Sang Nguhnasr in Kol Mahnosr
Sie ma yohk srihpac emet ma kuht kuh in lotwelah ke moul se inge pa in ahkkweye fuhkah moul in nguhn ma pahtpaht lasr ac in kutong kena koluk lasr uh.
Tamuhlwel ac tahmtahel wiyuck, ke toeni luhlahp ke Ohktopa ke yac tari ah fototome, nga tuh ahkoe sramsram ke toeni se luhk ah in ahkkahlwemye yac ahk 100 [siofok] ke aruhruhma ke facl luhn nguhn ma utuckyang nuh sel Prestuhn Joseph F. Smith ke Ohktopa 3, 1918.
Lwen ekahsr tukun nga suhpwaclah sramsram se luhk ah in lwenglah, kawuck sacohk ma pahtpaht se luhk, Barbara, el ahksahfyelah moul suhkawihl lal ac somlah nuh ke facl luhn nguhn.
Ke lwen ah somlah nuh ke wik, na nuh mahlwem, ac ingena yac se lac ke Barbara el misac ah, nga sokwack lah nga luhngse ma suhmuhslah se inge ma fahk muh kom fah tuhkweni muhta in luhngse, yohkna oruh kom ac tuhng ke wacngihnlac lalos suc misac.1 Nga ac Barbara tuh insewowo in “tuhkweni muhta in luhngse” ke lusen yac 67. Tuhsruhk nga etwaclah ke ohiyac na fototo se nuh sihk lah meac kalmac in “tuhng ke wacngihnlac” luhn elos suc kuht luhngse. We, nga luhngse el ac asrellah!
Sahp nga muh inkaiyacsr kuloh ma luhlahp ke ma mwet sahyac oruh nuh sesr ke ne ka kuht misac. Nga etuh lah Barbara el kwacna kahfofo, tuhsruhk nga tiac arulacna kahlwem ke enenuh kahsruh luhn sucu, Alu, ac mura uh ma eislah pacl lal uh. Kampare ahkmuhtahlyeyucklac ke kais sie lwen ma kalweniyuck pacl tausin ke lusen yac nuh ke yac ma oruh sucu lasr uh ahkwot in mukwikwi. Ac ke ma inge nuhkwewa, tiac siefanna sin sucu lasr uh lohng el sralwack puhsrwacl kohuyak kuh fahklah sie kahs sekuhlwacng.
Nga esam ma pucspucs ke yac se somlah ah. Nga motko ke sulaclah na upac se nuh ke mahnol ma el oraclah oacna ninac se nuh sin tuhlihk itkohsr. In muhta na karihngihn lohm ac sucu uh pa orekma sefanna ma el luhngse, ac el arulacna pihsrlac kac.
Pacl puhs nga motko lah el etuh fahkah lah nga ac tuhlihk nahtuhsr uh oasr oyac kuh meac kuht oruh. Orek mongo uh orekma na upac se, weacng pac kwemkahtuh ke tohtohkiyacn nuknuk fohkfohk ma sucu lasr uh oraclah ke wik nuhkwewa, ac liyacacng in wo lah fahluhk ac nuknuk an fal nuh sin tuhlihk an. Kuht nuhkwewa foracng nuh sel ke ma pucspucs sahyac ma yohk srihpac nuh sesr. Ac ke srihpen elos yohk srihpac nuh sesr, elos yohk srihpac pac nuh sel. El, ke sie kahs, wolacna—oacna sie muhtacn kiyac, oacna sie ninac, oacna sie kawuck, oacna sie mwet tuhlan, ac oacna sie muhtwacn nuhtin God.
Inge ke el somlah uh, nga engan lah nga tuh sulaclah in muhta siskacl ke nga fohlohk nuh lohm ah ke mahlwem sahflah ekahsr in moul lal ah, in sruok pahol ke kuht liye sahflahiyacn kuhtuh sin movie in on ma el luhngse emet—nuh kalweni na in liye ke srihpen mas Muhlyela uh tiac lwelah elan esam lah el liye tari ke na tacfuhn lwen met ah. Mwe acsmakihn ke pacl in sruohsroh-po ingacn ingena arulacna sacohk nuh sihk.
Tamuhlwel ac tahmtahel, nuhnakmuhnahs nimet sislah pacl wo in ngwetwacng liye muhtuhn mwet in sucu lom an ke luhngse. Tuhlihk ac ninac pahpah an, saplakyang nuh sin sie sin sie ac ahkkahlwemye luhngse ac kuloh yohk lom an. Oacna nga, kuhtuh suwos sahp ac muhtwaclihk sie lwen nge ac sokwack lah pacl nuh ke kain in sramsram yohk srihpac inge somlah tari. Tuhkwena muhta ke kais sie lwen ke inse ma sesseslah ke kuloh, mwe acsmakihn wo, kuhlwacnsap, ac luhngse yohk.
Ke yac se somlah ah, nga motko yohk liki na nga muhta motko met ah ke plwacn luhn Pahpah tuhmwacsr Inkuhsrao. Ke el lotwel Corianton suc wen nahtuhl, Alma el pahngon muh “plwacn wolacna luhn engan.”2
Kahs se ma nuh tuhkuh na nuh ke nuhnak luhk uh ke nga motko ke plwacn se pa “sifilpac ohsun.” Plwacn se, oreklac sin Pahpah luhngse se tuhmwacsr Inkuhsrao, suc akiyac ke akwuck yohk ac wolacna la in muh sucu uh kuh in sifilpac ohsun—ke fohlohkweni ne tok ma pahtpaht luhn siyacnyacn se, ninac pahpah ac tuhlihk an, fihl nuh ke fihl in lohm sin God.
Nuhnak se ingacn use ma puhlakihnyuck wo nuh sihk ac mwe ahkkweye lah nga ac fah sifilpac weluhl Barbara. Ne el kweok ke mahnol ah ke apkuhranyang nuh ke sahflahiyacn moul lal, nguhnal fokoko, suwohs, ac nwacsnwacs. El ahkoeluhllah sifacna ke ma nuhkwewa tuh ke lwen sac tuhkuh elan kuh in tu ye “nuhnuhnkuh wolacna luhn God,”3 sesseslah ke luhlahlfongi ac olweacng mihs. Tuhsruhk nga pa nge, in lwen luo ac matwac yac 91 [yucngucul sie], ac nga srwackna motko, “Kuh nga ahkolah? Kuh nga oruh ma nuhkwewa nga enenuh in oruh ngan kuh in sifilpac sruok pahol?”
Ma fihsrwacsr, pwacye se emet ke moul se inge: kuht nohfohn ac misac. Lah kuht ac mahtuh kuh fuhsr na misac, fihsrwacsr kuh upac, kahsruhp kuh suhkahsruhp, luhngseyuck kuh muhkahimtacl, wacngihn kuhtwena mwet ac kahingkihn misac uh.
Yac puh somlah ah, Prestuhn Gordon B. Hinckley el fahk sie ma na oasr srihpac se inge: Fuhkah wolacnaiyacn olweacng, puhlakihnyuck fuhkah se ke mislac se ma tuhkuh ke etwacack lah kuht fin pahyuck wo ac moul wo, kuhpahsriyacsr ac fahfahlacna, finne ke kuh luhn misac ac somlah luhn pacl uh.4
Pwacyena lah nga pahyuckyak wo. Wacngihn ahlohloh ke ma se ingacn. Tuhsruhk ma se ingacn tiacna fal, oacna nuh sel Prestuhn Hinckley. Nga enenuh pac in moul wo.5
Misenge, “moul wo” uh kuh pac na in nuhnak fohswack se, yohkna kom fin sislah pacl yohk ke acn in aetuhi ke internet, yac oacna sie puhsra kuh in fahkwack ma pwacye kuh nuhnak suhtuhuh ke God ac plwacn Lal nuh sin tuhlihk Nahtuhl. Tarilacna, oasr yohrohsr mempuhr luhn Alu uh ip yohk pwacye ma pahtpaht luhn wosasuc in etuh in moul fuhkah tuh kuht in kuh in ahkolah wo ke kuht misac uh.
Ke mahlem puh met liki nga isuslac ah, pahpahmahtuh Mwet Sap se tuhmuhk, Elder Melvin J. Ballard, el oruh sramsram se ma, nuh sin mwet pucspucs, sruokyac ma yohk srihpac ke lah meac kalmac in moul wo. Sifac sac pa “Tikuclkucl luhn Nguhn,” sramsram se lal ah lohacng na nuh ke fahfahlacna luhn mweun inmahsrlon mahno ikwac lasr uh ac nguhn ma pahtpaht lasr uh.
El fahk muh fohs yohk se emet ma kuhtwena mukul kuh muhtwacn ac sun uh … ac pa mweun lain kom sifacna, ahkuhtweyac lah Setuhn (mwet lokoalok luhn nguhnasr) el lain kuht ke luhng, kena, luhngse luhn ikwac uh.6 Mweun yohk se inge pa inmahsrlon ohiyac moul muhtahl ac nguhn lasr ac ohiyacn moul in ikwac luhn mwet. Tamuhlwel ac tahmtahel, esam, kuht kuh in eis kahsruh luhn nguhn ke kolyuck luhn Nguhn Muhahl ma kuh in “luti kom ma nuhwewa.”7 El oacyacpac kuh in tuhkuh ke kuh ac mwe insewowo luhn pristut.
Inge, nga siyuck, fuhkah mweun se inge sum?
Prestuhn David O. McKay elah fahk lah: “Moul luhn mwet fin facluh uh pa sikeng se lah el ac lohacng kampare, ke nuhnak lal, nguhnal, ke ma suc ac tahpuhk ma puhlakihnyuck wo ac oraclah luhngse luhn mahno ikwac lal, kuh lah el ac oruh srihpen moul lal uh in eis etwacack ke ohiyac wo luhn nguhn.”8
Mweun se inge inmahsrlon ohiyacn moul in ikwac ac nguhnasr tiacna ma sasuc se. Ke luti sahflah se lal nuh sin mwet lal, Tohkohsrah Benjamin el luti lah “mwet luhngse ma luhn facluh el sie mwet lokoalok nuh sin God, ac nuh oasr na e ke puhtatlac lal Adam, ac e fah, ne tok ac ma pahtpaht, sahyacn el lohacng nuh ke kolyuck luhn Nguhn Muhtahl, ac sislah ma luhn mwet luhngse facluh ac eklac sie mwet luhlahlfongi ke iwaclah luhn Leum Kraist,.”9
Mwet Sap Paul el luti lah “elos su moulkin moul in ikwa, nunak lalos sukna ma lun ikwa; tuhsruhk elos su moulkin moul in Ngun, nunak lalos suk ma lungse lun Ngun.
“Elos su nunkalana ke ma lungse lun ikwa elos fah misa; a elos su nunkalana ke ma Ngun lun God uh lungse, elos fah eis moul [pwaye] ac misla”10
Oacna in kahlwem nuh sihk lah sie ma yohk srihpac emet ma kuht kuh in lotwelah ke moul se inge pa in ahkkweye fuhkah moul in nguhn ma pahtpaht lasr ac in kutong kena koluk lasr uh. Ma se inge tiac enenuh in upac. Ke srihpac se inge, nguhn lasr, ma tuh oasr met liki mahno in ikoac lasr, kuhtanglah tari in sulaclah ma pwacye liki ma koluk ke moul liki facluh. Met liki facluh tuh oreklac ah, kuht muhta ke facl luhn nguhn oacna wen ac muhtwacn nuhtin Ninac Pahpah Inkuhsrao, suc luhngse kuht ac ahkwot in luhngse kuht ingena.
Ac ahok, kuht tuh oruh otwelah ac sulaclah ma ac ekuhllah-moul ke moul se met liki isuslac nuh facluh. Mwet nuhkwewa suc muhta fin facluh se inge tuh otwelah in sulaclah in insese nuh ke plwacn luhn Pahpah Lucng nuh ke molwelah lasr. Na kuht nuhkwewa tuhkuh nuh facluh ke ma sihmlac ahkpwacyeyucklac ke kuhtanglah ke ma luhn nguhn ac acn ma pahtpaht ma kuht fahsr nuh we.
Nuhnkuh kac ke kihtin pacl. Pa inge na pwacye mwet se kom an ac suc kom kwacna oacna: sie wen kuh muhtwacn nuhtin God, oasr okah in nguhn lom ne tok ma pahtpaht ac moul ke pacl fahsruh uh ma kahklah ke ma ac sikyak pucspucs ma wacngihn sahflahiyac. Kom na—emet, met liki ma nuhkwewa, ac pacl nuhkwewa—sie mwet nguhnnguhn. Ac inge ke sie sulaclah in fihliyac ohiyacn moul in ikwac lasr uh met liki ohiyacn moul in nguhn lasr uh, kuht sulaclah sie ma ma siena liki ohiyac nguhnnguhn na pwacye, suwohs, ac wo lasr uh.
Ne ohinge, wacngihn kihsensiyuck kac lah ikwac ac kena luhn facluh oruh arulacna upac in oruh-sulaclah. Ke mwe lihsrlihsr luhn muhlkuhnlah uh lihsrihngyac facl kawihl luhn nguhn ac facl suhkawihl se inge, sie mwet kuh in eislah muhtahl liki kuhpahsr lasr nuh yurun God ac ohiyac nguhnnguhn lasr, ac ohiyacn moul in ikwac lasr uh kuh in sang ma yohk srihpac uh nuh ke ma ma kuht luhngse ingena uh. Lotwelah in sulaclah ma luhn Nguhn liki na ma luhn ikwac uh pa sie sin srihpac yohk srihpac ma oruh ma kuht puhlakihn fin facluh pa sie ip ke plwacn luhn Pahpah Lucng. Pa pac srihpac se oruh plwacn uh muhsahiyuckyak ke pwelucng pwacye, fokoko ke Iwacluhn luhn Leum ac Mwet Lahngo lasr, Jisus Kraist, tuh ma koluk lasr, weacng tahfonglac ma kuht oraclah ke kuht puhtatyang nuh ke kena luhn ikwac, in kuh in kuhtangyucklac ke auliyak pacl nuhkwewa ac na kuht kuh in liyacacng na in muhta ke moul nguhnnguhn. Ingena pa pacl in karuhnguhnwacng kena luhn mahnosr in fal nuh ke luti muhtahl luhn Kraist. Pa sis oruh kuht enenuh in tiac kotwaclah pacl in auliyak lasr.11
Ohinge, auliyak uh eklac sie kuhfa in mweun ke mweun lasr nuh sesr sifacna. Ke toweni luhlahp se tari ah, Prestuhn Russell M. Nelson el sramsram ke mweun se inge ac ahkacsmakihnye kuht lah “ke kuht sulaclah in auliyak, kuht sulaclah in eklac! Kuht lwelah Mwet Lahngo Elacn ikihlkuhtlac sifacna nuh ke mwet wo emet. Kuht sulaclah in kapwack ke nguhn ac eis engan—engan luhn molwelah Kacl. Ke kuht sulaclah in auliyak, kuht sulaclah in moul oacna Jisus Kraist!”12
Fong nuhkwewa ke nga ngwetlah liyac lwen se luhk ah ke pruhe nuh sin Pahpah tuhmuhk Inkuhsrao, nga siyuck ke nuhnakmuhnahs nga fin tuh oraclah kuhtwena ma tahfonglac ac olweacng in srihke in wolac liki met ah lutu. Nga luhlahlfongi lah auliyak ke kais sie lwen kahsruh nguhnihk in ahkacsmakihnye monuk la suc kolyuc uh.
Siepac mwe kahsruh pa pacl wo lasr nuhkwewa ke kais sie wik in ahksasucye kuht sifacna in nguhn ke ipeis luhn kuhfa luhn Leum in esam ke Iwaclah ac luhngse luhn Leum ac Mwet Lahngo lasr, Jisus Kraist, nuh sesr.
Tamuhlwel ac tahmtahel, nga kwacfe kowos in kahkahsrihk ac nuhnkuh lah kowos oasr yac in kuhtanglah luhngse luhn mahno ac ahkyohkye ohiyac muhtahl luhn nguhn lowos in muh ke pacl fal, kowos kuh in som nuh ke facluh luhn nguhn aengani yurun mwet suc kowos luhngse—ma nga fahkwack ac pruhe inse puhsisacl ke inen Jisus Kraist, amen.