![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F86%2Fa8%2F86a895147de9b1f2278f6707f9778d1957bbee37%2F86a895147de9b1f2278f6707f9778d1957bbee37.jpeg/full/!250,/0/default)
Ñañenfoka Jesucristo-re
Ñandejára Jesucristo niko umi ñande problema solusiõ, ha katu jahupiva’erã ñande resa ha ñamaña yvate gotyo jahecha hag̃ua Chupe.
Che ru he’i jepi chéve: “Ani reñenfokaiterei ne problema-kuérare ndaikatúi hag̃uáicha rehecha pe solusiõ”.
Atestifika Ñandejára Jesucristo ha’eha pe solusiõ jepe umi ñane problema hasyvévape. Espesífikamente, Ha’e ogueropu’aka irundy umi problema peteĩteĩ ñande ñambohovakéva ha avave ñande ndaikatúiva jarresolve ñandejehegui:
-
Problema peteĩha niko ñande rete ñemano. Ikatu ñamombegue térã nañapenái hese, ha katu ndaikatúi jagueropu’aka ñandejehegui. Ha katu, Jesucristo ogueropu’aka pe ñemano ñanderehe, ha upévare opavave peteĩ árape jaikove jeýta.1
-
Problema mokõihápe oike umi jeiko’asy, tembiasa hasýva, vy’a’ỹ, ñembyasy ha tekojoja’ỹ yvoragua. Jesucristo ogueropu’akapaite umíva. Umi oñeha’ãvape g̃uarã osegi Chupe, peteĩ ára Ha’e “omokãta opa tesay” ha omoĩporãmba jeýta opa mba’e.2 Upéva aja, Ha’e ñanemombaretekuaa jahasa hag̃ua umi ñane jeipy’ara’ã jerovia, tory ha py’aguapy reheve.3
-
Problema mbohapyha niko pe ñemano espiritual oúva angaipa rupi. Jesucristo ogueropu’aka upe problema ojagarrávo hi’ári “ñande py’aguapy jehavira”.4 Isakrifísio expiatorio rupi, ikatu ñañemosãso umi mba’e ñane angaipakuéra reheve oúvagui jajeroviárõ pe Salvador rehe, ñañearrepenti añete, ja’acepta pe konvénio Túva oikuave’ẽva ñandéve umi ordenánsa esencial rupive, bautismo-icha, ha ñañeha’ã mbaite ipahaite peve.5
-
Problema irundyha niko ñande naturaleza limitada ha noĩmbaporãiva. Jesucristo avei oreko solusiõ ko problema-pe g̃uarã. Ha’e ndaha’éi omboguénteva ñande jejavykuéra ha ñanemoinosénte jey. Ha’e ikatu ojapo “peteĩ tuicha ñemoambue … ñane korasõme, upévare ndajajaposevéima mbaʼevai, ha katu jajapo meméntema pe iporãva.”6 Ikatu ñanderekoporãmbaite Cristo grásia rupive ha peteĩ ára oiko ñandehegui Ha’éicha.7
Ñembyasyrã, py’ỹieterei ñañekonsentraiterei umi ñande problema teépe ha ndaikatúi ñañenfoka pe solusiõme, ñande Salvador, Jesucristo. ¿Mba’éicha jajehekýi upe jejavýgui? Aguerovia mbohovái oĩha umi konvéniope ñañeinvitáva jajapo hag̃ua Hendive ha ñande Ru Yvagagua ndive.
Ñañesentrávo Jesucristo-pe konveniokuéra rupive
Ñane konveniokuéra ñanepytyvõ ñasentra hag̃ua ñane pensamiento ha mba’e’apo Cristo-pe. “Jajoajúvo konveniokuéra [jajapova’ekuére]”, ikatu hasyʼỹve jahechakuaa “umi mbaʼe ko mundogua” “ñambo’ykeva’erã” ha “umi mba’e peteĩ [múndo] iporãvévagui” jahekava’erã jesarekópe.8
Upevaite ojapova’ekue Ammón tavayguakuéra Mormón Kuatiañe’ẽme. Oikuaavévo Jesucristo-gui ha oñepyrũ osentra hekove Hese, ohechakuaa hikuái oñotỹva’erãha hi’armakuéra ñorairõrã ha oiko chuguikuera heko japuʼỹva ha oĩporãmbáva opa mbaʼépe ha “ojeikuaa chupekuéra ipyʼaporãgui Tupã ndive g̃uarã”.9
Ñañongatúvo umi konvénio ñandegueraha jahekávo umi mba’e oinvitáva Espíritu influencia-pe ha ñambotove oimeraẽ mba’e omomombyrýva—“jaikuaágui ikatúrõ ñanderekopotĩ ñaime hag̃ua Espíritu Santo ndive, avei ñanderekopotĩkuaa jaiko hag̃ua Túva Yvagagua ha Ita’ýra, Jesucristo presencia-pe.”10 Upéva ikatu he’ise ñamoambueva’erã ñane ñe’ẽ lája, jaiporúvo ñe’ẽ ipochy’ỹvéva. Ikatu he’ise ñamyengovia umi lája espiritual ivaíva lája porã pyahu reheve omombaretéva ñande joaju Ñandejára ndive, ñembo’e ára ha ára, ha escritura-kuéra estudio, ñaneaño ha ñane familia ndive.
Presidente Russell M. Nelson he’i “káda tekove ojapóva konvénio umi pila bautismal ha témplope—ha oñongatu umíva—ohupytykuaave Jesucristo pu’aka …
”Jehepyme’ẽ ñañongatu haguére umi konvénio Tupã ndive ha’e pu’aka yvagagua—pu’aka ñanemombaretéva jarresisti porãve hag̃ua ñande pruéva, jeipy’ara’ã ha ñembyasykuéra.”11
Ñambopyahúvo ñane konveniokuéra Santa Cena aja káda domingo niko oportunida guasu ñañehesa’ỹijo hag̃ua ñandejupe12 ha ñasentra jey ñande rekove Jesucristo-pe. Japartisipávo Santa Cena-gui, ñamomarandu “ñanemandu’aha tapiaite hese.”13 Pe ñe’ẽ tapiaite mba’eguasueterei. Oipyso pe Salvador influencia peteĩteĩ ñande rekove pehẽnguépe. Nañanemandu’ái Hese tupaópente térã ñane ñembo’e pyhareveguápe térã ñaimérõ techavaípe ha ñaikotevẽ peteĩ mba’e.
Héẽ, sapy’ánte jajedistrae. Ñanderesarái chugui. Okañy ñane enfóke. Ha katu ñambopyahu ñane konveniokuéra he’ise ñanemandu’ase tapiaite pe Salvador rehe, ñañeha’ãtaha jajapo upéva pe semana pukukue, ha ñañekompromete jeýta ha ñañesentra jeýta Hese Santa Cena mesápe semana oúvape.
Ñañesentrávo Jesucristo-re Ñande Rógape
Hesakã porã, ñañesentra Jesucristo-pe ha’eva’erã hetave peteĩ activida domingo-gua tupaógui. Presidente Nelson opresentárõguare Eju, Chesegi 2018-pe, he’i: “Ha’e peteĩ Tupao oñesentráva ógape ára.”14 He’i “ñamoambueva’erã [ñande] róga peteĩ santuario jerovia reheguápe” ha “peteĩ evanhélio ñemoarandu renda”. Ha ojapo ñandéve irundy promesa hechapyrãva jajapórõ upéicha.15
Promesa peteĩha: “Pende día de reposo ha’éta añetehápe peteĩ delísia”. Ha’éta peteĩ ára ñañemo’ag̃uivehápe ñande Salvador rehe. Peteĩ mitãkuña Perú-pegua he’i: “Pe Ñandejára ára niko ára ahupytyvehápe mbohovái Ñandejáragui”.
Promesa mokõiha: “Pende familia-kuéra oĩta vy’apópe oikuaa ha ovivi hag̃ua Salvador ñehekombo’ekuéra.” Upévare “ñañeʼẽ Cristo-re, ha javyʼa Cristo-pe, ñamboʼe Cristo-gui, … ñande raʼykuéra oikuaa hag̃ua moõpa ohekavaʼerã hikuái iñangaipa jora.”16
Jajapo upéva peteĩ ára, ñande ta’yrakuéra oho vove omba’apo, térã osẽ oguata yvytýre, térã oho omariska ka’aguýre, ojapo haguéicha Enós, imandu’a hag̃ua hikuái umi mba’e ñambo’eva’ekue chupekuéra Cristo-gui ha vy’a oúva javivívo pe evanhélio. Ha mávapa oikuaáne? Ikatu mba’e upe ára ipahápe ha’éta ára oñanduhápe ñembyahýi espiritual ombojerétava chupe Jesucristo gotyo ikatu hag̃ua ohendu Ñandejára ñe’ẽ he’ívo chupe: “Oñeperdona ndéve ne angaipakuéra, ha rejehovasáta.”17
Promesa mbohapyha: “Pe adversario influencia pende rekove ha pende rógape ikangyvéta”. Mba’ére? Ñañesentrave haguére Jesucristo-pe, angaipa naiporãvéi ohóvo.18 Ñande róga henyhẽveháicha pe Salvador resape reheve, oĩ pokãvéta tenda adversario ypytũme g̃uarã.
Promesa irundyha: “Ñemoambue pene familia-pe tuicha ha hi’aréta”. Mba’ére? Ñemoambue Jesucristo oguerúva ha’égui “peteĩ tuicha ñemoambue.”19 Ha’e omoambue ñane naturalesa; oiko ñandehegui “tekove pyahu”.20 Mbeguekatu jajoguave jahávo pe Salvador-pe, ñanerenyhẽvo Imborayhu potĩgui opavave Tupã ta’yrakuérare.
¿Mávapa ndoipotaichéne oñekumpli umi promesa hekove ha ifamiliakuérape? ¿Mba’épa jajapova’erã jahupyty hag̃ua umíva? Mbohovái ha’e ñakonverti ñande rogakuéra peteĩ jerovia santuario ha evanhélio ñemoarandu rendápe. ¿Ha mba’éicha jajapo upéva? Ñañesentrávo Túva Yvagagua ha Jesucristo-pe, jajapóvo Chuguikuéra ñande familia rekove mbytete, influencia tuichavéva ñande rógape.
¿Ikatu ha’e peẽme tapeñepyrũ pejapóvo Cristo ñe’ẽngueragui, oĩva escritura-kuérape, pende ára ha ára pehẽ? Ndaipóri peteĩ fórmula ojehaiva’ekue escritura-kuéra estudio porãmbarã. Ikatu 5 térã 10 aravo’i ára ha ára, térã hetave ikatúrõ. Ikatu peteĩ capítulo térã pokã versíkulo ára ha ára. Oĩ familiakuéra oestudiasevéva pyharevekue oho mboyve mbo’ehao térã mba’apohápe. Ambuekuéra omoñe’ẽ pyharekue oñeno mboyve. Oĩ umi omenda ramóva he’íva chéve oestudiaha ha’eño ohokuévo omba’apohápe ha upéi okomparti idea oñondive texto rupi iñemongeta opytahápe registrado.
Eju, Chesegi osuheri heta activida ha rrekursokuéra oipytyvõkuaáva tapicha ha familiakuérape oñemoarandu hag̃ua evanhélio principio-kuérape umi escritura-gui. Umi video Biblia ha Mormón Kuatiañe’ẽmegua ikatu ha’e tembiporu porãite pende familia-kuéra ohupytyporãve hag̃ua escritura-kuéra. Umi jóvenes ha mitãnguéra py’ỹi oñeinspira umi escritura-gua ñemombe’u hechapyrãva rupi. Ko’ã ñemombe’u ha umi evanhélio principio umíva ombo’éva opytáta pende ta’yrakuéra ndive, angirũicha ojeroviávare, oikotevẽvo ehémplo porã servicio, virtud, ñe’ẽrendu, ñeha’arõkuaa, ñeha’ãmbaite, rrevelasiõ personal, karida, ñemomirĩ ha jerovia Jesucristo-re rehegua. Ára ohasávo, pene ñeha’ãmeme pejedeleitávo Tupã ñe’ẽme oipytyvõta pende ta’yrakuérape oñemo’ag̃ui ag̃uive hag̃ua pe Salvador-re. Ha’ekuéra oikuaáta Chupe araka’evéicha upe mboyve.
Ñandejára Jesucristo oikove ko árape. Ha’e niko ikatu peteĩ presencia oikovéva ha ára ha aragua ñande rekovépe. Ha’e niko umi ñande problema solusiõ, ha katu jahupiva’erã ñande resa ha ñamaña yvate gotyo jahecha hag̃ua Chupe. Ha’e he’íkuri: “Pema’ẽ cherehe opa pensamiento-pe; ani pe duda, ani pekyhyje.”21 Ñañenfokávo Hese ha ñande Ru Yvagaguáre, jajapo ha ñañongatu konveniokuéra Hendivekuéra, ha jajapo Chuguikuéra influencia tuichavéva ñande róga ha ñande familiakuérape, oikóta ñandehegui umi tapichaichagua Presidente Nelson ohechava’ekue: “Peteĩ pueblo ikatupyrýva, oĩva listo ha hekojojáva orresivi hag̃ua Ñandejárape Ha’e ou jey vove, peteĩ táva oiporavómava Jesucristo-pe ko mundo ho’apyre ári, peteĩ pueblo horýva isãsome oiporavo hag̃ua ovivi umi Jesucristo léi ijyvateve ha imarangatuvéva.”22 Jesucristo rérape, Amén.