Témplo ha Historia Familiar Rembiapo—Peteĩ ha ojueheguáva tembiapo
Enfóke mbyte ñande Ru Yvagagua plan-pe ha’e ñambojoaju familia ko tekovépe ha eternidápe g̃uarã.
Cheaguyjeterei umi témplo oñemopu’ãvare hína ko “dispensasiõ ára oñekumplipaitetahápe” (Doctrina ha Konveniokuéra 128:18). Pe rrestaurasiõ ára ñepyrũmby guive, Santokuéra ijeroviarekóva ojapova’ekue heta jehasa’asy ohupyty hag̃ua témplo ordenánsa ha konveniokuéra. Rosegívo tuicha hembiecharãnguéra, 1975-pe, heta jehasa’asy económico rire, roviahávo Ciudad de México-gui, che rembireko ahayhuetéva, Evelia ha che, oremoirũvo ore rukuéra rohayhúva, rojesellákuri ména ha tembireko etérno ramo, Mesa, Arizona Témplope. Upe ára, rojoajúvo sacerdocio autorida rupive Ñandejára rógape, añetehápe roreko peteĩ techa yvagaguigua.
Templokuéra Rembiapo ha Propósito
Upe experiencia ohejákuri chéve omomba’eteve hag̃ua mba’éicha, mbohapy ary tembiapo pohýi ha tuicha jeha’asy rire, Santokuéra Kirtland, Ohio-pe, ipahápe omohu’ãkuri itémplo porãite, arapoty 1836-pe—peteĩháva ko dispensasiõmegua. Marzo upe áñope, hetave mil persona oñembyaty upe témplo ha henondépe servísio dedikatoriorã. Proféta José Smith oñembo’y oikuave’ẽ hag̃ua pe ñembo’e dedikatório, ohupytyva’ekue rrevelasiõ rupive (tojehecha Doctrina ha Konveniokuéra 109). Upévape omombe’u jehovasakuéra jojaha’ỹ oñeme’ẽva umi tekopotĩme oikévape Ñandejára témplope. Upéi pe kóro opurahéi himno “El Espíritu de Dios” ha pe kongregasiõ oñembo’y ha ome’ẽ pe Hosanna Sapukái “[imbaretetégui] ha’etévaicha … omopu’ãva pe óga técho” (Umi Tupao Presidente Mbo’epykuéra: José Smith [2007], 307).
Peteĩ semána upe rire, pe Proféta omombe’u Ñandejára jehechauka témplope, he’íva:
“Péina ápe, che amboajégui ko óga, ha che réra oĩta ko’ápe; ha Che ajehechaukáta poriahuverekópe che tavayguakuérape ko ógape. …
“Ha ko óga rerakuãporã isarambíta umi tetã ambue peve; ha kóva ha’e jehovasa ñepyrũmby oñeñohẽtava che tavayguakuéra akã ári” (Doctrina ha Konveniokuéra 110:7, 10).
Kóva ha ambue visiõ rire, Elías pe proféta, ojeguerahava’ekue yvágape oñadu’ỹre ñemano, ojehechauka Proféta José ha Oliver Cowdery-pe ha he’i:
“Péina ápe, og̃uahẽmbaitéma ára oñeñe’ẽ haguégui Malaquías juru rupi—otestifikávo ha’e, [Elías] [upe Proféta] oñemboutaha Ñandejára ára tuicha ha oporomondyietéva mboyve—
“Oguerujeýta tuvakuéra korasõ ta’yrakuéra gotyo, ha ta’yrakuéra korasõ tuvakuéra gotyo, ani hag̃ua ojehavira opa pe yvy ñe’ẽngáipe—
“Upévare, oñemoĩ pende pópe ko dispensasiõ llavekuéra; ha kóva rupi peikuaáta Ñandejára ára tuicha ha oporomondyietéva hi’ag̃uimaha, héẽ, upe okẽme” (Doctrina ha Konveniokuéra 110:14–16).
Pe Templo ha Historia familiar
Ñandejára orrestaura rire José Smith-pe llavekuéra ojesella hag̃ua, oñepyrũ salvasiõ rembiapo mokõi vélo ládope, ñane dispensasiõme (Tojehecha 1 Corintios 15:22, 29;Doctrina ha Konveniokuéra 128:8–18).
Presidente Boyd K. Packer ombo’e va’ekue “ko evénto ojehechaukapyréva múndo nohendúikuri, ha katu omoambuéta peteteĩ ánga destíno, araka’eve oikovéva térã oikovétava. Umi mba’e oñepyrũ oiko kirirĩháme. Tupaógui oiko tupao omopu’ãva témplo.
“Múndope ojekuaa ápe ha pépe, oñeimo’ãva ñeha’rõ’ỹme, umi tekove ha socieda ha organisasiõ ohekaséva genealogía-kuéra. Ko’ãva oikóva Elías ojehechauka ypy guive Kirtland Témplope” (The Holy Temple [1980], 141).
“Upe araite guive, Abril 3, 1836-pe, ta’yrakuéra korasõ oñepyrũ ojere ituvakuéra gotyo. Upe guive, umi ordenánsa ndaha’éikuri oñetanteáva, ha katu tapiaguáva. Pe poder sellador oĩkuri ñanendive. Mba’eve autorisasiõ hepyve chugui. Upe pu’aka ome’ẽ signifikádo ha permanénsia eterna opa ordenánsa ojejapóvape autorida ha’etéva rupive, mokõive, umi oikovéva ha omanova’ekuére” (Ñañembosako’i Jaike hag̃ua Témplo Marangatúpe [2002], 28).
Hermano ha hermana-kuéra pejehayhuetéva, umi témplo ñemopu’ã ha hekópe jeiporu ha’éva oimaraẽ dispensasiõme peteĩ techaukaha Jesucristo tupao añeteguágui. Ojededika rire Lago Salado témplo, 1893-pe, Presidente Wilford Woodruff omokyre’ỹ tupao miembro-kuérape ojuhu hag̃ua ijypykuéra rrehístro ha ohai hag̃ua igenealogía ojevy mombyryvévo upe ikatuhápeve ogueru hag̃ua herakuéra témplope, ha ojapo umi ordenánsa salvasiõ ha exaltasiõ rehegua (Tojehecha Enseñanzas de los Presidentes de la Iglesia: Wilford Woodruff [2004], 174).
Historia Familiar ha Templo Rembiapo—Peteĩ Tembiapo
Peteĩ ary rire (1894)-pe, upe Presidente Woodruff ijehegui osupervisa pe Sociedad Genealógica de Utah ñemopu’ã. Cien ary upe rire, 1994-pe, Elder Russell M. Nelson, upérõ Dóse Apóstoles Cuórum-gua miembro, he’íkuri, “Umi evénto upe ary histórico pegua, omoĩkuri pe Historia Familiar jeheka ha templo pegua servísio peteĩ tembiapóramo tupaópe” (“Elías ,Espíritu,” Ensign, Nov. 1994, 85).
Historia Familiar Rembiapo
Hermano ha hermana-kuéra pohayhuetéva, Ñandejára ñanemokyre’ỹ, Itupao miembro ramo, ñañongatu hag̃ua ñande historia familiar, jaikuaa hag̃ua umi ñande ypykuégui, ha jajapo tekotevẽva hesekuéra, ohupyty hag̃ua hikuái umi evanhélio ordenansakuéra témplope, ñaipytyvõ hag̃ua toñakarapu’ã hikuái pe konvénio rapére, ohovasátava chupekuéra familia eterna reheve. Kóva ha’e enfóke mbyte ñande Ru Yvagagua plan-pe: ñambojoaju familia ko tekovépe ha eternidápe g̃uarã.
Umi pende apytépe oñandúva ndaikatuiha ojapo ko tembiapo, peikuaáke napeimeiha pene’año. Opavave pehokuaa umi tembiporu Tupao opreparava’ekuépe ha oĩva FamilySearch center-pe, jaikuaáva jepi umi centro de historia familiar-ramo. Ko FamilySearch centers ojejapókuri haimete oimeraẽva, pytyvõ’imi rehe, ikatu hag̃uáicha ojuhu ijypykuéra informasiõ, ha omohenda porãmba, ikatu hag̃uáicha ogueraha hikuái umíva Ñandejára rógape. Peñe’ẽmi umi especialista de historia familiar pende barrio térã rrama-pegua ndive, penesãmbyhýtava opa mba’épe.
Jasegívo profetakuéra gía ha jaikuaa mba’éicha jajapova’ẽra ñande historia familiar ha jajapo umi témplo ordenánsa ñande ypykuérare, ñañandúta tuicha vy’a, ndajapoisevéi peve péva apóvogui. Pe Espíritu omyenyhẽta ñañe korasõ, omombáyta ñande katupyry jajapo hag̃ua, ha ñandegiáta jahekávo umi ñande ypykue réra. Ha katu ñanemandu’áke historia familiar he’iseveha umi téra, dáto ha tenda jehekágui añónte. He’ise familia ñembojoaju, ha ñañandu pe vy’a oúva jaipysóvo chupekuéra evanhélio ordenansakuéra.
Ahayhu ñande proféta jahayhuetéva mbo’epy, Presidente Russell M. Nelson, he’iva’ekue: “Pe témplo oĩ ñande jerovia ñemombarete ha ñemombarete espiritual mbytépe, pe Salvador ha Idroctrina ha’e haguére pe témplo korasõite. Opa mba’e témplope oñembo’éva, ñemoarandu ha Espíritu rupive, omongakuaa ñane ñeikũmby Jesucristo-gui. Iñordenansa esencial-kuéra ñanembojoaju Hese umi sacerdocio kónvenio sagrádo rupive. Upéi, ñañongatúvo umi ñane konvénio, Ha’e ñanembyao Ipu’akañanemongueráva ha ñanemombaretéva reheve” (“Pe Témplo ha Ñande Pyenda Espiritul,” Liahona, Nov. 2021, 93–94).
Añetehápe, pe témplo ha historia familiar rembiapo ha’e peteĩ, ha ojueheguáva tembiapo Tupaópe.
Atestifika ko’ã añeteguágui. Aikuaa kóva ha’eha Ñandejára Jesucristo, ñande Salvador ha Redentor Tupao, ñanemandu’ávare ha ñamomorãva ko Páskua árape. Aikuaa Ha’e ñanderayhuha, ha ñañongatúramo umi ñane konvénio ha ñamoĩramo ñane konfiánsa Hese, Ha’e ñanembyao Ipokatu opomonguera ha opomombaretéva reheve. Jesucristo rérape, Amén.