Araka’épa pehupytyva’erã pende jehovasa patriarcal
Pehupyty vove pende jehovasa, pehecháta ha peñandúta mba’éicha Túva Yvágagua ha Jesucristo penderayhu ha mba’éicha oñesentra peteĩteĩ penderehe.
Kuehe, che angirũ ahayhuetéva, pe élder Randall K. Bennett, oñe’ẽ umi jehovasa patriarcal rehe. Ha’ékuri peteĩ mensáhe tuichaitereíva ha ñaneinspira opavavépe. Che hermano ha hermana-kuéra ahayhuetéva, ikatúpa añe’ẽmi umi jehovasa patriarcal rehe avei? Patriarca-kuéra, hetavévo jehovasa patriarcal jejerure, añembo’e Ñandejára tapenderovasa pemagnifikávo pehóvo pene llamamiénto.
Aha jave conferencia de estakahápe, akóinte avisita pe patriarca estaka pegua ha hembirekópe. Umi patriarca ha’e líder horýva, iñe’ẽrendúva ha oñeimo’ã’ỹva Tupã ohenoiva’ekue. Ha’ekuéra omombe’u chéve heta experiencia espiritual hechapyrãva. Ajerure chupekuéra pe eda imitãvéva ha pe itujavéva ome’ẽva’ekuépe peteĩ jehovasa. Ko’ágã peve imitãvéva oreko 11 ary, ha itujavéva 93 ary.
Ahupyty che jehovasa patriarcal miembro pyahu ramo Tupaópe, arekópe 19 áño, mokõi ary añemongarai rire. Che patriarca itujaiterei ningo, oñeimo’ã’ỹháicha. Oike Tupaópe ary 1916-pe ha ha’e pionéro Tupaópe upe Japón-pe. Ha’ékuri honor tuichaite chéve g̃uarã ahupyty che jehovasa patriarcal upe Ñandejára discípulo ijojaha’ỹvagui. Upe ihapone hasy’imi chéve g̃uarã iñentende, ha katu imbareteterei.
Umi patriarca aikuaávape guive he’i chéve heta tapicha ohupytyha jehovasa patriarcal oservi mboyvemi peteĩ misiõ. Che pohayhuetéva mitãkuimba´e, kuñataĩ, sy ha túva ha obispo-kuéra, umi jehovasa patriarcal ndaha’éi oñembosako’i hag̃uánte ojeservi hag̃ua peteĩ misiõ. Umi miembro oñemongaraiva’ekue idígnova ikatu ohupyty ijehovasa patriarcal oĩ porã vove chupekuéra.1
Ahayhuetéva miembro-kuéra adulto, oĩ pende apytépe ndohupytýiva gueteri umi ijehovasa patriarcal. Penemandu’áke ndaiporiha edad máxima.
Che suegra ha’ékuri peteĩ Tupaogua miembro ijactivoitereíva, oservíva mbo’ehára ramo Sociedad de Socorro-pe omano meve orekópe 91 áño. Ambyasy aikuaávo ha’e ndohupytýi hague peteĩ jehovasa patriarcal. Ha’e ohasa heta dificulta hekovépe, ha ndorekóigui sacerdocio guerekohára hogapýpe, ndohupytýi heta sacerdocio jehovasa. Ikatúne raka’e peteĩ jehovasa patriarcal ome’ẽkuri chupe angapyhy oikotevẽvérõ guare.
Peẽ adulto, oĩméramo ne’ĩra gueteri pehupyty peteĩ jehovasa patriarcal, ajeruremi aníkena pejepy’apy! Opavave calendario espiritual iñambue. Peguerekóramo 35 térã 85 áño ha peguereko peteĩ deseo, peñe’ẽ pende obispo ndive pehupyty hag̃ua pende jehovasa.
Tupaogua miembro-kuéra pyahu, pehendúmapa umi jehovasa patriarcal rehegua? Ndaikuaáikuri pe oportunida ahupytykuaaha peteĩva aikerõ guare Tupaópe, ha katu che obispo ahayhuetéva omombe’u chéve umi jehovasa patriarcal rehegua ha chemokyre’ỹ tañembosako’i ahupyty hag̃ua che mba’éva añemongarai rire. Che pohayhuetéva miembro-kuéra pyahu, ikatu avei pehupyty peteĩ jehovasa patriarcal. Ñandejára penepytyvõta peñembosako’i hag̃ua ko sagráda oportunidarã.
Jahechami mokõi propósito oguerekóva peteĩ jehovasa patriarcal:
-
Peteĩ jehovasa patriarcal oguereko konsého personal oúva Ñandejáragui peẽme g̃uarã.2
-
Peteĩ jehovasa patriarcal odeklara pene linaje Israel rógape.
Pende jehovasa patriarcal ha’e peteĩ mensáhe oúva pende Ru Yvagaguágui ha oiméneva ogueru ipype promésa ha konsého inspirado penesãmbyhýtava pende rekove pukukue aja. Peteĩ jehovasa patriarcal ndaha’emo’ãi omoĩtava mapa pende rekovépe ni ombohováitava opa pene mba’eporandu. Noñe’ẽiramo peteĩ akontesimiénto importante rehe pende rekovépe, ani peimo’ã upéva he’iseha ndapeguerekomo’ãiha upe oportunida. Upéicha avei, ndaipóri garantía opa mba’e oĩva pende jehovasápe oikotaha ko tekovépe. Peteĩ jehovasa patriarcal ha’e mba’e ijapyra’ỹva ha peikóramo digno, umi promésa noñekumplíriva ko tekovépe oñeme’ẽta ambuépe.3
Pehupytývo peteĩ deklarasiõ mba’e lináje-pa, peikuaáta peẽ ha’eha Israel rogaygua ha Abraham ñemoñare.4 Peikuaa hag̃ua mba’épa he’ise ko mba’e, peñesentra umi promésa Ñandejára ojapova’ekue rehe Israel rógape Abrahám rupive.
Umi promésa apytépe oĩ:
-
“Iñemoñare hetaitereítaha (tojehecha Génesis 17:5–6; Abraham 2:9; 3:14).
-
“Iñemoñare, térã iñemoñarenguéra, ohupytytaha pe evanhélio ha oguerekotaha pe sacerdocio (tojehecha Abraham 2:9).
-
“Iñemoñare ministério rupive, ‘opavave familia ko yvy arigua [ojehovasátaha], jepe umi Evanhélio jehovasa reheve, ha’éva jehovasa salvasiõ rehegua, tekove opave’ỹva jepe’ (Abraham 2:11).”5
Tupao miembro-kuéra ramo, ñande ha’e pe konvénio ra’y.6 Jahupyty umi konvénio Abrahámico jehovasa ñaneñe’ẽrendúvo umi evanhélio léi ha ordenansakuérare.
Peñembosako’i ramo pehupyty hag̃ua pende jehovasa patriarcal penepytyvõta pembotuichave hag̃ua pende jerovia Túva Yvagagua ha Jesucristo-re. Ha pehupyty vove pende patriarcal jehovasa ha pemoñe’ẽ ha pejepy’amongeta hese, ikatu peñesentra py’ỹive Hesekuéra.
Presidente Thomas S. Monson omyesakã: “Pe Ñandejáraite voi ome’ẽva’ekue peteĩ Liahona Lehi-pe g̃uarã, ome’ẽ peẽme ha chéve g̃uarã ko árape peteĩ don jepivegua´ỹ ha valioso ombohapéva ñande rekove, ñamarka hag̃ua umi peligro ñande seguridarã, ha jahai hag̃ua pe tape, jepe isegúrova — ndaha’éi peteĩ yvy oñeprometeva’ekuépe, ha katu ñande róga yvága peguápe.”7
Che pohayhutéva obispo, sy ha túva, elder-kuéra kórum ha Sociedad de Socorro presidiharakuéra, líder misional barrio pegua, hermano ha hermana-kuéra ministránte, ajeruremi, tapemokyre’ỹ umi mitãrusu ha kuñataĩ, miembro adulto ha miembro pyahúpe ne’ĩrava gueteri ohupyty ijehovasa patriarcal toheka Ñandejára sãmbyhy ha tapeipytyvõ chupekuéra toñembosako’i ojapo hag̃ua upéva.
Py’ỹi ha ñembo’épe amoñe’ẽ che jehovasa patriarcal; akóinte chemokyre’ỹ. Ahechakuaa mba’épa Ñandejára oha’arõ chehegui, ha upéva chepytyvõ añearrepenti ha añemomirĩ hag̃ua. Amoñe’ẽ ha ajepy’amongeta vove hese, aikose digno ahupyty hag̃ua umi jehovasa oprometéva.
Umi escritura heta jey ñamoñe’ẽva’ekue oguerekoháicha significado pyahu ñandéve g̃uarã tenondeve, ñande jehovasa patriarcal oguerekóta peteĩ significado iñambuéva ñandéve g̃uarã ambue épokape. Pe chemba’éva oreko peteĩ significado iñambuéva ko’ág̃a, arekórõ guare 30 áño ha arekórõ guare 50 áño. Ndaha’éi umi ñe’ẽ iñambueha, ha katu jahecha ambue hendáicha.
Presidente Dallin H. Oaks odeklara peteĩ jehovasa patriarcal “oñeme’ẽha Espíritu Santo inspirasiõ rupive ha oñemoñe´ẽ ha oñeinterpretava’erã upe Espíritu influencia rupive jey. Pe he’iséva ha importancia orekóva peteĩ jehovasa patriarcal oñembo’éta línea ha línea rehe ára ohasávo pe Espíritu pu’aka rupi oinspira va’ekue [upéva].”8
Hermano ha hermana-kuéra, ame’ẽ che testimonio Túva Yvagagua ha Ita’ýra Ohayhuetéva ha Unihénito, Ñandejára Jesucristo, oikoveha. Ha’ekuéra ñanderayhu. Umi jehovasa patriarcal ha’e don sagrádo ome´ẽva ñandéve Ha´ekuéra. Pehupyty vove pende jehovasa, pehecháta ha peñandúta mba’éicha Túva Yvágagua ha Jesucristo penderayhu ha mba’éicha oñesentra peteĩteĩ penderehe.
Mormón Kuatiañe’ẽ ha’e Ambue Jesucristo Testamento. Ha che aguyje ajegia haguére peteĩ proféta oikovéva rupive, presidente Russell M. Nelson.
Cheaguyje tuichaieterei ñande Salvador Jesucristo rehe. Ko Domingo de Pascua añesentráta Hese ha Ijeikovejeýre ha amomba’eguasúta Chupe ha ame’ẽta aguyje Isacrificio rehe. Aikuaa Ha’e ohasa asyeterei hague ñanderayhu pypukuetereígui. Aikuaa Ha’e oikovejey hague Imborayhu rupi ñanderehe. Ha’e ningo añetegua. Péicha atestifika Jesucristo rérape, Amén.