Mba’eichaite tuicháta pende vy’a
Ko’ág̃a poinvita pejapyhy hag̃ua umi jejapo kuaa, pene testimónio consagrado ndive, ha pejapo peteĩ misiõ.
Hermano ha hermana-kuéra pejehayhuetéva, ko árape che pensamiento oĩ Israel ñembyatýpe, Presidente Russell M. Nelson ohenóiva “iñimportantevéva ojehúva ko’ág̃a yvy ári. Mba’eve ndaikatúi oñembojoja tuichakuépe, mba’eve ndaikatúi oñembojoja importancia-pe, mba’eve ndaikatúi oñembojoja, majesta-pe.”1
Pe ñembyaty ha’e jehechakuaa paha “angakuéra repy tuichaiteha Tupãme g̃uarã.”2 Ha péicha ningo ndahasyiete. Ñambyaty hína Tupã ra’ykuéra ko’ã ára pahápe oreko hag̃ua hikuái “jehovasapy oñehẽva iñakãnguéra ári”3 ha umi promesa “eternida-pegua riqueza-kuéra.”4 Upévare oñembyaty hag̃ua Israel-pe ñaikotevẽ misionero-kuérare—hetave oservívagui hína.5 Ko árape añe’ẽta heta umi Tupaogua experimentado ika’arúmavape ikatúva oservi misionero-kuéra ramo. Ñandejára oikotevẽ penderehe. Roikotevẽ penderehe Nueva York ha Chicago-pe, Australia ha África-pe, Tailandia ha México-pe, ha opa tenda umía apytépe.
Pehejami tapogueraha áño 2015-pe. Che peteĩ miembro oñehenói ramoitéva Quórum de los Doce Apóstoles-pe. Umi responsabilida porãite roguerekóva Apóstoles ramo ha’e romoĩ misionero-kuéra tenda omba’apotahápe hikuái. Aimémakuri Setenta ramo upe proceso-pe,6 ha katu ko’ág̃a, Apóstol-ramo, añandu tembiapo pohyikue. Añepyrũ amoĩvo ñembo’épe hetaite élder ha hermana-kuéra imitãva, peteĩteĩ, misión-pe múndo jerére. Upéi aha umi paréha tuichavévape. Oĩ 10 lista-pe. Ndahetái hikuái. Ñemondýipe, aporandu che irũ Departamento Misional-peguápe, “Mboy ñaikotevẽ ko semánape ñakumpli hag̃ua umi ojejeruréva?”
Ha’e ombohovái : “300”.
Upe moménto oporombo’éva opyta chendive: 10 pareja omyanyhẽ hag̃ua 300 pedido.
Presidente Russell M. Nelson omokyre’ỹ umi paréhape “toñesũ ha toporandu Túva Yvagaguápe ha’épa pe moménto porã oservi hag̃ua peteĩ misiõme.”7 Opa umi calificación-gui, he’i, “pejeservise ikatu pe iñimportantevéva.”8
He’iháicha Escritura, “Tupãme peserviséramo peñehenói tembiapópe.”9 Ko tembiapo oĩ pe kosécha léi ndive. Jalee Juan-pe, “Pe oñotỹva ha omono’õva ovy’áta hikuái oñondive.”10
Ahecha oñekumpli pe kosécha léi che familia-pe.
Ojapo áño avisita jave che familia-pe obispo ojerure chéve amohu’ã hag̃ua servicio sacramental.11 Aguejy aja estrado-gui, peteĩ kuñakarai oñemboja cherehe umi siete imembykuéra reheve ha oñepresenta hermana Rebecca Guzmán ramo.
Ha’e oporandu: “Élder Rasband, reikuaapiko Rulon ha Verda Rasband-pe?”
Apukavy ha ambohovái, “Ha’ekuéra che sy ha che ru.”
Ikatu pehecha moõ gotyopa oho kóva. Rebecca permiso-re, oĩva ko’a Centro de Conferencias-pe ifamilia ndive, akomparti ifamilia historia.12
Che rukuéra, Elder Rulon ha hermana Verda Rasband, oservi matrimonio mayor ramo Florida, Fort Lauderdale Misión-pe.13 Ojapo jave proselitismo ha, guía divina rupive, ohenói hikuái Rebeca róga rokẽme. Ha’e peteĩ adolescente-nte ha ohenduseterei umi Osmond purahéi, ha ogustavéva ore amígo Donny-pe—oĩva ko’ápe ko ára.14 Ohendúkuri umi entrevista medio-kuérape ha oikuaa ha’eha Jesucristo Tupao Santokuéra Ára Pahapegua miembro-kuéra. Oñandu oĩha iñambuéva ipypekuéra ha, opensávo ikatuha irreligiõ, Rebecca ohasa mokõi áño ojeporekávo umi Tupao creencia mbo’ehao biblioteca-pe. Upémarõ, peteĩ paréha ha’etévaicha horýva ohenói ifamilia rokẽme ha oñepresenta hikuái misionero Santokuéra Ára Pahapeguáramo, ha’e oñesorprende.
“Che sy he’i chéve tapoi chuguikuéra,” ohai upe rire Rebecca, “ha katu che korasõ he’i ‘Nahániri.’ Amaña hovarekuéra, ha añandu hetaite hakuvýva ha mborayhu. Mandu’a ogueru gueteri tesay che resápe ha emosiõ ipypukúva che korasõme.”15
Rebecca oinvita chupekuéra tohasa ha che rukuéra misionéro okomparti peteĩ mensáhe hendive, mokõi iñermana michĩvéva ha, imbohovái ramo jepe, isy.
Rebecca omombe’u chéve: “Nde rukuéra oiporãiterei omyesakãvo oréve oimeháichagua roporanduséva. Ahecha vaicha gueteri hovakuéra ojererõguáicha hesekuéra tesape. Akóinte roñañuã nde sýpe ohokuévo ha ha’e akói oñeha’ã chepytyvõ añeñandu porã ha ajetrata porã hag̃ua. Nde ru akóinte hesa mimbi orembo’e jave Jesucristo-re. Oñeha’ã omoinge che rúpe umi charla-pe ha ipahápe ha’e ogana. Che ru chef-va’ekue peteĩ club de campo upepeguápe ha oñepyrũ ombosako’i cena nde rukuérape g̃uarã, oikehápe upe tarta de lima ohayhuetéva nde ru.”16
Élder ha hermana Rasband ojerurévo Rebecca ha ifamiliape tolee Mormón Kuatiañe’ẽ, Rebecca ojapo cinco día-pe. Ha’e pya’e ikaraise, ha katu ambue ifamiliaguakuéra noiméi gueteri listo. Cuatro mése rire, Rebecca he’ijey ikaraiseha ha oikeseha Tupao añeteguápe. Ha’e imandu’a, “Káda che ánga ku’ikuemíme aikuaa añeteguaha.”17 Upe 5 de abril 1979-pe, misionero-kuéra omongarai Rebecca-pe, 19 áño orekóva, isy ha mokõi iñermanakuérape. Che ru ha’e testígo upe ñemongaraípe.
Aikuaa ramo Rebecca ha ifamiliape tupaópe, ajapo peteĩ fóto ifamíliagui chendive. Agueraha ógape che sy g̃uag̃uimíme ha ha’e omboja ag̃ui ikorasõre. Upéi he’i chéve, “Ronnie, kóva ha’e peteĩ umi ára avy’aveha.”
Che sy ñembohovái ogueru porandu umi ñande mayor-kuérape, ”Mba’e pejapopeína ko ára aja pende rekovépe?”. Oĩ heta mba’éichapa umi misionéro mayor ikatúva ojapo avave ikatu’ỹva ojapo. Peẽ ha’e umi mba’eporãrã mbarete, ojehecháva Tupaópe ha oñembosako’íva omokyre’ỹ ha omosãso hag̃ua Tupã ra’ykuérape.
Oiméne pende apytépe ikatúva opensa: “Ha katu mba’etekópa umi niéto jeheja? Rohechaga’uetéta umi familia ñembyaty, aramboty, amigokuéra ha uvei umi ñane rymba”. Aporandu rire che sýpe mba’érepa ha’e ha che ru ohova’ekue misiõme, aikuaa he’itaha koicha: “Areko heta niéto. Aipota oikuaa hikuái nde ru ha che roservihague campo misionérope, rome’ẽsévo ehémplo ore ñemoñarépe, ha rojehovasa, heta rojehovasa.”
Avisitávo umi misiõ opa múndo jerére, ahecha servicio techapyrã ojapóva ñane misionero-kuéra veteráno legiõ. Hesakã ovy’aha hikuái ojapóvo “Ñandejára oipotáva” ha omba’apóvo “umi Ñandejára negocio-pe.”18
Hetápe g̃uarã, ha roha’arõ míle pende apytépe, pe servicio misional de tiempo completo ambue múndo rincón-pe ha’éta upe tendaite porã.19 Ambuekuérape g̃uarã katu, ikatu oserviseve hógape peteĩ Tupao misión de servicio. Umi mba’asy ha ambue mba’ére, oĩ ikatu’ỹva oservi. Rontende ko’ã situasiõ ha aha’arõ ojuhu hikuái mba’éichapa oipytyvõta umi ojapóvape servicio. Pesegi proféta consejo ha peñembo’e peikuaa hag̃ua mba’épa oipota Ñandejára pejapo.
Umi misionéro kámpo opa múndo pýre ojerure hína ñeipytyvõ. Presidente Nelson he’i umi ñane misionéro tuichávagui, “Ha’ekuéra imitã ijespíritupe, iñarandu ha oĩva dispuesto omba’apo.”20
Campo-pe, peguereko peteĩ hetáichagua oportunida jehe’a: ikatu peservi misiõ térã témplo oficina-pe, misionero-kuéra imitãva ñemombarete, umi ráma michĩ ñemokyre’ỹ, mba’apo umi Historia Familiar centro térã tenda histórico-pe, instituto-pe ñehekombo’e, servicio humanitario ñeme’ẽ, mba’apo umi kakuaa imitãvandi, pytyvõ umi centro de empleo térã Tupao granja-pe. Umi mba’éichapa peservíta, opyta porãvéva peẽme, oñeikotevẽháicha ha mba’éichapa ikatu peñembosako’i peñepyrũ hag̃ua pehechakuaa sitio web “Misionero Mayor-pe.”21 Avei ikatukuaa peñe’ẽ pende obispo térã presidente de rama ndive.
Ahenói heta paréhape oservi hag̃ua ha ahecha mba’éichapa pe Cristo Resape omyenyhẽ hovakuéra.22 Ojevývo, omombe’u hikuái mba’éichapa oñemoag̃uive Ñandejárare ha hi’ag̃uive ojuehegui, oñandu hikuái Ñandejára Espíritu oñehẽvo hi’arikuéra, ha oikuaa hikuái ojapoha peteĩ diferencia.23 Mávapa ndoipotaichéne upéva?
Peteĩ misiõ ikatu ha’e pe kapítulo iñimportantevéva peteĩ paréha rekovépe. Peteĩ título porã ikatu ”Che Ñandejára oikotevẽ cherehe.”24 Ikatu peime peteĩ terréno peikuaa’ỹvape; upeichavérõ, pe Espíritu mbarete ojapóta peñeñandu pende rogapeguáicha.
Che rukuéra ha umi decena de mile paréha misionero-kue ome’ẽ hikuái testimónio vy’a rehegua ojuhuva’ekue tembiapo misional-pe. Ñandejára he’íkuri Escritura-kuérape ára pahápe, “Ha pemba’apóramo opa pende ára perosapukáivo arrepentimiento ko tavayguápe, ha pegueru chéve, jepe peteĩ ánga, tuicháta pende vy’apavẽ hendive Che Ru rréinope!”25
Isaías ome’ẽ peteĩ descripción poética he’isévagui jeservi “kampo” misionérope. Escritura-kuéra he’i ñandéve “kampo ha’eha múndo.”26 Ko proféta ymaguare tuichaite ohai, “Vy’áre pesẽtagui, ha py’aguapýpe pejegueraháta; umi mónte ha kolladokuéra osẽta opurahéi pene renondépe, ha opa ñumegua yvyramáta ojepopetéta.”27 Umi montáña, kolína, kampo ha yvyramatakuéra ikatu oñembojoja umi presidente de misión, obispo, líder de distrito, miembro ha umi ohekáva añetegua ha katu “ndoikuaáiva moõpa ojuhúta,”28 Ha’ekuéra otestifikáta umi misionéro mayor omoambueha pe panoramaite, ñande Salvador ha Redentor, Jesucristo testimónio reheve.
Ñandejára Jesucristo Apóstol ramo, ajerure peẽme peservi hag̃ua misionéro ramo Israel ñembyatépe ha ikatu peservi jey jepe. Roikotevẽ penderehe, roikotevẽ penderehe. Roime agradecido peẽme, pene mayor-va, tekove peguerahávare ha ehémplo ha’e haguére pende rógape, barrio ha estaka-kuérape. Ko’ág̃a poinvita pejapyhy hag̃ua pende “jejapo kuaa,” pene testimónio consagrado ndive, ha pejapo peteĩ misiõ. Añembo’e ambue ára aguapývo ahenói hag̃ua umi matrimonio kakuaávape, toĩ ciento pende apytépe oha’arõ kyre’ỹva iñehenói.
Avei apromete peservi aja, peñandutaha Ñandejára mborayhu pende rekovépe, peikuaáta Chupe, Ha’e pendekuaáta ha “mba’eichaitépa tuicháta pende vy’a.”29 Pende servicio dedicado Jesucristo-pe oinspira ha ohovasáta pene familia, pene niéto ha pene bisniéto. “Py’aguapy ha mborayhu heta[véta]”30 pende rekovépe áño oútavape. Che apromete. Jesucristo rérape. Amén.