Ñemomirĩ ñemoneĩ ha jesegi hag̃ua
Ñemomirĩ ha’e peteĩ requisito obligatorio ñaime hag̃ua lísto jajevy hag̃ua Tupã rendápe.
Alma kapítulo quinto-pe oñemoĩ peteĩ porandu oporopy’amongetáva: “Pemanóramo ko’ag̃aite ikatúta piko peje, pende py’apýpe, peñemomirĩ porãhague?”1 Ko porandúpe oike ñemomirĩ ha’eha peteĩ requisito obligatorio ñaime hag̃uáicha lísto jajevy hag̃ua Tupã rendápe.
Opavavépe ñandegusta ñapensa ñane momirĩ ohupytymaha, ha katu oĩ umi experiencia tekovépe ojapóva jahechakuaa pe kuimba’e térã kuña natural ijorgullósova py’ỹi oikovetereiha ñande pype.
Ojapo áño, mokõi ore rajy oiko aja gueteri ógape, adesidi ahechauka chupekuéra ha che rembirekópe pe unidad de negocio arekóva che kárgope upe empresa amba’apohápe.
Che propósito añete upevére ha’ékuri ahechauka hag̃ua chupekuéra peteĩ tenda, iñambuéva ógagui, opavave ojapoha ajerurehaichaite chekuestiona’ỹre hikuái. Rog̃uahẽvo okẽ principal-pe, ojepe’áva jepi automáticamente che kóche oñemoag̃uivo, añesorprende ndojepe’aiha. Upéva rangue katu, peteĩ guardia de seguridad araka’eve che rekovépe ahecha’ỹva oñemboja pe kóchere ha ojerure chéve che empresa identifikasiõ.
Ha’e chupe araka’eve naikotevẽihague peteĩ identifikasiõ aike hag̃ua che kóchere upe propiedad-pe ha upéi ajapo chupe porandu tekove orgullóso oipuruetéva: “Reikuaa piko mávandipa reñe’ẽreína?“
Upe ombohováivape, “Néi, ndereguerekóigui ne empresa identifikasiõ, ndaikatúi aikuaa mávapa nde ha upe aime aja ko okẽme, nojehejamo’ãi reike ko local-pe identifikasiõ porã’ỹre.”
Apensa amañávo espejo retrovisor-re, ha katu aikuaa che rajykuéra osavoreahahína káda segundo upe moménto! Che rembireko che ykére oñakãmbováva ohechaukávo noimeiha de acuerdo upe che komportamiéntondi. Che recurso paha ha’e opémarõ ha’e ajediskulpa upe guardia-ndi ha ha’e chupe ambyasyeteha atrata vai haguére chupe. “Reĩ perdonádo,” he’i, “ha katu peteĩ empresa identifikasiõ’ỹre, ndereikemo’ãi ko árape!”
Upéi aha jey mbeguekatu ógape agueru hag̃ua che identifikasiõ, ikatúvo aikuaára’e ko mbo’epy hepýva: jaiporavóramo ñemomirĩ’ỹ, japyta ñañemotĩ.
Proverbios-pe jajuhu, “Pe kuimba’e orgúllo omokane’õ chupe; ha terakuãporã ojoko pe ijespíritu ñemomirĩvape.”2 Oñemongakuaa hag̃ua ñemomirĩ, jahechakuaava’erã he’ise añetéva pe evanhélio ryepýpe.
Heta oĩ okonfundíva ñemomirĩ ambue mba’ére, por ejemplo, mboriahúndicha. Ha katu añetehápe oĩ heta imboriahúva ha ijorgullósova ha avei oĩ heta irríkova ha upevére imirĩva. Ambuékatu hi’õtietereíva térã ojehayhu’íva ha’etévaicha ijape ñemomirĩva ha katu amo hapópe henyhẽ orgúllogui sapy’ánte.
Upéicharõ mba’épa pe ñemomirĩ? He’iháicha Pepredika Che Evanhélio-pe, ha’e peteĩ “Ñandejára volunta guýpe ñemoĩse. … Ha’e jajeporohekombo’ekuaa. … [Péva] ha’e peteĩ catalizador vital ñemongakuaa espiritual-pe g̃uarã”.3
Añetehápe oĩ heta oportunida opavave ñañemoĩporãve hag̃ua ko atributo cristiano-pe. Ñepyrũrã ahesa’ỹijose mba’éicha pevépa ñanemirĩ, térã ñanemirĩva’erã, jasegívo ñande proféta consejo. Peteĩ cuestionario pop ñande peteĩteĩme g̃uarã ikatu ha’e:
-
Ja’epaitépiko Tupao réra opa jajahápe? Presidente Russell M. Nelson he’i, “Ñandejára réra jepe’a Ñandejára Tupaógui ha’e peteĩ victoria tuicháva Satanáme g̃uarã.”4
-
Jahejápiko hína Tupã oprevalese ñande rekovépe ñamog̃uahẽvo pe invitasiõ específica-itéva ñande profétagui? “Ko árape ahenói ñane miembro-kuérape opa tendagua ome’ẽ hag̃ua ehémplo porã ohejávo umi actitu ha tembiapo prehuísio rehegua.”5
-
Ñavense piko múndope, jajeroviavévo Cristo doctrina-re umi kuimba’ekuéra filosofía-gui, ombo’eháicha ñande proféta?6
-
Oikópiko ñandehegui py’aguapyhára, he’íva mba’e porã umi héntepe ha hesekuéra? Presidente Nelson ñanembo’e ko conferencia general ohasava’ekuépe: “Oĩramo oimeraẽ mba’e ivirtuóso, iporãmba, térã herakuã porã ikatúva ja’e ambuére, taha’e hovápe térã ijatukupépe, upéva ha’eva’erã ñane comunicación estándar.”7
Ko’ãva ha’e instrucción simple ha katu imbaretéva. Penemandu’a, opa mba’e Moisés tavaygua ojapova’erãnte oñemonguera hag̃ua ha’ékuri omaña serpiente de bronce ha’e omopu’ãva’ekuére.8 Ha katu “pe tape isensíllo haguére, térã ndahasýigui, oĩ heta omanova’ekue.”9
Ko conferencia aja ñahendúkuri ha ñahendúta pe consejo infalible ñande proféta ha apóstol-kuéragui. Peteĩ okasiõ porã ñamongakuaa hag̃ua ñemomirĩ ha jaheja ñane opinión mbarete tojeipyte peteĩ convicción imbaretevévare Ñandejára oñe’ẽha ko’ã líder ojeiporavova’ekue rupive.
Opa mba’e ári, ñamongakuaávo ñemomirĩ, avei jahechakuaa ha ja’aseptava’erã ndaikatuiha jasupera umi ñande desafio ni jahupyty ñane potencial ijyvatevéva ñane ñeha’ã rupivénte. Umi orador motivacional, haihára, entrenador, ha influencers opa mundogua, uvei umi plataforma digital-pe, he’ítava opa mba’e odependeha ñanderehe ha ñane rembiapórente. Pe múndo ojerovia to’ogua jyváre.
Ha katu Evangelio restaurado rupive jaikuaa tuicha ñadependeha Túva Yvagagua py’aporã ha ñande Salvador Jesucristo expiasiõre, “roikuaa haguére igrásiare rojesalvaha, rojapo rire opa ikatúva.”10 Upévare iñimportanteiterei jajapo ha ñañongatu umi konvénio Tupãndi, jajapóvo ikatútagui jaikepaite Jesucristo pokatu ñanemonguerávape, okapasitáva ha operfeccionáva Iñexpiasiõ rupive.
Reunión sacramental-pe jeho semanalmente ha ja’adora témplope regularmente japarticipa hag̃ua ordenanza-kuérape ha ñamog̃uahẽ ha ñambopyahu konveniokuéra ha’e peteĩ señal jahechakuaaha ñadependeha Túva Yvagagua ha ñande Salvador, Jesucristo-re. Upéva oinvitáta Ipokatu ñande rekovépe ñanepytyvõ hag̃ua jasuperávo opa ñane problema ha, ipahápe, ñakumpli ñande creación medída.
Nda’aréi, peteĩ jeyve oñemoinge prueba-pe che ñemomirĩ nivel ha che jeikuaa adependeha Ñandejárare. Aha’aína aeropuerto peve peteĩ taxi-pe ajagarra hag̃ua peteĩ vuélo mbyky peteĩ tenda oiháme peteĩ situasiõ ijetu’uetéva. Pe taxista, ndaha’éiva Tupao miembro, omaña cherehe espého rupive ha he’i chéve, “Ahecha nereñeñanduporãiha ko árape!”
“Ojehechakuaa piko?“ Aporandu che.
“Upeichaite“ he’i ha’e. Upéi he’i koichagua mba’e, “Añetehápe niko eguereko peteĩ mba’e inegativoitéva nde jerére!“
Amyesakã chupe arekoha peteĩ situasiõ ijetu’uetéva ahechava’erã, ha upéi oporandu chéve, “Rejapo piko opa mba’e ikatúva rerresolve hag̃ua upéva?“.
Ambohovái ajapoha opa mba’e ikatúva.
Upéi he’i peteĩ mba’e araka’eve cheresarai’ỹva: “Upéicharõ eheja ko mba’e Tupã pópe, ha opa mba’e osẽ porãta.”
Akonfesa aĩhague tentádo aporandúvo chupe, “Reikuaa piko mávandipa reñe’ẽreína?” Ha katu ndajapói upéva! Ajapóva katu añemomirĩ Ñandejára rovake upe una hora vuélo aja, ajerurévo pytyvõ divíno. Aguejývo aviõgui aikuaa pe situasiõ ijetu’uetéva arresolveva’erãkuri oiporãmaha ha noñeikotevẽvéimaha cherehe.
Hermano ha hermana-kuéra, pe Ñandejára mandáto, invitasiõ ha promesa hesakã ha ñanemoangapyhy: “Eñemomirĩ; ha Ñandejára nde Tupã ndegueraháta nde pógui ha ombohováita ne ñembo’ekuéra.”11
Tañañemomirĩ jasegi hag̃ua ñande profetakuéra consejo ha taja’asepta Tupã ha Jesucristo-nte ikatuha ñanemoambue—umi ordenanza ha konveniokuéra ñamog̃uahẽva’ekue rupi Itupaópe—upe versiõ iporãvévape ñande jehegui ko tekovépe, ha, peteĩ ára, ojapo tañaimeporãmba Cristo-pe. Jesucristo rérape, amén.