Salvador pu’aka oporomongueráva umi Islas del mar-pe
Umi templo jehovasakuéra rupive pe Salvador omonguera tapichakuéra, familiakuéra ha tetãnguéra.
1960 ñepyrũme, che ru ombo’e Tupaogua Colegio Universitario Hawaii Laie-pe, che chereñóihague. Che siete hermana-kuéra oinsisti che tuvakuérape cherenói hag̃ua “Kimo”, peteĩ hawaiano réra. Roiko Laie Hawaii Templo ypýpe, upéva oservi aja heta Tupaogua miembro-kuérape Área Asia Pacífico-gua, oikehápe Japón.1 Umi arýpe, oñepyrũ og̃uahẽ Hawaii-pe santokuéra japón-pegua aty ohupyty hag̃ua templo jehovasakuéra.
Peteĩ umi miembro ha’e peteĩ hermana pe Isla porãite Okinawa-pegua. Ije’ói og̃uahẽ hag̃ua Hawaiii templo-pe ñemombe’u hechapyrãite. Mokõi década voive, omendákuri peteĩ ñemenda budista tradicional oñekonvenipyréva. Pokã mése uperire, Japón oataka Pearl Harbor, Hawái, omoheñóiva peteĩ joavy vai Estados Unidos ha Japón mbytépe. Umi batalla Midway ha Iwo Jima rire, pe ñorairõguasu rape omboguevi umi Japón-pegua mbaretekue hi’isla natal rembe’y peve, Okinawa, ha’éva Japón korasõ ñemo’ã paha umi fuerzas aliadas renondépe.
1945-pe, Okinawa batalla oiko mbarete vai mohapy mése asy aja. Peteĩ flota 1.300 buque de guerra reheve Estados Unidos-pegua ombojere ha ojapi pe Isla. Umi militar ha civil omanova’ekue hetaiterei. Ko árape oĩ peteĩ monumento solemne Okinawa-pe ohechaukáva peteĩ lista orekóva hetave 240.000 tapicha rerakuéra ojeikuaáva omanova’ekue upe ñorairõme.2
Peteĩ ñeha’ã py’aropúpe okañy hag̃ua umi atákegui, ko kuña Okinawa-pegua, iména ha mokõi imemby michĩva oheka ñemo’ã peteĩ yvyty itakuápe. Semana ha mese aja ogueropu’aka hikuái peteĩ jeiko’asy oñemombe’ukuaa’ỹva.
Peteĩ pyhare py’aropupópe pe ñorairõ mbytépe, ifamilia reheve omanombotáva ñembyahýigui ha iména ipy’ahóva, ha’e opensa ombopahávo heko’asykuéra peteĩ granada de mano reheve umi autorida ome’ẽva’ekue chupe ha ambuekuérape upeva’erãvoi. Upéicharõ jepe, oñembosako’i aja ojapo hag̃ua upéva, oreko peteĩ experiencia espiritual pypuku ha oñandu porãiterei Tupã oikoveha ha ohayhuha chupe, omombaretéva chupe ohove hag̃ua tenonde gotyo. Umi ára oúvape, omoingove iménape ha omongaru ifamíliape ñana reheve ha eirete ojuhúva peteĩ eiraity saitépe ha umi mymba’i ojagarráva peteĩ arroyo hi’ag̃uivagui. Oñeimo’ã’ỹre, oikove hikuái sei mese upe itakuápe, umi tava’igua omombe’u peve chupekuéra pe ñorairõ opahague.
Upe familia oho jeývo hógape oñepyrũ omopu’ãjey hekovekuéra, ko kuña japonesa oñepyrũ oheka mbohovái Tupãgui. Mbeguekatu heñói ipype jeguerovia Jesucristo-re ha tekotevẽha ojebautisa. Upevére, oipy’apy chupe umi ohayhúvape omanova’ekue oikua’ỹre Jesucristo-pe ha pe bautismo-gui, umíva apytépe isy, omanova’ekue ha’e onase vove.
Peñeimahinamína ivy’a mokõi hermana misionera Jesucristo Tupao Santokuéra Ára Pahapeguáva og̃uahẽro hógape peteĩ ára ha ombo’e chupe tapichakuéra ikatuha oikuaa Jesucristo-gui mundo de los espíritus-pe. Ha’e opyta ijurujái ko’ã tekombo’e reheve, ituvakuéra ikatuha oiporavo osegi Jesucristo-pe omano riréma ha oasepta hikuái pe bautismo ojejapóva hesekuéra umi tenda marangatúpe oñehenóiva templo-kuéra. Ha’e ha ifamilia oñekonverti pe Salvador-pe ha ojebautisa.
Ifamilia omba’apo heta ha oñepyrũ oñemotenonde, ha og̃uahẽve mbohapy mitã. Ha’ekuéra ijeroviareko ha oĩ activo Tupaópe. Upéi, oñeimo’ã’ỹre, iména oreko peteĩ korasõ atáke ha omano, omyañávo chupe omba’apo hag̃ua heta aravo aja heta mba’apohápe omantene hag̃ua imembykuérape.
Oĩ ifamilia ha vesinokuéra oñe’ẽ’apíva hese. Omboja hikuái umi ijeiko’asy odesidi haguére ojoaju peteĩ tupao cristiano-re. Oñeme’ẽ’ỹre upe trahédia guasuete ha ñe’ẽ’api hatãitére, ojejagarra hatã ijerovia rehe Jesucristo-re, ojedesidívo oho tenonde gotyo, ha ojeroviávo Tupã oikuaaha chupe ha outaha umi ára porãve.3
Pokã ary iména omanohague voieterei, pe Japón-pegua misiõ presidente oñeinspira omokyre’ỹ hag̃ua japón-pegua miembro-kuérape oñeha’ã hag̃ua oasistívo templo-pe. Upe misiõgua presidente ha’ékuri peteĩ veterano Estados Unidos-pegua oñorairõva’ekue pe Okinawa batalla-pe, upe hermana ha ifamilia Okinawa-peguáva ohasa’asyeteva’ekuépe.4. Upevére, ko umílde hermana he’i hese: “Ha’e niko upérõ peteĩ ore enemigo ojehayhu’ỹvéva, ha katu ko’ág̃a oĩ ko’ápe pe evanhélio mborayhu ha py’aguapy reheguáva reheve. Upéva, chéve g̃uarã ha’ékuri peteĩ milagro.”5
Ohendúvo pe misiõgua presidente mensáhe, ko hermana viuda ojesellase ifamilia ndive templo-pe peteĩ ára. Upevére, umi limitasĩo económica rupi ha umi barrera ñe’ẽ reheguáva, upéva ndaikatumo’ãi ojehu.
Upérõ, henóĩ heta solución pyahu. Pe pasáhe repykue ikatu oñemboguejy mbyte peve umi Japón-pegua miembro oalkilapárõ peteĩ aviõ oveve hag̃ua Hawaii-pe temporada baja-pe.6 Miembro-kuéra avei ograva ha ovende disco de vinilo ombohérava Santo japonekuéra opurahéi. Oĩ miembro ovendéva hóga jepe. Ambuekuéra katu oheja imba’apoha ojapo hag̃ua upe viáhe.7
Ambue pa’ã miembro-kuérape g̃uarã ha’ékuri pe templo presentación noĩriha disponible japón ñe’ẽme. Tupaogua liderkuéra ohenói peteĩ hermano Japón-pegua oho hag̃ua Hawaii templo-pe ombohasa hag̃ua pe investidura ceremonia.8 Ha’ékuri ha’e pe peteĩha konvérso Japón-pegua upe ñorairõguasu rire, oñehekombo’e ha ojebautisava’ekue umi Estados Unidos-pegua soldado ijeroviarekóva rupi.9
Umi japón-pegua miembro oñeivestímava oikóva Hawaii-pe ohendúrõguare peteĩha jave pe ñembohasa, hasẽ hikuái. Peteĩ miembro ohai: “Roĩkuri templo-pe heta, hetaiterei vése. Ha rohendúkuri pe ceremonia Inglés-pe. [Ha katu] araka’eve noroñanduiva’ekue pe templo rembiapo espíritu … roñandu haguéicha ko’ág̃a [rohendúvo] ore ñe’ẽ teépe.”10
Uperireve upe aryetépe, 161 kakuaa ha mitã osẽ Tokio-gui ohóvo Hawaii templo gotyo. Peteĩ hermano Japón-pegua ojepy’amongeta upe viáhere: “Amañávo okagotyo aviõ guive ha ahecha Pearl Harbor, chemandu’a ore retã ojapova’ekue umi hentekuérape upe 7 de diciembre 1941-pe, ha oike chéve kyhyje. ¿Mba’éichapa orerresivíne hikuái? Ha katu che sorpresa-rã, ohechauka oréve mborayhu ha py’aporã tuichavéva ahechava’ekue che rekovépe araka’eve”11
Umi Santo japón-pegua og̃uahẽvo, umi miembro hawaiano orresivi umi heta yvotygua guirnalda reheve oñoañua ha oñohetũ aja hovápe, jepokuaa iñextráñova Japón cultura-pe. Ohasa rire Hawaii-pe 10 ára opormoambuéva, umi Santo Japón-pegua ojedespedi Santokuéra hawaiano opurahéi aja “Aloha Oe”.12
Upe hermana viuda Okinawa-pegua oho pe viáhe mokõihápe ojejapova’ekue umi japón pegua miembro-pe g̃uarã. Oho umi 16.000 km (10.000 milla) peteĩ jopói pojerápe ome’ẽva chupe umi misionero oserviva’ekue irrámape ha heta okaru’akue imesápe. Oĩ aja templo-pe, ha’e oñohẽ tesay vy’águi orrepresentávo isýpe ibautismo vicario-pe ha ojesellávo chupe iména omanova’ekue ndive.
Umi viáhe Japón guive Hawaii peve oiko meme, 1980 peve ojededikahápe pe Tokio, Japón Templo, ha’eva’ekue decimoctávo templo en funcionamiento. Noviembre, ko arýpe ojededikáta Okinawa, Japón templo, ha’éva templo número 186. Opyta namombyrýi pe itakuágui Okinawa central-pe upe kuña ha ifamilia ojuhu haguépe ñemo’ã.13
Jepémo ndaikuaáikuri upe hermana hechapyrãvape Okinawa-pegua, ilegado oikove gueteri iñemoñare ijeroviarekóva rupive, hetápe che aikuaa ha ahayhúva.14
Che ru, Segunda Guerra Mundial Pacífico-pegua veterano, oñe’emosionaiterei arresivívo che llamamiento aservi hag̃ua mitãrusu misionero-ramo Japón-pe. Ag̃uahẽ Japón-pe Tokio templo ojededika rire ramoite ha chete ahecha santokuéra mborayhu upe templo-re.
Umi templo-gua konvénio ha’e ñande Ru Yagagua jopói umi Ita’ýra Jesucristo segiha ijeroviarekóvape g̃uarã. Templo rupive Ñande Ru Yvagagua ombojoaju tapichakuérape ha ifamiliakuérape Salvador ndive ha oñondivekuéra.
Ary ohasava’ekuépe Presidente Russell M. Nelson omomarandu:
“Káda tekove ojapóva konvénio umi pila bautismal ha témplope—ha oñongatu umi konvénio—ohupytykuaave Jesucristo pu’aka. …
Jehepyme’ẽ ñañongatu haguére umi konvénio Tupã ndive ha’e pu’aka yvagagua, pu’aka ñanemombaretéva jarresisti porãve hag̃ua ñande pruéva, jeipy’ara’ã ha ñembyasykuéra. Ko pu’aka ombohasy’ỹve ñande rape.”15
Templo-gua jehovasa rupive, pe Salvador omonguera umi tapicha, familiakuéra ha tetãnguérape, jepe umi ha’eva’ekue peteĩ árape enemigo oñerrekonsilia’ỹva. Ñandejára oikovejeýmava omomaranduva’ekue peteĩ sociedad ojoavyetévape Mormón Kuatiañe’ẽme opavave umi o’onrrávape g̃uarã “che réra, opu’ãta pe Tekojoja Ra’y, pohanoha reheve ipepópe.”13
Cheaguijeme’ẽ ha’égui testigo pe Ñandejára promesa kumplimiento memégui “oúta ára peteĩ Salvador-gui jeikuaa isarambitaha opa tetã, avaretã, ñeʼẽ ha tavayguakuéra apytépe“17 avei “umi islas del mar-pe oikóva.“18
Atestifika pe Salvador Jesucristo-gui ha iproféta ha apóstol-kuéra ko’ã ára pahapeguágui. Solemnemente ame’ẽ che tesmonio pu’aka celestial-gui ombojoajúva yvágape pe oñembojoajúva yvy ári.
Kóva ha’e pe Salvador rembiapo, ha umi templo ha’e Hóga marangatu.
Jeikuaaporã oñemova’ỹva reheve, amomarandu ko’ã añetegua Jesucristo rérape. Amén.