ຂ່າວສານຕ້ອນຮັບ
ຂໍຕ້ອນຮັບເຂົ້າສູ່ກອງປະຊຸມໃຫຍ່ສາມັນ ແລະ ສູ່ສິດທິພິເສດທີ່ຈະໄດ້ຍິນສຸລະສຽງຂອງພຣະຜູ້ເປັນເຈົ້າ.
ອ້າຍເອື້ອຍນ້ອງ ແລະ ໝູ່ເພື່ອນທີ່ຮັກແພງຂອງຂ້າພະເຈົ້າຕະຫລອດທົ່ວໂລກ, ຂ້າພະເຈົ້າຂໍສະເໜີຕ້ອນຮັບທ່ານເປັນການສ່ວນຕົວສູ່ກອງປະຊຸມໃຫຍ່ສາມັນນີ້. ເຮົາລວມຕົວກັນເປັນຄອບຄົວໃຫຍ່ທົ່ວໂລກດ້ວຍຄວາມປາດຖະໜາທີ່ຈະນະມັດສະການພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ. ຂໍຂອບໃຈທີ່ມາຮ່ວມກັບພວກເຮົາ.
ໃນປີທີ່ຜ່ານມານີ້ເປັນປີໜຶ່ງແຫ່ງການຈົດຈຳ. ບໍ່ແປກໃຈເລີຍທີ່ເຮົາແຕ່ລະຄົນໄດ້ຮຽນຮູ້ໃນສິ່ງທີ່ເຮົາບໍ່ເຄີຍຮູ້ມາກ່ອນ. ບົດຮຽນບາງຢ່າງທີ່ຂ້າພະເຈົ້າຮູ້ຈັກ ມາກ່ອນ ໄດ້ຖືກຂຽນລົງໃນໃຈຂອງຂ້າພະເຈົ້າໃນແນວທາງ ແລະ ການຊີ້ນຳແບບໃໝ່.
ຕົວຢ່າງເຊັ່ນ, ຂ້າພະເຈົ້າ ຮູ້ ຢ່າງແນ່ນອນວ່າ ພຣະຜູ້ເປັນເຈົ້າຊີ້ນຳວຽກງານຂອງສາດສະໜາຈັກຂອງພຣະອົງ. ພຣະອົງໄດ້ກ່າວວ່າ, “ເຮົາຈະສະແດງໃຫ້ [ເຈົ້າ] ເຫັນວ່າ ເຮົາສາມາດທຳງານຂອງເຮົາເອງໄດ້.”1
ຫລາຍຄັ້ງ, ທີ່ປຶກສາຂອງຂ້າພະເຈົ້າ ແລະ ຂ້າພະເຈົ້າໄດ້ເບິ່ງທັງນ້ຳຕາຂະນະທີ່ພຣະອົງໄດ້ໄກ່ເກ່ຍແທນໃນສະຖານະການທີ່ທ້າທາຍທີ່ສຸດ ຫລັງຈາກທີ່ເຮົາໄດ້ເຮັດພາກສ່ວນຂອງເຮົາຈົນສຸດຄວາມສາມາດ ແລະ ໝົດຫົນທາງແລ້ວ. ແນ່ນອນເຮົາເຝົ້າພິສະຫວົງ.
ບັດນີ້ຂ້າພະເຈົ້າເຂົ້າໃຈຫລາຍຂຶ້ນວ່າສິ່ງທີ່ພຣະອົງໝາຍເຖິງແມ່ນຫຍັງເມື່ອພຣະອົງໄດ້ກ່າວວ່າ, “ຈົ່ງເບິ່ງ, ເຮົາຈະເລັ່ງວຽກງານຂອງເຮົາເມື່ອເຖິງເວລາຂອງມັນ.”2 ຂ້າພະເຈົ້າປິຕິຍິນດີຊ້ຳແລ້ວຊ້ຳອີກທີ່ພຣະອົງໄດ້ຊີ້ນຳ ແລະ ດຳເນີນການເລັ່ງວຽກງານຂອງພຣະອົງ—ແມ່ນແຕ່ຊ່ວງໄລຍະຂອງການແຜ່ລະບາດຕະຫລອດທົ່ວໂລກ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຄວາມເຂັ້ມແຂງຂອງສາດສະໜາຈັກແມ່ນຂຶ້ນກັບຄວາມພະຍາຍາມ ແລະ ການເຕີບໂຕໃນປະຈັກພະຍານຂອງສະມາຊິກ. ການປູກຝັງປະຈັກພະຍານທີ່ດີທີ່ສຸດແມ່ນຢູ່ທີ່ບ້ານ. ໃນຊ່ວງປີທີ່ຜ່ານມາ, ຫລາຍ ຄົນໃນພວກທ່ານໄດ້ສຶກສາພຣະກິດຕິຄຸນທີ່ບ້ານຂອງຕົນເພີ່ມຂຶ້ນຢ່າງຫລວງຫລາຍ. ຂ້າພະເຈົ້າຂອບໃຈພວກທ່ານ, ແລະ ລູກໆຂອງພວກທ່ານກໍຈະຂອບໃຈພວກທ່ານເຊັ່ນກັນ.
ໂຄງການໃຫຍ່ໃນການບູລະນະພຣະວິຫານເຊົາເລັກແມ່ນຈະດຳເນີນຕໍ່ໄປ. ຈາກຫ້ອງການຂອງຂ້າພະເຈົ້າ, ຂ້າພະເຈົ້າມີຕັ່ງແຖວໜ້າສຸດໃນການດູແລວຽກງານທີ່ກຳລັງດຳເນີນຢູ່ທີ່ລານພຣະວິຫານ.
ຂະນະທີ່ຂ້າພະເຈົ້າແນມເບິ່ງຄົນງານຂຸດເອົາຮາກຕົ້ນໄມ້ເກົ່າ, ທໍ່ນ້ຳ, ສາຍໄຟ, ແລະ ຖານນ້ຳພຸທີ່ຮົ່ວໄຫລ ອອກມາ, ຂ້າພະເຈົ້າໄດ້ຄິດກ່ຽວກັບຊາກເສດເຫລືອເກົ່າໆທີ່ເຮົາແຕ່ລະຄົນຈຳເປັນຕ້ອງກຳຈັດອອກຈາກຊີວິດຂອງເຮົາ ດ້ວຍຄວາມຊ່ວຍເຫລືອຈາກພຣະຜູ້ຊ່ວຍໃຫ້ລອດ.
ພຣະກິດຕິຄຸນຂອງພຣະເຢຊູຄຣິດ ເປັນ ພຣະກິດຕິຄຸນຂອງການກັບໃຈ.3 ຍ້ອນການຊົດໃຊ້ຂອງພຣະຜູ້ຊ່ວຍໃຫ້ລອດ, ພຣະກິດຕິຄຸນຂອງພຣະອົງຈຶ່ງໄດ້ເຊື້ອເຊີນໃຫ້ສືບຕໍ່ປ່ຽນແປງ, ເຕີບໂຕ, ແລະ ກາຍເປັນຄົນບໍລິສຸດຫລາຍຂຶ້ນ. ມັນແມ່ນພຣະກິດຕິຄຸນແຫ່ງຄວາມຫວັງ, ແຫ່ງການປິ່ນປົວ, ແລະ ແຫ່ງການກ້າວໜ້າ. ດັ່ງນັ້ນ, ພຣະກິດຕິຄຸນ ຄືຂ່າວສານແຫ່ງ ຄວາມສຸກ! ຈິດວິນຍານຂອງເຮົາປິຕິຍິນດີກັບທຸກໆບາດກ້າວນ້ອຍໆທີ່ເຮົາກ້າວໄປຂ້າງໜ້າ.
ພາກສ່ວນໜຶ່ງຂອງການເຕົ້າໂຮມອິດສະຣາເອນ, ແລະ ເປັນພາກສ່ວນທີ່ສຳຄັນຫລາຍ, ຄືເຮົາຖືກບັນຊາໃຫ້ເປັນຄົນທີ່ ມີຄ່າຄວນ ແລະ ເຕັມໃຈ ທີ່ຈະຊ່ວຍກະກຽມໂລກສຳລັບການສະເດັດມາຄັ້ງທີສອງຂອງພຣະຜູ້ເປັນເຈົ້າ.
ຂະນະທີ່ເຮົາຟັງຂ່າວສານທີ່ໄດ້ກຽມພ້ອມຢ່າງລະອຽດໂດຍຜູ້ນຳຂອງເຮົາ ພາຍໃຕ້ການຊີ້ນຳຂອງພຣະວິນຍານບໍລິສຸດ, ຂ້າພະເຈົ້າຂໍເຊື້ອເຊີນທ່ານໃຫ້ອະທິຖານ ເພື່ອລະບຸຊາກເສດເຫລືອຕ່າງໆທີ່ທ່ານຄວນເອົາອອກໄປຈາກຊີວິດຂອງທ່ານ ເພື່ອວ່າທ່ານຈະສາມາດມີຄ່າຄວນຫລາຍຂຶ້ນ.
ຂ້າພະເຈົ້າຮັກທ່ານ, ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ແລະ ເປັນພະຍານວ່າພຣະບິດາເທິງສະຫວັນຂອງເຮົາ ແລະ ພຣະບຸດທີ່ຮັກຂອງພຣະອົງຮູ້ຈັກ ແລະ ຮັກເຮົາແຕ່ລະຄົນ. ພວກພຣະອົງພ້ອມສະເໝີທີ່ຈະຊ່ວຍເຫລືອທ່ານ ໃນທຸກບາດກ້າວຂອງທ່ານ. ຂໍຕ້ອນຮັບເຂົ້າສູ່ກອງປະຊຸມໃຫຍ່ສາມັນ ແລະ ສູ່ສິດທິພິເສດທີ່ຈະໄດ້ຍິນສຸລະສຽງຂອງພຣະຜູ້ເປັນເຈົ້າ. ໃນພຣະນາມຂອງພຣະເຢຊູຄຣິດ, ອາແມນ.