ສິ່ງທີ່ເຮົາກຳລັງຮຽນຮູ້ ແລະ ຈະບໍ່ເຄີຍລືມ

ໂດຍ ປະທານຣະໂຊ ເອັມ ແນວສັນ

ປະທານຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ

ຖ້າຫາກທ່ານເບິ່ງຊີວິດຂອງທ່ານດ້ວຍການອະທິຖານ, ຂ້າພະເຈົ້າເຊື່ອວ່າ ທ່ານຈະເຫັນຫລາຍວິທີທາງ ຊຶ່ງໃນນັ້ນພຣະຜູ້ເປັນເຈົ້າໄດ້ນຳພາທ່ານຜ່ານຜ່າເວລາທີ່ຫຍຸ້ງຍາກນີ້.

ອ້າຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າໄດ້ລໍຖ້າການມາຮ່ວມກອງປະຊຸມທາງອອນລາຍຄັ້ງນີ້ກັບພວກທ່ານ. ເທື່ອສຸດທ້າຍທີ່ພວກເຮົາໄດ້ຈັດກອງປະຊຸມໃຫຍ່ສາມັນພາກຖານະປະໂລຫິດທີ່ຜ່ານມາ ແມ່ນເດືອນເມສາ ປີ 2019. ຫລາຍສິ່ງຫລາຍຢ່າງໄດ້ເກີດຂຶ້ນໃນໄລຍະສອງປີທີ່ຜ່ານມານີ້! ພວກທ່ານບາງຄົນໄດ້ສູນເສຍຄົນຮັກໄປ. ບາງຄົນກໍເສຍການງານ, ເສຍການທຳມາຫາກິນ, ຫລື ເສຍສຸຂະພາບ. ຍັງມີບາງຄົນທີ່ເສຍຄວາມຮູ້ສຶກສະຫງົບ ຫລື ຄວາມຫວັງສຳລັບອະນາຄົດ. ຂ້າພະເຈົ້າກໍເຫັນໃຈທ່ານແຕ່ລະຄົນທີ່ໄດ້ຮັບທຸກທໍລະມານກັບສິ່ງເຫລົ່ານີ້ ຫລື ການສູນເສຍຢ່າງອື່ນໆ. ຂ້າພະເຈົ້າອະທິຖານຕະຫລອດເວລາຂໍໃຫ້ພຣະຜູ້ເປັນເຈົ້າປອບໂຍນທ່ານ. ຂະນະທີ່ທ່ານໃຫ້ພຣະເຈົ້າໄຊຊະນະໃນຊີວິດຂອງທ່ານ, ຂ້າພະເຈົ້າຮູ້ວ່າ ພຣະອົງກໍຄິດໃນແງ່ດີຄືກັນກ່ຽວກັບອະນາຄົດຂອງທ່ານ ຄືກັນກັບທີ່ຜ່ານມາ.

ໃນທ່າມກາງ ການສູນເສຍ ທີ່ເຮົາໄດ້ປະເຊີນ, ກໍມີບາງສິ່ງທີ່ເຮົາໄດ້ ພົບເຫັນ. ບາງຄົນໄດ້ພົບເຫັນສັດທາຢ່າງເລິກເຊິ່ງໃນພຣະບິດາເທິງສະຫວັນຂອງເຮົາ ແລະ ພຣະບຸດຂອງພຣະອົງ, ພຣະເຢຊູຄຣິດ. ຫລາຍຄົນກໍໄດ້ພົບເຫັນທັດສະນະຢ່າງໃໝ່ຂອງຊີວິດ—ແມ່ນແຕ່ທັດສະນະນິລັນດອນ. ທ່ານອາດພົບເຫັນຄວາມສຳພັນທີ່ເຂັ້ມແຂງຫລາຍຂຶ້ນ ກັບຄົນທີ່ທ່ານຮັກ ແລະ ກັບພຣະຜູ້ເປັນເຈົ້າ. ຂ້າພະເຈົ້າຫວັງວ່າທ່ານໄດ້ພົບເຫັນຄວາມສາມາດເພີ່ມເຕີມ ທີ່ຈະ ຟັງພຣະອົງ ແລະ ຮັບເອົາການເປີດເຜີຍສ່ວນຕົວ. ການທົດລອງທີ່ຫຍຸ້ງຍາກມັກຈະໃຫ້ໂອກາດໃນການເຕີບໂຕ ຊຶ່ງບໍ່ສາມາດຫາໄດ້ໃນທາງອື່ນ.

ໃຫ້ຫວນຄິດເບິ່ງໄລຍະສອງປີທີ່ຜ່ານມາ. ທ່ານໄດ້ເຕີບໂຕແນວໃດ? ທ່ານໄດ້ຮຽນຮູ້ຫຍັງແດ່? ທຳອິດທ່ານອາດຄິດຢາກກັບຄືນໄປຫາປີ 2019 ແລະ ຢູ່ໃນປີນັ້ນ! ແຕ່ຖ້າຫາກທ່ານເບິ່ງຊີວິດຂອງທ່ານດ້ວຍການອະທິຖານ, ຂ້າພະເຈົ້າເຊື່ອວ່າ ທ່ານຈະເຫັນຫລາຍວິທີທາງ ຊຶ່ງໃນນັ້ນພຣະຜູ້ເປັນເຈົ້າໄດ້ນຳພາທ່ານຜ່ານຜ່າເວລາທີ່ຫຍຸ້ງຍາກ, ຊ່ວຍທ່ານໃຫ້ກາຍເປັນຜູ້ຊາຍທີ່ອຸທິດຕົນ ແລະ ເຫລື້ອມໃສຫລາຍຂຶ້ນ—ເປັນຊາຍທີ່ແທ້ຈິງຂອງພຣະເຈົ້າ.

ຂ້າພະເຈົ້າຮູ້ວ່າພຣະຜູ້ເປັນເຈົ້າມີແຜນອັນຍິ່ງໃຫຍ່ ແລະ ໜ້າອັດສະຈັນສຳລັບເຮົາ—ເປັນບຸກຄົນ ແລະ ເປັນກຸ່ມໃຫຍ່. ດ້ວຍຄວາມເຫັນອົກເຫັນໃຈ ແລະ ດ້ວຍຄວາມອົດທົນ, ພຣະອົງກ່າວວ່າ:

“ເຈົ້າເປັນເດັກນ້ອຍໆ, ແລະ ເຈົ້າຍັງບໍ່ເຂົ້າໃຈພອນອັນຍິ່ງໃຫຍ່ທີ່ພຣະບິດາມີ … ຕຽມໄວ້ໃຫ້ເຈົ້າເທື່ອ;

“ແລະ ເຈົ້າບໍ່ສາມາດທົນກັບທຸກສິ່ງທັງປວງໄດ້ໃນຕອນນີ້; ເຖິງຢ່າງໃດກໍຕາມ, ຈົ່ງເບີກບານເຖີດ, ເພາະເຮົາຈະນຳພາເຈົ້າໄປ.”¹

ອ້າຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າເປັນພະຍານວ່າ ພຣະອົງໄດ້, ແລະ ກຳລັງ, ນຳພາເຮົາໄປຢ່າງແນ່ນອນ, ຂະນະທີ່ເຮົາສະແຫວງຫາທີ່ຈະຟັງພຣະອົງ. ພຣະອົງປະສົງໃຫ້ເຮົາເຕີບໂຕ ແລະ ຮຽນຮູ້, ແມ່ນແຕ່ຜ່ານທາງ—ບາງທີ ໂດຍສະເພາະ ຜ່ານທາງ—ຄວາມຍາກລຳບາກ.

ຄວາມຍາກລຳບາກເປັນນາຍຄູທີ່ດີເລີດ. ທ່ານ ໄດ້ຮຽນຮູ້ຫຍັງແດ່ໃນໄລຍະສອງປີທີ່ຜ່ານມາ ຊຶ່ງທ່ານຢາກຈື່ຈຳຕະຫລອດໄປ? ຄຳຕອບຂອງທ່ານຈະແມ່ນສະເພາະສຳລັບທ່ານ, ແຕ່ຂ້າພະເຈົ້າຂໍແນະນຳບົດຮຽນສີ່ຢ່າງ ທີ່ຂ້າພະເຈົ້າຫວັງວ່າເຮົາທຸກຄົນຈະຮຽນຮູ້ ແລະ ຈະບໍ່ເຄີຍລົມ.

ບົດຮຽນທີ 1: ບ້ານເຮືອນເປັນສູງກາງແຫ່ງສັດທາ ແລະ ການນະມັດສະການ

ສ່ວນຫລາຍແລ້ວເມື່ອພຣະຜູ້ເປັນເຈົ້າເຕືອນເຮົາເຖິງວັນເວລາທີ່ຫຍຸ້ງຍາກ, ພຣະອົງແນະນຳດັ່ງນີ້: “ຈົ່ງຢືນຢູ່ໃນສະຖານທີ່ສັກສິດ, ແລະ ບໍ່ຫວັ່ນໄຫວ.”² ແນ່ນອນ “ສະຖານທີ່ສັກສິດ” ເຫລົ່ານີ້ແມ່ນລວມທັງພຣະວິຫານ ແລະ ຕຶກໂບດຂອງພຣະຜູ້ເປັນເຈົ້າ. ແຕ່ເມື່ອການໄປເຕົ້າໂຮມກັນຢູ່ໃນສະຖານທີ່ເຫລົ່ານີ້ຖືກຈຳກັດໃນຫລາຍລະດັບ, ພວກເຮົາຈຶ່ງຮຽນຮູ້ວ່າ ສະຖານທີ່ສັກສິດທີ່ສຸດຢູ່ໃນໂລກນີ້ແມ່ນບ້ານເຮືອນ—ແມ່ນແລ້ວ, ແມ່ນແຕ່ບ້ານເຮືອນ ຂອງທ່ານ.

ອ້າຍນ້ອງທັງຫລາຍ, ທ່ານດຳລົງຖານະປະໂລຫິດຂອງພຣະເຈົ້າ. “ສິດຂອງຖານະປະໂລຫິດກ່ຽວຂ້ອງກັບອຳນາດແຫ່ງສະຫວັນຢ່າງແຍກກັນບໍ່ໄດ້.”³ ທ່ານ ແລະ ຄອບຄົວຂອງທ່ານໄດ້ຮັບພິທີການຂອງຖານະປະໂລຫິດ. ມັນແມ່ນ “ໃນພິທີການດັ່ງກ່າວ, ອຳນາດຂອງຄວາມເປັນເໝືອນພຣະເຈົ້າຈະສະແດງໃຫ້ປະຈັກ.”⁴ ອຳນາດນັ້ນມີໃຫ້ທ່ານ ແລະ ຄອບຄົວຂອງທ່ານ ໃນບ້ານເຮືອນຂອງທ່ານເອງ ຂະນະທີ່ທ່ານຮັກສາພັນທະສັນຍາທີ່ທ່ານໄດ້ເຮັດ.⁵

ພຽງແຕ່ 185 ປີຜ່ານມານີ້, ຊຶ່ງກົງກັບມື້ດຽວກັນນີ້, ວັນທີ 3 ເດືອນເມສາ, 1836, ເອລີຢາໄດ້ຟື້ນຟູຂໍກະແຈຂອງຖານະປະໂລຫິດທີ່ອະນຸຍາດໃຫ້ຄອບຄົວຂອງເຮົາຜະນຶກເຂົ້າກັນຕະຫລອດໄປ. ນັ້ນຄືເຫດຜົນທີ່ມີຄວາມຮູ້ສຶກດີໃນການປະຕິບັດສິນລະລຶກຢູ່ໃນບ້ານຂອງທ່ານ. ທ່ານຄິດວ່າມັນມີຜົນກະທົບຕໍ່ສະມາຊິກໃນຄອບຄົວຂອງທ່ານແນວໃດ ທີ່ໄດ້ເຫັນທ່ານ—ພໍ່ຂອງພວກເຂົາ, ພໍ່ຕູ້, ສາມີ, ລູກຊາຍ, ອ້າຍ, ຫລື ນ້ອງຊາຍ—ປະຕິບັດພິທີການສັກສິດນີ້? ທ່ານຈະເຮັດຫຍັງເພື່ອຮັກສາຄວາມຮູ້ສຶກທີ່ສັກສິດນັ້ນໄວ້ໃນຄອບຄົວຂອງທ່ານ?

ທ່ານອາດຮູ້ສຶກວ່າ ມັນຍັງມີຫລາຍສິ່ງຫລາຍຢ່າງທີ່ທ່ານຕ້ອງເຮັດ ເພື່ອເຮັດໃຫ້ບ້ານເຮືອນຂອງທ່ານເປັນສະຖານທີ່ສັກສິດແຫ່ງສັດທາ. ຖ້າເປັນເຊັ່ນນັ້ນ, ກໍຂໍໃຫ້ເຮັດຕໍ່ໄປ! ຖ້າຫາກທ່ານແຕ່ງງານແລ້ວ, ຈົ່ງປຶກສາກັບພັນລະຍາຂອງທ່ານ ໃນຖານະຫຸ້ນສ່ວນທີ່ເທົ່າທຽມກັນ ໃນວຽກງານທີ່ສຳຄັນນີ້. ມີສອງສາມຢ່າງທີ່ສຳຄັນຫລາຍໄປກວ່ານີ້. ຈາກເວລານີ້ຈົນເຖິງເວລາທີ່ພຣະຜູ້ເປັນເຈົ້າສະເດັດມາອີກຄັ້ງ, ເຮົາທຸກຄົນຕ້ອງເຮັດໃຫ້ບ້ານເຮືອນຂອງເຮົາເປັນສະຖານທີ່ງຽບສະຫງົບ ແລະ ປອດໄພ.⁶

ທັດສະນະຄະຕິ ແລະ ການກະທຳທີ່ເຊື້ອເຊີນພຣະວິນຍານຈະເພີ່ມຄວາມສັກສິດໃຫ້ແກ່ບ້ານເຮືອນຂອງທ່ານ. ເຊັ່ນດຽວກັນນີ້ ຄວາມສັກສິດຈະໝົດໄປ ຖ້າຫາກມີການກະທຳ ຫລື ບັນຍາກາດໃດທີ່ຂັດກັບພຣະວິນຍານບໍລິສຸດ, ເພາະວ່າ ຈາກນັ້ນ “ສະຫວັນຈະຖອນຕົວ.”⁷

ທ່ານເຄີຍສົງໄສບໍວ່າ ເປັນຫຍັງພຣະຜູ້ເປັນເຈົ້າຈຶ່ງປະສົງໃຫ້ເຮົາເຮັດໃຫ້ບ້ານເຮືອນຂອງເຮົາເປັນສູນກາງການຮຽນຮູ້ພຣະກິດຕິຄຸນ ແລະ ການດຳລົງຊີວິດຕາມພຣະກິດຕິຄຸນ? ມັນບໍ່ພຽງແຕ່ເປັນການກະກຽມຕົວເຮົາ, ແລະ ຊ່ວຍເຮົາຜ່ານຜ່າ, ການແຜ່ລະບາດເທົ່ານັ້ນ. ໃນທີ່ສຸດຂໍ້ບັງຄັບເລື່ອງການເຕົ້າໂຮມກັນກໍຈະສິ້ນສຸດລົງ. ເຖິງຢ່າງໃດກໍຕາມ, ຄຳສັນຍາຂອງທ່ານທີ່ຈະເຮັດໃຫ້ບ້ານເຮືອນຂອງທ່ານເປັນສະຖານທີ່ສັກສິດ ບ່ອນທຳອິດ ແຫ່ງສັດທາ ຄວນ ບໍ່ເຄີຍ ສິ້ນສຸດລົງ. ຂະນະທີ່ສັດທາ ແລະ ຄວາມບໍລິສຸດນັບມື້ນັບມີໜ້ອຍລົງຢູ່ໃນໂລກທີ່ເຊື່ອມໂຊມນີ້, ທ່ານຈະຢາກມີສະຖານທີ່ສັກສິດຫລາຍຂຶ້ນກວ່າເກົ່າ. ຂ້າພະເຈົ້າຂໍຊຸກຍູ້ທ່ານໃຫ້ສືບຕໍ່ເຮັດໃຫ້ບ້ານເຮືອນຂອງທ່ານເປັນສະຖານທີ່ສັກສິດແທ້ໆ “ແລະ ບໍ່ຫວັ່ນໄຫວ”⁸ ຈາກເປົ້າໝາຍທີ່ສຳຄັນຍິ່ງນັ້ນ.

ບົດຮຽນທີ 2: ເຮົາຕ້ອງການກັນແລະກັນ

ພຣະເຈົ້າປະສົງໃຫ້ເຮົາເຮັດວຽກນຳກັນ ແລະ ຊ່ວຍກັນແລະກັນ. ນັ້ນຄືເຫດຜົນທີ່ພຣະອົງໄດ້ສົ່ງເຮົາມາສູ່ໂລກໃນຄອບຄົວ ແລະ ຈັດເຮົາໄວ້ໃນຫວອດ ແລະ ສະເຕກ. ນັນຄືເຫດຜົນທີ່ພຣະອົງຂໍໃຫ້ເຮົາຮັບໃຊ້ ແລະ ປະຕິບັດສາດສະໜາກິດຕໍ່ກັນແລະກັນ. ນັ້ນຄືເຫດຜົນທີ່ພຣະອົງຂໍໃຫ້ເຮົາດຳລົງຊີວິດ ຢູ່ໃນ ໂລກ ແຕ່ບໍ່ໃຫ້ເປັນ ຂອງ ໂລກ.⁹ ເຮົາສາມາດສຳເລັດສິ່ງຕ່າງໆນຳກັນໄດ້ຫລາຍກວ່າທີ່ເຮົາເຮັດຄົນດຽວ.¹⁰ ແຜນແຫ່ງຄວາມສຸກຂອງພຣະເຈົ້າຈະບໍ່ປະສົບຄວາມສຳເລັດ ຖ້າຫາກລູກໆຂອງພຣະອົງແຍກຕົວອອກຈາກກັນ.

ການແຜ່ລະບາດເມື່ອບໍ່ດົນມານີ້ແມ່ນແຕກຕ່າງ ຊຶ່ງມັນໄດ້ມີຜົນກະທົບຕໍ່ທຸກຄົນຢູ່ໃນໂລກ ໃນເວລາດຽວກັນ. ຂະນະທີ່ບາງຄົນໄດ້ຮັບທຸກທໍລະມານຫລາຍກວ່າຄົນອື່ນໆ, ເຮົາທຸກຄົນໄດ້ປ່ຽນໄປໃນທາງໃດທາງໜຶ່ງ. ຍ້ອນສິ່ງນີ້, ການທົດລອງແບບດຽວກັນຂອງເຮົາທັງຫລາຍ ມີຄວາມເປັນໄປໄດ້ວ່າ ມັນໄດ້ຊ່ວຍໃຫ້ລູກໆຂອງພຣະເຈົ້າເປັນນ້ຳໜຶ່ງໃຈດຽວກັນ ດັ່ງທີ່ບໍ່ເຄີຍເປັນມາກ່ອນ. ສະນັ້ນ, ຂ້າພະເຈົ້າຈະຖາມວ່າ, ການທົດລອງທີ່ໄດ້ຮັບນຳກັນນີ້ ຊ່ວຍທ່ານໃຫ້ເຂົ້າໃກ້ຊິດກັບເພື່ອນບ້ານຂອງທ່ານບໍ—ກັບອ້າຍເອື້ອຍນ້ອງຢູ່ຟາກທາງ ແລະ ຕະຫລອດທົ່ວໂລກບໍ?

ກ່ຽວກັບເລື່ອງນີ້, ພຣະບັນຍັດສອງຂໍ້ໃຫຍ່ສາມາດນຳພາເຮົາ: ຂໍ້ທຳອິດ, ໃຫ້ຮັກພຣະເຈົ້າ ແລະ, ຂໍ້ທີສອງ, ໃຫ້ຮັກເພື່ອນບ້ານຂອງເຮົາ.¹¹ ເຮົາສະແດງຄວາມຮັກຂອງເຮົາໂດຍການຮັບໃຊ້.

ຖ້າຫາກທ່ານຮູ້ເຖິງບາງຄົນຜູ້ໂດດດ່ຽວ, ຈົ່ງເອື້ອມອອກໄປ—ແມ່ນແຕ່ຖ້າຫາກທ່ານຮູ້ສຶກໂດດດ່ຽວກໍຕາມ! ທ່ານບໍ່ຈຳເປັນຕ້ອງມີເຫດຜົນ ຫລື ມີຂ່າວສານ ຫລື ມີທຸລະ ເພື່ອຕິດຕໍ່ຫາ. ພຽງເວົ້າວ່າ ສະບາຍດີ ແລະ ສະແດງຄວາມຮັກຂອງທ່ານ. ເທັກໂນໂລຈີສາມາດຊ່ວຍທ່ານໄດ້. ການແຜ່ລະບາດ ຫລື ບໍ່ລະບາດ, ລູກທີ່ມີຄ່າຂອງພຣະເຈົ້າແຕ່ລະຄົນກໍຢາກຮູ້ວ່າເຂົາບໍ່ໄດ້ຢູ່ຄົນດຽວ!

ບົດຮຽນທີ 3: ກຸ່ມຖານະປະໂລຫິດຂອງທ່ານມີຄວາມໝາຍຫລາຍກວ່າພຽງແຕ່ການປະຊຸມກັນເທົ່ານັ້ນ

ໃນລະຫວ່າງການແຜ່ລະບາດ, ການປະຊຸມກຸ່ມໃນວັນອາທິດໄດ້ຖືກຍົກເລີກຊົ່ວໄລຍະໜຶ່ງ. ປະຈຸບັນນີ້ ບາງກຸ່ມກໍໄດ້ປະຊຸມກັນທາງອອນລາຍ. ເຖິງຢ່າງໃດກໍຕາມ, ວຽກງານທີ່ພຣະຜູ້ເປັນເຈົ້າໄດ້ມອບໃຫ້ກຸ່ມຖານະປະໂລຫິດ ບໍ່ໄດ້ມີເຈດຕະນາໃຫ້ເກີດຂຶ້ນພຽງແຕ່ໃນເວລາປະຊຸມກັນເທົ່ານັ້ນ. ການປະຊຸມເປັນພຽງພາກສ່ວນນ້ອຍໜຶ່ງຂອງຄວາມໝາຍຂອງກຸ່ມ ແລະ ສິ່ງທີ່ກຸ່ມສາມາດເຮັດໄດ້.

ອ້າຍນ້ອງໃນຖານະປະໂລຫິດແຫ່ງອາໂຣນ ແລະ ກຸ່ມແອວເດີທັງຫລາຍ, ຈົ່ງຂະຫຍາຍວິໄສທັດຂອງທ່ານ ວ່າເປັນຫຍັງເຮົາຈຶ່ງມີກຸ່ມ. ພຣະຜູ້ເປັນເຈົ້າປະສົງໃຫ້ທ່ານໃຊ້ກຸ່ມຂອງທ່ານເຮັດຫຍັງ ເພື່ອບັນລຸວຽກງານຂອງພຣະອົງ—ໃນເວລານີ້? ຈົ່ງສະແຫວງຫາການເປີດເຜີຍຈາກພຣະຜູ້ເປັນເຈົ້າ. ຈົ່ງຖ່ອມຕົວ! ຈົ່ງໝັ່ນຂໍ! ຈົ່ງໝັ່ນຟັງ! ຖ້າຫາກທ່ານໄດ້ຖືກເອີ້ນໃຫ້ນຳພາ, ຈົ່ງປຶກສາກັນໃນຝ່າຍປະທານ ແລະ ກັບສະມາຊິກໃນກຸ່ມ. ບໍ່ວ່າຕຳແໜ່ງ ຫລື ການເອີ້ນໃນຖານະປະໂລຫິດຂອງທ່ານຈະເປັນສິ່ງໃດກໍຕາມ, ຈົ່ງໃຫ້ພຣະເຈົ້າໄຊຊະນະໃນຄຳໝັ້ນສັນຍາຂອງທ່ານ ໃນຖານະສະມາຊິກຂອງກຸ່ມທ່ານ ແລະ ໃນການຮັບໃຊ້ຂອງທ່ານ. ຈົ່ງປະສົບຄວາມສຸກກັບຄວາມຊອບທຳທີ່ທ່ານຈະເຮັດໃຫ້ບັງເກີດຂຶ້ນ ຂະນະທີ່ທ່ານ “ກະຕືລືລົ້ນໃນອຸດົມການດີ.”¹² ກຸ່ມຖານະປະໂລຫິດຢູ່ໃນຖານະພິເສດ ເພື່ອເລັ່ງການເຕົ້າໂຮມອິດສະຣາເອນຢູ່ທັງສອງຟາກມ່ານໃຫ້ໄວຂຶ້ນກວ່າເກົ່າ.

ບົດຮຽນທີ 4: ເຮົາຟັງພຣະເຢຊູຄຣິດໄດ້ດີຂຶ້ນເມື່ອເຮົາສະຫງົບງຽບ

ເຮົາມີຊີວິດຢູ່ໃນວັນເວລາທີ່ໄດ້ຖືກທຳນາຍໄວ້ດົນນານມາແລ້ວ, ເມື່ອ “ທຸກສິ່ງທັງປວງຈະຢູ່ໃນຄວາມສັບສົນວຸ້ນວາຍ; ແລະ ແນ່ນອນ, ໃຈຂອງມະນຸດຈະທໍ້ຖອຍ; ເພາະຄວາມຢ້ານກົວຈະມາສູ່ທຸກຄົນ.”¹³ ນັ້ນເປັນຄວາມຈິງກ່ອນການແຜ່ລະບາດ, ແລະ ຈະເປັນຄວາມຈິງຫລັງຈາກນັ້ນ. ຄວາມວຸ້ນວາຍຢູ່ໃນໂລກຈະເພີ່ມທະວີຫລາຍຂຶ້ນກວ່າເກົ່າ. ກົງກັນຂ້າມ, ສຸລະສຽງຂອງພຣະຜູ້ເປັນເຈົ້າຈະບໍ່ “ແມ່ນສຽງກຶກກ້ອງ, ແຕ່ … ມັນ [ເປັນ] ສຽງອ່ອນຫວານຂອງຄວາມນິ້ມນວນຢ່າງແຈ່ມແຈ້ງ, [ຄ້າຍຄືກັບວ່າເປັນ] ສຽງສື່ມໃສ່ຫູ, ແລະ ມັນໄດ້ສຽບແທງເຂົ້າໄປໃນຈິດວິນຍານທຸກດວງ.”¹⁴ ກ່ອນຈະໄດ້ຍິນສຽງແຜ່ວເບົານີ້, ທ່ານຕ້ອງສະຫງົບງຽບ!¹⁵

ໃນຊົ່ວໄລຍະໜຶ່ງ, ການແຜ່ລະບາດໄດ້ຍົກເລີກກິດຈະກຳຕ່າງໆ ຊຶ່ງຕາມປົກກະຕິແລ້ວ ຈະເຮັດໃຫ້ເຮົາຫຍຸ້ງຕະຫລອດທັງວັນ. ບໍ່ດົນເຮົາຈະສາມາດເລືອກເອົາມາໃສ່ເວລາວ່າງຂອງເຮົາຄືນອີກ ພ້ອມກັບສຽງດັງ ແລະ ຄວາມວຸ້ນວາຍຂອງໂລກ. ຫລື ເຮົາສາມາດໃຊ້ເວລາເພື່ອຟັງສຸລະສຽງຂອງພຣະຜູ້ເປັນເຈົ້າ ກ່າວການນຳພາ, ການປອບໂຍນ, ແລະ ສັນຕິສຸກກັບເຮົາ. ເວລາທີ່ງຽບສະຫງົບເປັນເວລາທີ່ສັກສິດ—ເປັນເວລາທີ່ຈະໄດ້ຮັບການເປີດເຜີຍສ່ວນຕົວ ແລະ ມີຄວາມສະຫງົບພາຍໃນ.

ຈົ່ງຮູ້ຈັກບັງຄັບຕົວເອງ ເພື່ອໃຫ້ມີເວລາຢູ່ຕາມລຳພັງ ແລະ ຢູ່ກັບຄົນທີ່ທ່ານຮັກ. ໃຫ້ເປີດໃຈກັບພຣະເຈົ້າໃນການອະທິຖານ. ໃຊ້ເວລາເອົາຕົວເຂົ້າຫາພຣະຄຳພີ ແລະ ນະມັດສະການຢູ່ໃນພຣະວິຫານ.

ອ້າຍນ້ອງທີ່ຮັກແພງຂອງຂ້າພະເຈົ້າ, ມີຫລາຍສິ່ງທີ່ພຣະຜູ້ເປັນເຈົ້າປະສົງໃຫ້ເຮົາຮຽນຮູ້ຈາກປະສົບການລະຫວ່າງການແຜ່ລະບາດນີ້. ຂ້າພະເຈົ້າພຽງແຕ່ກ່າວເຖິງສີ່ຢ່າງເທົ່ານັ້ນ. ຂ້າພະເຈົ້າເຊື້ອເຊີນທ່ານໃຫ້ເຮັດລາຍການເອງ, ໃຫ້ພິຈາລະນາມັນຢ່າງຖີ່ຖ້ວນ, ແລະ ແບ່ງປັນມັນໃຫ້ກັບຄົນທີ່ທ່ານຮັກ.

ອະນາຄົດແມ່ນແຈ່ມໃສສຳລັບຜູ້ຄົນທີ່ຮັກສາພັນທະສັນຍາຂອງພຣະເຈົ້າ.¹⁶ ພຣະຜູ້ເປັນເຈົ້າຈະເອີ້ນຜູ້ຮັບໃຊ້ຂອງພຣະອົງຫລາຍຕື່ມອີກ ຜູ້ທີ່ມີຄ່າຄວນໃນການດຳລົງຖານະປະໂລຫິດ ເພື່ອໃຫ້ພອນ, ປອບໂຍນ, ແລະ ເພີ່ມຄວາມເຂັ້ມແຂງໃຫ້ແກ່ມວນມະນຸດ ແລະ ຊ່ວຍກະກຽມໂລກ ແລະ ຜູ້ຄົນໃນນັ້ນສຳລັບການສະເດັດມາຄັ້ງທີສອງຂອງພຣະອົງ. ມັນສົມຄວນທີ່ເຮົາແຕ່ລະຄົນຈະເໝາະສົມກັບພິທີການສັກສິດ ທີ່ເຮົາໄດ້ຮັບ. ເຮົາສາມາດເຮັດໄດ້! ຂ້າພະເຈົ້າເປັນພະຍານ, ດ້ວຍການສະແດງຄວາມຮັກຕໍ່ທ່ານທັງຫລາຍ, ອ້າຍນ້ອງທີ່ຮັກແພງຂອງຂ້າພະເຈົ້າ, ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.