Conferencia General
Pe ñembohovái akóinte ha’e Jesucristo
Abril 2023-gua Conferencia General

Pe ñembohovái akóinte ha’e Jesucristo

Presidente Russell M. Nelson rupive

Jesucristo Tupao Santokuéra Ára Pahapegua Presidente

Taha’e ha’éva pe mba’eporandu térã problema peguerekóva, pe ñembohovái akóinte ojejuhu Jesucristo rekove ha mbo’epykuérape.

Che hermano ha hermana-kuéra ahayhuetéva, ñañemongarúkuri espiritualmente ko’ã mokõi ára paha aja. Pe kóro purahéi iporãiterei. Umi oñe’ẽva’ekue ha’ékuri tembiporu Ñandejárape g̃uarã. Añembo’e tapeheka pe Espíritu Santo togia pende estudio pema’ẽvo umi añetegua oñembo’eva’ekue rehe ko púlpito guive. Añetehápe umíva oñemondókuri yvágagui.

Peteĩ semana ko ára guive ha’e Domingo de Pascua. Ha’e pe observancia religiosa iñimportantevéva Jesucristo seguidor-kuérape g̃uarã. Pe razón principal mba’ére jaguerovy’aha Navida ha’e pe Semana Santa rupi. Pe Eju, Chesegi mbo’epy ko semánape pendegueraháta pe’estudia Salvador jeike triunfal Jerusalén-pe, Iñemopotĩ ojapóva pe témplo rehe, Ijehasa’asy Jardín de Getsemaní-pe, Iñemongurusu, Ijeikovejey glorióso ha umi upe riregua Ijehechauka Iseguidor-kuérape.1

Tapenembovy’a ko’ã versíkulo marangatu ha peheka opa mba’e ikatúva rupi peme’ẽ aguyje ñande Ru Yvagaguápe ombou haguére ñandéve Ita’ýra Unihénito.2 Jesucristo rupi, ikatu ñañearrepenti ha oñeperdona ñandéve ñane angaipakuéra. Ha’e rupi, peteĩteĩ ñande jaikovejeýta.

Avei po’invita pe’estudia jey hag̃ua pe ñemombe’u Salvador ojehechaukáramo guare nefita-kuérape América-pe, ojehaiháicha 3 Nefi-pe. Ojehechauka mboyvemi, oñehendu iñe’ẽ tavayguakuéra apytépe, umíva apytépe avei ko’ã ñe’ẽ ojerure’asýva:

“Ndapejeremoʼãi piko koʼág̃a cherendápe, ha napeñearrepentimoʼãi piko pene angaipágui, ha napeñekonvertimoʼãi piko, che pomonguera hag̃ua?

“…Péina ápe, che jyva poriahuvereko ojeipyso peẽme, ha opavave oúvape, che amog̃uahẽta.”3

Hermano ha hermana-kuéra ahayhuetéva, Jesucristo ome’ẽ peẽme upe invitasiõ jeyete voi, ko árape. Ajerure peẽme peju hag̃ua Hendápe ikatu hag̃uáicha Ha’e penemonguera! Ha’e penemongueráta angaipágui peñearrepenti aja. Ha’e penemongueráta ñembyasy ha kyhyjégui. Ha’e penemongueráta ko múndo pegua erídagui.

Taha’e ha’éva pe mba’eporandu térã problema peguerekóva, pe ñembohovái akóinte ojejuhu Jesucristo rekove ha mbo’epykuérape. Peñemoaranduve Ijexpiasiõ, Imborayhu, Iporiahuvereko, Idoctrina ha Iñevanhélio rrestaurádope ñemonguera ha progreso rehegua. Tapeho Hendápe! Pesegui Chupe!

Jesucristo ha’e pe mba’érepa ñamopu’ã umi témplo. Peteĩteĩva ha’e Hóga marangatu. Pejapóvo umi konvénio ha pehupyty umi ordenánsa tekotevẽpy témplope, ha upéicha avei peñeha’ã peñemo’ag̃uive Hese upépe, ohovasáta pende rekove ikatu’ỹháicha ambuéichagua adorasiõ ojapo. Upévare, rojapo hína opa mba’e ikatumíva rojapo umi templo jehovasa ohupytyve hag̃ua ñane miembro-kuérape opa múndo jerére. Ko árape, cheaguyjeme´ẽ aikuaaukávo umi ore plan romopu’ã hag̃ua peteĩ templo pyahu peteĩteĩva ko’ã tendápe:

  • Retalhuleu, Guatemala

  • Iquitos, Peru

  • Teresina, Brazil

  • Natal, Brazil

  • Tuguegarao City, Philippines

  • Iloilo, Philippines

  • Jakarta, Indonesia

  • Hamburg, Germany

  • Lethbridge, Alberta, Canada

  • San Jose, California

  • Bakersfield, California

  • Springfield, Missouri

  • Charlotte, North Carolina

  • Winchester, Virginia

  • Harrisburg, Pennsylvania

Che hermano ha hermana-kuéra ahayhuetéva, ame’ẽ testimonio Jesucristo odirihiha umi asunto Itupaópe. Atestifika jasegívo Chupe ha’eha pe tape peteĩete jaguereko hag̃ua vy’a hi’aréva. Aikuaa Ipu’aka oguejyha hína Itavayguakuéra oñongatúva konveniokuéra ári, umi “oguereko hikuái hiʼármaramo tekojoja ha pe Tupã puʼaka tuicha verapýpe.”4 Péicha atestifika, che mborayhu ha jehovasa reheve peteĩteĩ pende rehe, Jesucristo réra sagrádope. Amén.

Toñeimprimi