Pu’aka ojesella hag̃ua
Pe pu’aka ojesella hag̃ua ojapo peteĩteĩme g̃uarã salvasiõ ha familiape g̃uarã exaltasiõ, oĩva opa yvy arigua Tupã ra’ykuéra ohupytykuaa hag̃uáicha.
Ojeprofetisava’ekue Isaías ára guive jepe,1 umi ára pahápe, Ñandejára tavayguakuéra konveniogua yma, Israel róga, “oñembyatytaha pe iñemosarambi pukúgui, umi islas del mar, ha irundy yvy renda guive”2 ha oñemoĩjeýta “ijyvy jehejapyrépe”3 Presidente Russell M. Nelson py’ỹi ha pu’aka reheve oñe’ẽ ko ñembyaty rehe, oñehenóiva “mba’e iñimportantevéva oikóva hína yvy ári ko árape.”4
Mba’épa ko ñembyaty propósito?
Revelasiõ rupi Proféta José Smith-pe, Ñandejára ohechauka peteĩ propósito ha’eha oñemo’ã hag̃ua tavayguakuéra konvenioguápe. Ha’e he’i, “Ñembyaty Sion retãme ha ijestakakuérape [ha’éta] ñeñongatuha ha ñemo’ãharã pe aravai ha ñeko’õigui, oñeñohẽ vove mbojehe’a’ỹre opa pe yvy ári.”5 “Ñeko’õi” ko’ápe ikatu oñentende ha’évaramo umi mba’e katuete oúva hetave naiñe’ẽrendúigui Tupã léi ha tembiapoukapykuérare.
Ha iñimportantevéva, ñembyaty propósito ha’e tojegueru salvasiõ ha exaltasiõ jehovasakuéra opa umi ko’ãva omog̃uahẽtavape. Kóicha oiko umi konvénio promésa oñeme’ẽva’ekue Abraham-pe. Ñandejára he’i Abraham-pe, iñemoñare ha sacerdocio rupi “ohehovasa[taha] opa tetãmegua ogayguakuéra, jepeve Evanhélio jehovasa reheve, ha’éva salvasiõ jehovasakuéra, tekove ijapyra’ỹva jepeve.”6 Kóicha he’i Presidente Nelson: “Ñamboajévo pe evanhélio ha ñañemongarai, ñamoĩ ñande jehe Jesucristo réra marangatu. Ñemongarai ha’e pe okẽ ñandegueraháva ja’ereda hag̃ua opa promésa yma Ñandejára ome’ẽva’ekue Abraham, Isaac, Jacob ha iñemoñarekuérape.”7
Moisés ojehechaukava’ekue Proféta José Smith-pe, Kirtland templope,1836-pe, ha “ome’ẽ … Israel ñembyaty llavekuéra irundy yvy rendágui.”8 Upe jave, ou Elías, ha “ome’ẽ Abraham evanhélio dispensasiõ, he’ívo, ñande ha ñane ñemoñarépe ojehovasataha opa ñemoñare’aty ñande riregua.”9 Kóva ko autorida reheve, jagueraha ko’ág̃a Jesucristo evanhélio—marandu porã redensiõ rehegua Ha’e rupive—opa yvy arigua tenda ha tavayguápe, ha ñambyaty opa umi oikeséva evanhélio konvéniope. Oiko chuguikuéra “Abraham ñemoñare, ha pe tupao ha rréino, ha Tupã poravopyre.”10
Upe jave Kirtland témplope, oĩkuri mbohapyha mensahéro yvagagua ojehechaukáva José Smith ha Oliver Cowdery-pe. Añe’ẽ proféta Elías-re, ha ko ára añe’ẽse pe autorida ha lláve ha’e orrestaurava’ekuére.11 Pu’aka ojevalida hag̃ua opa sacerdocio ordenánsa ha umíva legal hag̃ua yvy ári ha yvágape—pe pu’aka sellador—tekotevẽterei, oñembyaty ha oñembosako’i hag̃ua peteĩ tavayguakuéra konveniogua, mokõive vélo ládogui.
Heta ary upe mboyve, Moroni omohesakãva’ekue José Smith-pe, Elías oguerutaha sacerdocio pu’aka tekotevẽva: “Che arreveláta peẽme pe sacerdocio, Elías, upe proféta po rupi.”12 José Smith upéi omohesakã: “Mba’ére oñembou Elías-pe? Ha’e orekógui autorida llavekuéra oadministra hag̃ua opa Sacerdocio ordenánsape; ha [ỹrõ] oñeme’ẽ pe autorida, umi ordenánsa ndaikatumo’ãikuri oñeadministra tekojojápe”13—péva he’ise, umi ordenánsa ndovalemo’ãikuri tiempo ha eternidápe.14
Peteĩ mbo’epýpe, ko’ág̃a oñekanonisáva escritura-ramo, Doctrina ha Konveniokuérape, Proféta he’i: “Oĩne he’íva ijatrevidoha ko doctrina ñañe’ẽvare hína—peteĩ pu’aka ohaíva térã oñapytĩva ko yvy ári ha avei yvágape. Upevére, opa múndo edápe, oimeraẽ ára Ñandejára ome’ẽ jave peteĩ sacerdocio dispensasiõ peteĩ tekovépe térã tekovekuéra atýpe, rrevelasiõ añete rupive, akóinte oñeme’ẽva ko pu’aka. Upéicha, opa mba’e umi kuimba’e ojapova’ekue autorida reheve, Ñandejára rérape, ha ojapo hikuái añetépe ha jeroviarekópe, ha ogueraha hikuái peteĩ jehaipyre umívagui, oĩporãva ha ijeroviapýva, kóva ha’ékuri peteĩ léi yvýpe ha yvágape, ha, upe Jehová guasu opaukapykuérape he’iháicha, ndaikatúikuri oñemboparei.”15
Heta vése ñaimo’ã pe autorida ojesella hag̃ua ha’eha umi templogua ordenánsape g̃uarã añónte, ha katu upe autorida oñeikotevẽ oimeraẽ ordenánsa ovale ha ojoaju hag̃ua ñemano mboypýri.16 Pe poder sellador ome’ẽ peteĩ legitimida séllo pende bautismo-pe, tembiecharã, oñerrekonose hag̃ua ko’ápe ha yvágape. Ipahápe, opa sacerdocio ordenánsa ojejapo pe Tupao Presidente llavekuéra guýpe, ha Presidente Joseph Fielding Smith omyesakã haguéicha, “Ha’e [pe Tupao Presidente] ome’ẽkuri ñandéve autorida, ha’e omoĩkuri pe pu’aka ojesella hag̃ua ñande sacerdocio-pe, ha’e oguerekógui ko’ã lláve.”17
Oĩ ambue propósito iñimportánteva Israel ñembyatýpe orekóva peteĩ signifikádo espesial ñañe’ẽramo yvy ári ha yvágape jesella rehe—péva he’ise templo-kuéra ñemopu’ã ha tembiapo ipypegua. Proféta José Smith omysakã haguéicha: “Mbaʼépa haʼékuri Tupã tavayguakuéra … ñembyaty propósito oimeraẽ yvoragua épokape? … Pe propósito principal ha’ékuri oñemopu’ã hag̃ua peteĩ óga Ñandejárape g̃uarã, Ha’e ikatuhápe oikuaauka Itavayguakuérape Hogagua ordenansakuéra ha umi Irreinogua glória, ha ombo’e tavayguakuérape salvasiõ rape; oĩgui umi ordenánsa ha principio, oñembo’e ha ojejapóramo, ojejapova’erã peteĩ tenda térã óga upevarã oñemopu’ãva’ekuépe.”18
Validés pe pu’aka ojesella hag̃ua ome’ẽva sacerdocio ordenansakuérape oike, katuete, umi ordenánsa vikária ojejapóva tenda Ñandejára ohechaukahápe—Itémplope. Ko’ápe jahecha pe poder sellador pu’aka tuichakue ha marangatukue—ojapo salvasiõ individual ha familia exaltasiõ toĩ mayma Tupã ra’ykuéra ohupytykuaa hag̃uáicha, taha’e moõ térã araka’épa oikóra’e yvy ári. Ndaipóri ambue teología, filosofia térã autorida ombojojáva kóichagua oportunida enterovete oikeha. Ko pu’aka ojesella hag̃ua ha’e hustísia, poriahuvereko ha Tupã mborayhu rechauka porãmba.
Ikatúvo jaiporu pe pu’aka ojesella hag̃ua, umi ñane korasõ ojere voi umi ñane mboyvegua gotyo. Ára pahapegua ñembyaty konvéniope ojehasa pe vélo rupive. Tupã orden iporãmbávape, umi oikovéva ndaikatúi oñandupaite pe tekove opave’ỹva, ojapo’ỹre joaju hi’aréva “tuvakuéra,” ndive, ñane ñemoñarekuéra. Péicha avei, umi oĩmava ambue ládo jekakuaa, térã ikatúva gueteri ohasa ñemano vélo rupive umi sellamiento venefísio ỹre, noimbái, umi ordenánsa vikária ombojoaju peve chupekuéra ñanderehe, iñemoñare, ha ñandéve hesekuéra órden divínope.19 Kompromíso ñañopytyṽo hag̃ua vélo rupive ikatu oñemohenda peteĩ konveniogua promésa ramo, konvénio pyahu ha ijapyra’ỹva pehẽ. José Smith ñe’ẽme, ñande jaipota “ojesella umi ñande omanova’ekue ha tosẽ [ñanendive] jeikovejey peteĩháme.”20
Pu’aka ojesella hag̃ua jehechauka ijyvateve ha isantovéva oiko peteĩ kuña ha peteĩ kuimba’e jojau eterno ñemendápe, ha yvyporakuéra ñembojoajúpe opa iñemoñare’aty rupive. Isagradoitégui autorida oje’ofisia hag̃ua ko’ã ordenánsape, pe Tupao Presidente ha’ete voi osupervisa ambuekuérape oñeme’ẽ. Presidente Gordon B. Hinckley he’i peteĩ ára, “Heta ára ha’éva, mba’eve nosẽiramo opa pe rrestaurasiõ vy’a’ỹ, jehasa’asy ha mba’erasýgui, ndaha’éirõ pe sánto sacerdocio pu’aka sellador oñembojoaju hag̃ua familiakuéra tapiaite g̃uarã, ovaleva’erãmo’ã opa mba’e okostava’ekue.”21
Umi sellamiento ỹre, ojapóva familia eterna ha ombojoajúva umi ñemoñare’aty ko’ápe ha ára oúvape, japytátakuri eternidápe umi hapo ha haka’ỹre—péva he’ise, ypykue’ỹre ni ñemoñare. Ko tapichakuéra ñeime’año ha joaju’ỹme, peteĩ ládope, térã umi joaju odesafiáva ñemenda ha umi rrelasiõ familiar Tupã omoĩva’ekue,22 ambue ládope, ha’e pe ombyaítava ko yvy apopy propositoite voi. Upévagui oikóramo norma, ha’éta pe yvy ojehavirarõguáicha peteĩ ñe’ẽngái reheve, térã “oñehundipaite” Ñandejára jejúpe.23
Jahecha mba’érepa “kuimba’e ha kuña ñemenda oñeordena Tupãre, ha pe familia tekotevẽteha ñande Apohare plan-pe, Ta’yrakuéra destíno ijapyra’ỹvape g̃uarã.”24 Ha jahecha avei, ko presente imperfeto-pe, kóva ndoikoiha ha ndaha’éiha peteĩ mba’e ikatúva oiko jepe oimeraẽvape g̃uarã. Ha katu jareko esperánsa Cristo-pe. Ñaha’arõ aja Ñandejárape, Presidente M. Russell Ballard ñanemomandu’a “umi escritura ha profetakuéra ára pahapegua okonfirma opavave ijeroviarekóva oñongatúvo evanhélio konveniokuéra, orekotaha oportunida exaltasiõrã”.25
Oĩ ohasáva hogapýpe vy’a’ỹ ha mba’evai, ha sa’i oñandu oipotaha peteĩ joaju familiar opave´ỹva. Elder David A. Bednar péicha ohecha: “Peẽ pehasava’ekue divorcio rasykue pene famíliape, térã jehasa’asy oúva jerovia jejapyhara rupi, penemandu’áke [Tupã modélo familia-kuérape g̃uarã] oñepyrũ jeyha penendive! Ikatu osóra’e peteĩ ñane ñemoñare’aty itasã joajuha, ha katu ambue joaju hekojojáva ha pe itasãgui hembýva, iñimportánte gueteri tapiaite g̃uarã. Ikatu pemombareteve pene itasã ha ikatu peipytyvõ jepe pemyatyrõ hag̃ua umi ojoajuhápe osóva. Upe tembiapo ojejapova’erã peteĩteĩ.”26
Hermana Pat Holland, Elder Jeffrey R. Holland rembireko servicio funeral-pe, julio ohasávape, Presidente Russell M. Nelson ombo’e: “Ára og̃uahẽvo, Patricia ha Jeffrey ojotopajeýta. Upéi ojoajúta hendivekuéra imitãnguéra ha iñemoñare konvénio ñongutaha, oñandu hag̃ua vy’a paha Tupã orekóva ñongatupy Ita’yrakuéra ijeroviarekóvape g̃uarã. Péva jaikuaávo, ñaikũmby pe ára iñimportantevéva Patricia rekovépe ndaha’eihague ára onase ni omanohague. Pe ára iñimportantevéva chupe g̃uarã ha’ékuri junio 7, 1963-pe, ha’e ha Jeff ojesellárõ guare St. George Templo-pe. … Mba’ére kóva iñimportanteterei? Pe yvy ojejapóguikuri ikatu hag̃ua familiakuéra oñemonhenda ha ojesella ojuehe. Salvasiõ ha’e peteĩ asunto individual, ha katu exaltasiõ ha’e peteĩ asunto familiar. Avave ndaikatúi oje’exalta ha’eño.”
Nda’aréi che ha che rembireko roñembyaty peteĩ angirũ rohayhúvandi peteĩ sellamiento kotýpe, Bountiful, Utah templo-pe. Aikuaa ypýkuri ko angirũme imitãme, Córdoba, Argentina-pe. Che kompañero misiõmegua ha che roñe’ẽkuri hína tapichakuérandi peteĩ vecindario-pe, namombyrýi oficina de misión-gui, ha ha’e ombohovái pe hóga rokẽmẽ rog̃uahẽvo. Hi’árape, ha’e ha isy ha ijoyke’ykuéra ojoaju Tupoaóre, ha ha’égueteri hikuái miembro ijeroviarekóva. Ko’ág̃a ha’e peteĩ kuña horýva, ha upe ára roimékuri templo-pe osella hag̃ua ojuehe ituvakuérape, omanova’ekue, ha upéi ojesella hag̃ua chupe hesekuéra.
Peteĩ paréha, ary ohasávo ha’évakuri angirũ ag̃ui, orrepresenta ituvakuérape altar-pe. Ha’ékuri momento emotívo, he’ẽvéva jepe, ore angirũ argentina-gua ojesellávo ituvakuéra ndive. Roimékuri séinte pe ka’aru kirirĩme mombyry múndogui, ha upevére, oikókuri hína peteĩ umi mba’e iñimportantevéva araka’eve yvy ári oikóva. Avy’aitékuri che rembiapo ha joaju oujey haguére iñepyrũme apoko ypy guive hokẽme, misionero imitãva ramo, ko’ág̃a peve, ko’ã heta ary rire, ojapóvo umi sellamiento ordenánsa ombojoajúva chupe ituvakuéra ha ñemoñare’aty ohasava’ekue ndive.
Kóva ha’e peteĩ mba’e oiko meméva opa templo múndo jerére. Kóva ha’e paso paha oñembyaty hag̃ua tavayguakuéra konveniogua. Ha’e pene membresía priviléhio ijyvatevéva Jesucristo Tupaópe. Apromete peẽme pehekáramo upe priviléhio jeroviarekópe, ára térã ára apyra’ỹme, añete penemba’éta.
Atestifika pu’aka sellador ha autorida oñemoĩjeyva’ekue yvy ári José Smith rupive añeteha, pe oñeñapytĩva yvy ári, oñeñapytĩ añeteha yvágape. Atestifika Presidente Russell M. Nelson, Tupao Presidente ramo, ha’eha peteĩete kuimba’e illáve rupive oisãmbyhýva ko árape ko pu’aka supremo jeiporu. Atestifika Jesucristo Expiasiõ omoañeteha inmortalida ha familiakuéra relasiõ je’exalta ikatuha oiko. Jesucristo rérape. Amén.