Jesucristo pokatu ñande rekovépe ára ha ára
Ñane mbarete ykua ha’e jerovia Jesucristo-re jaipotágui jahekáramo jaju Hendápe peteĩteĩ ára ha ára ha opaite ára.
Hermano ha hermana-kuéra ahayhuetéva, kóva ha’e Jesucristo Tupao Santokuéra Ára Pahapegua. Tuicha vy’apavẽ ñañembyatývo Itupaóicha. Cheaguyjeme’ẽ Presidente Russell M. Nelson ñanemomandu’a haguére py’ỹi jaipuruva’erãha Ñandejára Tupao réra hekopete ikatu hag̃uáicha ñanemandu’a máva Tupaópa kóva ha máva mbo’epýpa jasegi.
Presidente Nelson he’i: “Ára oúvape, jahecháta umi tuichavévaSalvador pokatu jehechauka ko múndope araka’eve ojehechava’ekue. … Ha’e ome’ẽta hetaiterei priviléhio, jehovasa ha milágro umi ijeroviarekóvape.”1
Peteĩva umi priviléhio tuichavéva roguerekóva che rembireko Renee ha che ha’e, pe roñembyaty Santokuéra ndive upe roservihápe. Rohendu hembiasakuéra, rohecha umi ipérdida, rokomparti umi imba’embyasy ha rovy’a umi osẽ porãva rehe chupekuéra. Rohechákuri heta jehovasa ha milágro Salvador ome’ẽva’ekue umi ijeroviarekóvape. Roikuaákuri tapichakuéra ohasava’ekue pe mba’e ikatu’ỹva, ohasa’asýva’ekue umi mba’e oñeimo’ã’ỹva.
Rohechákuri pe Salvador pokatu jehechauka peteĩ viúdare operdeva’ekue iménape oĩ aja hikuái Ñandejára rembiaporãme Bolivia-pe.2 Rohechákuri peteĩ mitãkuña rehe Argentina-pe ho’ava’ekue peteĩ tren guýpe ha operde hetyma, oĩgui omondaséva chugui i-celular.3 Ha itúva ha’eñóva, ko’ág̃a ombyatyva’erã umi ipehẽngue ha omombarete itajýrape peteĩ aña rembiapo oñemombe’ukuaa’ỹva rire. Rohecha umi familia operdeva’ekuére hóga ha opa mba’e oguerekomíva tatarendy jave Chile-pe mokõi ára Navidad mboyvemi 2022.4 Rohecha umi ohasa asýva rehe ojopoi vaietéva rire ha umi inosénte víctima avusokue rehe.
Mba’épa omeʼẽ chupekuéra puʼaka ohasa hag̃ua umi mbaʼe ijetuʼuetévagui? Mba’épa ome’ẽ chupekuéra iñanambusuve hag̃ua imbaretekue, oho hag̃ua hese tenonde gotyo ha’etéramo jepe opa mba’e okañymbaha?
Ajuhu upe mbarete ykua ha’eha jerovia Jesucristo-re jaipotágui jahekáramo jaju Hendápe peteĩteĩ ára ha ára ha opaite ára.
Jacob pe proféta ombo’e, “Ha haʼe ou yvórape osalva hag̃ua opa yvyporakuérape koʼãva ohendúramo iñeʼẽ; ha péina ápe, haʼe oñandu opa yvypóra mbaʼeʼasy, héẽ, opa tekove oikovéva mbaʼeʼasy, upéicha kuimbaʼe, kuña, ha mitã, haʼéva Adán rogaygua.”5
Sapy’ánte, jerovia Jesucristo rehe ikatu haʼete peteĩ mbaʼe ikatu’ỹva, haimete ndaikatúiva ojehupyty. Ikatu ñapensa jaju hag̃ua Cristo rendápe oñeikotevẽha peteĩ mbarete, pu’aka ha perfección ndajarekóiva, ha ndaikatuinteha jajuhu ñemombarete jajapo hag̃ua opa mba’e. Ha katu pe a’aprendeva’ekue opa ko’ã tapichágui ha’e pe jerovia Jesucristo rehe ha’eha pe ome’ẽva ñandéve ñemombarete ñañepyrũ hag̃ua jaguata. Sapy’ánte ikatu ñapensa: “Tekotevẽ amyatyrõ che rekove aju mboyve Jesús rendápe”, ha katu pe añetegua ha’e jajuha Jesús rendápe ñamyatyrõ hag̃ua ñande rekove Ha’e rupive.
Ndajajúi Jesús rendápe ñande perfecto haguére. Jaju Hendápe jaguerekógui defecto ha Hese ikatu “ñañeperfecciona.”6
Mba’éichapa ñañepyrũta ñamomba’apo michĩmi jerovia ára ha ára? Chéve g̃uarã oñepyrũ pyhareve: Apu’ãvo, amaña rãngue che teléfono-re, ha’e peteĩ ñembo’e. Peteĩ ñemboʼe ojegua’ỹva jepe. Upéi amoñe’ẽ peteĩ pasáhe escritúragui. Kóva chepytyvõ che konvénio semanal reheve ajapóva aparticipa jave pe Santa Cena-gui “akóinte chemandu’ataha hese.”7 Añepyrũvo che ára peteĩ ñembo’e ha peteĩ escritura reheve, ikatu “chemandu’a Hese” amañáramo che teléfono-pe. Ikatu “chemandu’a Hese” ambohovake jave problema ha conflicto, ha añeha’ã ambohovake Jesús ojapoháichane.
“Chemandu’ávo Hese”, añandu akambiaseha, añearrepentise. Ajuhu pe ykua ñeñombarete añongatu hag̃ua che konvéniokuéra, ha añandu pe Espiritu Santo influencia che rekovépe “ha añongatu hembiapoukapykuéra ha’e ome’ẽva’ekue [chéve]; ikatu hag̃uáicha [che] akóinte areko ijespíritu.”8 Péva cheipytyvõ aha hag̃ua heseve ipahaite peve.9 Ja’e chupe opa peve mba’e upe ára! Ha umi ára ndaikatuihápe chemandu’a Hese opa ára pukukue, Ha’e oĩ gueteri upépe, cherayhúvo ha he’ívo chéve, “oĩ porãmba; ikatu reñeha’ã jey ko’ẽrõ”.
Ñande imperfecto ramo jepe ñanemandu’a hag̃ua Hese, ñande Ru Yvagagua jahayhuetéva araka’eve ndojavýi imandu’a hag̃ua ñanderehe.
Peteĩ mba’épe sapy’ánte jajavy jepi ñapensa jave ñakumplívo umi konvénio, térã umi promésa jajapóva Tupãme, ha’etaha peteĩ transasiõ ramo jajapóva Hendive: cheñe’ẽrendu, ha Ha’e chemo’ãta opa mba’e vaívagui ani oiko cherehe. Ahepyme’ẽ che diésmo, ha araka’eve ndaperdemo’ãi che rembiapo térã tata ndohapymo’ãi che róga. Ha katu upéi nosẽiramo mba’eve ñaha’arõháicha, jajerure’asy Ñandejárape: “Nderehechakuaáipiko che añehundiha?”10
Ñane konvénio ndaha’éi peteĩ transasiõ añónte; umíva ha’e transformasiõ.11 Umi che konvénio rupive ahupyty Jesucristo pu´aka santifikador ha poromombaretéva, ohejáva oiko chehegui peteĩ tekove pyahu, aperdona hag̃ua umi ha’etéva oñeperdonakuaa’ỹva, asupera hag̃ua umi ha’etéva ojehupytykuaa’ỹva. Ñanemandu’ávo Jesucristo rehe jajaposégui akóinte ipu’akapa; chemombareteve “añongatu hag̃ua hembiapoukapykuéra ome’ẽva’ekue [chéve].”12 Chepytyvõ aime porãve hag̃ua, apukavy hag̃ua mba’eve’ỹre, aiko hag̃ua peteĩ py’aguapy’apoha, 13 ani hag̃ua aheka ñorairõ, aheja hag̃ua Tupã ipu’aka che rekovépe.14
Ñande jehasa’asy térã peteĩ jahayhúva jehasa’asy tuichaiterei jave ndaikatúiva jagueropu’aka, ñanemandu’a Jesucristo rehe ha jaju Hendápe ikatu ombovevýi pe mba’epohýi, omohu’ũ pe korasõ ha ombovevýi pe jehasa’asy. Kóva ha’e pe pu’aka ombokatupyryva’ekue upe túvape, osẽramo jepe ikapasida natural-gui, omantene hag̃ua itajýra pe hete hasykue ha emocional rupive operdekuévo hetyma.
Elder Soares ovisitarõguare Argentina junio ohasava’ekuépe ha oporandu Flavia-pe pe accidente vaite rehe, ha’e ombohovái jegueroviapýpe: “Ahasa sarambi, py’aro, pochy ha ja’e’ỹ [upéva oiko ramo]. Peteĩ mbaʼe chepytyvõva’ekue ha’e naporanduihague: ‘mbaʼérepiko chéve?’, ha katu ‘maẽrápa?’ … Kóva ha’e peteĩ mba’e chemoag̃uiva ambue tapichakuérare ha Ñandejára. … Añemomombyry rãngue Chugui, ajejagarramánte Hese.”15
Presidente Nelson ombo’e: “Pe jopói ñañongatu haguére umi konvénio Tupã ndive ha’e pu’aka yvagagua—pu’aka ñanemombaretéva jagueropu’aka porãve hag̃ua ñande prueba, jepy’ara’ã ha py’arasy. … Péicha, umi konvénio oñongatúva oguereko derécho peteĩ especial pytu’úre.”16 Péichagua pytu’u ha py’aguapy ahechákuri pe viúda resápe, ohechaga’u asyetéramo jepe iménape ko’ẽ ko’ẽvére.
Pe Nuevo Testamento omombe’u peteĩ ára Jesús ha i-discipulo-kuéra oĩha peteĩ várkope:
“Ha opu’ã peteĩ yvytu’atã tuichaite, ha umi ypu’ã oñeinupã pe várkore. …
“Ha ha’e … oke hína peteĩ aramboha ári, ha omombáy chupe hikuái ha he’i chupe: Mbo’ehára, nderehechakuaáipiko ñañehundiha?
“Ha opu’ã ha oja’o yvytúpe ha he’i yguasúpe: Py’aguapy, epyta kirirĩháme. …
“Ha he’i chupekuéra: Mba’érepiko pekyhyjete? mba’éichapiko ndapeguerekói jerovia?”17
Ymaite guive chemonambipu’ã ko tembiasa. Oha’arõpikora’e Ñandejára oipuru hikuái ijerovia ombopy’aguapy hag̃ua pe yvytu’atã? Ojaʼo hag̃ua umi yvytu? Jerovia Jesucristo rehe ha’e pe py’aguapy remiandu jagueropu’aka hag̃ua pe yvytu’atã, jaikuaágui nañañehundimo’ãiha oĩgui Ha’e ñanendive pe várkope.
Kóichagua jerovia rohechákuri rovisitarõguare umi familia tatarendy rire Chile-pe. Hogakuéra okaipaitékuri; operdepaite hikuái oguerekomia. Upevére jepe, roguata aja umi hóga rendaguépe ha ha’ekuéra omombe’u oréve umi mba’e ohasava’ekue, roñandu roñembo’yha yvy sagrádo ári. Peteĩ hermana he’i che rembirekópe: “Ahechávo umi óga hi’aguĩva okáipaha, añandu ore róga okáita, roperdepataha roguerekomia. Chepy’aropurãngue, añandu peteĩ py’aguapy remiandu amombe’ukuaa’ỹva. Opáichavo, añandu oĩporãmbataha.” Tupã rehe jajerovia ha ñañongatu umi ñane konvénio Hendive ogueru pu’aka ñande reko kangýpe ha angapyhy ñane ñembyasýme g̃uarã.
Cheaguyjeme’ẽterei pe oportunida Renee ha che roguereko haguére roikuaa hag̃ua mayma ko’ã Santo hechapyrãvape, umi hetaite jerovia jehechauka, mbarete ha perseverancia orekóvare. Umi ñembyasy ha desilusiõ tembiasakue araka’eve nosẽmo’ãi peteĩ diario páhina apére térã araka’eve ndoikomo’ãivagui viral. Umi ta’anga araka’eve nosẽiva tesay ñeñohẽgui ha ñembo’e oñeikuave’ẽva peteĩ pérdida térã umi ojopoi vaietéva rire, umi puvlikasiõ araka’eve ndojejapóiva pe kyhyje, pe ñembyasy, ha pe mba’e’asy rehe, ha ojegueropu’akaha jerovia rupi Jesucristo rehe ha Ijexpiasiõ. Koʼã tapicha omombarete che jerovia, ha upévare cheaguyjeterei.
Aikuaa kóva ha’eha Jesucristo Tupao. Aikuaa Ha’e oĩha ñaneinvesti hag̃uáicha Ipu’aka reheve jajúramo Hendápe peteĩteĩ ára ha ára ha árare. Jesucristo rérape. Amén.