Umi mbo’epy divíno mitãnguéra ñemongakuaa rehegua

Elder Valeri V. Cordón rupive

Setenta-gua

Tuvakuéra ojoaju umi iTuvakuéra Yvagagua ndive ogia hag̃ua ita’yrakuéra porãitépe oho jeývo yvágape.

¿Pehupisapy’ava’ekuépa peteĩ mitã onaseramóva pende jyva’ári? Oĩ peteĩ tesape osẽva káda mitã onaseramóvagui, omoheñóiva peteĩ mborayhu joaju especial omyanyhẽkuaáva vy’apavẽgui ituvakuéra korasõ.¹ Peteĩ haihára Mexicáno ohai: “Aikuaa peteĩ onaseramóva ojopy’imi vove itúva kuã, peteĩha jave, ikuã’imíme, ha’e ojúrama chupe tapiaite g̃uarã.”²

Mitã ñemongakuaa niko peteĩ experiencia imba’eguasuvéva ko tekovépe. Tuvakuéra ojoaju umi iTuvakuéra Yvagagua ndive ogia hag̃ua ita’yrakuéra porãitépe oho jeývo yvágape.³ Ko árape akompartise umi mbo’epy mitã ñemongakuaa rehegua ojejuhúva escritura-kuérape ha oñembo’éva umi proféta oikovéva rupive, ñanepytyvõva jaheja hag̃ua peteĩ patrimonio túva ha sýicha.

Jajupi Evanhélio cultura ijyvatevévape

Jajupiva’erã evanhélio cultura ijyvatevévape ñane familiakuéra ndive. Presidente Russell M. Nelson he’i: “Familiakuéra omerese yvagagua sãmbyhy. Tuvakuéra ndaikatúi oakonseha porã ita’yrakuérape ojevasávo umi hembiasa, kyhyje térã hemiandúpente.”⁴

Jepémo ñande cultura ypykue, ñañemongakuaa laja ha tembiasa tee ikatu ivalióso túva ha sýramo, ko’ã katupyrykue ndohupytýi ñaipytyvõ hag̃ua ñande ta’yrakuérape oho jey hag̃ua yvágape. Ñaikotevẽ peteĩ “valores ha … práctica aty” ijyvatevéva,”⁵ peteĩ cultura mborayhu ha ñeha’arõ rehegua, ikatuhápe ñamba’e’apokuaa ñane mitãnguéra ndive “ijyvate ha imarangatuveháicha.”⁶ Presidente Dallin H. Oaks he’i pe evanhélio cultura ha’eha “peteĩ jeikove laja, peteĩ valores ha expectativa ha práctica aty. … Ko evanhélio cultura ou pe plan de salvación, Tupã mandamiento-kuéra ha umi … proféta oikovéva rekombo’ekuéragui. Ha ome’ẽ ñandéve gía mba’éichapa ñamongakuaava’erã ñane familiakuérape ha jaikove ñande rekove tee.”⁷

Jesucristo niko pe evanhélio cultura mbyte. Ja’adopta pe evanhélio cultura ñane familiakuérape niko ikláve jajapo hag̃ua peteĩ tekoha iporãva ikatuhápe pe jerovia ra’ỹi ipoty. Jajupi hag̃ua ko tenda ijyvatevévape, Presidente Oaks ñaneinvitákuri “tañamboyke oimeraẽichagua tradisiõ térã jepokuaa tee térã familiaguáva oñemoĩva Jesucristo Tupao rekombo’ekuérare.”⁸ Tuvakuéra, ñandepy’amirĩrõ ñamoĩ hag̃ua pe evanhélio cultura ohejakuaa pe adversario-pe toñemoinge ñande rógape, térã ivaivéva katu, ñane mitãnguéra korasõme.

Jaiporavórõ jajapo evanhélio cultura-gui pe cultura imbaretevéva ñane familiakuérape, upéicharõ, Espíritu Santo influencia ipu’akapáva rupi,⁹ umi ñane ñemongakuaa laja, tradisiõ ha teko laja oñemopotĩ, oñembojoja, oñerrefina ha oñemehoravéta.

Jajapóvo ógagui evanhéliope ñemoarandu renda

Presidente Russell M. Nelson ombo’e ñande róga ha’eva’erã pe “evanhéliope ñemoarandu renda.”¹⁰ Evanhéliope ñemoarandu propósito niko “ñambopypuku ñane konversiõ Túva Yvagagua ha Jesucristo-pe, ha ñanepytyvõ Ha’ekuéraichave hag̃ua ñande.”¹¹ Ñakonsiderami mbohapy responsabilida kláve mitã ñemongakuaápe omombe’úva umi proféta ha apóstol, ñanepytyvõkuaáva ñamoĩ hag̃ua pe evanhélio cultura ijyvatevéva ñande rógape.

Peteĩha: Ñehekombo’e sãsome

Túva Yvagagua omoarandu Adán-pe Jesucristo ha Idoctrinagui. Ha’e ombo’e chupe: “sãsome remboʼe hag̃ua koʼã mbaʼe nde raʼykuérape.”¹² Ambue ñe’ẽme, Túva Yvagagua ohekombo’e Adán-pe ombo’eva’erãha sãsóme, pojerápe ha ojejoko’ỹre opa ko’ã mba’e ita’ýra ha tajyrakuérape.¹³ Umi escritura he’i ñandéve “Ha Adán ha Eva ohovasa Tupã réra, ha oikuaauka opa mbaʼe itaʼýra ha itajyrakuérape.”¹⁴

Ñambo’e hína pojerápe jahasávo ára ovaléva hendivekuéra. Ñambo’e hína jejoko’ỹre ñañemongeta vove umi tema idelikádovagui, ehémploramo mboy ára ohasa pantalla renondépe, jaiporúvo umi rekurso Tupao omoĩva disponible.¹⁵ Ñambo’e sãsóme ja’estudiávo escritura-kuéra ñande ta’yrakuéra ndive jaiporúvo Eju, Chesegi ha jaheja pe Espíritu taha’e pe mbo’ehára.

Mokõiha: Ha’évo pe discipulado modélo

Juan kuatiañe’ẽme ñamoñe’ẽ heta judío-kuéra oporandúrõkuri Salvador-pe Heko rehegua, Jesús ogueraha jesareko Imodélore, Itúva. Ha’e ombo’e: “Ndaikatúi Ta’ýra ojapo mba’eve ijehegui, sino pe ohechava’ekue Túva ojapo; upévare opa mba’e [Ha’e] ojapóva, upéva avei Ta’ýra ojapo.”¹⁶ Tuvakuéra, ¿mba’épa ñamodelava’erã ñande ra’y ha rajykuérape g̃uarã? Discipulado.

Tuvakuéraicha, ñambo’ekuaa imba’eguasueteha ñamoĩ Tupãme raẽve ñañe’ẽrõ hína pe mandamiento peteĩháre, ha katu ñamodela hína upéva ñamboykévo umi yvoragua distracción ha ñañongatu pe día de reposo marangatúramo káda semana. Ñambo’ekuaa umi templogua konvénio imba’eguasuha ñañe’ẽvo pe ñemenda celestial doctrina rehe, ha katu ñamodela upéva ñaonrrávo ñane konveniokuéra ha jatratávo dignida reheve ñane rembireko térã ñane ménape.

Mbohapyha: Ñainvitávo mba’e’aporã

Jesucristo-re jerovia ha’eva’erã ñane mitãnguéra testimonio mbytete, ha upe testimonio og̃uahẽva’erã peteĩteĩ mitãme rrevelasiõ personal rupive.¹⁷ Ñaipytyvõ hag̃ua ñane mitãnguérape omopu’ãvo itestimonio, ñamokyre’ỹ chupekuéra oiporu hag̃ua isãso oiporavo hag̃ua oiporavóvo oĩ porãva¹⁸ ha ñambosako’i chupekuéra peteĩ tekovépe g̃uarã Tupã konveniokuéra rapére.¹⁹

Iñarandúne ñamokyre’ỹrõ peteĩteĩ ñande ta’yrakuérape oacepta hag̃ua Presidente Nelson invitasiõ oñenkarga hag̃ua itestimonio teégui Jesucristo ha Iñevanhélio-gui, tomba’apo hese, tomongaru okakuaa hag̃ua, tomyanyhẽ añeteguágui, ha ani omongy’a umi kuimba’e ha kuña ojerovia’ỹva filosofía japu reheve.²⁰

Mitãnguéra ñemongakuaa tekojoja ha propósito reheve

Ñande Ru Yvagagua potapy divíno túvaramo ojeikuaauka peteĩ rrevelasiõ rupi oñeme’ẽva Moisés-pe: “Péina ápe, kóva haʼégui che rembiapo ha che glória—toiko yvypóra ñemanokuaaʼỹ ha tekove ijapyraʼỹva.”²¹ Presidente Nelson he’ive: “Tupã ojapóta opa mba’e Ikatúva, omombyky’ỹre pende albedrío, penepytyvõ hag̃ua pono okañy pendehegui umi eternidagua jehovasa tuichaitéva.”²²

Túvakuéraicha, ñande niko Tupã ahénte ñanemitãnguérare ñeñangarekópe.²³ Jajapova’erã opaite mba’e ikatumíva jajapo hag̃ua peteĩ jeikoha ñande ta’yrakuéra ikatuhápe oñandu Iñinfluensia divíno.

Túva Yvagagua rembipota ndaha’éiva’ekue araka’eve ñande tuvakuéraicha tajaguapy yképe ñamañávonte mba’éichapa ñane mitãkuéra rekove espiritual ohasa. Pehejami tamoha’anga peẽme ko idea mitã ñemongakuaa propósito reheve peteĩ che rembiasa tee rupive. Aha aja peteĩ Guatemala-pegua rrama’imi primaria-pe, che tuvakuéra oñepyrũkuri chembo’e bendición patriarcal imba’eguasuha. Che sy oñemotiempo okomparti hag̃ua chendive hembiasa orresivírõguare i-bendición patriarcal omomba’eguasuetéva. Ha’e chembo’e pe doctrina bendición patriarcal reheguáva, ha otestifika umi jehovasa oñeprometévagui. Iñemongakuaa propósito reheve chemomỹi arekose hag̃ua avei che bendición patriarcal.

Arekórõguare 12 áño che tuvakuéra chepytyvõ aheka hag̃ua peteĩ patriarca. Upéva oñeikotevẽkuri ndaipórigui patriarca pe distrito ore roikohápe. Aviaha ajotopa hag̃ua peteĩ patriarca ndive oikóva peteĩ estákape mombyrýva 156 kilómetro (97 milla) rupi. Chemandu’a porãiterei upe patriarca omoĩ vove ipo che akã ári cherovasa hag̃ua. Aikuaákuri, peteĩ konfirmasiõ espiritual mbarete rupi, duda’ỹre, che Ru Yvagagua chekuaaha.

Peteĩ mitãrusúpe g̃uarã orekóva 12 áño peteĩ tava’ípegua niko, upeva tuichaite mba’e. Che korasõ ojere che Ru Yvagagua gotyo upe ára che sy ha che ru ñemongakuaa propósito reheve rupi ha ame’ẽta aguije chupekuéra tapiaite g̃uarã.

Hermana Joy D. Jones ha’eva’ekue Primaria Presidenta General he’i: “Ndaaikatúi ñaha’ãrõ pe konversiõ taha’e peteĩ mba’e ojehúvante ñane membykuérape. Peichareíntegua konversiõ ndaha’éi principio Jesucristo evanheliogua.”²⁴ Ñane mborayhu ha invitasiõ iñinspirádova ikatu omoambue mba’éichapa ñane membykuéra oiporu isãso oiporavo hag̃ua. Presidente Nelson he’i mbarete, “Mba’evéichagua tembiapo imba’eguasuve pe propósito reheve ñamongakuaa porã umi mitãme!”²⁵

Mbopaha

Tuvakuéra, ko mundo henyhẽ filosofía, cultura ha idéagui oñorairõva ñande ta’yrakuéra atención rehe. Pe óga tuicha ha ipyrusúva omopropaganda imiembrokuérape ára ha ára oiporúvo umi redes sociales canal ipyahuvéva. “Ha katu Itaʼýra don-pe, ”proféta Moroni ombo’e, “Tupã ombosakoʼivaʼekue peteĩ tape iporãvéva.”²⁶

Ñamba’apóvo oñondive Tupã ndive umi konvénio rupive ha oikórõ ñandehegui Irrepresentante ñande ta’yrakuéra ñeñangarekópe, Ha’e omomarangatúta ñane rembipota, oinspiráta ñane rekombo’e ha omoĩporãta ñane invitasiõ “ñande raʼykuéra oikuaa hag̃ua moõpa ohekavaʼerã hikuái iñangaipa jora.”²⁷ Jesucristo rérape. Amén.