Acn Sacohk

Sel Bonnie H. Cordon

Prestuhn Luhlahp luhn Muhtwacn Fuhsr

Ke infulwacn ma nuh kwewa kuht oruh ke Muhtwacn Fuhsr uh pa kena lasr in kahsre kom in eis luhlahlfongi fokoko ke Leum Jisus Kraist.

Tahmtahel sacohk wiyuck, nga engan in wi kowos! Kuht lohloh nuh ke kahklah luhn fwackyuck ma kwewana ahkyohkye nguhn ac ahkengan.

Ke kuht muhtwacwacack uh, nga ke fahk keiwos nuh sin kuhtuh kawuck; elos muhtwacn fuhsr pihsrlac ke orekma suhmaht, facsin, ac ohiyac luhn kais sie mwet ac sucu. Kais sie selos, oacna kowos nuhkwewa, oasr in insiyuck.

Ma se met, ohsun nuh sel Bella. El tu na kuh ekihn muhtwacn fuhsr sefanna ke pracns lal fin acn Iceland.

Ohsun nuh sel Josephine insacnweacng suc ma Africa, suc sifilpac otwelah in lutlut ke Puk luhn Mormon ke lwen nuhkwewa. El sokwack kuh ac mwe insewowo uh ma tuhkuh ke orekma fihsrwacsr, oaru uh.

Ac sahflah, ohsun nuh sin kawuck se luhk Ashtyn, sie muhtwacn fuhsr wo na pwacye suc misac tukun el lain mas cancer ke lusen yac-ohnkohsr. Luhlahlfongi fokoko lal ke Iwaclah luhn Jisus Kraist srwackna oasr ke insiyuck.

Kowos nuhkwewa muhtwacn fuhsr wowo. Wacngihn mwet oacna kom, oasr mwe sang ac ma puhlakihnyuck luhn kais sie suwos tuhsruhk oacna sie ke ohiyac yohk srihpac ac ma pahtpaht.

Pwacyena lah kowos acn nguhn nuhtin Ninac ac Pahpah Inkuhsrao, ac wacngihn kuhtwena ma kuh in srikowoslac liki luhngse Lalos ac luhngse luhn Mwet Lahngo lowos.¹ Ke kowos fototoyang nuh Yohrohl, finne kowos fahsr na kahkahsrihk nuh met an, kowos fah sokwack mihslac paht ma tilyang nuh ke nguhnum oacna sie mwet tuhma lutlut oaru luhn Mwet Lahngo lasr, Jisus Kraist.

Prestuhn Russell M. Nelson, mwet pahluh sacohk lasr, el siyuck tuh nga in akacsruhi ke kuhtuh ma eklac mokleyuck ma ac kahsrwe kom in “ahkkweye kapkapwack muhtahl [lom]”² in ahkyohkye ma mokleyuck suwohswohs lom an. Nga ac fah sramsram ke ip ahkosr ke ma eklac uh ofong.

Sifac luhn Muhtwacn Fuhsr

Ma se met, ma yohk srihpac ke ma nuhkwewa kuht oruh ke u luhn Muhtwacn Fuhsr uh pa kena lasr in kahsre kom in eis luhlahlfongi fokoko ke Leum Jisus Kraist³ ac etwacack pwacye ke ohiyac muhtahl oacna sie acn nuhtin God.

Ofong, nga kena ahkkahlwemye sie ma eklac ke sifacn luhn Muhtwacn Fuhsr. Nga pruhe tuh kowos in puhlakihn Nguhn Muhtahl in fahkwack ke pwacyeiyacn kahs inge ke nga fahk sifacn sasuc se:

Nga sie muhtwacn sacohk nuhtin ninac ac pahpah inkuhsrao,⁴ ke ohiyac muhtahl ac muhta na ke inkacnek nuh ke moul ma pahtpaht.⁵

Oacna sie mwet tuhma lutlut luhn Jisus Kraist,⁶ nga srihke in eklac oacna El.⁷ Nga suk ac mukwikwi ke fwackyuck ma tuhkuh nuh sihk⁸ ac luti nuh sin mwet sahyac ke ine muhtahl Lal.⁹

Nga ac tu oacna sie mwet loh luhn God ke pacl nuhkwewa ac ke ma nuhkwewa ac ke acn nuhkwewa.¹⁰

Ke nga srihke in fal nuh ke enganwack,¹¹ nga sacohkkihn mwe sang luhn auliyak¹² ac suk in wolac ke kais sie lwen.¹³ Ke luhlahlfongi,¹⁴ nga fah ahkfokokoye lohm sihk ac sucu luhk,¹⁵ oruh ac karuhnguhnwacng wuhlweacng muhtahl,¹⁶ ac eis akwuck¹⁷ ac mwe insewowo luhn tempuhl muhtahl.¹⁸

Liye eklac se ke “kuht” nuh ke “nga.” Ma pwacye inge ma nuh sum sifacna. Kom pa sie acn sacohk nuhtin Ninac ac Pahpah Inkuhsrao. Kom pa sie mwet tuhma lutlut wuhlweacng luhn Mwet Lahngo lasr, Jisus Kraist. Nga suli kom in lutlutkihn ac motko kahs inge. Nga etuh lah ke kom ac oruh, kom ac fah eis sie luhlahlfongi kuh ke pwacyeiyacn ma ingacn. Kahlwem ke ma pwacye inge ac fah ekuhllah ohiyacn foracng lom nuh ke ma upac an. In etuh lah suc kom an ac srihpom ac fah kahsrwe kom in ahksuwohsyeacng kena lom nuh ke kena luhn Mwet Lahngo.

Mihslac ac kolyuck ac fah ma lom ke kom fahsr tukun Jisus Kraist.

Kuhlahs luhn Muhtwacn Fuhsr

Akhkluo ke ma eklac uh pa ke kuhlahs luhn Muhtwacn Fuhsr. Elder Neal A. Maxwell el fahk, “puhslac pacl ma mwet uh enenuh yohk an pa in loangweyucklac liki ongaiyac luhn moul uh ke acn wo sef luhn iwi uh.”¹⁹ Kuhlahs lasr uh enenuh in acn wo sef liki ongaiyac, acn wowo ke luhngse ac in wi. In kampare in oraclah in yohkwelihk luhn ma sefanna, ahkfokokoye kakawuck, ac ahkyohkye ma puhlakihnyuck ke [kom] wi Muhtwacn Fuhsr, kuht ekuhllah kuhtuh ma nuh ke ohiyacn kuhlahs uh.

Ke lusen yac siofok, muhtwacn fuhsr an sreyucklac nuh ke kuhlahs tolu. Muhtwacwack ingena, kuht suli mwet kol luhn Muhtwacn Fuhsr ac pisap an in pruhe motko enenuh luhn kais sie muhtwacn fuhsr ac akiyac u fal nuh ke ohiyac enenweyuck luhn ward an. Pa inge kuhtuh mwe srihkasrak lah fuhkah atacn ma se inge.

• Fin oasr muhtwacn fuhsr sepuhs, kom kuh in oraclah kuhlahs sefanna in mwet nuhkwewa toweni nuh sie.

• Sahp oasr u luhlahp se ke muhtwacn fuhsr matwac yac 12 ac na u srihsrihk se ke muhtwacn fuhsr ma mahtuh liki. Kom kuh in sulaclah in oraclah kuhlahs luo: Muhtwacn Fuhsr 12 ac Muhtwacn Fuhsr 13–18.

• Kuh fin yohklac ward lom an ac oasr muhtwacn fuhsr 60 ma wi, kom kuh in oraclah kuhlahs ohnkohsr, sie nuh ke kais sie matwacn yac an, akwucki ke yac.

Oacna sie ohiyac ma kuhlahs lom an akwucki kac, kom muhtwacn fuhsr an yohk srihpac in muhsaheack in ma sefanna inmahsrlo. Oruh kom in sie kahlwem nuh selos suc raunikomlac an. Oruh kom in pa sie mwet suc luhngse ac etatwen karihngihn ma kom finsrak in eis sin mwet sahyac an. Ke sie pruhe in insiyom, fahfahlac na in saplakyang ac oruh kom in sie usrwen ma wo uh. Ke kom oruh ohinge, moul lom an ac fah sesseslah ke kuhlwacng. Puhla lom an ac fah wolac nuh sin mwet sahyac ac ac fohlohkihnyac an pa kom ac fah muhtwacwacack in liye wolacna lalos.

Inen Kuhlahs luhn Muhtwacn Fuhsr

Ahktolu, ke akwucki luhn kuhlahs sasuc inge, kuhlahs nuhkwewa ac fah pahngpahng ke ine se “Muhtwacn Fuhsr.”²⁰ Kuht ac tilac orekmakihn ine “Beehive,” “Mia Maid,” ac “Laurel.”

Ahkfokokoye Prestuhnsi luhn Kuhlahs

Ma sahflah se nga ke sramsramkihn uh pa yohk srihpaciyacn prestuhnsi luhn kuhlahs. Macnsis lah kuhlahs luhn Muhtwacn Fuhsr an akwucki fuhkah, kuhlahs nuhkwewa enenuh in oasr prestuhnsi luhn kuhlahs!²¹ Ma ke akwuck muhtahl tuh muhtwacn fuhsr uh pahngyak in kol mwet fuhsr lalos.

Srihpac and kunohkohn luhn prestuhnsi ke kuhlahs fokokoi ac yohkwelihk in kahlwem. Orekma in molwelah pa kunohkohn luhlahp inge, finne ke eria luhn karihngihn, orekma luhn misinacri, sulpac wi, ac orekma ke sucu ac tempuhl.²² Ahok, pa inge ohiyac se kuht oracni Israel²³—orekma wolacna se nuh sin mempucr nuhkwewa luhn muhtwacn fuhsr ke un mweun fuhsr luhn Luem.

Ke kowos etuh tari, ke lacfahl nuhkwewa ke Alu uh, Leum El pahngon prestuhnsi in kol mwet Lal. Muhtwacn fuhsr, ke kom sie mempucr ke prestuhnsi ke kuhlahs an sahp pa pacl wowo se emet lom in wi mukwikwi ke ohiyac mokleyuck ke kolyuck uh. Mwet kol mahtuh an, oruh pahngyak luhn prestuhn ke kuhlahs in in yohk srihpac emet na fah kol lac-lac weluhlos, kahsrwelos ac kohlohlos elos in kuh in kuhtanglah.²⁴ Oacna sie lacfuhl ke etuh in kol luhn prestuhnsi ke kuhlahs, muhtwacwacack ke lacfuhl ma elos oasr kac ac kahsrwelos in ahkyohkye etatwen ac ekahk ma ac ahkinsewowoyaclos oacna mwet kol. Muhta fototo nuh yohrohlos, tuhsruhk nimet eislah oruh. Nguhn ac kol kom ke kom kohlohlos an.

In ahkkahlwemye kunohkohn yohk srihpac luhn ninac pahpah ac mwet kahsruh kol an, lwelah ngan sruhmuhn sie sramsram ah. Chloe el tuh pahngyak in kuhlwacnsap ekihn prestuhn luhn kuhlahs. Mwet kol suhmaht se lal ke pristut ahkkweyeyacl in suk kahsruh luhn Leum in sang kuhtuh inen mwet nuh ke prestuhnsi lal an. Chloe el pruhe ac eis mokleyuck na sa lah suc elac sang ine in mwet kahsruh lal. Ke el fahfahlac na in motko ac pruhe lah suc ac mwet sihm, Nguhn kalweni na in oruh elan lohacng nuh ke sie muhtwacn fuhsr ma oruh el lut—sie mwet suc suhkwac wi alu kuh ma orek uh.

Ahlohloh ke mokleyuck sac, Chloe el sramsram kac nuh sin ninac kiyacl ah, suc ahkuhtweyac lah sie sin inkacnek ma kuht kuh in eis fwackyuck uh pa ke kuht kalweni na in nuhnkuh. Ahksasucyeyuck ke puhlakihnyuck wo, Chloe el puhlakihn muh el enenuh in sang inen muhtwacn fuhsr se inge. Pisap el tahfweacng pahng sac, ac muhtwacn fuhsr sac insese. Tukun sulaclah nuh ke kunohkohn, mwet sihm wowo se inge fahk, “Kom etuh, nga tiacna puhlakihn muh nga fal kuh in wi, kuh enenweyuck nga ke oacna sie acn. Nga tiacna puhla muh nga fal in wi. Tuhsruhk ke pahng se inge, nga puhlakihn muh oasr srihpac lal Pahpah Lucng ac oasr sie acn nuh sihk.” Ke Chloe ac ninac kiyacl ah som liki miting sac, Chloe el foracng nuh sin ninac kiyacl ah, sroninmuhtayak fahk, “Fwackyuck uh pwacye! Fwackyuck uh orekma na pwacye!”

Prestuhnsi ke kuhlahs an, kowos pahngak sin God ac luhlahlfongiyuck in kol sie un muhtwacn Nahtuhl. “Leum El etwekowos. … El sulekowoslac.”²⁵ Kowos tuh sulelah nuh ke kunohkohn sin sie suc sruok kuh luhn pristut; kalmacn ma se inge pa ke kowos oruh kunohkohn ke pahng lowos an, kowos orekmakihn kuh luhn pristut. Oasr orekma yohk srihpac se lowos in oruh. Oruh kowos in acsmak nuh ke ac mukwikwi ke mokleyuck luhn Nguhn Muhtahl. Ke kowos oruh ohinge, kowos kuh in kuhlwacnsap wo, tuh kowos tiacna muhkwena kuhlwacnsap!

Prestuhn luhn kuhlahs an, kuht enenuh suhmaht, puhsra, ac fokoko lowos nuh ke un mwet in kahsruh sasuc luhn mwet fuhsr ke ward ma Elder Quentin L. Cook el sulkackihn misenge ah. Kom sie ip na yohk srihpac ke topukyac in oraclah enenuh luhn tamuhlwel ac tahmtahel wiyom an.²⁶

Ma eklac ke u ac kolyuck ke kuhlahs an kuh in muhtwacwacack ke pacl sa ke ward ac pracns an ahkolah tuhsruhk enenuh in akwucki ke Jacnweri 1, 2020.

Tahmtahel sacohk wiyuck, nga fahkwack luhlahlfongi luhk lah eklac ma nga sramsramkihn mihsenge inge mokleyuck tuhkuh sin Leum. Ke kuht oaru in oraclah eklac inge, lwelah kuht in tiacna ngwetlah liki srihpac lasr uh: in ahkkweye sulaclah lasr in fahsr tukun Jisus Kraist ac in kahsruh mwet sahyac in tuhkuh nuh Yohrohl. Nga fahkwack lah pa inge Alu Lal. Fuhkah luhpan tarilacna luhk lah El lwelah kuht in ip yohk srihpac na pwacye ke orekma muhtahl Lal.

Nga pruhe tuh Nguhn sepacna ma kol eklac inge in kol kowos ke kowos ahkwot nuh met ke inkacnek luhn wuhlweacng. Nga fahkwack ke inen Jisus Kraist, amen.

Mwe Ahkkahlwemye

1. Liye Rome 8:35–39.

2. Russell M. Nelson, “Witnesses, Aaronic Priesthood Quorums, and Young Women Classes,” Liahona, Nohfuhmpuh 2019, 39.

3. Liye Soakas 3:5–7; Jacob 7:5.

4. Liye Rome 8:16–17; Doctrine and Covenants 76:24; “Sucu: Sie Mwe Fahkwack Nuh Fin Facluh,” Liahona, Mei 2017, 145.

5. Liye 2 Peter 1:3–4; Alma 37:44; Doctrine and Covenants 78:18; “Sucu: Sie Mwe Fahkwack Nuh Fin Facluh.”

6. Liye John 13:14–15, 35.

7. Liye Matthew 22:37–39; 25:40; 3 Nephi 12:48.

8. Liye John 16:13; 3 Nephi 14:7–8; Moroni 7:13; 10:5; Doctrine and Covenants 8:2; 9:8; 11:13.

9. Liye Matthew 20:26–28; 22:37–39; 25:34–40; 3 Nephi 26:19.

10. Liye Isaiah 43:10; Mosiah 18:9; Doctrine and Covenants 14:8.

11. Liye Rome 8:17; 2 Nephi 9:18; 31:20; Doctrine and Covenants 84:38; 132:49; Moses 1:39.

12. Liye Helaman 12:23; Moroni 10:33; Doctrine and Covenants 58:42.

13. Liye Alma 34:33; Doctrine and Covenants 82:18.

14. Liye Hebrew 11; 2 Nephi 31:19–20; Alma 32:21.

15. Liye Joshua 24:15; Doctrine and Covenants 109:8; 132:19.

16. Liye Exodus 19:5; 1 Nephi 14:14; 2 Nephi 11:5; Doctrine and Covenants 54:6; 66:2; 90:24.

17. Liye Mosiah 13:30; Alma 30:3; Doctrine and Covenants 84:20–22; Articles of Faith 1:3.

18. Liye Psalm 24:3; Isaiah 2:3; Ezekiel 37:26.

19. Neal A. Maxwell, All These Things Shall Give Thee Experience (1979), 55.

20. Kuhlahs an enenuh in pahngpahng ke sifac ma oracni nuh sie se “Muhtwacn Fuhsr.” In ahkkahlwemye ke sie kuhlahs, sang matwac yac an in weacng—in mwe srihkasrak, “Muhtwacn Fuhsr 12–14”; “Muhtwacn Fuhsr 15–18” (liye Handbook 2: Administering the Church, 10.1.5, ChurchofJesusChrist.org).

21. Prestuhnsi ke kuhlahs enenuh in pahngyak nuh sin kais sie kuhlahs luhn Muhtwacn Fuhsr. Fin kuh, prestuhnsi fohnlah se enenuh in pahngyak, ke sie prestuhn, mwet in kahsruh luo, ac mwet in sihm se. Fin enenweyuck, tahfuhn prestuhnsi se kuh in pahngyak (liye Handbook 2, 10.3.5).

22. Liye Handbook 2, 10.3.5.

23. Liye Russell M. Nelson “Hope of Israel” (worldwide youth devotional, Jun 3, 2018), HopeofIsrael.ChurchofJesusChrist.org.

24. Kuhtuh pac ahkuhtweyac an oasr nuh sin mwet kol mahtuh luhn Muhtwacn Fuhsr ke Handbook 2, chapter 10.

25. Henry B. Eyring, “Rise to Your Call,” Liahona, Nohfohmpuh 2002, 76.

26. Fin oasr kuhlahs sefanna lom ac prestuhnsi sefanna, prestuhnsi nohflah sacn kuh in wi un mwet in kahsruh fuhsr luhn ward wi un prestuhn ke Aaronic Pristut tuh in oacna sie inmahsrlon muhtwacn fuhsr ac mukul fuhsr (liye Handbook 2, 18.2.9).