Peteĩ Proféta viviénte Ára Pahápe g̃uarã
Túva Yvagagua oiporavókuri modélo orrevela hag̃ua añetegua Itaʼyrakuérape peteĩ proféta rupive.
Che mitã aja, ahayhueteʼakue Sábado, opaite mbaʼe upe árape ajapóva haʼetévaicha peteĩ aventura. Péina katu tahaʼe haʼe ajapóva, akóinte ouraẽve pe iñimportantevéva—ahecha télepe dibujo animado. Peteĩ umi Sábado pyharevépe, añemboʼývo téle renondépe akambiávo umi canal, ahechakuaa pe dibijito ahaʼarõva ajuhu rangue oñemoĩhague Conferencia General ñetrasmiti, Jesucristo Tupao Santokuéra Ára Pahapegua. Amañávo pe telesiviõre ha ambyasývo ndaiporiha dibujo animado, ahechákuri peteĩ kuimbaʼe akã morotĩ, itráhe ha i-corbata oguapýva peteĩ apyka porã ári.
Ahecha peteĩ mbaʼe idiferénteve hese, ha aporandu che rykeʼýpe, “mávaiko péva?”
Haʼe heʼi, “Péva haʼe Presidente David O. McKay; heʼe ningo peteĩ proféta.”
Chemanduʼa añanduhague peteĩ mbaʼe ha oimeháicha aikuaákuri haʼeha peteĩ proféta. Upéi, che haʼe rupi peteĩ mitã oguerohoryetéva dibujito, akambiákuri pe canal. Ha katu, aravaʼeve ndacheresaráiva añanduvaʼekue upe mbykymi ha oñehaʼarõʼỹva momento revelador aja. Peteĩ profeta ndive, sapyʼamínte oñeikotevẽ ojeikuaa hag̃ua.1
Jaikuaávo rrevelasiõ rupi oĩha peteĩ proféta viviénte yvy ári omoambue opaite mbaʼe.2 Ojapo jaheja interés ñemongeta peteĩ proféta oñeʼẽha prefétaicha térã jajehustifika vove jarrechasárõ peteĩva konsého profétiko.3 Kóichagua jeikuaa ojerrevelapyre oporoinvita ojejerovia hag̃ua peteĩ proféta viviénte ñemoñeʼẽre, jepeve nañantendepái.4 Ipahápe, peteĩ Túva Yvagagua hekoporãmba ha oporohayhúva oiporavókuri modélo orrevela hag̃ua añetegua Itaʼyrakuérape peteĩ proféta rupive, máva arakaʼeve ohekaʼỹva kóichagua ñehenói sagrádo ha noikotevẽiva ñanepytyvõ rehe ohechakuaa hag̃ua hekoporãmbaʼỹ.5 Peteĩ proféta haʼe máva Tupãite voi ombosakoʼi, ohenói, okorrehi, oispira, ohavira, osantifika, ha ososteneʼakue.6 Upévare ñande arakaʼeve ndajaguerekói riesgo espiritual jasegívo konsého profétiko.
Tahaʼe jarohory térã nahániri, opavave jajeporavókuri oimeháicha tekove yvy arigua mboyve ñanese hag̃ua koʼã ára pahápe. Oĩ mokõi añete ojeoajúva koʼã ára paha rehe. Peteĩha añete haʼe Cristo Tupao oñemoĩjeytaha yvy ári. Mokõiha añete haʼe hasyvetaha ohóvo. Umi escritura oikuaauka ára pahápe outaha “peteĩ yvytu vai guasu amandáu reheve ohundi hag̃ua yvy arigua ñemitỹnguéra,”7 umi plága,8 “ñorairõguasu ha ñorairõguasu rerakuã, ha opa pe yvy oĩta jepy’apyvaípe, … ha hetavéta tembiapovai.”9
Che mitãme, koʼã ára pahapegua profesía chemongyhyjéva ha oñemboʼéva jepi pe Jeju Mokõiha ani hag̃ua oiko aikove aja—poʼaʼimi reheve koʼág̃a peve ikatu haʼe. Ha katu koʼág̃a ajerure upéichaʼỹ hag̃ua, jepeve umi mbaʼevai ojeprofetisavaʼekue oikóta katuete,10 Cristo oujey vove orreina hag̃ua, opa Ijapopyrekuéra “oĩtagui segúro.”11
Ko aragua múndo situasiõ ñanemondýi. Tupã konvénio raʼyrakuéraramo, natekotevẽi jaha kóva térã péva rapykuéri jaikuaa hag̃ua mbaʼéicha jaytavaʼerã koʼã ára pochy rupive. Natekotevẽi jakyhyje.12 Pe doctrina ha umi prinsípio jasegivaʼerã jasobrevivi hag̃ua espiritualmente ha jaropuʼaka hag̃ua físicamente ojejuhu peteĩ proféta viviénte ñeʼẽme.13 Upéva rupi, Presidente M. Russell Ballard heʼíkuri “ndahaʼeiha mbaʼe michĩ … jareko hag̃ua peteĩ Tupã proféta ñane mbytépe.”14
Presidente Russell M. Nelson otestifikavaʼekue pe “Tupã modélo yma oñemoĩvaʼekue omboʼe hag̃ua Taʼyrakuérape umi proféta rupive, oasegura ñandéve Haʼe ohovasataha peteĩteĩ proféta ha Haʼe ohovasataha umi ohendúvape konsého profétiko.”15 Upéicha pe kláve haʼe jasegi hag̃ua proféta viviéntepe.16 Hermano ha hermana-kuéra, mboʼepykuéra profétiko ndahepyvéi ary ohasávo umi libro cómico ha umi auto clásico-icha. Upévarupi, ndajahekaivaʼerã jaiporu umi proféta yma ñeʼẽnguéra ñamombaʼeʼi hag̃ua umi proféta viviénte mboʼepykuéra.17
Ahayhuete umi parávola Jesucristo oiporuvaʼekue omboʼe hag̃ua evanhélio prinsipiokuéra. Akompartise penendive peteĩ parávola vida real-gua ko pyharevépe.
Peteĩ árape aikékuri Tupao oficinas generales cafetería-pe akaru hag̃ua. Ajagarra rire peteĩ tembiʼu vandéha, aike upe comedor-pe ha ahechakuaa peteĩ mesa oguapyhápe mbohapy Primera Presidencia miembro, peteĩ apyka inandi. Umi che insegurida ojapo pyaʼe ajere hag̃ua upe meságui, ha upéi ahendu ñande proféta Presidente Russell M. Nelson ñeʼẽpu, heʼíva, “Allen, oĩ peteĩ apyka nandi koʼápe. Eju eguapy orendive.” Upéichamarõ aha.
Rokarupapotávo, añemondýi ahendúvo peteĩ chiã atã, ha amañávo, ahecha Presidente Nelson omoñemboʼy pe hiʼy botélla de plástico, ha upéi ombope ha omoĩjey hese itápa.
Presidente Dallin H. Oaks oporandu upérõ pe che aporaduséva, Presidente Nelson, mbaʼére embope nde y botella de plástico?
Haʼe ombohovái, “Hasyʼỹve umi omohendávape material reciclable, ndojagarráigui heta tenda contenedor ryrúpe”.
Ajepyʼamongetávo upe mbohováire, ahendujey pe chiã ryapu. Amaʼẽ che asúpe, ha Presidente Oaks ombopékuri ibotélla de plástico Presidente Nelson-cha. Upéi ahendu tyapu che akatúape, ha Presidente Henry B. Eyring ombopékuri ibotella de plástico, ha oiporu katu ambue estrategia, ojapóvo pe botella oñenóme, oikotevẽva oñembaʼapove hese pe botella oñemboʼývagui. Ohechávo, Presidente Nelson torýpe ohechauka chupe botella moñemboʼy técnica, hasyʼỹve hag̃ua botella ñembope.
Upe moménto, añemboyke Presidente Oaks gotyo ha aporandu mbeguekatumi, “Haʼe piko ñande botella ýregua ñembope reciclahe requisito pyahu cafetería-gua?”
Presidente Oaks ombohovái, pukavýpe hováre, “Upéicha, Allen, tekotevẽ resegi profétape.”
Aguerovia Presidente Nelson ndoreklaráihague peteĩ doctrina pyahu reciclaje rehegua cafetería-pe upe ára. Ha katu ikatu ñaikumby pyaʼe ñembohovái 18 Presidente Oaks ha Presidente Eyring ojapóva Presidente Nelson rembiecharãgui, ha Presidente Nelson jasarekógui oipytyvõ hag̃ua umívape mbaʼéicha hasyʼỹve.19
Ojapo mbovymi ary, Elder Neal A. Maxwell okompartihague mbovy observasiõ ha konsého profétikamente ojasertáva ñande ára reheguápe:
“Umi mes ha áño oútavape, umi mbaʼe oikóva ojeruréta peteĩteĩ miembro-kuéra odesidi osegíta térã ndosegimoʼãi Primera Presidencia-pe. Hasyvéta miembro-kuérape oreko hag̃ua mokõi opiniõ. …
“… Tajaheja peteĩ ñemombe’u, umi jeiporavo hesakã hag̃ua, jahejávo ambuekuéra tojapo ojaposeháicha pe konsého profétiko renondépe.
“Jesús he’i umi igéra rogue ho’ávo, ‘arahaku hi’ag̃uíma.’ … Upéicha, oje’émavo ára haku oĩmaha ñande ári, aníke jajekeha hakúgui!”20
Henerasiõ pyahu okakuaahína peteĩ ára hetavehápe umi igéra rogue ha hakuve. Upe añetegua ogueru ipohyivéva rresponsabilida henerasiõ pyahúpe g̃uarã, ko’ýte ojetratárõ konsého profétiko jesegíre. Tuvakuéra nopenáiramo proféta viviénte ñemoñe’ẽre, ndaha’éi operdénte umi jehovasa oñeprometéva chupekuéra g̃uarã, ha katu pe ivaivéva, ombo’e ifamilíape proféta he’íva ñaiñimportanteiha térã pe konsého profétiko ikatuha ojeporavo heta hendáicha, jajepy’apy’ỹre nutrisiõ espiritual vai upéva rupi oúvare.
Elder Richard L. Evans peteĩ jave he’i: Oĩ tuvakuéra jejavýpe oñandúva ikatuha opytu’u’imi tekopy ha konformida reheguápe … ikatuha opytu’u’imi umi mba’e iñimportántevape, ombyai’ỹre ifamília térã ifamília tenondevegua. Ha katu, peteĩ sy ha túva oguatakarẽ’imírõ, umi mitã ikatu oguatakarẽ tuichave ituvakuéra techapyrãgui.”21
Peteĩ henerasiõ orekóvaramo tembiaporã sagrádo ombosako’i hag̃ua henerasiõ pyahu hembiaporã ojeprofetisapyrévape g̃uarã ára pahápe,22 tembiapo oñekumpliva’erã, ára upe aña influénsia imbareteveha javépe,23 ndaikatúi osẽvo ñandehegui konfusiõ, pe konsého profétiko jesegi iñimportanteha. Upe konsého ningo ohejáta henerasiõ pyahu ohecha hag̃ua “pe añáme imombyry aja [chugui]; ha upéi [ikatu oĩ hikuái] preparádo”, ogueropu’aka hag̃ua pe oporohayhu’ỹva atáke.24 Umi ha’etévaicha ñande guatakarẽ’imi, ñane ñehendu’ỹ kirirĩ, térã umi ñe’ẽvai ja’e mbeguemíva ñambohováivo pe konsého profétiko, ikatu ñandereraha jaguata peligrosamente pe konvénio rape ru’ã rembe’ýre; ha katu pe aña ombotuicháramo umíva umi henerasiõ pyahu rekovépe, ikatu ogueraha chupekuéra ohejaite hag̃ua pe tape. Upe rresultádo ha’e peteĩ jehepyme’ẽ ñemoñare rehegua ijyvatetereíva.25
Ikatu oĩ oñándúva ndohupytyihague ñeha’ã ojapóva osegi hag̃ua Presidente Russell M. Nelson ñemoñe’ẽ. Upéicharamo, peñearrepenti; peñepyrũ jey pesegi umi Tupã oiporavo’akue proféta ñemoñe’ẽ. Pemboyke umi dibujo animado pende distraéva ha pejerovia Ñandejára unhídore. Pevy’a, oĩ pyahu jeýre peteĩ “proféta Israel-pe .”26
Jepe ndapeikuaa porãi, che ha’e testígo ikatuha jaropu’apa ára haku ko’ã ára pahapegua ha japrogresa jepe ipype. Ñande ningo Santokuéra ára pahapegua, ha ko’ãva ningo ára rechapyrã. Jajusetékuri yvy ári ko árape, jajeroviávo ndojehejamo’ãiha ñañepysãnga ñambohovakévo umi adversario ratatĩ iñypytũ ha ikonfusovéva ohóvo27 upe rangue katu jajapyhy hag̃ua consejo ha dirección upe ojeautorisa porãmbávagui he’i hag̃ua ñandéve ha opa múndope, “Péicha he’i Tupã Ñandejára.”28 Pe proféta Tupã omopu’ãva’ekue réra sagrádope, Israel-gua Imarangatuetéva, 29héẽ, Jesucristo, Amén.