Eklac ma in Ahkkweye Mwet Fuhsr

Sel Elder Quentin L. Cook

Ke U luhn Mwet Sap Singucul Luo

Kuht puhlakihn wo muh puhs mukul fuhsr ac muhtwacn fuhsr ac tuyak eis kunohkohn upac se ac muhta na ke inkacnek luhn wuhlweacng ke lohacng yohk nuh sin mwet fuhsr lasr.

Kuloh nuh sum, Prestuhn Nelson, ke kolyuck engan ma ahkkahlwemyeyuck nuh ke mwet loh ke pacptais ac ke inkacnek in kol ma kom siyuck kuht in akacsruhi kac in kahsruh ahkkweye mwet fuhsr ac in kapkapwack muhtahl lalos.

Met liki nga akacsruhi ke ma eklac ingacn, kuht ahkkahlwemye tarilacna pwacye lasr ke ohiyac wowo ma mempucr an oruh ke muhsahiyuckyak ke fahfahlacna ke Fohlohkyak luhn wosasuc. Oacna Prestuhn Nelson el fahk ke yac tari ah, kom eis tari ono vitamin lom an!¹

Kom engan in lutlut ke Fahsruh, Fahsr Tukuk lohm ah.² Kom oacyacpac topuk ke ekyek ke alu uh. Mempucr ke u luhn elder an ac tahmtahel ke Rilif Sosaiti an tuhkweni oruh orekma luhn molwelah.³

Tarilacna lasr uh kahklah.⁴ Kuht tarilacna yohk lah mwet fuhsr lasr uh fahfahlacna in tu na kuh ac oaru.

Mwet fuhsr lasr uh moul ke pacl wo tuhsruhk oacypac upac. Ma sulaclah ma oasr ingena uh arulacna puhslac. Sie mwe srihkasrak: cellphone sasuc pahngpahng smartphone uh oruh kuh in use kahs ma yohk srihpac ac kahs in ahkkweye, weacng sramsram mahtuh ke sucu ac ma suhmuhslah muhtahl. Ke lacpo se sahyac an, ma inge nein lahlfon, elah koluk, ac ma koluk ma tiac fihsrwacsr in oasr ke pacl somlah ah.

In kahsruh mwet fuhsr lasr in forfor ke kain in inkacnek fohs luhn sulaclah an, Alu uh ahkolah mwe kahsruh wowo ac kahlwem tolu. Ma se met, mwe luti uh ahkkweyeyucklac ac tuhtahflah nuh in lohm an. Ahk luo, prokracm luhn tuhlihk ac mwet fuhsr an ituckyang in weacng mukwikwi wo ac kapkapwack luhn sie mwet ma tuh ahkkahlwemyeyuck ke Sacnri tari ah sel Prestuhn Russell M. Nelson, Prestuhn M. Russell Ballard, ac Mwet ke Ohfuhs Fuhlwact an. Mwe kahsruh ahk tolu an pa eklac luhn u an in oruh pisap lasr ac mwet kol sahyac an in lohacng yohk nuh sin mwet fuhsr. Lohacng se inge enenuh in fokoko in nguhn ac kahsruh mwet fuhsr lasr uh in eklac nuh ke un mwet fuhsr fokoko suc Prestuhn Nelson el siyuck elos in eklac oacna.

Pactuhn in Otwot

Srihke yohk inge, tuhkweni wi elos suc ahkkahlwemyeyuck ke yac ekahsr somlah ah, tiac eklac srwenglah se siena. Kais sie eklac uh pa sie ip yohk srihpac ke pactuhn in otwot in ahkinsewowoye Mwet Luhlahlfongi ac ahkoeloslac in ohsun nuh sin God.

Sie ipin pactuhn an luhmweyuck nuh ke fihl se ma kapkapwack inge. Siyuckyuck sin mwet fuhsr lasr an in sifacna liyaclosyang ke matwac srihsrihk—wacngihn ninac pahpah ac mwet kol in liyacacng ma mwet fuhsr uh kuh in oruh nuh selos sifacna.⁵

Mwe Sulkackihnyuck

Misenge kuht sulkackihn ma eklac ke u luhn mwet fuhsr ke ward ac stek an. Oacna ke Prestuhn Nelson el ahkuhtweyac ah, Tahmtahel Bonnie H. Cordon el ac fah sramsramkihn ma eklac ke u luhn muhtwacn fuhsr an oyekuh. Sie srihpen eklac ma ngac sramsramkihn ingena uh pa in ahkfokokoye elos suc sruok Aaronic Pristut, u an, ac prestuhnsi ke u an. Ma eklac inge ahksuwohsye mukwikwi lasr uh nuh ke Doctrine and Covenants 107:15, ma rit fahk muh u luhn pisap an pa prestuhnsi luhn [Aaronic pristut] se inge, ac sruok ki kuh kuh luh ma sepacna inge.

Sie sin kunohkohn ke ma suhmuhslah luhn pisap pa in karihngihn prist an ac in ohsun kahsrwelos, lotwelos ke ma kunaclos ke ohfuhs lalos.⁶ In weacng, mwet in kahsruh se met ke u luhn pisap an oasr kunohkohn lal nuh sin mwet luti an ac mwet in kahsruh ahkluo nuh sin tikin an.

Oacpacna, in suwohs nuh ke fwackyuck se inge ke Doctrine and Covenants, prestuhnsi luhn Mukul Fuhsr ke ward ac wacngihnlac. Tamuhlwel oaru inge oraclah orekma yohk wo, ac kuht ahkkahlwemye kuloh nuh selos.

Finsrak lasr pa u luhn pisap an in kampare ac lohacng yohk nuh ke kunohkohn in pristut luhn mukul fuhsr an ac kahsrwelos ke ma kunaclos ke u an. Mwet in sang kahs in kahsruh ke Mukul Fuhsr an ac fah pahngyak in kahsruh u luhn prestuhnsi ke Aaronic Pristut ac u luhn pisaprik ke ma kunaclos an.⁷ Kuht puhlakihn wo muh puhs mukul fuhsr ac muhtwacn fuhsr ac tuyak eis kunohkohn upac se ac muhta na ke inkacnek luhn wuhlweacng ke srihpen lohacng yohk nuh sin mwet fuhsr lasr.

Ke pactuhn mokleyuck se luhn Leum, ma kunacl pisap in karuhnguhnwacng mwet nuhkwewa ke ward an. El ahkinsewowoye ninac pahpah kiyacn mwet fuhsr ac oacyacpac mwet fuhsr an. Sie pisap el sokwack lah ke el kahsruh sie mukul fuhsr ma tikuclkucl ke petsac koluk, el kuh in kahsruh mukul fuhsr sacnke auliyak lal muhkwena ke el kahsruh ninac pahpah kiyacl in sramsram nuh sel ke luhngse ac kahlwem. Unweyucklac luhn mukul fuhsr se inge unwelah pac sucu lal ah ac ma se inge oreklac wo ke orekma luhn pisap nuh sin sucu sac nohfohn. Mukul fuhsr sac inge el nwacsnwacs fal in sruok Melchizedek Pristut ac full-time misineri se.

Ke srasmsram se inge ahkkahlwemye, ma eklac inge ac fah:

Kahsruh pisap ac mwet in kahsruh lalos an in lohacng nuh ke kunohkohn yohk srihpac lalos nuh sin mwet fuhsr ac U luhn tuhlihk srihsrihk an.
Akiyac kuh ac ma kunacn Aaronic Pristut in yohk srihpac nuh ke moul ac plwacn luhn mukul fuhsr nuhkwewa.

Eklac pac inge:

Ahkyohkye kunohkohn luhn u luhn prestuhsike Aaronic Pristut an ac tahklac luhn mwet in ripohrt nuh ke u luhn pisap.
Moklweack mwet kol mahtuh an in kahsruh ac tuhfahlah u luhn prestuhnsi ke Aaronic Pristut an in ahkfokokoye ac ahkkweye kuh ke ohfuhs lalos an.

Oacna ke sihmihsyucklac, eklac inge tiacna ahksrihkyelah kunohkohn luhn pisaprik nuh sin muhtwacn fuhsr an. Oana ke Prestuhn Nelson el tuh luti ah, “[Pisap el] emet ac ma yohk srihpac se emet an pa in karuhnguhnwacng mukul fuhsr ac muhtwacn fuhsr ke ward lal an.⁸

Pisap sacohk ac kahfofo-upac lasr uh ac oraclah fuhkah kunohkohn se inge? Oacna kom esam, ke yac 2018 u ke Melchizedek Pristut tuh eklac in orekma fototo nuh sin Rilif Sosaiti in oruh u luhn elder ac Rilif Sosaiti an in kuh, ye kohkoh lal pisap, in kahsruh oruh yohk srihpaciyacn kunohkohn ma met eislah pacl yohk lal oruh. Kunohkohn inge weacng orekma luhn misineri ac tempuhl ac orekma ke sramsram mahtuh luhn sucu ke ward⁹—weacng pac inkaiyacn forfor luti nuh sin mempucr ke ward an.

Pisap el tiacna kuh in kihtaclihk kuhtuh kunohkohn lal an, suc pa in ahkkweye mwet fuhsr, in nuhnuhnkuh, karuhnguhnwacng elos suc enenuh, ac liyacacng ip luhn mani ac mwe kahsruh ke ma luhn mahno. Tuhsruhk, ma inge suhpuhs liki ma kuht kahlwem kac ke pacl somlah ah. Oacna ke Elder Jeffrey R. Holland el ahkuhtweyac ke yac somlah ah ke eklac ke u luhn Melchizedek Pristut tuh sulkackihnyuck ah: “Pisap el muhta na, ahok, in pa prist fuhlwact se ma karihngihn ward uh. Tahk sasuc se inge [ke u luhn elder ac Rilif Sosaiti an] enenuh in lwelah elan karihngihn orekma luhn Melchizedek Pristut ac Rilif Sosaiti a tiac enenuh elan oruh orekma luhn kuhtwena sin u ingacn.”¹⁰

In mwe srihkasrak, prestuhn luhn Rilif Sosaiti ac prestuhn ke u luhn elder an, oacna ke srihsrngiyucki, kuh in oruh kahsruh yohk in oruh kahs in kahsruh nuh sin mwet mahtuh—oacna pac prestuhn luhn Muhtwacn Fuhsr in sang kahsruh nuh sin muhtwacn fuhsr. Pisap muhkwena pa kuh in kuhlwacnsap ekihn mwet nuhnuhnkuh se, mwet kol sahyac inge elos kuh pac in eis fwackyuck inkuhsrao me in kahsruh ke ma upac ma tiac enenuh mwet nuhnuhnkuh se kuh ma tuhkuh ke kuhtwena kain in ohiyac in ahkkolukye.¹¹

Tiac kalmac pa muhtwacn fuhsr se el tiac kuh in kuh tiac enenuh in sramsram nuh sin pisap kuh nuh sin ninac ac pahpah tuhmwacl an. Elos in lohacng nuh sin mwet fuhsr! Tuh kalmac pa mwet kol luhn Muhtwacn Fuhsr an sahp pa kuh in oraclah wo emet enenuh luhn muhtwacn fuhsr se. U luhn pisap an fosrngahkihn muhtwacn fuhsr an oacpacna mukul fuhsr an, tuhsruhk kuht akihlen kuh se ma tuhkuh ke oasr mwet kol fokoko, insacnweacng, ac lohacngke mwet kol luhn Muhtwacn Fuhsr suc luhngse ac karihngihn, tiac eislah ma kunacn prestuhnsi ke kuhlahs an, tuhsruhk kahsruh mwet fuhsr an in kuhtanglah ke kunohkohn ingacn.

Tahmtahel Cordon elac akacsruhi ke kuhtuh pac ma eklac wowo nuh sin muhtwacn fuhsr an ofong. Tuh nga sulkackihn lah prestuhn luhn Muhtwacn Fuhsr ke ward an ac inge ripohrt nuh sin ac toeni ke kahsruh wi pisap luhn ward uh. Ke pacl somlah ah, ma pakpucki se inge kuh in ituckyang nuh sin sie mwet in kahsruh, tuhsruhk ingena fahlah, muhtwacn fuhsr an ac fah ma na kunacl suc sruok ki in karihngihn ward uh. Prestuhn luhn Rilif Sosaiti ac fahfahlac na in ripohrt nuh sin pisap.¹²

Ke lacfahl luhn general ac stek an, kuht ac fahfahlac na in oasr prestuhnsi luhn Mukul Fuhsr. Ke lacfahl luhn stek an, sie mwet fuhlwact ac fah prestuhn luhn Mukul Fuhsr¹³ ac fah, wi un mwet fuhlwact ma pakpucki nuh sin Muhtwacn Fuhsr ac U luhn Tuhlihk Srihsrihk an, ac sie ip ke Un Mwet Orekma ke Aaronic Pristut–Muhtwacn Fuhsr luhn stek. Tamuhlwel inge ac orekma wi prestuhnsi luhn Muhtwacn Fuhsr ke stek ke un mwet orekma se inge. Ke sie mwet in kahsruh nuh sin stek prestuhn an ekihn mwet karihngihn miting an, un mwet orekma se inge ac fah yohkwaclihk yohk srihpaciyac mweyen puhslac prokracm ac mukwikwi ke mwe kahsruh sasuc luhn Tuhlihk ac Mwet Fuhsr ac fah oasr ke lacfahl luhn stek.

Un mwet in kahsruh fuhlwact inge, ye kohkoh luhn prestuhnsi ke stek, kuh in kuhlwacnsap oacna sie mwe kahsruh nuh sin pisap ac u luhn Aaronic Pristut ke sie ohiyac ma oacna nuh ke kuhlwacnsap ma utuckuh sin un mwet in kahsruh fuhlwact nuh sin u luhn elder ke ward.

Oacna sie ma kuhpahsr nuh ke ma inge, siepacna mwet in kahsruh fuhlwact ac fah kuhlwacnsap oacna prestuhn luhn Sacnri Skul ke stek, ac fin enenweyuck, el kuh in kuhlwacnsap ke un mwet orekma luhn Aaronic Pristut–Muhtwacn Fuhsr ke stek.¹⁴

Oasr pac eklac ke u sahyac ma ac ahkuhtweyucki ke mwe ahkkahlwem ma ac suhpweyucklac nuh sin mwet kol an. Eklac inge weacng:

Miting luhn un mwet fuhsr orekma ac u luhn pisap ac fah aholyucklac sin un mwet in kahsruh luhn ward.
Kahs se “Sie sin Sie” ac fah tilac orekmakihnyuck ac eklac nuh ke “mukwikwi luhn Muhtwacn Fuhsr,” “mukwikwi ke u luhn Aaronic Pristut,” kuh “mukwikwi luhn mwet fuhsr,” suc ac fah orek ke kais sie wik ke acn ma kuh an.
Mani luhn ward ma pakpucki nuh ke mukwikwi luhn mwet fuhsr an ac fah kihtakwelihk inmahsrlon u luhn mukul fuhsr ac muhtwacn fuhsr an fal nuh ke pihsacn mwet fuhsr ke kais sie u an. Luhpah fal se ac ituckyang nuh ke mukwikwi luhn U luhn Tuhlihk Srihsrihk.
Ke lacfahl nuhkwewa ke—ward, stek, ac ohfuhs luhlahp—ac fah orekmakihn kahs se “u in mwet” liki na in orekmakihn kahs se “u srihsrihk ke alu uh.” Elos suc kol Ohfohs luhlahp ke Rilif Sosaiti, Muhtwacn Fuhsr, Mukul Fuhsr, U luhn Tuhlihk Srihsrihk, ac un in mwet ke Sacnri Skul an ac fah etweyuck muh “Mwet ke Ohfohs Luhlahp.” Elos suc kol u in mwet ke lacfahl luhn ward ac stek an ac fah etweyuck muh “mwet ke ohfohs luhn ward” ac “mwet ke ohfohs luhn stek.”¹⁵

Ma eklac ma sulkackihnyuck misenge an ac muhtwacwacack ke pracns, ward, tistrik, ac stek an ahkolahntuhsruhk enenuh in akwucki ke Jacnweri 1, 2020. Eklac inge, ke toeniyucki ac sang in weacng ma eklac ke pacl met ah, ahol insacnweacng luhn un in mwet in kampare srihke ke ma luhn nguhn in fal nuh ke mwe luti in ahkinsewowoye ac ahkkweye mukul, muhtwacn, mwet fuhsr, ac tuhlihk nuhkwewa, in kahsruh kais sie in fahsr tukun mwe srihkasrak luhn Mwet Lahngo lasr, Jisus Kraist, ke kuht ahkwot na nuh met ke inkacnek luhn wuhlweacng.

Tamuhlwel ac tahmtahel sacohk, nga olwelah ac fahkwack lah eklac kahlwem inge, ye kohkoh luhn prestuhn ac mwet pahluh moklweyuck, Russell M. Nelson, ac fah ahkfokokoye ac ahkkweye mempucr nuhkwewa ke Alu uh. Mwet fuhsr lasr ac yohkwaclihk luhlahlfongi lalos ke Mwet Lahngo, ac karihngihnyuck liki mwe sruhf luhn mwet lokoalok sac, ac tu ahkolah in sun ma upac luh moul uh. Ke ine muhtahl luhn Jisus Kraist, amen.