Ñane irũ akoiete
Che ha peẽ jareko oportunida jaguereko hag̃ua Espíritu Santo ñane irũ akoiete ramo.
Che hermano ha hermana-kuéra ojehayhúva, ko conferencia-pe jajehovasákuri rrevelasiõ ñeñohẽ reheve. Ñandejára Jesucristo siervo-kuéra oñe’ẽkuri ha oñe’ẽta ñe’ẽ añetegua, ñemokyre’ỹ ha ñesãmbyhy rehegua.
Chemopirĩ umi testimónio oñeme’ẽva ko conferencia-pe Ñandejára oñeha’ẽha petẽteĩ ñandéve Espíritu Santo rupive. Ñañembo’e ha upéi jajapysakáramo umi Espíritu Santo impresiõre, jahupytyve kuaapy ha jehovasa ñanemboguatáva umi ára oúva hasy hasyvéva rupive.
Ñahendu jeýkuri Presidente Russell M Nelson ñemomarandu “umi ára oúvape, ndaikatumo’ãiha jagueropu’aka espiritualmente, pe Espíritu Santo ñemboguata, ñeisãmbyhy, ñemoangapyhy ha tapiagua influénsia’ỹre.”1
Pe ñemomarandu profétiko chemopy’amongeta mba’épa ambo’eva’erã che ra’ykuéra, che nieto ha che tataranieto-kuérape mba’éicha ikatu oguereko hikuái ñemboguata tekotevẽva umi ára hasyete oútava chupekuéra g̃uarã.
Upéicha ko aragua mensáhe ha’e peteĩ kárta mbyky che ñemoñarekuérape ikatúva oipytyvõ chupekuéra che naimevéi vove hendivekuéra umi ára guasu oútavape. Aipota oikuaa hikuái aikuaahague mba’épa oipytyvõkuaa chupekuéra.
Aikũmby porãvéva mba’épa oñeikotevẽ oguereko tapia hag̃ua hikuái Espíritu Santo influénsia umi ára ha’ekuéra oikovetahápe. Añandúkuri impresiõ añe’ẽ hag̃ua ko árape che experiencia personal rehe ainvita hag̃ua Espíritu Santo-pe, ag̃uive che ikatuveháicha, ha’e hag̃ua che irũ tapia. Che ñembo’e ha’e tomokyre’ỹ chupekuéra.
Añepyrũta pomopensávo ha tapeñembo’e Helamán ra’ykuéra rehe, Nefi ha Lehi, ha ambue Ñandejára rembiguakuéra omba’apova’ekue hendivekuéra rehe. Ha’ekuéra ombohovake ivaíva oposisiõ. Oservíkuri hikuái teda ñañáme ha oñorairõ japu vaiete reheve. Chembopy’aguasu, ha ikatu peẽme avei, ko Helamán jehaipyre versíkulo:
“Ha ary setenta y nueve-pe oñepyrũ oĩ heta joavy. Ha katu ojehu Nefi ha Lehi, ha heta ijoykeʼykuéra oikuaáva upe doctrina añeteguáva rehegua, oñemeʼẽgui chupekuéra heta rrevelasiõ opa ára, upévare omboʼe hikuái tavayguakuérape, upéicha rupi ombopaha hikuái ijoavykuéra upe arýpe.”2
Ko ñemombe’u chemokyre’ỹ, ha penemokyre’ỹkuaa avei peẽme. Helamán ra’ykuéra oñehekombo’e ha oñemboguata heta experiencia rupi Espíritu Santo ndive. Kóva oasegura chéve ikatuha ñañehekombo’e ha jaikuaa pe Espíritu Santo-gui sa’i sa’i, jahupytývo pe ñaikoteṽeva, ha upéi ñeime vove listo, jahupytyvéta.
Péicha añemokyre’ỹva Nefi ñemombe’u rupi ojejerurévo chupe ojevy hag̃ua Jerusalén-pe Labán planchakuérare. Penemandu’a jeporavo ha’e ojapóvakuri. Ha’e he’i, “Aháta ha ajapóta umi mba’e Ñandejára he’iva’ekue.”3
Nefi rembiasa Espíritu Santo ndive upe tembiapópe, chemokyre’ỹva heta ára aike jave umi tembiaporãme aikuaáva ha’eha Ñandejáraguigua asignasiõ ha katu ha’ete ku mombyrýva umi che rembiasakuégui ha pe che ahechávagui ikatuha ajapo.
Penemandu’a mba’épa Nefi he’i hembiasa rehe: “Ha pyharéma; ha amokañy [chupekuéra] pe tápia kupépe. Ha okañy rire hikuái, che, Nefi, aike kañyháme pe tavaguasúpe ha aha Labán róga gotyo”.
Ha’e he’ive, “Ha chegueraha pe Espíritu, aikuaa mboyveʼỹre mbaʼépa ajapovaʼerã.”4
Chemokyre’ỹva oikuaávo Nefi oñeisãmbyhyhague Espíriture minuto a minuto pyhare pukukue aja Ñandejára rembiapópe.
Ñande ñaikotevẽ, ha peẽ peikotevẽta, Espíritu Santo ñemoirũ tapiagua. Ko’ág̃a, ñande jaipota, ha katu jaikuaa ñane rembiasa rupi hasyha jahupyty hag̃ua. Peteĩteĩ ñande ñapensa ha ja’e ha jajapo ñande rekove ára ha araguápe umi mba’e ikatúva o’ofende pe Espíritu.
Upéva oikóramo, oikotaháicha, ikatu ñañandu Ñandejára ndoguerohorýi. Ha ikatu ñañanduse ñaimeha ñane’año. Iñimportánte ñanemandu’a hag̃ua promésa segúra jahupytýva káda semána ñañearrepenti ha japartisipáramo Santa Cena-gui: “Tapiaite oguereko hag̃ua Ijespíritu hendivekuéra.”5
Peñandúroamo Espíritu Santo influénsia ko ára, ikatu pejapyhy evidénsia he’ẽtévaramo, pe Expiasiõ omba’apoha hína pende rekovépe.
Elder Jeffrey R. Holland he’i haguéicha: “Og̃uahẽ jave ko’ã ñane momento ijetu’úva, ani jakyhyje Tupã ñande rejareiha térã nohenduiha umi ñane ñembo’e. Ha’e ñane rendu. Ha’e ñande recha. Ha’e ñande rayhu.”6
Upe segurida chepytyvõkuri. Añandu jave chemombyry Ñandejáragui, umi che ñembo’e ñembohovái ha’ete jave oñembo’are, aikuaákuri asegi hag̃ua Presidente Nelson ñemoñe’ẽ ama’ẽmi hag̃ua che rekovére ajuhu hag̃ua oportunida añearrepenti hag̃ua. Ha’e ñanemomandu’a, “Pe arrepentimiento diario ha’e tekopotĩ rape, ha tekopotĩ ogueru pu’aka.”7
Pejejuhúramo hasyhahína peñandu pe Espíritu Santo, ikatu peñeporandu oĩpa oimeraẽ mba’e ikatuha peñearrepenti ha pehupyty perdón.8 Ikatu peñembo’e jerovia reheve peikuaa hag̃ua mba’épa pejapova’erã penepotĩ hag̃ua ha péicha pekalifika porãve peguereko hag̃ua upe Espíritu Santo ñemoirũ tapia.
Pehupytyséramo Espíritu Santo ñemoirũ tapia, peipotava’erã oĩporãgui péicha. Umi pende propósito ha’eva’erã Ñandejára propositokuéra. Umi mba’ére peipota ha’éramo pendejupe g̃uarãnte, hasýta pehutypy ha peñadu hag̃ua umi Espíritu Santo impresiõ.
Pe kláve chéve ha peẽme g̃uarã oĩ jaipota Salvador oipotáva. Ñande motivo oñemokyre’ỹva’erã Cristo mborayhu potĩ rupi. Ñane ñembo’e ha’eva’erã “Opa che aipotáva ha’e upe nde reipotáva. Tojejapo ne rembipota.”
Añeha’ã chemandu’a pe Salvador jehasa’asy ha Imborayhu cherehe. Upéi, añembo’e jave Túva Yvagaguápe ame’ẽ hag̃ua aguyje, añandu mborayhu ha aikuaaporã umi che ñembo’e oñehenduha ha oñeme’ẽtaha pe iporãvéva chéve g̃uarã ha umi ahayhúvape g̃uarã. Omombarete che testimónio.
Opa mba’e pe Espíritu Santo otestifikávagui, pe iporãvéva ñandéve g̃uarã ha’e Jesús ha’eha pe Cristo, Tupã Ra’y oikovéva. Pe Salvador opromete, “Ou vove Moangapyhyhára, che amboútava peẽme Túvagui, añetegua Espíritu jepe, Túvagui oúva, ha’e otestifikáta chehegui.”9
Ojapo heta ary cherenoihague peteĩ sy ojepy’apýva. He’i chéve imemby kuña ovahague mombyry hógagui. Ha’ẽ oñandúkuri sa’i oñe’ẽre imemby kuñándi oĩha mba’e ivaietéva. Ojerure’asy chéve aipytyvõ hag̃ua chupe.
Ajuhúkuri mávapa pe imemby maestro orientador. Ko térare pehechakuaa ymaguaréma péva. Ahenói chupe. Ha’e imitãkuri. Upevére he’i chéve ha’e ha iñirũ opayhague pyharekue ndaha’éi ojepy’apýnteva upe memby kuña rehe, ha katu inspirasiõ reheve, ha’e ojapopotaite hína umi desisiõ oguerútava chupe vy’a’ỹ ha teko’asy. Upe espíritu inspirasiõ rehe añónte oho hikuái ohecha chupe.
Primerorã ha’e noñe’ẽséi hendivekuéra isituasiõ rehe. Inspirasiõ guýpe, ha’ekuéra ojeru’asy chupe oñearrepenti hag̃ua ha oiporavo tape Ñandejára orekóva chupe g̃uarã. Upérõ ha’e ohechakuaa, che arovia Espíritu rupi, Tupãgui añoite ikatuhákuri oikuaa hikuái pe mba’e oikuaáva hekove rehegua. Peteĩ sy ombojere ijepy’apy mborayhu rehegua Túva Yvagagua ha Salvador gotyo. Pe Espíritu Santo oñemboúkuri umi maestro orientador-pe, oĩgui hikuái dispuesto oservi hag̃ua Ñandejárape. Oseguíkuri hikuái ñemoñe’ẽ ha promésa ojejuhúva Doctrina ha Konveniokuérape:
“Eheja avei tahenyhẽ nderyepy karidágui opa tekovekuérandi, ha nde jeroviápe nemoirũva ndive, ha eheja pe virtu tombojegua meme ne akãmegua; upérõ ndejeroviapy oñemombaretéta Tupã renondépe; ha sacerdocio doctrina otyky tykýta ne ánga ári yvagagua ysapýicha”.
“Pe Espíritu Santo ha’éta ne irũ tapia, ha nde vára, peteĩ vára iñambue’ỹva hustísia ha añeteguágui; ha ndepu’akareko ha’éta peteĩ pu’akareko ijapyra’ỹva, ha jejopy’ỹme oútava ndéve akói ha tapiaite g̃uarã.”10
Atestifika Ñandejára okumpliha Ipromésa. Pe Espíritu Santo oñembou hína Jesucristo Tupao konveniogua miembro-kuéra ijeroviarekóvape. Ko’ág̃a, umi pene rembiasa peteĩetéta, ha pe Espíritu pene mboguatáta iporãveháicha pende jeroviáre ha pende katypyry pehupyty hag̃uáre rrevelasiõ peẽme g̃uarã ha umi pehayhúva ha peservívape g̃uarã. Añembo’e che py’aiyte guive tokakuaa pende jeroviapy.
Che atestifika peẽme Tupã pe Túva oikoveha. Ha’e penderayhu. Ohendu opaite peneñembo’e. Jesucristo oñembo’e Túvape ombou hag̃ua pe Espíritu Santo ñanemboguata, ñaneomoangapyhy, ha otestifika hag̃ua ñandéve añeteguágui. Pe Túva ha Ita’ýra Ohayhuetéva ojehechaukava’ekue José Smith-pe peteĩ yvyramáta týpe. Proféta José Smith ombohasava’ekue Mormón Kuatiañe’ẽ Tupã don ha pokatu rupive.
Maranduharakuéra yvagagua omoĩjey sacerdocio llavekuéra. Presidente Russell M. Nelson ha’e Tupã proféta opa yvy ári oikóvape g̃uarã.
Testigo ramo Jesucristo-gui, che aikuaa Ha’e oikove ha Ha’e oisãmbyhyha Itupao. Peẽ ha che jaguereko oportunida jareko hag̃ua Espíritu Santo ñane irũ tapiávaramo, ha toñekonfirma ñandéve ko’ã añetegua, jahayhu ha ñanemandu’áramo Salvador rehe, ñañearrepenti, ha jajerure Imborayhu toĩ ñane korasõme. Añembo’e tajaguereko upe jehovasa ha Espíritu Santo ñemoirũ ko ára ha opa ára ñande rekovépe. Che pohayhu. Jesucristo réra sagrádope, Amén.