វដ្ដប្រកបដោយអានុភាព និងគុណធម៌នៃគោលលទ្ធិនៃព្រះគ្រីស្ទ
ខ្ញុំសូមអញ្ជើញបងប្អូនឲ្យរស់នៅតាមគោលលទ្ធិនៃព្រះគ្រីស្ទម្ដងហើយម្ដងទៀត ដដែលៗ និងដោយមានចេតនាពិត ហើយជួយអ្នកដទៃនៅតាមផ្លូវរបស់ពួកគេ ។
ជាច្រើនឆ្នាំកន្លងទៅ ភរិយាខ្ញុំ រូស្ស កូនស្រីយើង អាសលី និងខ្ញុំបានចូលរួមនឹងអ្នកទេសចរណ៍ផ្សេងទៀតក្នុងដំណើរកម្សាន្ដទូកខៃយ៉ាកនៅរដ្ឋហាវ៉ៃ សហរដ្ឋអាមេរិក ។ ទូកខៃយ៉ាកគឺជាទូកទាបដល់ទឹក មានរាងដូចទូកខានូ ដែលអ្នកជិះអង្គុយបែរទៅមុខ ហើយប្រើច្រវាដែលមានផ្លែពីរ ដើម្បីចែវពីមុខទៅក្រោយ ម្ដងខាងនេះ ម្ដងខាងនោះ ។ តាមផែនការគឺចែវទូកទៅកាន់កោះតូចៗចំនួនពីរ ចេញពីឆ្នេរអូអាហ៊ូ ហើយត្រឡប់មកវិញ ។ កាលពីខ្ញុំនៅក្មេង ខ្ញុំមានទំនុកចិត្តពីព្រោះខ្ញុំធ្លាប់ចែវទូកខៃយ៉ាកឆ្លងកាត់បឹងភ្នំ ។ ការមានទំនុកចិត្តហួសហេតុ មិនដែលបានផលល្អទេ មែនអត់ ?
អ្នកនាំផ្លូវបានផ្តល់ការណែនាំដល់យើង ហើយបង្ហាញរបៀបប្រើទូកខៃយ៉ាកសម្រាប់ទឹកសមុទ្រ ។ ទូកទាំងនោះខុសពីទូកដែលខ្ញុំធ្លាប់ចែវពីមុន ។ ខ្ញុំត្រូវអង្គុយនៅពីលើទូកខៃយ៉ាក ពុំមែនអង្គុយក្នុងទូកទេ ។ ពេលខ្ញុំឡើងទូកខៃយ៉ាក ទំនាញទម្ងន់ខ្ញុំធ្ងន់ជាងធម្មតា ហើយខ្ញុំមិនសូវមានលំនឹងនៅលើទឹកទេ ។
ពេលយើងចាប់ផ្តើម ខ្ញុំបានចែវទូកលឿនជាង រូស្ស និង អាសលី ។ មួយសន្ទុះក្រោយមក ខ្ញុំអុំហួសឆ្ងាយពីពួកគេ ។ ទោះជាខ្ញុំមានមោទនភាពចំពោះល្បឿនដ៏លឿនរបស់ខ្ញុំក្ដី ក៏ខ្ញុំបានឈប់ចែវ រង់ចាំឲ្យពួកគេអុំមកទាន់ដែរ ។ រលកធំមួយ—ទំហំធំប្រហែល ១៣ សង់ទីម៉ែត្របោកមកលើចំហៀងទូកខៃយ៉ាកខ្ញុំធ្វើឲ្យក្រឡាប់ខ្ញុំធ្លាក់ទៅក្នុងទឹក ។ ពេលខ្ញុំក្រឡាប់ទូកខៃយ៉ាកមកវិញ ហើយខំឡើងជិះទូក រូស្ស និង អាសលី បានចែវហួសខ្ញុំបាត់ទៅហើយ ប៉ុន្ដែខ្ញុំចែវទៅមុខមិនរួចទេ ព្រោះខ្ញុំដកដង្ហើមស្ទើរមិនដល់គ្នាផង ។ ខ្ញុំដកដង្ហើមមិនទាន់បានស្រួលបួលផង ស្រាប់តែមានរលកមួយទៀតបក់មក វាពិតជាធំមែន—ទំហំធំប្រហែល ២០ សង់ទីម៉ែត្របានបោកមកលើទូកខ្ញុំ ធ្វើឲ្យក្រឡាប់ទូកខ្ញុំម្ដងទៀត ។ ទម្រាំខ្ញុំអាចលើកក្រឡាប់ទូកខៃយ៉ាកមកវិញបាន ខ្ញុំស្ទើរតែផុតដង្ហើម ហើយខ្ញុំភ័យថា ខ្ញុំមិនអាចឡើងជិះលើទូករួចទេ ។
ពេលឃើញស្ថានភាពខ្ញុំដូច្នេះ អ្នកនាំផ្លូវបានចែវទូកមកក្បែរ ហើយបានទប់ទូកខ្ញុំឲ្យនឹង សម្រួលឲ្យខ្ញុំឡើងជិះទូកវិញបាន ។ ពេលគាត់ឃើញថា ខ្ញុំនៅដង្ហក់ខ្លាំងមិនអាចចែវបានដោយខ្លួនឯង គាត់ក៏បានចងខ្សែពួរមួយជាប់នឹងទូកខ្ញុំ ចែវអូសទូកខ្ញុំទៅជាមួយគាត់ ។ មិនយូរប៉ុន្មាន ខ្ញុំដកដង្ហើមស្រួលវិញ ហើយចែវទូកបានដោយខ្លួនឯង ។ គាត់បានស្រាយខ្សែពួរចេញ ហើយខ្ញុំបានទៅដល់កោះទីមួយដោយគ្មានជំនួយបន្ថែមឡើយ ។ ពេលមកដល់ ខ្ញុំបានទម្លាក់ខ្លួនលើខ្សាច់ ទាំងអស់កម្លាំងយ៉ាងខ្លាំង ។
បន្ទាប់ពីក្រុមបានសម្រាកហើយ អ្នកនាំផ្លូវបាននិយាយខ្សឹបៗប្រាប់ខ្ញុំថា « លោក រិនឡាន់ ខ្ញុំគិតថា បើលោកគ្រាន់តែបន្ដចែវទូក ហើយរក្សាសន្ទុះទូកលោកឲ្យទៅមុខ នោះលោកនឹងមិនអីទេ » ។ ខ្ញុំបានធ្វើតាមដំបូន្មានគាត់ នៅពេលយើងអុំទូកទៅកាន់កោះទីពីរ រួចត្រឡប់ទៅកន្លែងដើមវិញ ។ អ្នកនាំផ្លូវបានចែវទូកមកក្បែរខ្ញុំ ហើយប្រាប់ខ្ញុំពីរដងថា ខ្ញុំធ្វើបានល្អណាស់ ។ ទោះជារលកធំជាងនេះបានបោកមកចំហៀងទូកខៃយ៉ាកខ្ញុំក៏ដោយ ក៏ខ្ញុំមិនក្រឡាប់ទូកដែរ ។
តាមរយៈការបន្ដចែវទូកខៃយ៉ាកដោយខ្ជាប់ខ្ជួន នោះខ្ញុំរក្សាសន្ទុះ ហើយចែវបន្ដឆ្ពោះទៅមុខ កាត់បន្ថយឥទ្ធិពលនៃរលកដែលបោកមកចំហៀងទូកខ្ញុំ ។ គោលការណ៍ដូចគ្នានេះអនុវត្តចំពោះជីវិតខាងវិញ្ញាណរបស់យើងផងដែរ ។ យើងងាយនឹងរងគ្រោះ នៅពេលយើងបន្ថយល្បឿន ជាពិសេសនៅពេលយើងឈប់ ។ បើយើងរក្សាសន្ទុះខាងវិញ្ញាណដោយបន្ត « ចែវទូក » ឆ្ពោះទៅរកព្រះអង្គសង្គ្រោះ នោះយើងកាន់តែមានសុវត្ថិភាព និងសន្ដិសុខ ដោយសារជីវិតដ៏អស់កល្បជានិច្ចរបស់យើងពឹងផ្អែកលើសេចក្ដីជំនឿរបស់យើងទៅលើទ្រង់ ។
សន្ទុះខាងវិញ្ញាណកើតឡើង « ពេញមួយជីវិត នៅពេលយើងឱបក្រសោបគោលលទ្ធិនៃព្រះគ្រីស្ទដ៏ខ្ជាប់ខ្ជួន » ។ ប្រធាន រ័សុល អិម ណិលសុន បានបង្រៀនថា ការធ្វើដូច្នោះបង្កើតជា « វដ្ដប្រកបដោយអានុភាព និងគុណធម៌ » ។ តាមពិត ធាតុនៃគោលលទ្ធិនៃព្រះគ្រីស្ទ—ដូចជា ជំនឿលើព្រះអម្ចាស់ព្រះយេស៊ូវគ្រីស្ទ ការប្រែចិត្ដ ការចូលទៅក្នុងទំនាក់ទំនងសេចក្ដីសញ្ញាជាមួយព្រះអម្ចាស់តាមរយៈពិធីបុណ្យជ្រមុជទឹក ការទទួលអំណោយទាននៃព្រះវិញ្ញាណបរិសុទ្ធ និងការកាន់ខ្ជាប់ដរាបដល់ចុងបំផុតពុំមែនដើម្បីឲ្យដកពិសោធន៍តែម្ដង ហើយចប់នោះទេ ។ ជាពិសេស « ការកាន់ខ្ជាប់ដរាបដល់ចុងបំផុត » វាពុំមែនជាជំហានផ្សេងមួយនៅក្នុងគោលលទ្ធិនៃព្រះគ្រីស្ទនោះទេ—ពុំមែនថាយើងបញ្ចប់ជំហានទាំងបួនដំបូងហើយ បន្ទាប់មកដេកចាំខាំធ្មេញ រង់ចាំថ្ងៃស្លាប់នោះទេ ។ អត់ទេ ការកាន់ខ្ជាប់ដរាបដល់ចុងបំផុតគឺជាការអនុវត្តធាតុផ្សេងទៀតនៃគោលលទ្ធិនៃព្រះគ្រីស្ទម្តងហើយម្តងទៀត ដដែលៗ ដែលបង្កើតបានជា « វដ្ដប្រកបដោយអានុភាព និងគុណធម៌ » ដូចដែលប្រធាន ណិលសុន បានរៀបរាប់ ។
ម្ដងហើយម្ដងទៀត មានន័យថា យើងដកពិសោធន៍ធាតុនៃគោលលទ្ធិនៃព្រះគ្រីស្ទម្ដងហើយម្ដងទៀតពេញមួយជីវិតយើង ។ ដដែលៗ មានន័យថា យើងស្ថាបនា និងកែលម្អឲ្យប្រសើរឡើងដោយធ្វើឡើងវិញដដែលៗ ។ ទោះបីជាយើងធ្វើតាមជំហានទាំងនេះឡើងវិញក្ដី ក៏យើងពុំនៅវិលជុំដោយគ្មានផ្លូវឆ្ពោះទៅមុខនោះដែរ ។ ផ្ទុយទៅវិញ យើងកាន់តែខិតទៅជិតព្រះយេស៊ូវគ្រីស្ទ រាល់ពេលយើងចូលវដ្ដនេះម្ដងៗ ។
សន្ទុះជាប់ទាក់ទងទាំងល្បឿន និងទិសដៅ ។ បើខ្ញុំចែវទូកខៃយ៉ាកយ៉ាងលឿនទៅខុសទិសដៅខ្ញុំអាចបង្កើតសន្ទុះដ៏ខ្លាំងមួយបាន ប៉ុន្តែខ្ញុំនឹងមិនទៅដល់គោលដៅដែលគ្រោងទុកនោះទេ ។ ស្រដៀងគ្នានេះដែរ នៅក្នុងជីវិត យើងត្រូវតែ « ចែវទូក » ឆ្ពោះទៅរកព្រះអង្គសង្រ្គោះដើម្បីមករកទ្រង់ ។
សេចក្ដីជំនឿរបស់យើងទៅលើព្រះយេស៊ូវគ្រីស្ទត្រូវការចិញ្ចឹមបីបាច់ជារៀងរាល់ថ្ងៃ ។ សេចក្ដីជំនឿនឹងត្រូវបានបីបាច់ នៅពេលយើងអធិស្ឋានជារៀងរាល់ថ្ងៃ សិក្សាព្រះគម្ពីរប្រចាំថ្ងៃ គិតពិចារណាពីសេចក្ដីល្អរបស់ព្រះជារៀងរាល់ថ្ងៃ ប្រែចិត្តជារៀងរាល់ថ្ងៃ ហើយធ្វើតាមការបំផុសគំនិតពីព្រះវិញ្ញាណបរិសុទ្ធជារៀងរាល់ថ្ងៃ ។ ដូចជា ការពន្យាពេលចាំទទួលទានអាហាររហូតដល់ថ្ងៃអាទិត្យ ដើម្បីទទួលទានសរុបក្នុងមួយពេលតែម្ដង វាមិនល្អសម្រាប់សុខភាពទេ ហើយវាក៏មិនល្អខាងវិញ្ញាណដែរ បើយើងដាក់កំហិតលើឥរិយាបថបីបាច់ដល់ទីបន្ទាល់របស់យើងមកត្រឹមតែមួយថ្ងៃក្នុងមួយសប្តាហ៍វិញនោះ ។
នៅពេលយើងទទួលខុសត្រូវចំពោះទីបន្ទាល់ផ្ទាល់ខ្លួនយើង នោះយើងទទួលបានសន្ទុះខាងវិញ្ញាណ ហើយបន្ដិចម្ដងៗ យើងអភិវឌ្ឍមូលដ្ឋានគ្រឹះនៃសេចក្ដីជំនឿលើព្រះយេស៊ូវគ្រីស្ទ ហើយគោលលទ្ធិនៃព្រះគ្រីស្ទក្លាយជាផ្នែកសំខាន់មួយនៃគោលបំណងក្នុងជីវិតនេះ ។ ដូចគ្នានេះដែរ នៅពេលយើងខិតខំគោរពតាមក្រឹត្យវិន័យរបស់ព្រះ ហើយប្រែចិត្ត នោះសន្ទុះនឹងកើនឡើង ។ ការប្រែចិត្តគឺពេញដោយអំណរ ហើយអនុញ្ញាតឲ្យយើងរៀនពីកំហុសរបស់យើង ដែលជារបៀបយើងរីកចម្រើនដ៏អស់កល្បជានិច្ច ។ យើងប្រាកដជានឹងមានគ្រាដែលយើងក្រឡាប់ទូកខៃយ៉ាក ហើយឃើញថាខ្លួនឯងលិចក្នុងទឹកដ៏ជ្រៅ ។ តាមរយៈការប្រែចិត្ត យើងអាចឡើងមកលើវិញបាន ហើយបន្តទៅមុខទៀត ទោះបីជាយើងបានធ្លាក់ចុះប៉ុន្មានដងក៏ដោយ ។ ផ្នែកដ៏សំខាន់គឺថា យើងមិនបោះបង់ចោលទេ ។
ធាតុបន្ទាប់នៃគោលលទ្ធិនៃព្រះគ្រីស្ទ គឺពិធីបុណ្យជ្រមុជទឹក ដែលរួមមានការជ្រមុជដោយទឹក និងតាមរយៈពិធីបញ្ជាក់ ជាការជ្រមុជដោយព្រះវិញ្ញាណបរិសុទ្ធ ។ ខណៈដែលពិធីបុណ្យជ្រមុជទឹកគឺជាព្រឹត្តិការណ៍តែម្ដង នោះយើងរំឭកសេចក្ដីសញ្ញានៃពិធីបុណ្យជ្រមុជទឹករបស់យើងម្ដងហើយម្តងទៀត នៅពេលយើងទទួលទានសាក្រាម៉ង់ ។ ពិធីសាក្រាម៉ង់មិនជំនួសឲ្យពិធីបុណ្យជ្រមុជទឹកនោះទេ តែវាភ្ជាប់ធាតុដើមនៅក្នុងគោលលទ្ធិនៃព្រះគ្រីស្ទ—សេចក្ដីជំនឿ និងការប្រែចិត្ត—ទៅនឹងការទទួលព្រះវិញ្ញាណបរិសុទ្ធ ។ នៅពេលយើងទទួលទានសាក្រាម៉ង់ដោយមានមនសិការ នោះយើងអញ្ជើញព្រះវិញ្ញាណបរិសុទ្ធឲ្យចូលមកក្នុងជីវិតយើង គឺដូចជាពេលយើងបានជ្រមុជទឹក និងបានបញ្ជាក់ដែរ ។ នៅពេលយើងរក្សាសេចក្ដីសញ្ញាដែលបានរៀបរាប់នៅក្នុងការអធិស្ឋានសាក្រាម៉ង់ នោះព្រះវិញ្ញាណបរិសុទ្ធក្លាយជាដៃគូរបស់យើង ។
នៅពេលព្រះវិញ្ញាណបរិសុទ្ធមានឥទ្ធិពលកាន់តែខ្លាំងក្នុងជីវិតយើង នោះយើងអភិវឌ្ឍគុណលក្ខណៈដូចជាព្រះគ្រីស្ទដដែលៗជាបន្តបន្ទាប់ ។ ដួងចិត្តយើងនឹងផ្លាស់ប្ដូរ ។ ធម្មជាតិរបស់យើងដែលចង់ធ្វើអំពើអាក្រក់នឹងថយចុះ ។ ទំនោរចង់ធ្វើល្អរបស់យើងនឹងកើនឡើង រហូតដល់យើងចង់ « ប្រព្រឹត្តអំពើល្អជានិច្ច » ។ ដូច្នេះយើងអាចទទួលបានអំណាចពីស្ថានសួគ៌ ដែលចាំបាច់ដើម្បីកាន់ខ្ជាប់ដរាបដល់ចុងបំផុត ។ សេចក្ដីជំនឿរបស់យើងបានកើនឡើង ហើយយើងត្រៀមខ្លួនជាស្រេចដើម្បីធ្វើតាមវដ្ដប្រកបដោយអានុភាព និងគុណធម៌នេះម្ដងហើយម្ដងទៀត ។
សន្ទុះឆ្ពោះទៅមុខខាងវិញ្ញាណ ក៏នាំយើងទៅធ្វើសេចក្ដីសញ្ញាបន្ថែមទៀតជាមួយព្រះនៅក្នុងដំណាក់របស់ព្រះអម្ចាស់ផងដែរ ។ សេចក្ដីសញ្ញាជាច្រើនទាញយើងឲ្យខិតទៅកាន់តែជិតព្រះគ្រីស្ទ ហើយភ្ជាប់យើងទៅនឹងទ្រង់កាន់តែខ្លាំង ។ តាមរយៈសេចក្ដីសញ្ញាទាំងនេះ យើងមានសិទ្ធិទទួលបានព្រះចេស្ដារបស់ទ្រង់ខ្លាំងឡើង ។ ដើម្បីឲ្យច្បាស់ សេចក្ដីសញ្ញាបុណ្យជ្រមុជទឹក និងព្រះវិហារបរិសុទ្ធ គឺពុំមែនជាប្រភពនៃអំណាចនោះទេ។ ប្រភពនៃអំណាចគឺមកពីព្រះអម្ចាស់ព្រះយេស៊ូវគ្រីស្ទ និងព្រះវរបិតាសួគ៌របស់យើង ។ ការធ្វើ និងការរក្សាសេចក្ដីសញ្ញាបង្កើតជាបណ្ដាញចរន្ដអំណាចមកក្នុងជីវិតរបស់យើង ។ នៅពេលយើងរស់នៅស្របតាមសេចក្ដីសញ្ញាទាំងនេះ នៅទីបំផុតយើងនឹងក្លាយជាអ្នកគ្រងមរតកនៃអ្វីៗទាំងអស់ដែលព្រះវរបិតាសួគ៌ទ្រង់មាន ។ សន្ទុះដែលកើតមានដោយសារការរស់នៅតាមគោលលទ្ធិនៃព្រះគ្រីស្ទ មិនត្រឹមតែមានអំណាចកែប្រែនិស្ស័យដ៏ទេវភាពរបស់យើងទៅជាជោគវាសនាដ៏អស់កល្បជានិច្ចប៉ុណ្ណោះទេ ប៉ុន្តែវាក៏ជំរុញយើងឲ្យជួយអ្នកដទៃតាមរបៀបត្រឹមត្រូវផងដែរ ។
សូមពិចារណាពីរបៀបដែលអ្នកនាំផ្លូវរូបនេះបានជួយដល់ខ្ញុំ បន្ទាប់ពីខ្ញុំបានក្រឡាប់ទូកខៃយ៉ាក ។ គាត់មិនបានស្រែកសួរពីចម្ងាយនូវសំណួរឥតប្រយោជន៍ដូចជា « លោក រិនឡាន់ តើលោកកំពុងធ្វើអ្វីក្នុងទឹកហ្នឹង ? » គាត់ពុំបានចែវទូកមកស្ដីបន្ទោសខ្ញុំថា « លោក រិនឡាន់ លោកនឹងមិនជួបរឿងចឹងទេ បើលោកមានរាងកាយមាំមួនជាងនេះនោះ » ។ គាត់មិនបានអូសទូករបស់ខ្ញុំទេ ពេលខ្ញុំកំពុងតែព្យាយាមឡើងលើទូកនោះ ។ ហើយគាត់ពុំកែតម្រូវខ្ញុំ នៅពីមុខក្រុមនោះទេ ។ ផ្ទុយទៅវិញ គាត់បានផ្តល់ជំនួយដែលខ្ញុំត្រូវការ នៅពេលខ្ញុំត្រូវការ ។ គាត់បានផ្តល់ដំបូន្មានដល់ខ្ញុំ នៅពេលខ្ញុំទទួលយក ។ ហើយគាត់ខំព្យាយាមលើកទឹកចិត្តខ្ញុំ ។
នៅពេលយើងផ្ដល់ការងារបម្រើដល់អ្នកដទៃ យើងពុំបាច់សួរសំណួរឥតប្រយោជន៍ ឬនិយាយអ្វីដែលយើងឃើញជាក់ស្ដែងនោះទេ ។ មនុស្សភាគច្រើនដែលកំពុងជួបការលំបាកដឹងថា ពួកគេកំពុងជួបការលំបាកហើយ ។ យើងមិនគួរវិនិច្ឆ័យទេ ការវិនិច្ឆ័យរបស់យើងមិនជួយ ក៏មិនស្វាគមន៍នោះដែរជាញឹកញាប់វាគឺជាព័ត៌មានមិនល្អ ។
ការប្រៀបធៀបខ្លួនឯងទៅនឹងអ្នកដទៃអាចនាំឲ្យយើងប្រព្រឹត្តកំហុសដ៏គ្រោះថ្នាក់ ជាពិសេសបើយើងសន្និដ្ឋានថា យើងសុចរិតជាងអ្នកដែលកំពុងជួបការលំបាកនោះ ។ ការប្រៀបធៀបបែបនេះប្រៀបដូចជាការលង់ទឹកទាំងអស់សង្ឃឹមនៅក្នុងទឹកជម្រៅបីម៉ែត្រ ហើយមើលនរណាម្នាក់ដែលលង់ទឹកក្នុងជម្រៅបួនម៉ែត្រ រួចវិនិច្ឆ័យគាត់ថាគាត់ជាមនុស្សមានបាបខ្លាំងជាង ហើយមានអារម្មណ៍ល្អចំពោះខ្លួនឯងដូច្នោះដែរ ។ សរុបសេចក្ដីទៅ យើងទាំងអស់គ្នាមានបញ្ហារៀងៗខ្លួន ។ គ្មានពួកយើងណាម្នាក់ទទួលបានសេចក្ដីសង្គ្រោះដោយខ្លួនឯងឡើយ ។ យើងពុំអាចធ្វើបានទេ ។ នៅក្នុងព្រះគម្ពីរមរមន យ៉ាកុបបានបង្រៀនថា « ចូរចងចាំថា បន្ទាប់ពី [ យើង ] រាល់គ្នាបានស្រុះស្រួលជាមួយនឹងព្រះហើយ នោះគឺមានតែដោយសារ និងតាមរយៈព្រះគុណរបស់ព្រះប៉ុណ្ណោះ ដែល [ យើង ] រាល់គ្នាបានសង្គ្រោះ » ។ យើងទាំងអស់គ្នាត្រូវការដង្វាយធួនដ៏និរន្ដរ៍របស់ព្រះអង្គសង្គ្រោះ ពុំមែនគ្រាន់តែជាផ្នែកមួយនៃដង្វាយធួននោះទេ ។
យើងត្រូវការយកសេចក្តីមេត្តាករុណា ចិត្តអាណិតអាសូរ និងសេចក្ដីស្រឡាញ់ទាំងអស់របស់យើងទៅជាមួយ នៅពេលយើងប្រាស្រ័យទាក់ទងជាមួយមនុស្សនៅជុំវិញយើង ។ អស់អ្នកដែលកំពុងជួបការលំបាក « ត្រូវការដកពិសោធន៍សេចក្ដីស្រឡាញ់ដ៏បរិសុទ្ធរបស់ព្រះយេស៊ូវគ្រីស្ទ ដែលឆ្លុះបញ្ចាំងតាមពាក្យសម្ដី និងសកម្មភាពរបស់ [ យើង ] » ។ កាលយើងផ្ដល់ការងារបម្រើ ជាញឹកញាប់ យើងលើកទឹកចិត្តអ្នកដទៃ ហើយផ្ដល់ជំនួយ ។ ទោះជានរណាម្នាក់មិនទទួលយកក៏ដោយ ក៏យើងនៅបន្ដផ្ដល់ការងារបម្រើ តាមដែលពួកគេអនុញ្ញាតដែរ ។ ព្រះអង្គសង្គ្រោះបានបង្រៀនថា « ដ្បិតចំពោះអ្នកនោះហើយដែលត្រូវធ្វើការងារបម្រើ ដ្បិតអ្នករាល់គ្នាពុំដឹងថា ដល់ពេលណាទេដែលអ្នកនោះនឹងត្រឡប់មកវិញ ហើយប្រែចិត្ត ហើយមករកយើងដោយអស់ពីដួងចិត្ត ហើយយើងនឹងប្រោសឲ្យគេបានជា ហើយអ្នករាល់គ្នានឹងទៅជាមធ្យោបាយក្នុងការនាំមកនូវសេចក្តីសង្គ្រោះដល់គេ » ។ កិច្ចការរបស់ព្រះអង្គសង្គ្រោះគឺដើម្បីព្យាបាល ។ កិច្ចការរបស់យើងគឺដើម្បីស្រឡាញ់—ស្រឡាញ់ និងផ្ដល់ការងារបម្រើតាមរបៀបមួយ ដែលនាំអ្នកដទៃចូលមកជិតព្រះយេស៊ូវគ្រីស្ទ ។ នេះគឺជាផលផ្លែមួយនៃវដ្តដ៏មានអានុភាព ប្រកបដោយគុណធម៌នៃគោលលទ្ធិរបស់ព្រះគ្រីស្ទ ។
ខ្ញុំសូមអញ្ជើញបងប្អូនឲ្យរស់នៅតាមគោលលទ្ធិនៃព្រះគ្រីស្ទម្ដងហើយម្ដងទៀត ដដែលៗ និងដោយមានចេតនាពិត ហើយជួយអ្នកដទៃនៅតាមផ្លូវរបស់ពួកគេ ។ ខ្ញុំសូមថ្លែងទីបន្ទាល់ថា គោលលទ្ធិនៃព្រះគ្រីស្ទគឺជាផ្នែកសំខាន់នៃផែនការរបស់ព្រះវរបិតាសួគ៌ ព្រោះនៅទីបញ្ចប់ វាគឺជាគោលលទ្ធិរបស់ទ្រង់ ។ នៅពេលយើងអនុវត្តសេចក្ដីជំនឿលើព្រះយេស៊ូវគ្រីស្ទ និងដង្វាយធួនរបស់ទ្រង់ នោះយើងនឹងត្រូវបានដឹកនាំនៅលើផ្លូវនៃសេចក្ដីសញ្ញា ហើយមានទឹកចិត្តជួយដល់អ្នកដទៃឲ្យក្លាយជាសិស្សដ៏ស្មោះត្រង់របស់ព្រះយេស៊ូវគ្រីស្ទដែរ ។ យើងអាចក្លាយជាអ្នកគ្រងមរតកនៅក្នុងនគររបស់ព្រះវរបិតាសួគ៌ ដែលជាកម្រិតខ្ពស់បំផុតក្នុងការរស់នៅដោយស្មោះត្រង់តាមគោលលទ្ធិនៃព្រះគ្រីស្ទ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕