Etuh, Luhngse, ac Kapkapwack
Lwelah kuht in kuh in kahlwem ip lasr ke orekma yohk in karihngihn kuht in muh kuh in fahsr oacna El.
Ke 2016 Tabernacle Choir ke Temple Square tuhkuh in muhtwacta acn Netherlands ac acn Belgium. Ac ke nga wi pacl wolacna sac, oasr pacl luhk in liye mukwikwi lalos pacl luo.
Ke mukwikwi lalos nga nuhnkuh ke orekma upac inge in mokle choir luhlahp se inge acn nuh ke acn. Insifuck liye gong luhlahp se lah upac ac kahsruhp in us tuhkuh nuh acn ngwe in on ke tiac oacna violin, trumpet an, kuh kuhfwen mwe on sahyac muh kom kuh in us ke paho. Tuhsruhk ke nga liye pacl in sritacl luhn gong se, nga akihlen orekmakihn kuhtuh pacl na, ac kuhfwen mwe on srihsrihk sahyac orekmakihnyuck pacl puhs ke concert ah. Nga motko lah fin wacngihn gong, na mukwikwi sac ac tiac oacna sie ac na orekma in us gong luhlahp sac sahslah fin meoa pa yohk srihpac.
Kuhtuh pacl kuht puhla lah kuht, oacna gong sac, pa wo kuhtuh in oruh ip srihsrihk ke mukwikwi se. Tuhsruhk lwelah ngan fahk muh ukukyak lom pa yohk srihpac.
Kuht enenuh kuhfwen mwe on nohfohn. Kuhtuh sesr fihsrwacsr in etwaclah ac oruh wo ke lutlut, tuh oasr talan ke sroal luhn mwet sahyac. Kuhtuh mwet plwacn ac muhsahi ma kuh nurse, karihngihn, kuh luti mwet sahyac. Kuht nohfohn enenweyuck in oracni tuhn ac kalmac nuh fin facluh.
Nuh sin mwet suc puhla lah wacngihn ma elos kuh in sang kuh tiac luhlahlfongi muh elos yohk srihpac nuh sin kuhtwena mwet, nuh sin mwet suc puhla lucng liki facluh nohfohn, ac mwet infulwen, nga ke fahk pweng se inge.
Oacna sie acn kom oasr ke inkacnek luhn moul uh, kuhtuh suwos ac fah puhla toasr nuh upac muh kowos nuhnkuh kowos tiacna oasr ke inkacnek an. Nga ke suli kowos in fahsr liki acn lohsr nuh ke acn kahlem. Kahlwem luhn wosasuc muh ac usot engan ac kuh ac kuh in kahsrwekom in kahlwem suc kom ac ac lah meac srihpac lom ke moul se inge.
Kuhtuh sesr forfor ke inkacnek suhtuhuh in srihke in konwacack engan ke acn ngoh.
Kuht suliyuck sin Pahpah Tuhmasr Inkuhsrao in fahsr ke inkacnek pwacye Lal ac fohlohk nuh Sel. El luhngse kowos ke sie luhngse na suwohs.1
Piyac inkacnek pwacye uh? Inkacnek uh pa in kahsruh sie sin sie in kahlwem lah suc kuht ke karihngihn sie sin sie.
Nuh sihk karihngihn pa orekmakihn luhngse suwos.2 Ke ohiyac se inge kuht oakiyac acn ke mwet sang se ac mwet eis se kuh in eis kena in auliyak. Ke kahs sahyac, kuht ekuhllah ohiyacsr ac tuhkuh nuh yurin Mwet Lahngo Jisus Kraist ac eklac oacna El.
Ke srihkasrak, wacngihn srihpac in fahk nuh sin muhtwacn kiyacsr kuh mukul tuhmacsr kuh tuhlihk nahtuhsr muh elos enenuh in kapwack; elos etuh tari. Ke kuht orwaclah acn in luhngse muh elos eis kuh in ekuhllah moul lalos ac eklac nuh ke mwet wolac.
Ke ohiyac se inge auliyak pa mukwikwi lwen nuhkwewa in kapwack, muh sahp ac fah wiwina auli ke ma koluk. Nga esam ac srwack puhla pacl lah nga sa in nuhnuhnkuh kuh suhmuhi in lohng. Ac ke sahflahiyacn lwen se ke pruhe kais sie luhk, nga eis luti ke luhngse sin inkuhsrao in auliyak ac oruh wolac. Acn in luhngse muhahiyack omeet ah sin pahpah ninac kiyuck, mukul wiyuck, ac muhtwacn wiyuck ac pacl tok ke muhtwacn kiyuck, tuhlihk nahtuhsr, ac kawuck luhk kahsrweyuc in eklac mwet wolac.
Kuht nohfohn lah oyac kuht kuh in eklac wolac. Wacngihn srihpac in ahkacsmakihnye sie sin sie pacl puhs, tuhsruhk oasr mwe enenuh in luhngse ac, karihngihn sie sin sie, ac ke kuht oruh ma inge orwaclah mwe puhla in eklac.
Ke acn in luhngse se inge kuht etwaclah lah suc kuht ac lah meac ip lasr ke sapta in sahflah se inge luhn facluh met liki Tuhkuh Ahkluo ke Mwet Lahngo.
Fin kom nuhkanlah ke ip lom, nga ke suli kom in konwacack sie acn muh kom kuh in sifacna siyuck sin Pahpah Tuhmasr Inkuhsrao in ahkkahlwemye nuh sum ip lom an. Top sac fah tuhkuh kais kuhtuh ac na kuht fah eis in kahlwem ke kuht tu kuh fin inkacnek ke olwelah ac karihngihn.
Kuht moulkihn kuhtuh ma upac muh Joseph Smith el sun ke el “infulwacn na mweun [se] ke kahs ac nuhnak.” Ke kuht riti ke kahs lal sifacna, el fahk nuh sel sifacna: “Meac nga enenuh in oruh? Piyac u pwacye; kuh, nohfohn tuhkweni suhtuhuh? Fin [sie] pwacye, na meac, ac nga kuh in etuh fuhkah?”3
Ke etwacack el konwacack ke Leta sel James, pa fahk muh “Tusruktu kutena suwos fin enenu in akyokya lalmwetmet lal, enenu elan pre nu sin God, su ac fah sang nu sel; mweyen God El tia srowohsr a El insewowo in sang yohk nu sin mwet nukewa,”4 Joseph el “sulwaclah in ‘siyuck sin God.’”5
Kuht tuhtahflah in rit muh “pa inge pa pacl se emet ke moul lal el srihke in oruh ma inge, ke pacl in sahngweng nohfohn lal el tiac, nwe ke pacl se inge, srihke in pruhe ke puhsrwel luhlahp.”6
Ac na ma se oacna ke kuht sramsram nuh sin Mwet Oraclah lasr ke ohiyac se kuht tiacna oruh met.
Ke srihpen srihke lal Joseph, Pahpah Tuhmasr Inkuhsrao ac Wen Nahtuhl, Jisus Kraist, sikyang nuh sel, pahnglol ke inel, ac ke srihpen pacl sac oasr kahlwem wo in etuh muh suc kuht ac pwacyena kuht yohk srihpac.
Kuht tuhtahflah in rit muh ke yac fuhsr lal Joseph el “sun kihsruhng sin elos suc enenuh in kawuck lal ac elos suc enenuh in kuhlwacng nuh sel.”7 Ac na sahp kuht fah sun ma upac ke kuht moul in fahsr tukun Kraist.
Fin kom puhla kom tiac kuh in wi orchestra ac inkacknek ke auliyak upac nuh sum, nuhnak muhnahs etuh muh fin kuht srihke nuh srihke, ma toasr lasr ac fah som liki mahnosr ac na oasr kahlwem. Pahpah Tuhmasr Inkuhsrao ac tiac som liki kuht ke kuht saplakyang nuh Sel. Kuht kuh in puhtatlac ac sifilpac tuyak, ac El ac fah kahsrwekuht in ahknwacsnwacsye niyacsr liki ma fohkfohk.
Kuhtuh sesr ngalyak, tuhsruhk oasr mwe kahsruh ke poun Leum in afungyac kihnet nohfohn lasr.
Na pa luhngse, luhngse suwohswohs muh kuht pahngon luhngse pwacye kuh luhngse suwohs luhn Kraist,8 muh enenweyuck ke lohm sesr ke pahpah ninac karihngihn tuhlihk nahtuhlos ac tuhlihk nuh sin pahpah ninac kiyaclos. Nuh ke luhngse se inge, insiyac an ac fah eklac ac kena ac fah eklac in oruh luhngse Lal.
Pa inge luhngse uh muh enenweyuck ke ma yurin kais sie mwet ke tuhlihk nuhtin Pahpah Tuhmasr Inkuhsrao ac mempucr luhn Alu Lal ac kahsrwe kuht in us nohfohn kuhfwen mwe on lasr muh kuht kuh in sritacl in wo ke choir lipufacn luhn inkuhsrao ke Mwet Lahngo El sifil tuhkuh.
Pa inge luhngse, kahlwem sac muh enenweyuck in ahkkahlwemye ma raunikuhtlac ke kuht moul lwen nuh ke lwen. Mwet sahyac ac fah liye kahlwem sac ac tuhkuh nuh yohroh. Pa inge kain orekma luhn misineri in oracni mwet sahyac in “tuhkuh ac liye, tuhkuh ac kahsruh, ac tuhkuh ac muhta.”9 Nuhnak muhnahs ke kowos eis loh lasr ke orekma wolacna se inge ac ip lowos ke uh, lwelah kuht in tuhkweni engan ke Mwet Pahluh kuloh lasr Joseph Smith ke el fahk, “Tuh nga liye arrurruhma se; nga etuh, ac nga etuh ma God El etuh, ac tiac kuh in lahfwekihn.”10
Nga fahkwack nuh suwos muh nga etuh suc nga, ac nga etuh suc kowos an. Kuht nuhkwewa tuhlihk nuhtin Pahpah Lucng suc luhngse kuht. Ac El tiac suhpwackuhtme in puhtatlac tuhsruhk fohlohk in wolacna nuh Sel. Tuh kuht in kuh in kahlwem ip lasr ke orekma in karihngihn wolacna na kuht ac fah eklac oacna El ke Mwet Lahngo sifil tuhkuh pa pruhe luhk ke inen Jisus Kraist, amen.