Karai, rohechasemi Jesús-pe

Elder Robert M. Daines rupive

Setenta-gua

Jahechasemi Jesús-pe ha’ehaichaite Ha’e ha ñañandu Imborayhu.

Tova jehechave’ỹ

Peteĩ arapoty ára jave 1945-pe, peteĩ mitãrusu opáy peteĩ ospitál militar-pe. Ha’e ipo’a oikove haguére—ojejapíkuri chupe ijapysa atukupetépe, ha katu umi médiko o’opera, ha ko’ág̃a ikatu oguata ha oñe’ẽ porã jey.

Ñembyasyrã, pe vála ombyaíkuri pe párte iñakãme ikutuha rupi tova ohechakuaa. Ko’ág̃a omaña hembirekóre ni michĩmi ndohechakuaái chupe; ndohechakuaái isy teépe jepeve. Pe hova espého renondépe jepe ndoikuaái ha’eha—ndaikatúi ohechakuaa kuimba’épa térã kuña.¹

Ha’e opyta ndohechavéi—peteĩ mba’asy o’afectáva millones tapichápe.²

Umi tapicha tova jehechave’ỹ vaiete orekóva oñeha’ã ohechakuaa ambue tapichápe imandu’ávo umi regla—peteĩ regla ohechakuaa hag̃ua imembykuña térã itajýra hova pititíre térã peteĩ iñamígape iguata tyryrýre.

Akakuaávo

Ko’ápe oĩ mokõiha tembiasakue, hi’aguĩvéva che rógagui: Chemitã’irõguare, ahecha jepi che sy ha’eha pe regla apoha. Ha’e odesidi araka’épa ikatu añembosarái ha araka’épa añenova’erã térã, ivaivéva katu, tahapo’o ñanavai korapýpe.

Ojekuaa porãiterei cherayhuha. Ha katu py’ỹieterei ha añemotĩrã, ahecha chupe “Pe oñe’ẽrenduva’erãnte ramo.”

Heta ary upe rire aju ahecha chupe peteĩ tekove añeteguávaicha. Atĩ ndahechakuaáire isacrificio ni nañeporandúi mba’ére áño aja ha’e oipuru mokõi sái tujánte (che ajogua aja ao pyahu mbo’ehaópe g̃uarã) térã mba’ére, ára opávo, ikane’õiterei ha iñansiósa cherehe añeno voi hag̃ua.

Ñande ikatu ndajahechái

Oiméne pehechakuaa ko’ã mokõi tembiasakue añetehápe ha’eha peteĩnte—hetaiterei ary aja, che, añetehápe, ndahechái. Ndaikatúi ahecha che sýpe peteĩ tekove añeteguáicha. Ahecha umi regla orekóva ha katu ndahechái hese imborayhu.

Amombe’u peẽme ko’ã mokõi tembiasakue ahechauka hag̃ua peteĩ mba’e: Aimo’ãmínte peikuaaha peteĩ tapicha (ikatúva peẽ ha’e umi) máva ohasa’asýva peteĩ jehechave’ỹ espiritual joguaha rupi.

Ikatu hasy peẽme pehecha Tupãme peteĩ Túva oporohayhúvaicha. Pemañakuaaite yvága gotyo ha pehecha, ndaha’éi mborayhu ha poriahuvereko rova, ha katu peteĩ regla iñapesãva peñembohapeva’erãha rupi pehóvo. Ikatu peimo’ã Tupã oisãmbyhyha Ijyvága, oñe’ẽ iprofetakuéra rupive, ha ohayhu pene reindýpe, ha katu kañyháme peporandu Penderayhúpa.³ Ikatu peñandúkuri pe barra de hierro pende pópe ha katu napeñandúi gueteri pe Salvador mborayhu pendeguerahávape.⁴

Aimo’ãmínte peikuaaha tapichakuéra péichagua heta ára aja, che ha’éguikuri máva péichagua—espiritualmente ohechave’ỹva.

Apensa che rekove ha’eha umi regla jesegi ha ñeime umi estándares abstractos altúrape. Aikuaa Tupã cherayhuha chéve perfectamente ha katu che nañandúi. Apensavénte aha yvágape aime rãngue che Ru Yvagaguándi.

Peẽ, cheichaite avei, sapy’ánte pemongu’énte pende juru, ha katu ndapepurahéiri pe “mborayhu purahéi orredimíva, ”⁵ mba’épa ikatu jajapo?

Upe ñembohovái, ñanemomandu’aháicha Russell M. Nelson, akóinte ha’e Jesús.⁶ Ha upéva ha’e notísia iporãitereíva.

Karai, rohechasemi Jesús-pe

Oĩ peteĩ versíkulo mbykymi Juan-pe che ahayhuetéva. Omombeʼu peteĩ tapicha aty tetã ambuegua oñembohapéva i-discipulo-kuéra rendápe peteĩ mbaʼe jerure iñimportánteva rehe. “Karai”, he’i hikuái, “[rohechase] Jesús-pe.”⁷

Upéva pe opavave jaipotáva—jahecha Jesús-pe ha’eháicha Ha’e ha ñañandu Imborayhu. Kóva ha’eva’erãmo’ã mba’ére jajapo heta umi jajapóva Tupaópe—ha upéicha opa reunión sacramental-pe. Peporandúramo mba’eichagua mbo’epýpa pembo’eva’erã, mba’eichagua reunión-pa peplaneava’erã, ha pehejántepa umi diákono ha peñembosarái pelóta mano, ikatu peguereko ko versíkulo sãmbyhyha ramo: oipytyvõtapa kóva tapichakuéra ohecha ha ohayhu hag̃ua Jesucristo-pe? Ndaupéicharõ, ikatu peha’ã ambue mba’e.

Ahechakuaávo aĩha jehecha’ỹme espiritualmente, ahechaha umi regla ha katu ndahechái Túva poriahuvereko rova, aikuaa ndaha’eiha Tupao kúlpa. Ndaha’éi Tupã rehegua, ha nde’iséi opa mba’e oñehundimaha; ha’e mba’e opavave jaikuaava’erã. Upéi, umi Rresurrecciõ testigo ñepyrũha py’ỹi ojejuhu Ñandejára oikovejeýva rováre ha katu ndoikuaái Chupe; pe Huerto Tumba guie umi Galilea costa peve, umi Isegidor peteĩha “ohecha Jesús oñembo’y, ha ndoikuaái Jesús-ha.”⁸ Oaprende hikuái ohechakuaa Chupe, ha avei ñande.⁹

Karida

Ahechakuaávo che ha’eha peteĩ ohechave’ỹva espiritual, añepyrũ asegi Mormón ñemoñe’ẽ tañembo’e “opa korasõ mbaretekue reheve” añemyenyhẽ hag̃ua pe mborayhu oñeprometévagui I-discípulo-kuérape—che mborayhu Hese ha Imborayhu cherehe—ha “ahecha hag̃ua chupe ha’eháicha … ha areko upe esperanza”¹⁰ Añembo’e heta ary aja ikatu hag̃ua asegi pe peteĩha tembiapoukapy tuichaitéva Tupãme jahayhu ha tañandu upe “añetegua peteĩha tuichavéva … Tupã ñanderayhuha opa Ikorasõ, ipu’aka, iñakã ha imbaretekue reheve.”¹¹

Umi Evanhélio

Avei amoñe’ẽ ha amoñe’ẽ jey umi irundy Evanhélio—ndaha’éi anohẽ hag̃ua irreglakuéra ha katu ahecha hag̃ua mávapa Ha’e ha Oporohayhuha. Ha, ára ohasávo, chembotyryry pe mborayhu ysyry osyryvaʼekue Chugui.

Jesús omombe’u inepyrũ guive Ha’e oñemondo hague “omoangapyhy hag̃ua umi ikorasõ rasývape, omomarandu hag̃ua ñemosãso umi oñeñapytĩvape ha omonguera jey hag̃ua umi ohecha’ỹva resa.”¹²

Kóva ndaha’éi peteĩ lista umi mba’e ojejapova’erã térã buenas relaciones públicas-nte; ha’e mba’éichaguápa Imborayhu.

Peipe’ánte umi evanhélio; opavave nunga páhinape jahecha Chupe oñangarekóvo umi osufríva: social, espiritual ha físicamente-pe. Opoko tapichakuéra rehe ojehecháva iky’a ha ipotĩ’ỹva ramo¹³ ha omongaru umi iñembyahýivape.¹⁴

Mávapa nde historia favorita Jesús rehegua? Aimo’ãnte ohechaukaha Tupã Ra’y iñasãivo oñañuã hag̃ua ha ome’ẽ esperanza peteĩ marginado-pe: pe leproso,¹⁵ pe samaritano ojehayhu’ỹetéva,¹⁶ pekador akusádo ha escandaloso,¹⁷ térã pe enemigo nacional.¹⁸ Kóichagua grásia iñasombrósa.

Peñeha’ãmi pehai Ha’e omomba’eguasu térã omonguera térã okaru jave peteĩ okápegua ndive, ha pepytáta tinta’ỹre Lucas peheja mboyve.

Ahecha kóva ha che korasõ opo peteĩ jehechakuaa mborayhúpe, ha añepyrũ añandu ikatuha Ha’e cherayhu. Presidente Nelson ombo’e haguéicha: “Peikuaavévo Salvador-gui, ndahasyivéta pejerovia Iporiahuvereko rehe, upe Imborayhu opave’ỹvare.”¹⁹ Ha pejerovia ha pehayhuvéta pende Ru Yvagaguápe.

Elder Jeffrey R. Holland ñanembo’ékuri Jesús ou ohechauka hag̃ua ñandéve “máva ha mba’eichaguápa Tupã, ñande Ru Ijapyra’ỹva, mba’eichaitepevépa Idevóto Ita’yrakuérare opaite ára ha tetãme.”²⁰

Pablo he’i Tupã ha’eha “pe Túva [opa] misericordia rehegua ha pe Tupã opa konsolasiõ rehegua.”²¹

Pehecháramo Chupe ambuéicha ramo, peñeha’ã meménte.

Konveniokuéra ha Tupã ñeañuã

Profetakuéra ñaneinvita jaheka hag̃ua Hova.²² Ajagarra kóva peteĩ momandu’arã ñamomba’eguasuha ñande Rúpe, ha ndaha’éi peteĩ fórmula, ha nañamohu’ãmo’ãiha jahecha peve Jesús-pe ñande Ru mborayhu rova ramo²³ ha jasegui Chupe, ani Irreglakuéra añónte.²⁴

Proféta ha apóstol-kuéra oñe’ẽvo konveniokuéra rehe, ndaha’éi umi entrenador-icha osapukáiva umi gráda guive ijao (terciopelo pytã) reheve, he’íva ñandéve “ñañeha’ãve hag̃ua!” Ha’ekuéra oipota jahecha ñane konveniokuéra ha’eha fundamentalmente umi relasiõ rehegua²⁵ ha ikatuha omonguera pe tova jehechave’ỹ espiritual.²⁶ Ha’ekuéra ndaha’éi regla jahupyty hag̃ua Imborayhu; Haʼe penderayhúma perfectamente. Ñande desafío ha’e ñantende ha ñamoldea ñande rekove upe mborayhúpe.²⁷

Ñañeha’ã jahecha ñane konvénio rupive, peteĩ ovetã rupive ramoguáicha, pe Túva poriahuvereko oĩva hova kupépe.

Umi konvénio ha’e forma Tupã mba’éichapa oporoañuã.

Tupã mborayhu ysyry

Ipahápe, ikatu ña’aprende jahecha Chupe jaservívo Chupe. “Mbaʼéicha piko oikuaa peteĩ yvypóra pe ijára noipytyvõivaʼekuépe?”²⁸

Ojapo sa’i ary, ahupytyhague peteĩ llamamiénto pyahu nañanduiva’ekue ajaposeha. Apu’ã voi, nervioso—ha katu peteĩ ñe’ẽ che akãme nahendúiva’ekue upe mboyve: jaservi ko Tupaópe ha’e ñaimeha Tupã mborayhu ysyrýpe Ita’yrakuéra rehehápe. Ko Tupao ha’e peteĩ aty omba’apoha tapichakuéra orekóva píko ha pála ipópe, oñeha’ãva oipytyvõ omopotĩ pe Tupã mborayhu ysyry rape og̃uahẽ peve Ita’yrakuérape upe fila pahápe.

Taha’e ha’éva peẽ, taha’e ha’éva pende reko ymaguare, oĩ pene rendag̃ua ko Tupaópe.²⁹

Pejagarra píko ha pála ha peike pe ekípope. Peipytyvõ pegueraha hag̃ua Imborayhu Ita’yrakuérape ha upévagui michĩmi pejehypýine.³⁰

Jaheka Hova mborayhúpe, Ikonvénio añuã, ha upéi ñañomoirũta Ita´yrakuéra ndive ojojyvágui, ha oñondive japurahéita “Israel Redentor”:

Emoĩporãjey, che Salvador ahayhuetéva,
Nde rova resape;
Eme’ẽ pe konsúelo ánga omokyre’ỹva;
Ha eheja upe oñeha’arõ asyetéva
Ne renda marangatu rehe
Egueru esperánsa che korasõ tave’ỹme.31

Jaheka Hova mborayhu ha upéi jaiko Iporiahuvereko mba’yrúramo Ita’yrakuérape g̃uarã.³² Jesucristo rérape. Amén.