Karuhnguhngwacng in Pruhe Pacl Nuhkwewa (Alma 34:39; Moroni 6:4; Luke 21:36)
Oaru pacl nuhkwewa enenweyuck in kuhtanglah alsruhngwacsr ac suhnuhkuh.
Nga sang kuhiyuck in pruhe tuh Nguhn Muhtahl in kahsrwekom ac nga ke kuht aengani ac alu tuhkweni.
Ke Eprel ke yac 1976 [sie tausin yucfoko itngucul ohnkohsr], Elder Boyd K. Packer el sramsram nuh sin mwet fuhsr ke Alu uh ke toeni luhlahp. Ke sramsram wo se lal pahngpahng “Crocodiles in Ahkkolukye Nguhn,” el ahkuhtweyac tuh ke el som nuh acn Africa el liye crocodile ah wihkwihk ac sanno in ngalisyac ma suc tiac liyaclos. El na kapsra crocodile inge nuh ke Setuhn, suc ngalisyac mwet fuhsr ke el wihklac ke ma koluk.
Nga matwac yac 23 [longoul tolu] ke Elder Packer el use sramsram soko ingwacn, ac Susan ac nga tuh ahkolah ke isuslac ke tuhlihk se emet nahstuhsr ke lwen tohkoh. Kuht luhngse ip yohk ke sramsram lal ke sensenkihn ma koluk ac ohiyac suhmaht lal el kapsreyac ohiyacn kosro suhlalacl in luti ke ma luhn nguhn.
Susan ac nga oacyacpac som nuh acn Africa ke kunohkohn puhkantwen. Ac oasr pacl lasr in liye kosro puhkantwen ma muhta ke acn sacn. In esam yohk srihpacn sramsram lal Elder Packer ke moul lasr, kuht srihke in liye ac etwaclah ma yohk srihpac ke kosro puhkantwen ma oasr acn Africa.
Nga kena ahkkuhtweyac kuhtuh ohiyac ac plwacn luhn cheetah lukoac Susan ac nga tuh liye suk ke mongo naclos ac kuhtuh ma kuht liye kapsrweni nuh ke wosasuc luhn Jisus Kraist.
Cheetahs ac Topis
Cheetahs pa pihsrpihsr emet ke kosro fin facluh ac kuh in kahsrohsr ke 75 [itngucul limekohsr] mph (120 km/h). Kosro kahto inge kuh in som ke tiac mukwiwi nuh ke kahsrohsr ke 68 mph [ongoul alkohsr] (109km/h) ke second tolu. Cheetah pa kosro sulalwacl ma sanno wihklac ke kosro sahyac na kahsrohsr muhi ac ngaluhlos.
Susan ac nga tuh sang ao luo in liye cheetah lukoac wihkwihk sanno un topis, suc pa in kain in kosro antelope ma pucs acn Africa. Mah loes, paho ke acn mwesis Africa tuhn brown ac okanlah kosro sulalacl inge ke elos ukwe un topis inge. Cheetah inge loes liki sie sin sie ke sahp yard 100 [siofok] (91 m) tuh orekma tuhkweni.
Soko cheetah el tuyak ke mahmah tiac mukwiwi, ac cheetah soko sahyac el kahkahsrihk orahkrahk ke infohk ah ac som fototo nuh ke topis ah suc tiac liyacl. Na cheetah soko ma tuyak ah el som ten liki mahmah ke pacl se na ma cheetah soko sahyac el tuyak. Ohiyac sac ke kais soko cheetah in som nuh ten ac orahkwack nuh met ke cheetah soko sahyac el tuyak ke mahmah kalweni sikyak ke pacl loes. Plwacn suhlalwel pa in wakre ac kiacpwe un topis ac na oruh tuh elos tiac lohacng nuh ke ma sensen ma tuhkuh. Kais kuhtuh ke muhtwacng, cheetah lukoac orekma tuhkweni in eis mongo nwaclos.
Tu inmahsrlon u luhn topis ac cheetah lukoac pa topi mahtuh ac luhlahp ekahsr suc tu topang fin fohk fuhlwact kuhtuh. Ke srihpen elos muhta lucng kuhtuh liki mahmah ke acn fuhlwact lalos topang luhn topis inge muhta suk ke ma sensen.
Ke kihtihn pacl, ke cheetah ah fototo in eis topis ah, un topis nohfohn forlah ac kahinglac. Nga nihkihn fin pa topang luhn topis inge pa sensenkackihnuhlos, tuh mwe sensen etweyuck, ac topis nohfohn kahinglac nuh acn mihs.
Ac na meac cheetah lukoac oruh tok? Ac tiacna tui, cheetah lukoac ah sifilpac muhtwacwacack in kais soko wihklac ten ac orahkrahk nuh met ke cheetah soko sahyac tuyak ke mahmah. Ohiyacn ukwac uh kalweni. Elos tiacna tui. Elos tiacna monglac. Elos insacnwacng ke plwacn lalos ke kikiacp ac suhlalwacl. Susan ac nga liye cheetah wihklac ke acn loes, in fototo ac fototoeni nuh ke un topis.
Fong sacn Susan ac nga sramsram ke ma kuht liye ac etwaclah. Kuht oacyacpac sramsram nuh sin tuhlihk ac tuhlihk mahtuh nahtuhsr ke mwe luti kuht lotwelah. Nga ac ingena ahkkuhtweyac tolu sin mwe luti ingwacn.
Ma Se Met—Taran ke Ohiyacn Wihkwihk luhn Ma Koluk
Nuh sihk, cheetah elos kain kosro arulacna kahto. Kulun cheetah tuh rangrang ac fasrfasr wi ip sralsral srihsrihk ac pa mwe wihkwihk kahto se tuh oruh in upac in liyaclos ke elos fahsr ke acn mwesis Africa.
Ke ohiyac se pacna, nuhnak ac mukwikwi ahkkolukye nguhn kuh in luhman kahto, ahkpwacr, kuh wo. Na, ke facluh mihsenge, kuht enenuh in taran ke ma koluk lah wihkwihk in oacna ma wo. Oacna Isaiah el fahk, “We nuh selos suc pahngon ma koluk wo, ac ma wo koluk, suc ekuhllah lohsr nuh ke kahlwem, ac kahlwem nuh ke lohsr, suc ekuhllah ma muhkohl in emwem, ac ma emwem in muhkohl!”1
Ke pacl fohs se ke uniyac moul muhtahl se oacna ma suhnakihnyuck ac fohs ahkuhtweyucklac oacna sukohsohk, kuht ahkinsewowoyeyuck tuh kuht moul ke lwen sahflah inge ke kahlwem luhn wosasuc fohlohkyak kuh in ahkkahlwemye moul lasr ac kahsruh kuht etuh liki mwe kikiacp luhn devil.
“Tuh elos nuhkwewa tuh lahlmwetmwet ac eis ma pwacye, ac us Nguhn Muhtahl in mwet kol lalos, ac tiac kiacpweyucklac—nga fahk nuh suwos, elos in tiac sihpihkyac ac tollah nuh in e, tuh in moullac ke lwen sac.”2
Mwe Luti Ahkluo—Acsmaklac ac Ngwetngwet
Nuh ke topi soko, kihtihn pacl se na kuh suhnuhnkuh ke tiac lohacng suli ahkkoluk sin soko cheetah. Oacna, suhnuhnkuh ac tiac lohacng luhn nguhn ac oruh setuhn in muh ahkkolukye kuht. Suhnuhnkuh luhn nguhn suli ahkkoluk sin setuhn nuh ke moul lasr.
iStock.com/Angelika
Nephi el ahkuhtweyac lah ke lwen sahflah Setuhn el ac srihke in ahkmihsye ac kiacpwelah tuhklihk nuhtin God nuh ke “ohiyac wo luhn ikoac, tuh elos fah fahk: Ma nuhkwewa wo Zion; ahok, Zion kapkapwack, ma nuhkwewa wo—ac ohinge devil el pihsrwaclah nguhnalos, ac kahkahsrihk kohlohloslac nuh ten nuh ke hell.”3
In sensen pacl nuhkwewa pa enenweyuck in kuhtanglah suhnuhnkuh. In sensen pa ohiyac kuh mukwikwi ma liyeyacng wo nuh ke ma sensen kuh ma upac. Ac liyeyacng kalmac in acsmaklac in topang ac karihngihn. Ke kahs luhn nguhn, kuht enenuh in acsmaklac ac lohacng nuh ke kolyuck luhn Nguhn Muhtahl ac kolyuck ma tuhkuh sin mwet topang luhn Leum fin acn fuhlwact.4
“Ahok, ac nga oacyacpac kwacfe kowos … tuh kowos in karuhnguhnwacng in pruhe pacl nuhkwewa, tuh kowos in tiac kolyucklac ke mwe sruhf luhn devil, … tuh liye, el tiac acsot nuh suwos kuhtwena ma wo.”5
Lohacng moul lasr ke Mwet Lahngo ac wosasuc Lal ahkkweyekuht in kuhtanglah kena luhn mahno in alsruhngwacsr in nguhn. Kuht ahkinsewowoyeyuck ke atron muhta in liye ac insrac in lohng,6 ac Nguhn Muhtahl kuh in ahkyohkye kuh lasr in liye ac lohng finne kuht tiac nuhnkuh muh kuht enenuh liye ac lohng kuht fin kuht tiac nuhnkuh oasr ma in liyeyuck kuh lohngyuck.
“Karuhnguhnwacng, na, tuh kowos in ahkolah.”7
Mwe Luti Ahktolu—Kahlwem ke Ohiyacn Mwet Lain
Cheetah soko pa kosro sulalwacl ac mongo la pa kosro sahyac. Lwen nohfohn, lwen nuhkwewa, cheetah pa kosro sulalwacl.
Setuhn el pa “mwet lain se luhn ma suwohs ac mwet nuhkwewa suc suk in oruh luhngse luhn God.”8 Lwen nohfohn, lwen nuhkwewa, kena ac srihpac lal pa in ahksuhpwacrye wen ac acn nuhtin God oacna el sifacna.9
Plwacn in engan luhn Pahpah oreklac in sang kolyuck nuh sin tuhlihk Nahtuhl, in kahsrwelos puhla engan pwacye, ac usaclos fohlohk nuh lohm Yohrohl ke mahno moulyak, ahkmuhtahlyeyuck. Devil el orekma in ahkfohsye wen ac acn nuhtin God ac ahksuhpwacryaclos ac kosrwaclah moul ma pahtpaht lalos. Devil el orekma pacl nuhkwewa in ahkkolukye ip yohk luhn plwacn luhn Pahpah ma el sruhnga emet.
Wacngihn mahnol Setuhn, ac wacngihn moul ma pahtpaht lal. Oacna kohf sohrohr ke infacl soko ac tulohkihnyucklac ke dam se, oacna sie nuh sin moul ma pahatpsht lsl Setuhn ke srihpen wacngihn mahnol. Ke srihpen lain lal ah, Lucifer el lahfwekihn mwe insewowo nuhkwewa luhn moul uh ac puhlakihn ma kuh in tuhkuh ke moul in ikoac ac srah. Kalmac se ke ma suhmuhslah ke kahs se misac ma pahtpaht ahkkahlwemyeyuck lah el tiac kuh in kapwack ac in oacna Pahpah Tuhmasr Inkuhsrao.
Ke srihpen mahno luhn ikoac yohk srihpac nuh sin plwacn luhn Pahpah ac kapwack in nguhn lasr, Lucifer el suk in kosrwaclah kapwack lasr ke srihfe kuht in orekmakihn mahnosr nuh ke ma koluk. Prestuhn Russell M. Nelson el luti tuh in karihngihn nguhn lasr enenuh in “‘tiac som finne ma srihsrihk nuh ke acn ma kowos tiac enenuh in som nuh we ac oruh ma kom tiac enenuh in oruh.’ . Oacna mwet luhn facluh kuht nuhkwewa oasr mwe enenuh [luhn mahno] kuht in moul. ‘Mwe enenuh inge yohk srihpac na pwacye ke tahfweyacn moul uh. Na, meac mwet koluk sac el oruh? . El srihfe kuht nuh ke mwe enenuh in mahno lasr. El srihfe kuht in kang ma kuht in tiac mongo, nihm ma kuht in tiac nihm, ac luhngse ma kuht tiac in luhngse!’”10
Sie ma luhman tahfuhnkahs tuh suhpwacr ke ma pahtpaht uh tuh mwe koluk sac, suc ahsor ke srihpen wacngihn mahno lal, suli ac srihfe kuht in weluhl suhpwacr nuh ke orekmakihnyacn koluk mahnosr. Ma se ma wacngihn lal ac el tiac kuh in orekmakihn pa lohacng emet lal elacn srihfe kuht nuh ke misac luhn mahno ac nguhn.
Yohk srihpac in kahlwem plwacn luhn mwet lokoalok in ahkolah ke mweum.11 Ke srihpen Captain Moroni el etuh ke plwacn luhn mwet Laman, el ahkolah in sonolwaclos pacl se elos tuhkuh ac kuhtangwacloslac.12 Ac ip yohk ac olwelah se ingwacn fal nuh sesr kais sie.
“Kom fin ahkolah, kom ac tiac sahngweng.
“Ac tuh kom in kahingkuhnlah kuh luhn mwet lokoalok.”13
Solsol, Olwelah, ac Testimoni
In kapsreyucklac nuh ke mukwikwi luhn kosro cheetah ac topis, kuht kais sie kuh in suk mwe luti ac mwe ahksensen ma oasr ke moul lasr kais sie lwen. Ke kuht suk ikacslah nuhnak ac insiyacsr in eis kolyuck inkuhsrao sin Nguhn Muhtahl, na kuhtuh sin mwe luti yohk srihpac emet kuht kuh in eis ac mwe ahksensen fokoko ma kuh in karihngihn kuht fah tuhkuh ke moul lasr kais sie lwen. Puhlpuhlyak fokoko oasr ke ma suhmuhslah ac moul lasr kwewa.
Nga sramsram ke ma tolu sin mwe luti pucs ma kuh in lutiyuck nuh sin ma nga ac Susan kuht puhlakihn fin acn Africa. Nga suli ac ahkkweye kowos in motko ke sramsram inge ke kosro cheetah ac topis ac konwacack kuhtuh mwe luti sasuc nuh suwohs ac sucu lowos. Nuhnak muhnahs esam tuh lohm suwos oasr infulwacn lutiyacn ac moulyacn wosasuc uh.
Ke kowos mukwikwi in luhlahlfongi nuh ke solsol se inge, nuhnak moklweyuck ac tuhkuh nuh suwos, puhla luhn nguhn nuh insiyowos, ac kowos ac akihlen mukwikwi kowos enenuh in muhtwacwack kuh kalweni kowos in kuh in “eis nuh fowos mwe loang [luhn God] nohfohn, tuh kowos in kuhtanglah ke lwen koluk, oruh ma nuhkwewa, tuh kowos in kuhtanglah.”14
Nga olwelah tuh mwe insewowo luhn karihngihnyuck ac ahkolah in nguhn ac tuhkuh nuh ke moul lowos ke kowos karuhnguhnwacng in pruhe pacl nuhkwewa ke kuhiyowos.
Nga fahkwaclihk tuh in kampare nuh met ke inkacnek in wuhlweacng karihngihn nguhn lasr ac use engan nuh in moul lasr. Ac nga ahklohye tuh Mwet Lahngo moulyak ac moul El ac ahkkweyekuht ac karihngihn kuht ke pacl wo ac koluk. Ke ma pwacye inge, nga fahkwack luhlahlfongi luhk ke ine muhtahl luhn Leum Jisus Kraist, amen.