Egueropu’aka pe ára Cristo-pe
Jesucristo ojapo ikatu hag̃ua “jagueropu’aka pe ára.”
Ha’ékuri peteĩ ára henyhẽva umi parávola dirécto ha omyesakãva, porandukuéra ijetu’úva ha doctrina ipypukúva. Oja’o mbarete rire umi ojoguáva “omanova’ekue ñeñotỹha morotĩme, pe ijapéguio iporãva, ha hyepýpe katu henyhẽ te’õngue kanguekuégui ha opaite mba’e ky’águi,”1 Jesús ombo’eve mbohapy parávola preparación espiritual ha discipuládo reheguáva. Peteĩva ha’ékuri pe parávola die virgen rehegua.
“Upéicha pe rréino yvagagua ha’éta umi die virgen-cha, ojagarrávo ilamparakuéra, osẽ ohug̃uaitĩ hag̃ua menarãme.
“Ha cinco umívagui iñakãguapy, ha cinco naiñakãguapýi.
“Umi iñarandu’ỹva, ojapyhývo ilamparakuéra, ndoguerahái hendive ñandyry:
“Ha katu umi iñarandúva ogueraha ñandyry ilamparakuérape.
“Pe menarã hi’arémagui, opa umíva hopehyipa ha oke.
“Ha pyhare mbyte oñehendu peteĩ sapukái, Péina ápe, oúma pe menarã; pesẽ pehug̃uaitĩ ichupe.
“Upévo opu’ãjoaite umi virgen, ha omoĩporã ilamparakuéra.
“Ha umi iñarandu’ỹva he’i iñarandúvape, Peme’ẽ oréve pene ñandyrýgui; ore lamparakuéra ningo ogue.
“Ha katu umi iñarandúva ombohovái, he’ívo, Ndaupéichai; ndohupytýi ningo oréve ha peẽme g̃uarã: ha katu tapeho umi ovendévape, ha pejogua pendejupe g̃uarã.
“Ha oho aja hikuái ojoguávo, ou pe menarã; ha umi oñembosako’iva’ekue oike hendive upe mendahápe: ha oñemboty pe okẽ.
“Ha upéi ou avei ambue vírgen-kuéra, he’ívo, Ñandejára, Ñandejára, eipe’ána oréve”.2
“Ha katu ha’e ombohovái ha he’i, Añetehápe che ha’e peẽme, peẽ ndachekuaái.3
“Peñangarekóke, ndapeikuaáigui upe ára ni aravo pe Kuimba’e Ra’y outaha.”4
Presidente Dallin H. Oaks ojapókuri ko’ã porandu ñanepy’amongetáva pe Menarã jeju rehegua:5 “Ha pe Hi’ára jeju ha’éramo ko’ẽrõ? Jaikuaáramo jajotopataha Ñandejára ndive ko’ẽrõ—ñamano rupi térã Ijeju ñeha’arõ’ỹ rupi—mba’épa jajapóne ko árape?”6
Che aikuaa che rembiasa tee rupi, pe preparación espiritual Ñandejára oúvo g̃uarã, ndaha’éi tekotevẽnteva ha katu péicha añoite ikatu jajuhu py’aguapy añete ha vy’a.
Ha’ékuri peteĩ araroguekúi piro’y jave ahendu ypýrõguare pe ñe’ẽ “Nde reguereko cáncer”. Che ména ha che tuicha roñemondýi! Romanehávo ógape kirirĩháme, ajepy’amongetávo pe marandúre, che korasõ ojere ore mbohapy mitãnguera gotyo.
Che akãme aporandu Túva Yvagaguápe, “Amanóta piko che?”
Espíritu Santo oñe’ẽ mbegue, “Opa mba’e OĨPORÃMBÁTA”.
Upéi aporandu, “Aikovéta piko?”
Jeyjey, ou pe mbohovái, “Opa mba’e OĨPORÃMBÁTA”.
Apyta añekonfundi. Mba’ére ahupyty peteĩchagua mbohovái, taha’e aikovéta térã amanóta?
Upémarõ, añandupaite sapy’a cheryepýpe py’aguapy, añeromandu’ávo: Natekotevẽiha rojapura roho ógape rombo’e ore mitãnguérape mba’éicha oñembo’eva’erã. Ha’ekuéra oikuaákuri mba’éicha ohupytyva’erã ñembohovái ha angapyhy ñembo’égui. Natekotevẽi rojapura roho ógape ha rombo’e chupekuéra umi escritura térã proféta viviente ñe’ẽ. Ko’ã ñe’ẽ ha’émakuri mbarete ha ñeikũmby ykua roikuaáva. Natekotevẽi rojapura roho ógape ha rombo’e chupekuéra arrepentimiento, ha Jeikovejey, ha Ñemoĩjey, salvasiõ plan, familia eterna, térã Jesucristo doctrina-ite rehegua.
Upe jave, káda mbo’epy noche de hogar-pegua, káda escritura jestudia, káda ñembo’e jeroviápe oñeikuave’ẽva, káda jehovasa oñeme’ẽva, káda testimónio oñekompartíva, káda konvénio ojejapóva ha oñeñongatúva, káda Ñandejára rógape jeho, ha káda Pytu’uha ára ñeñongatu—O, tuichaite mba’ékuri! Tárdema romoĩ hag̃ua ñandyry ore lámparape. Roikotevẽkuri opaite tyky, ha roikotevẽ ko’ág̃aite!
Jesucristo ha Iñevanhélio rupi, che amanórõkuri, che familia oñemoangapyhýta, oñemombaretéta, ha peteĩ ára oñemoĩjeýta oñondive. Aikovéramo, ahupytýta pu’aka tuichavéva ko yvy arigua, chepytyvõ, chemombarete ha chemonguera hag̃ua. Ipahápe, Jesucristo rupi, opaite mba’e OĨPORÃKUAA.
Jaikuaa mba’épa he’ise “OĨPORÃMBA” jesarekópe jastudiávo Doctrina ha Konveniokuéra:
“Ha upe ára, Che aju vove che glóriape, oñekumplíta upe parávola Che ha’eva’ekue diez vírgen rehegua.
“Umi iñarandúva ha omog̃uahẽva’ekue añetegua, ha ojapyhyva’ekue Espíritu Santo oisãmbyhy hag̃ua chupekuéra, ha noñembotavyiva’ekue—añetehápe Che ha’e peẽme, ko’ãvape ndojeitymo’ãi ni noñemombomo’ãi tatápe, ha katu ogueropu’akáta pe ára.”7
Jesucristo ojapo ikatu hag̃ua “jagueropu’aka upe ára.” Jagueropu’aka upe ára nde’iséi ñamboheta hetave umi mba’e jajapova’erã. Pepensami peteĩ lúpare. Ndaha’éi ojapónteva ha’ete hag̃ua tuichave umi mba’e. Ikatu avei ombyaty ha omombyte pe tesape omombareteve hag̃ua. Tekotevẽ ñambohasy’ỹve, ñamombyte umi ñande ñeha’ã, ha taha’e Jesucristo Resape mbyatyha. Ñaikotevẽve experiencia imarangatúva ha oguerúva rrevelasiõ.
Israel noroeste-pe oĩ yvyty porãite, py’ỹi ojeheróva “yvyty hovyũpa’ỹva”. Pe Monte Carmelo8 hovyũ ary pukukue, hetave umi ysapy’imi rupi. Ára ha ára oiko ñeñangareko. “Carmelo-gua ysapýicha”,9 jahekávo ñamongaru ñane ánga “umi mba’e ha’éva tekojoja rehegua reheve”, 10 “mba’e michĩ ha mba’e ndaha’éivaicha mba’eve”,11 ñande testimónio ha ñane mitãnguéra testimónio oikovéta!
Ko’ág̃a oiméne pepensa, “Hermana Wright, ha katu nde ndereikuaái che familia. Ore roñeha’ã añete ha ore ndaupeichaiete.” Peẽ pejeporã. Che ndaikuaái pene familia. Ha Tupã katu, mborayhu ijapyra’ỹva, poriahuvereko, pokatu, kuaapy ha glória reheve oikuaa.
Umi ñeporandu pejapóva ha’e korasõ porandu, hasýva pene ánga ruguaite guive. Ko’ãichagua porandu ojejuhu escritura-kuéra marangatúpe:
“Mbo’ehára, mba’evete piko ndéve [che rogaygua] oñehundi?”12
“Mamo opyta ko’ág̃a che ñeha’arõ?”13
“Mba’e [a]japova’erã ojeipe’a hag̃ua ko arai ypytũ [che]ahoíva?”14
“Moõpa ojejuhúne arandu? ha moõpa oĩ ñeikũmby renda?”15
“Mbaʼéichapa ikatu [a]jejoko mbarete opa mbaʼe porãre?”16
“Ñandejára, mba’épa eipota ajapo?”17
Ha upéi, he’ẽ’asy umi ñembohovái og̃uahẽva:
“Egueroviápa Cristo pokatu rehe oporosalva hag̃ua?”18
“He’i piko Ñandejára peteĩme ani hag̃ua ohupyty ipy’aporãgui?”19
“Pegueroviápa [Ha’e ikatuha] ojapo péva?”20
“Pegueroviápa umi proféta?”21
“Pemombaʼapo piko jerovia upe pende apohare rrendensiõre?”22
“Ndojapomo’ãipa ijojáva pe Hue opa yvy arigua?”23
Che angirũnguéra pejehayhúva, ndaikatúi ñakomparti ñane ñandyry, ha katu ñakompartikuaa Hesape. Ñandyry ñane lámparape ndaha’éi ñanepytyvõnteva jagueropu’aka hag̃ua ára, ha katu avei ha’ekuaa medio ohesape hag̃ua pe tape oguerúva umi jahayhúvape Salvador-pe, oĩvamava voi “jyva jepe’ápe omog̃uahẽ hag̃ua” chupekuéra.24
“Péicha he’i Ñandejára; Ejoko tasẽgui ne ñe’ẽpu , ha umi nde resa tesaýgui: ne rembiapo oñembojopóitagui, … ha ou jeýta oporohayhu’ỹva retãgui.
“Ha oĩ ñehaʼarõporã tenonderã; he’i Ñandejára, ita’yrakuéra ou jeytaha ijyvy teépe.”25
Jesucristo ha’e pe “ñehaʼarõporã nerenonderã.” Ndaipóri mba’eve jajapova’ekue térã jajapo’ỹva’ekue ndaikatúiva ohupyty Ijehasa’asy opave’ỹva ha ijapyra’ỹva. Ha’e rupi araka’eve ndaha’éi ñane rembiasakue paha.26 Upévare ñande, “ñañemotenondevaʼerã ñemovãʼỹme Cristo-pe, jaguerekóvo peteĩ ñehaʼarõporã mimbi, ha mborayhu Tupãre ha mayma yvypórare. Upévare, [ja]háramo tenonde gotyo, ñande rorývo Cristo ñe’ẽme, ha ñañeha’ãmbaite ipahaite peve, péicha he’i pe Túva: [ja]hupytýta tekove opave’ỹva.”27
Tekove opave’ỹva ha’e vy’a opave’ỹva. Vy’a ko jeikovépe, ko’ág̃aite—ndaha’éi, jepe umi desafío ñande aragua rupi, ha katu Ñandejára pytyvõ rupi ñañemoarandu hag̃ua, ha amo ipahápe, jaguegueropu’aka hag̃ua umíva—ha vy’a ojepapakuaa’ỹva tekove oúvape. Umi tesay oñemokãta, umi korasõ hasýva oñemyatyrõta, pe okañýva ojejuhúta, jepy’apykuéra oñemoĩporãta, familiakuéra oñemoĩjeyta oñondive, ha opa mba’e pe Túva orekóva ñanemba’éta.28
Peju Jesucristo-pe ha peikove29 ha’e che testimónio, pe jahayhuetéva “[ñane] ánga Pastor ha Obispo”,30 Jesucristo réra sagrádo ha marangatúpe, amén.