi” tuhkuh ke etuh la lah Mwet Lahngo El kwacfe ke enenuh lalos,28 “ac wacngihn mwet kuh in kahlwem ke ohiyacn engan [ma ac fah nwacklah] nguhnasr [ke] kuht [lohng Jisus] pruhe kacsr nuh sin Pahpah.”29 Nga wi Prestuhn Russell M. Nelson, nga fahkwack engan pa mwe sang nuh sin Mwet Luhlahlfongi wo “suc muhtwacnglah mwe kweok luhn facluh”30 ac suc “srihke pwacye in moul suwohs, oacna lutiyuck sin Jisus Kraist.”31 Lwelah kowos in engan yohk, nga pruhe ke ine muhtahl luhn Jisus Kraist, amen.