Ne Bendición patriarcal: Ñande Ru Yvagagua gía inspirado
Che bendición patriarcal chepytyvõ antende hag̃ua che identida eterna añetéva—mávapa che ha’ekuri añetehápe ha mávapa ikatu oiko chehegui.
Chemongakuaa tuvakuéra hechapyrãva ohayhu ha ombo’eva’ekue jesarekópe pe evanhélio imitãnguérape. Ñembyasyrã, che tuvakuéra ahayhuetéva ohasa’asýkuri iñemendápe heta ary aja. Che peteĩ mitã primaria-gua oje’évo chéve ikatutaha ojedivorsia hikuái oimeraẽ árape ha aiporavova’erãha máva sy térã túva ndive aikóta. Resultado-ramo, heta ára aja añandu tuicha py’ajopy; upevére peteĩ che Ru Yvagagua don ipahápe omoambue opa mba’e chéve g̃uarã—Che bendición patriarcal.
Arekóvo 11 áño, ajepy’apyvévo che tuvakuéra rrelasiõre, aipotaiterei che bendición Patriarcal. Aikuaa che Ru Yvagagua chekuaaporãha, ha oikuaa che situasiõ. Ha avei aikuaa arresivitaha gía Chugui. Pya’e Akumpli rire 12 áño, arresivi che bendición Patriarcal. Ojapóma medio siglo upévagui, ha katu che mandu’a porãite umi detalle upe tembiasa sagrádogui.
Cheaguije, jareko haguére umi gía bendición Patriarcal rehegua tupaópe Manual General-pe:
“Opavave miembro hekopotĩ ha ikaraíva’ekue oreko derécho orresivívo peteĩ bendición patriarcal, ome’ẽtava Túva Yvagagua gía inspirádo.”
Peteĩ miembro “imaduro porãva’erã ontende hag̃ua upe bendición mba’eguasukue ha inaturaleza sagrádo” ha “ontendeva’erã evanhélio doctrina básico”
“Iporãvéta pe miembro imitã porãrõ gueteri ikatu hag̃uáicha heta umi desisiõ imba’eguasúva tekovépe oĩta gueteri ou hag̃uáicha. … Sacerdocio liderkuéra nomoĩriva’erã peteĩ eda mínima peteĩ miembro orresivi hag̃ua bendición patriarcal. …
“Peteĩteĩ bendición patriarcal isagrádo, iñeñongatupy ha personal. …
“Peteĩ tapicha orresivíva peteĩ bendición patriarcal oñongatu’atãva’erã umi iñe’ẽ, ojepy’amongetava’erã umívare ha ovivi tekopotĩme ohupyty hag̃uáicha umi jehovasa oñeprometéva ko tekovépe ha eternidápe.”1
Presidente Russell M. Nelson jahayhuetéva ombo’e heta jey jey bendicion patriarcal imba’eguasueteha,2 ome’ẽha peteĩteĩ orresivívape “peteĩ momarandu ilináhegui ohóvo tapykue gotyo Abraham, Isaac ha Jacob peve”3 ha upéva “ha’e escritura personal peẽme g̃uarã.”4
Che bendición patriarcal imba’eguasuetereíkuri chéve g̃uarã che mitãrusu aja heta mba’ére. Peteĩha, Espiritu Santo pu’aka rupive, che bendición patriarcal chepytyvõ antende hag̃ua che identida eterna añetéva—mávapa che ha’ekuri añetehápe ha mávapa ikatu oiko chehegui. Chepytyvõ aikuaa hag̃ua, ombo’ehaguéicha presidente Nelson, che ha’eha “peteĩ Tupã ra’y”, peteĩ “konveniogua ra’y”, ha peteĩ “Jesucristo discípulo”.5 Aikuaa che Ru Yvagagua ha che Salvador chekuaa ha cherayhuha, ha Ha’ekuéra opartisipaha personalmente che rekovépe. Kóva chepytyvõ añemo’ag̃uiseve hag̃ua Hesekuéra ha tokakuaa che jerovia ha confianza Hesekuéra.
Peteĩ che angirũ ahayhuetéva ojoajúva tupaóre ha’évo peteĩ joven adulto okomparti: “Pe patriarca omoĩ vove ipo che akã ári ha he’i che réra, opa mba’e oñemoambue, … ndaha’éi upe momento-pe añónte, ha katu opa che rekove pukukue. Pya’ete ahechakuaa, pu’aka ha’e oñe’ẽva rupi, ajekuaa porãha ha pypuku avei. Umi ñe’ẽ ha’e he’iva’ekue oike pypuku opa che retére. Aikuaa Túva Yvagagua chekuaaha, tyepýpe ha okápe.”
Aikuaávo mávapa che añetehápe chepytyvõ antende ha ajapose hag̃ua Tupã oha’arõva chehegui.6
Upéva chegueraha aestudiávo umi konvénio ajapova’ekue ha umi jehovasa oñeprometéva Tupã konvéniope Abraham ndive.7 Ome’ẽ chéve peteĩ perspectiva ijapyra’ỹva cheinspiráva añongatu porãve hag̃ua che konveniokuéra.
Py’ỹi aestudia che bendición patriarcal, ha imitãvaramo, py’ỹi ára ha ára, chepytyvõva añandu hag̃ua Espíritu Santo influencia oporomoangapyhy ha oporogiáva, chepytyvõva omopokãve hag̃ua che py’ajopy asegívo Igía. Upéva ombokakuaa che rembipota ainvita meme hag̃ua tesape, añetegua ha Espíritu Santo-pe aestudiávo che escritura-kuéra ha añembo’évo ára ha ára, ha aestudia ha asegívo umi Tupã proféta ha apóstol rekombo’e. Che bendición patriarcal chepytyvõ avei chesumisoseve hag̃ua che Ru Yvagagua rembipotápe, ha upe enfóke chepytyvõ añandu hag̃ua tuicha vy’a, jepe che situasiõ personal.8
Ahupyty mbarete espiritual káda astudia che bendición patriarcal. Che tuvakuéra ipahápe ojedivorsiávo, che bendición patriarcal, ombo’eháicha presidente Thomas S. Monson, oñekonverti chéve g̃uarã peteĩ “tesoro personal amomba’ete ha ijojaha’ỹva”, jepe “peteĩ Liahona personal.”9
Anínte chentende vai. Ndacheperféctoikuri. Ajapo opáichagua jejavy. Che irũ eterno okonfirmáne ajapoha gueteri. Ha katu che bendición patriarcal chepytyvõkuri ha chepytyvõ gueteri amehorase ha ajapo porãve hag̃ua.10 Astudiamemévo che bendición patriarcal ombotuichave che deseo agueropu’aka hag̃ua umi jeipy’ara’ã. Chepytyvõ areko hag̃ua potapy ha py’aguasu añearrepenti hag̃ua, ha pe arrepentimiento oñekonvertive peteĩ proceso chembovy’ávape.
Chéve g̃uarã imaba’eguasuete arresivi che bendición patriarcal che mitãrõguare ha che testimonio okakuaa aja gueteri. Ha che aguije tapiaite g̃uarã che tuvakuéra ha che obispo ontendehague che deseo ohechaukaha aimemaha listo.
Arekórõguare 12 áño, yvóra pokãve ñanemoapañuái ha ñanembohesamboyke ko’ág̃agua yvóragui. Presidente Nelson oñe’ẽ ko ára rehe “peteĩ époka hasyetereihápe yvóra rembiasakuépe”-, peteĩ yvóra “henyhẽtéva angaipágui” ha “oñesentráva ijehe”11. Vy’arã, ñande mitã ko’ág̃agua imadurove chehegui arekórõ 12 áño, ¡ha ha’ekuéra avei oreko umi jeiporavo imba’eguasuetereíva ojapova’erã imitã aja! Avei oikotevẽ oikuaa mávapa añetehápe hikuái ha Tupã ohayhuha ha oikuaa porãiterei chupekuéra.
Ndaopavavéi oipotáta ibendición patriarcal che aipotávokuri. Ha katu ajerure’asy umi miembro-pe ndorresivíriva gueteri ibendición patriarcal toñeha’ã, ñembo’epópe, oikuaa hag̃ua oĩ vove listo. Apromete peñembosako’írõ espiritualmente, pende rembiasa, che mba’éicha, isagrádota peẽme g̃uarã. Avei ajerure’asy umi orresivímava’ekue ibendición patriarcal to’estudia ha tomomba’eguasu upéva. Amomba’eguasúvo che bendición patriarcal che mitã aja cherovasa py’aguasu reheve añeñandu’i vove, moangapyhy akyhyje vove, py’aguapy chepy’ajopy vove, ñeha’arõkuaa chepy’aropu vove ha vy’apavẽ che ánga oikotevẽve vove. Che bendición patriarcal chepytyvõkuri okakuaa hag̃ua che jerovia ha guerovia che Ru Yvagagua ha che Salvador rehe. Avei ombokakuaa che mborayhu Hesekuéra ha ko’ág̃a peve gueteri upéicha.
Atestifika umi bendición patriarcal ome’ẽha Túva Yvagagua gía inspirádo. Ame’ẽ che testimónio ñande Ru Yvagagua ha Ita’ýra— ñande Salvador Jesucristo—ñandekuaa, ñanderayhu, ha ñanderovasaséva oikoveha añete. Avei aikuaaporã presidente Russell M. Nelson ha’eha Tupã proféta ko’ág̃agua ko yvy ári. Jesucristo rérape, Amén.